Heydər Əliyevin xatirəsinə həsr olunmuş müsabiqə keçirilib

Azərbaycan Dillər Universitetinin fransız dili fakültəsində ümummilli lider Heydər Əliyevin anadan olmasının 86-cı ildönümünə həsr olunan “Mən nəyi bilirəm?” mövzusunda müsabiqə keçirilib.

ADU-nin mətbuat xidmətindən SİA-ya verilən xəbərə əsasən, müsabiqədə ADU-nin fransız dili fakültəsinin dekanı, filologiya elmləri namizədi Sevda Vahabova, elmi işlər və beynəlxalq əlaqələr üzrə dekan müavini Gülnarə Sadıqova, tədris işləri üzrə müavin Rəfiqə Mürşüdova, fransız dilinin nitq praktikası kafedrasının müəllimi Deni Menie və Fransız dili fakültəsinin müəllim-tələbə heyəti iştirak edib. Müsabiqənin məqsədi Fransanın sivilizasiyası, mədəniyyəti haqqında tələbələrin hansı biliklərə malik olduqlarını öyrənmək və onların gələcəkdə keçiriləcək universitetlərarası müsabiqələrdə iştiraklarını təmin etməkdir. Fransız dilinin leksikologiyası və üslubiyyatı kafedrasının və dosent Gülnarə Sadıxovanın təşkilatçılığı ilə keçirilən müsabiqədə fakültə tələbələrindən ibarət 6-Liberte (Azadlıq), Mirakl (Möcüzə), Archange (Baş mələk), Louvre (Luvr muzeyi), Anges (mələk), le Fantöme (Kabus) adlı komandalar yarışıb.

Qalib tələbələr Fransanın Azərbaycandakı səfiliyindən ADU-ya hədiyyə olunan 10 ədəd “Le Rober” izahlı lüğəti ilə mükafatlandırılıb. İntellektual yarışmanın sonunda isə Mirakl komandası qalib seçilərək Fransanın universitetə hədiyyə etdiyi “La Rober” izahlı lüğətə sahib olub.

Səs.-2009.-19 may.-S.4.