ADNA-da ulu öndərin doğum günü qeyd olunub

Dünən Azərbaycan Dövlət Neft Akademiyasında Yeni Azərbaycan Partiyası ilk təşkilatının tədbiri olub. Ulu öndər Heydər Əliyevin anadan olmasının 86-cı ildönümünə həsr olunan tədbirdə dahi siyasətçinin və 30 aprel faciə qurbanlarının xatirəsi bir dəqiqəlik sukutla yad edildi.

Universitetin ilk təşkilatının sədri Tamella Nəsibova təbdiri giriş sözü ilə açaraq bildirib ki, əslində, ildönümü ərəfəsində keçirilməsi nəzərdə tutulan bu iclasın gecikməsinə universitetdə baş verən məlum 30 aprel faciəsi səbəb olub. Buna baxmayaraq, ali təhsil ocağı öz qaynar fəaliyyətini davam etdirir. Hər il çoxlu sayda tələbə və gənclərin YAP-a üzv olması üçün müraciət etdiyini söyləyən Tamella Nəsibova belə yığıncaqların mütəmadi keçirildiyini də vurğulayıb: “Gənclərin təlim-tərbiyəsində, cəmiyyətimizin formalaşmasında  ulu öndərin həyat və fəaliyyətinin örnək olması şübhəsizdir.  Biz YAP fəalları da çalışırıq ki, ümummilli lider Heydər Əliyev irsinin öyrənilməsində, tədqiq edilməsində onlara yardımçı olaq. Ulu öndərin həyat və fəaliyyətinin öyrənilməsi, müasir Azərbaycan tarixinin öyrənilməsi və mənimsənilməsi deməkdir”.

Ulu öndərin fəaliyyətinə qısa nəzər salan Tamella Nəsibova, onu da qeyd edib ki, Azərbaycanın böyük oğlu Heydər Əliyev irsinin öyrənilməsi gənclərdə azərbaycançılıq düşüncəsinin inkişafı,  dövlətçiliyimiz və müstəqilliyimiz uğrunda çalışmaq vərdişləri aşılayır”.

İlk təşkilat sədrinin çıxışından sonra universitetin digər müəllimləri də çıxış edərək ulu öndərlə bağlı fikirlərini yığıncaq iştirakçıları ilə bölüşüblər. Tədbirin sonunda partiyaya üzv olmaq üçün ərizə verən müəllim və tələbələrin namizədliyi müzakirə olunub, üzvlüyə qəbul olunanlara isə partiya biletləri təqdim edilib.

KÜBRA ƏLİYARLI

Səs.- 2009.- 16 may.- S. 4.