Elmi-praktik konfrans

Üzeyir Hacıbəyli adına Bakı Musiqi Akademiyasının Caz Mərkəzində Azərbaycanın tanınmış bəstəkarları, xalq artisti, SSRİ dövlət mükafatı laureatı, professor Soltan Hacıbəyovun 90 və əməkdar incəsənət xadimi, professor İsmayıl Hacıbəyovun 60 illiyinə həsr edilmiş elmi-praktik konfrans keçirildi.

Tədbiri giriş sözü ilə akademiyanın rektoru, professor Fərhad Bədəlbəyli açaraq Azərbaycan musiqisinin inkişafında mərhum bəstəkarların xidmətlərindən, onların yaradıcılığının bəzi məqamlarından danışdı.

Musiqişünasların, eləcə də, sənətkarın yaxınlarının iştirakı ilə keçirilən tədbirdə akademiyanın musiqi tarixi kafedrasının müdiri, professor Ülviyyə İmanovanın “Soltan Hacıbəyov müəllim kimi”, əməkdar incəsənət xadimi, professor Gülnaz Abdullazadənin “Soltan və İsmayıl Hacıbəyovlar Hacıbəyov nəslinin davamçıları kimi”, sənətşünaslıq namizədi, professor Aida Tağızadənin “Azərbaycan simfoniyasına Soltan Hacıbəyovun töhfəsi” mövzusunda məruzələri dinlənildi.

Məruzələrdə, xalq artisti, görkəmli bəstəkar Arif Məlikovun və b-nın çıxışlarında Soltan və İsmayıl Hacıbəyovların çoxşaxəli yaradıcılığından, onların özünəməxsusluğundan ətraflı söz açıldı.

Zümrüd

Səs.- 2009.- 27 may.- S. 12.