Təhsilin inkişafı dövlətin diqqət mərkəzindədir

Vilayət Əliyev: “Prezident İlham Əliyev ölkə təhsilinin inkişafını diqqət mərkəzində saxlayır”

Müsahibimiz YAP Siyasi Şurasının üzvü, professor Vilayət Əliyevdir

- Azərbaycan təhsilinin inkişafına dövlətin diqqət və qayğısını necə qiymətləndirirsiniz?

- Azərbaycan təhsili bütün dövrlərdə dövlətin qayğısını hiss edib. Xüsusilə, ölkəmiz milli müstəqillik əldə etdikdən sonra ulu öndərimiz Heydər Əliyevin dönəmində, digər sahələrə olduğu kimi, təhsil sahəsinə də xüsusi diqqət yetirilmişdir. Təhsilimizin dünya təhsil sisteminə inteqrasiyası üçün lazımi göstərişlər verilmiş və lazımi şərait yaradılmışıdır. Azərbaycan təhsilinin inkişafını mən müsbət qiymətləndirirəm. Bəziləri müxtəlif fikirlər səsləndirirlər ki, bu gün təhsilin və müəllimlərin bilik səviyyəsi aşağıdır. Amma qeyd edərdim ki, bunlar hamısı bəhanədir. Nəzər yetirdikdə, görürük ki, ölkəmizin təhsili MDB məkanında ən irəlidə gedən təhsil sistemidir. Bu gün dünya miqyasında Azərbaycan milli təhsilinin yetirdiyi kadrlar öz potensialına görə, öndə gedir. Dövlətimizin təhsilə olan diqqətindən danışırıqsa, o zaman gərək biz təhsil sahəsinə ayrılan vəsaitə diqqət yetirək. Bu gün Azərbaycan təhsilinə ayrılan vəsaitin miqdarı hərbi sahədən sonra ikinci yeri tutur. Bildiyimiz kimi, Heydər Əliyev Fondu var və ona ləyaqətlə rəhbərlik edən YUNESKO və İSESKO-nun xoşməramlı səfiri Mehriban xanım Əliyeva şəxs var. Prezidentin siyasəti ilə Heydər Əliyev Fondunun apardığı uğurli iş arasında fərq yoxdur. Həm ölkə rəhbərliyi, həm də ümummilli liderimizin adını daşıyan bu fond təhsilimizin çiçəklənməsinə kömək edir. Bunun bariz nümunəsi üçün onlarla orta məktəbin tikilib, istifadəyə verilməsini qeyd edə bilərik. Bütün məktəblərimiz kompüterləşdirilib, müasir standartlara uyğunlaşdırılıb.

Bir neçə gün öncə, Bakı Dövlət Unversitetinin 90 illik yubileyi qeyd olundu. Dünyanın müxtəlif ölkələrindən nüfuzlu, yüksək səviyyəli alimlər, unversitet rektorları gəlmişdilər. Onlar çıxışlarında bizim təhsilimizə yüksək qiymət verdilər. Bundan əlavə, xaricə təhsil almağa gedən ölkə gəncləri orada yüksək bilik, təcrübə qazanaraq, ölkəmizə qayıdırlar. Əgər bu gün Azərbaycan təhsilinin uğurlarından danışırıqsa, Baloniya sistemi ilə bağlı olaraq, tələbələrimiz istənilən vaxt xarici ölkələrdə təhsil ala bilərlər. Ölkə unversitetlərində əcnəbi dilləri öyrənənlərin sayı nə qədər çox olursa, bir o qədər də xaricdə təhsilini davam etdirə bilərlər.

- Yeni təhsil qanunu Azərbaycanda təhsilin inkişafına nə kimi yeniliklər gətirəcək?

- Bildiyiniz kimi, respublikamızın təhsil qanunu öz təsdiqini tapdı. Bu qanunun təsdiq olunması mübahisə olan məsələlərə son qoydu. Bu, bizə imkan verir ki, tələb olunan qanun çərçivəsində həm təhsilimiz daha da uğurla həyata keçiriləcək, həm də elmi kadrların yetişdirilməsində mübahisəli məsələlərə son qoyulacaq. Bütün bu uğurlara görə, ulu öndər Heydər Əliyev siyasətini layiqincə davam etdirən cəsarətli Prezidentimiz İlham Əliyevə minnətdaram. O, bütün sahələrə öz diqqətini ayırır. Yəni ölkəmiz hər sahədə uğurlar, nailiyyətlər əldə etməkdədir. Həmçinin, Prezident İlham Əliyev cənabları ölkə təhsilinin inkişafını diqqət mərkəzində saxlayır. Heç şübhəsiz ki, bütün bu uğurlar davamlı olacaq.

- Təhsil qanununda beynəlxalq təhsil sistemi ilə ziddiyyət təşkil edən məqamların olduğu bildirilir. Bu, nə qədər məntiqə uyğundur?

- Biz bu sistemə yenicə keçən dövlətlərdən biriyik. Bəziləri düşünür ki, bütün məsələlər tezliklə həll edilməlidir. Biz uzun illər sovet təhsil sistemi ilə getmişik. O dövrdə kadrların hazırlanmasının başqa prinsipləri var. Yeni təhsil qanununa görə, aspirantura ləğv edilib. Əslində, bu, formal bir şeydir. Çünki aspirnaturanı dokturantura əvəz etdi. Bundan başqa, elmələr namizədi fəlsəfə doktoru ilə əvəz olundu. Yəni 3 pillə mövcuddur-bakalavr pilləsi, magisturatura, dokturantura pilləsi. Sovet təhsilini alan mənim kimi alimlər aspirantura və ondan sonra dokturantura yolunu seçmişik. Yəni elmlər namizədi alim kimi formalaşırdı. İndi mən deyə bilmərəm ki, dokturanturanın birinci mərhələsini keçən şəxs hansı səviyyədə formalaşacaq. Ancaq mən əminəm ki, istər AMEA sistemində olsun, istərsə də, unversitet sistemində olsun bu məsələlər nəzarətsiz qalmayacaq. Bir halda ki, biz Avropaya inteqrasiya edirik və diplomlarımızın xaricdə də tanınmasını istəyiriksə, həmin tələblərə uyğun da hərəkət etməliyik.

- Ümumiyyətlə, təhsil qanununda aspirantura pilləsinin ləğv edilməsi elmi dərəcə almaq istəyində olan mütəxəssislərin maraqlarına nə kimi cavab verir?

- Əslində, yeni təhsil qanunu elmi dərəcə almaq istəyən mütəxəssislərə müsbət təsir göstərəcək. Çünki bizim zamanımızda elmlər namizədi elmi dərəcəsi aldıqdan xeyli vaxt sonra, elmlər doktoru elmi dərəcəsi alırdıq. Lakin indiki mütəxəssislər belə problemlərlə üzləşməyəcək. Bu da, onlar üçün müsbət haldır. Bundan əlavə, Ali Attestasiya Komissiyası tərəfindən mütəxəssislər qarşısında müxtəlif şərtlər qoyulub ki, bütün bunlar da, bütövlükdə, təhsilimizin, elmimizin inkişafına yönələn addımlardır.

ANAR MƏCİDZADƏ

Səs.- 2009.- 5 noyabr.- S. 7.