YAP cəmiyyətin yenilikçi, müasirləşməyə meyilli qüvvələrini öz ətrafında birləşdirib

Yeni Azərbaycan Partiyası Siyasi Şurasının üzvü, Milli Məclisin Aqrar siyasət komitəsinin sədri Eldar İbrahimovun yap.org.az-a müsahibəsi

- Eldar müəllim, bildiyimiz kimi, 1992-ci ilin 21 noyabr gününün Azərbaycan tarixində müstəsna yeri və rolu var. İlk olaraq, istərdik, məhz bu tarix haqqında məlumat verəsiniz.

- İllər keçəcək, bu tarix heç vaxt unudulmayacaq. Təkcə ona görə yox ki, 21 noyabrda nəinki Azərbaycanın, həmçinin, regionun ən böyük partiyası təsis olunub. Həm də ona görə ki, bu tarix xalqımızın böyük oğlu, Ulu öndər Heydər Əliyevin adı ilə birbaşa bağlıdır. Bilirsiniz ki, 1992-ci ilin noyabrının 21-də Naxçıvanda keçirilən yığıncağında Yeni Azərbaycan Partiyası təsis edildi və Ulu öndərimiz Heydər Əliyev partiyanın Sədri seçildi. Bu seçim də təsadüfi bir seçim deyildi. Bilirsiniz ki, həmin dövrlər Azərbaycanda çox mürəkkəb hadisələr cərəyan edirdi və dövlətimizin gələcəyi sual altında idi. Hakimiyyət başında olan səriştəsiz, dövlət idarəçiliyində bacarığı olmayan, avantürist siyasətçilər ölkəyə rəhbərlik edə bilmir, nəzarəti əllərinə götürməkdə acizlik göstərdilər. Buna paralel olaraq, iqtisadiyyat tamamilə çökmüş, əhalinin rifah halı getdikcə pisləşmiş, siyasi gərginlik artmışdı. Eyni zamanda, xarici qüvvələrin havadarlıq etdiyi daxili qüvvələr müstəqilliyimizə son qoymaq üçün əllərindən gələni edirdi. Dağlıq Qarabağdan gələn pis xəbərlər onsuz da pis olan əhval-ruhiyyəni daha da korlayırdı, ermənilər fəallaşır, hər ay bir rayonumuzu işğal edirdi. O dövrü yaşayanlar, yəqin ki, xatırlamaqda çətinlik çəkməzlər. Məhz belə bir məqamda hamının vahid düşüncəsi ondan ibarət idi ki, Azərbaycanda hadisələrin bu cür inkişafının, ölkəmizin məhv olmasının qarşısını yalnız bir nəfər - zəngin dövlətçilik təcrübəsinə malik, xalqını, millətini, dövlətini sevən böyük şəxsiyyət Heydər Əliyev ola bilər.

- Niyə məhz Ulu öndər Heydər Əliyev? Sizcə, xalqımızın bu inamını şərtləndirən amillər nədən ibarət idi?

- Bu inam da təsadüfən yaranmamışdır. Xalqımız Ulu öndərin gördüyü işləri, Onun xalqımıza olan sevgisini unutmamışdır. Eyni zamanda, dahi rəhbərin qısa müddət ərzində Naxçıvanda atdığı addımlar, muxtar respublikanın inkişafı, erməni işğalçılarına qarşı göstərdiyi mübarizə Azərbaycanda da diqqətlə izlənilir, cəmiyyət bu işlərin başında dayanan şəxsin Heydər Əliyev olduğunu anlayırdı. Partiyamızın yaranması və ümummilli lider Heydər Əliyevin YAP-ın Sədri seçilməsi təşəbbüsü ilə çıxış edənlər də məhz xalqımızın bu istəyini, arzusunu nəzərə almışdılar.

Fərəhverici haldır ki, Yeni Azərbaycan Partiyası yarandığı vaxtdan etibarən Azərbaycan Respublikasının dövlət müstəqilliyinin möhkəmləndirilməsi, demokratik, hüquqi, dünyəvi dövlətin formalaşdırılması, milli maraqlarımıza uyğun olaraq Dağlıq Qarabağ probleminin həlli, ölkə əhalisinin dinc və firavan həyat şəraitində yaşamasını təmin etmək kimi mühüm tarixi vəzifələri özünün ali proqramı müəyyən etmiş və bu istiqamətdə əsaslı işlər həyata keçirmişdir. Partiyamız qarşısına qoyduğu bu vəzifələrin həllinə nail olmaq məqsədilə öz fəaliyyətində müstəqil dövlətçilik, qanunçuluq, azərbaycançılıq, vətənçilik, varislik, yaradıcı təkamül, konstruktiv əməkdaşlıq, vətəndaş həmrəyliyi və sosial ədalət prinsiplərinə əsaslanmışdır.

- Partiyanın təsis edilməsi ölkə həyatında hansı dəyişikliklərə gətirib çıxardı?

- YAP-ın təsis edilməsi, hər şeydən əvvəl, Azərbaycanın hər yerində Heydər Əliyevi sevənlərin təşkilatlanmasına şərait yaratdı. Naxçıvanda keçirilən təsis konfransından sonra Azərbaycanın digər rayonlarında da YAP-ın rayon təşkilatları yaradıldı. Yerli təşkilatlar ictimaiyyət arasında fəal ideoloji iş aparır, ümumi maraqlar naminə, ölkəmizin gələcəyi naminə qüvvələr birliyi yaratmağa çağırırdı və buna nail olundu. Bilirsiniz ki, partiyanın yaranmasından cəmi bir neçə ay sonra ölkə tarixinə Qurtuluş Günü kimi həkk olunmuş hadisə yaşandı. Mən bunu təsadüfən qeyd etmədim. YAP-ın təsis olunması, partiyanın qısa zaman kəsimində gördüyü işlər Qurtuluş tarixinə gedən yolda çox böyük əhəmiyyət kəsb etmişdir.

Bunun nəticəsində də YAP gündən - günə böyüdü, inkişaf etdi. Bundan sonra isə artıq cəmiyyətin hazırlanması, partiya ideyaları xalqımızı səfərbər etdi və xalqımızın təkidli tələbi ilə Heydər Əliyev Azərbaycanda ikinci dəfə hakimiyyətə gəldi. Bu qayıdış Azərbaycan dövlətçiliyini xilas etdi, gələcəyimizi təhlükələrdən, qaranlıqlardan qorudu, həqiqi müstəqilliyimizi özümüzə qaytardı. Bu, həm də Yeni Azərbaycan Partiyasının hakimiyyətə gəlməsi demək idi. Heydər Əliyevin hakimiyyətə tarixi Qayıdışından sonra ölkədəki AXC-Müsavat cütlüyündən miras qalmış xaos və anarxiya, Azərbaycanın dünya xəritəsindən silinməsi xülyası qısa zamanda aradan qaldırıldı. Bir sözlə, Ulu öndərin Naxçıvanda başladığı Milli Qurtuluş savaşının əsil zəfər yürüşü başlandı. Tezliklə separatçıların respublikanı parçalamaq kimi məkrli niyyətlərinə layiqli cavablar verildi. Ordu quruculuğu sahəsində mühüm işlər görüldü. Cəbhədə atəşkəs elan olundu. Dövlət çevrilişi cəhdlərinin və terror aktlarının qarşısı alındı.

- Bəs niyə bəziləri buna görə narahat olurdu? Onlar hakimiyyətlərinin sonunun yaxınlaşdıqlarını gördükləri üçünmü YAP-ın yaranmasına qarşı müqavimət göstərirdilər?

- Bunu heç kəs inkar edə bilməz ki, AXC - Müsavat hakimiyyəti Heydər Əliyevin nüfuzunun artmasından qorxurdu. Ona görə də o zamankı hakimiyyətin silahlı qüvvələri 1992-ci il oktyabrın 24-də Naxçıvanda çevriliş etməyə, Heydər Əliyevi tutduğu vəzifədən devirməyə cəhd göstərdilər. Eyni zamanda, xalqın Heydər Əliyevin ətrafında birləşməsinin qarşısını almaq üçün YAP-ın təsis olunmasına qarşı əməlli - başlı iş aparırdılar. Ona görə də, konfransın Bakıda keçirilməsi mümkün olmadı. Mənim yadımdadır ki, hətta partiyanın təsis konfransına Bakıdan gedən insanların əksəriyyətinin qarşısı kəsilmiş, onlar aeroportdan geri qaytarılmışdılar. Gedən qonaqlar isə Naxçıvanda təhqir olunub aeroportdan geri qaytarılırdı. Lakin xalq öz böyük oğlunu müdafiə etdi, Onunla birlikdə olduğunu bir daha sübuta yetirdi. İlk dövlət çevrilişinə cəhdin qarşısı alındı. Bu, artıq Heydər Əliyev - xalq birliyinin sarsılmaz olduğunun əyani sübutu idi. Bu birlik Heydər Əliyevi Bakıya gətirdi. Naxçıvanda Heydər Əliyevə verilən dəstək Bakıda daha da artaraq davam etdi. Bu dəstək ölkəmizi xilas etdi, Azərbaycanın gələcəyini xilas etdi. Azərbaycan xalqının iradəsinə qarşı çıxanlara isə ən gözəl cavabı isə yenə Azərbaycan xalqı özü verdi. Bu gün həmin qüvvələrin harada olduğunu, nə işlə məşğul olduğunu hamı bilir.

- Yeni Azərbaycan Partiyası adının seçilməsini necə izah edərdiniz? Partiyanın bu cür adlanmasının səbəb nə idi?

- Partiyanın adı ilə əlaqədar müxtəlif təkliflər irəli sürülmüşdü. O vaxt Ulu öndər Heydər Əliyev bütün təşəbbüsləri dinlədikdən sonra təklif etdi ki, partiyanın adı Yeni Azərbaycan Partiyası olsun. O, fikrini belə əsaslandırdı ki, bu partiya yenilikçi bir təşkilat olsun, köhnə stereotiplərin dağıdılmasına xalqımıza yardımçı olsun, Azərbaycanda yeniləşmə, yenidənqurma işlərində öncüllük etsin. Yenilikçilik bu gün YAP-ın əsas fəaliyyət prioritetlərindəndir. YAP cəmiyyətin yenilikçi, müasirləşməyə meyilli qüvvələri öz ətrafında birləşdirib.

- Eldar müəllim, sirr deyil ki, Yeni Azərbaycan Partiyası bugünümüzə gələnə qədər çox məşəqqətli hadisələr yaşayıb.

- Siz düz deyirsiniz. YAP bu günə qədər çox böyük sınaqlardan uğurla çıxmışdır. Hətta müxtəlif dövrlərdə partiya daxilində ciddi narazılıqlar da olmuşdur. Mən ad çəkmək istəmirəm, amma bu, bir həqiqətdir ki, 1994-95-ci illərdə partiyanın İdarə Heyətinin üzvləri arasında narazılıqlar yaranmışdı. Hətta belə təkliflər irəli sürülürdü ki, partiya ləğv olunsun. Başqa bir qism adamlar partiyanı Heydər Əliyevin adından çıxarıb öz adlarına keçirmək istəyirdilər. Ulu öndər Heydər Əliyev də qurultayların birində bu hadisələri nəzərə alaraq demişdir ki, müvəqqəti olaraq partiyanı özü bu təlatümlərin içərisinə buraxıb ki, görsün ki, YAP bu burulğanlardan necə çıxacaq. İşlər yolunda getməyəndə isə ümummilli lider yenidən olayları nəzarətə aldı və təlatümlərdən partiyamızı xilas etdi. Sonrakı illərdə isə partiyanın daha yüksək səviyyədə inkişafı, idarə olunması üçün Ulu öndərin təşəbbüsü ilə İcra Katibliyi yaradıldı. Yeri gəlmişkən, mən İcra Katibliyinin fəaliyyətini yüksək qiymətləndirirəm. Ulu öndərdən sonra isə Prezident İlham Əliyev YAP-ın Sədri seçildi və Onun rəhbərliyi ilə partiyamız daha da inkişaf etdi, gücləndi. Bu da təsadüfi deyil.

- Yeri gəlmişkən, Prezident İlham Əliyevin rəhbərliyi altında partiyanın fəaliyyətini necə qiymətləndirirsiniz?

- İlham Əliyevin partiyaya Sədrlik etməsindən sonra YAP-da partiya quruculuğu işləri getditkcə genişləndi. Cənab Prezidentin yorulmaz fəaliyyəti bütün vətəndaşlarımızın partiya sıralarında daha sıx birləşməsini şərtləndirdi. Bu gün artıq YAP 500 min nəfərə yaxın üzvü öz ətrafında birləşdirir və regionun ən güclü siyasi təşkilatıdır. Eyni zamanda, YAP hazırda dünyanın əksər ölkələrinin partiyaları ilə sıx əməkdaşlıq qurub və bununla da beynəlxalq əlaqələrini genişləndirməkdir. Əlbəttə, bu, sədrimiz İlham Əliyevin rəhbərliyi altında YAP-ın uğuru kimi qiymətləndirilməlidir.

- Bu uğurlar fonunda YAP-ın dekabrın 23-də keçiriləcək bələdiyyə seçkilərində şansını necə qiymətləndirirsiniz?

- YAP 4 prezident, 3 parlament və 2 bələdiyyə seçkilərində iştirak edib və bütün bu sınaqlardan üzüağ çıxmışdır. Bu isə, onu göstərir ki, YAP-ın zəngin seçki təcrübəsi formalaşmışdır. Hər qələbə özlüyündə yeni qələbə kökləyir. YAP da bələdiyyə seçkilərinə məhz bu əhval-ruhiyyədə hazırlaşır. Yüksək hazırlığı, gördüyü işlər, tətbiqi etdiyi seçki texnologiyaları və ən əsası, xalq sevgisi bu seçilərdə də YAP-ın qələbə qazanacağını deməyə əsas verir.

Səs.- 2009.- 14 noyabr.- S. 4.