Beynəlxalq Musiqi Festivalı

M.Maqomayev adına Azərbaycan Dövlət Filarmoniyasında simfonik musiqi konserti ilə başlanmış Beynəlxalq Musiqi Festivalı ölkəmizin mədəni həyatında bu əlamətdar hadisəyə həsr edilib.

Konsertdən əvvəl Azərbaycan Bəstəkarlar İttifaqının sədri, əməkdar incəsənət xadimi, respublikanın xalq artisti, YUNESKO-nun təsis etdiyi “Dünya artisti” fəxri adına layiq görülmüş bəstəkar Firəngiz Əlizadə yubiley gecəsinə toplaşanlar qarşısında çıxış etmişdir. Sonra mədəniyyət və turizm naziri Əbülfəs Qarayev tədbir iştirakçılarını salamladı. O, dünyaya neçə-neçə böyük musiqiçilər bəxş etmiş bu yaradıcılıq birliyinin tarixinə qısaca nəzər salmış və xalqımızın ümummilli lideri Heydər Əliyevin ənənələrini davam etdirərək, milli mədəniyyətin inkişafına böyük qayğı göstərən Azərbaycan Prezidenti İlham Əliyevə təşəkkürünü bildirdi.

Konsertin əvvəlində istedadlı gənc dirijor, beynəlxalq müsabiqələr laureatı Əyyub Quliyevin idarə etdiyi Üzeyir Hacıbəyli adına Azərbaycan Dövlət Simfonik Orkestrinin ifasında ölməz “Koroğlu” operasının uvertürası səslənmiş, sonra respublikanın xalq artisti, bəstəkar Aqşin Əlizadənin violonçel və simfonik orkestr üçün “Poema”sının əzəmətli sədaları salona toplaşanların ruhuna hakim kəsilmişdir. Violonçeldə solo partiyasını Azərbaycanın əməkdar artisti Əyyub Əliyev ifa etdi. Konsertin birinci bölməsi Azərbaycanın xalq artisti, bədii rəhbər Gülbacı İmanovanın idarə etdiyi Dövlət Xor Kapellasının, Azərbaycanın xalq artisti, professor Ramiz Quliyevin və qiraət ustası Azad Şükürovun ifasında Oqtay Rəcəbovun xor və simfonik orkestr üçün yazdığı, Qarabağ müharibəsinin qəhrəmanı, jurnalist Çingiz Mustafayevin nurlu xatirəsinə həsr edilmiş “Çingiz” oratoriyası ilə başa çatdı.

Azərbaycan Bəstəkarlar İttifaqının 75 illiyinə həsr edilmiş Beynəlxalq Musiqi Festivalının başlanmasından xəbər verən konsertin ikinci hissəsi də böyük marağa səbəb oldu. Əməkdar incəsənət xadimi Sevda İbrahimovanın fortepiano və orkestr üçün “4 nömrəli konserti” (fortepianoda solo partiyasını Azərbaycanın əməkdar artisti, pianoçuların bir sıra beynəlxalq müsabiqələrinin laureatı Murad Adıgözəlzadə ifa edirdi), habelə, Rüfət Ramazanovun “Qara Qarayevə ithaf” əsəri musiqi sərraflarının gurultulu alqışlarına layiq görüldü.

Həmin axşam səslənmiş əsərlərdən biri - Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı, ölkəmizin birinci xanımı Mehriban Əliyevaya həsr edilmiş “Dünyanın qızılgülü” muğam-simfonik misteriyası barədə ayrıca danışmaq vacibdir. Bu əsərin müəllifi hazırda Kanadada yaşayan həmvətənimiz, Torontoda və Vaşinqtonda “İpək yolu” kamera orkestrlərinin bədii rəhbəri, Azərbaycanın əməkdar incəsənət xadimi İsmayıl Hacıyevdir. Tanınmış şair və yazıçı Şərəf Cəlilinin sözlərinə bəstələnmiş “Misteriya” respublikanın xalq artisti Əminə Yusifqızının ifasında melodik deklamasiyadan başlandı.

Bu əsərin dinləyicilərə təqdim olunmasında professor Ramiz Quliyev (tar), İkinci Respublika Muğam Müsabiqəsinin laureatı Güllü Muradova (xanəndə) və Mərkəz Əliyevdən (kamança) ibarət trio və respublikanın əməkdar artisti Yeganə Axundova (solo royal) da iştirak edib.

Konsert proqramı zəmanəmizin böyük bəstəkarı Qara Qarayevin “Yeddi gözəl” baletindən təntənəli “Zəfər” melodiyası ilə başa çatdı.

Qeyd edək ki, konsertdə səslənən, dinləyicilərə yüksək zövq verən əsərlər Bakıda ilk dəfə ifa edildi.

Zümrüd

Səs.- 2009.- 14 noyabr.- S. 12.