“Bakı - İslam Mədəniyyətinin Paytaxtı - 2009” mədəniyyət ili

Bu yaxınlarda paytaxtımızda keçirilən tədbirlər Azərbaycan milli-mənəvi dəyərlərinin, mədəniyyətinin dünya miqyasında tanınmasında, onun dünya mədəniyyət tarixində xüsusi yeri olmasını bir daha təsdiqlədi. Qısa bir zamanda Azərbaycan mədəniyyətinin dünyaya belə ayaq açması onun zəngin və dünya bəşəriyyətinə töhfələr verə biləcək bir irs olduğunu göstərən faktordur.

İslam Konfransı Təşkilatına üzv olan dövlətlərin konfransının, mədəniyyət nazirlərinin İclasının təşkili, eləcə də aşıq sənətinin dünyanın şah əsərləri sırasına daxil edilməsi Azərbaycan mədəni həyatının yadda qalan bir tarixinə çevrildi. Azərbaycan, öz növbəsində, paytaxtımızda islam ölkələrinin, dünya ölkələrində isə Azərbaycan Mədəniyyət Günlərinin təşkili beynəlxalq səviyyədə mədəniyyət aləmində bir sıçrayış kimi qəbul olundu. Bütün bunlar və digər tədbirlərin hər biri “Bakı İslam Mədəniyyətinin Paytaxtı - 2009” çərçivəsində baş tutdu və bu gün də davam etməkdədir. Bir daha təsdiqləndi ki, Azərbaycanın islam mədəniyyətinin tarixində özünəməxsus yeri vardır. Milli və müasir sivilizasiyaların qovuşuğunda yerləşən bu diyar islam mədəniyyətinə əvəzsiz töhfələr vermişdir.

Bakı şəhərinin 2009-cu il üçün “İslam Mədəniyyətinin Paytaxtı” elan olunması və 100-dən artıq milli və beynəlxalq miqyaslı tədbirin keçirilməsi İSESKO, İRSİKA, Avropa Şurası, TÜRKSOY və digər təşkilatlardan 200-dən çox nümayəndə heyətinin şəhərimizi qonağı olması qarşıda duran işlərin daha da geniş miqyas almasına gətirib çıxaracaq.

Bakıda bu tədbirlərin keçirilməsi mədəniyyətlərin qovuşuğunda yerləşən Azərbaycanın sivilizasiyalararası dialoqa böyük töhfələr verəcəyinə əsasdır. İKT-yə üzv ölkələrin mədəniyyət istiqamətində əlaqələrinin daha da dərinləşməsi üçün bir neçə proqram hazırlanmışdır. Bu konfrans, eyni zamanda, turizm sahəsində də əməkdaşlığın genişləndirilməsinə bir körpüdür. Mədəniyyət, mədəniyyətlərarası dialoq, mədəni turizm, incəsənət, mədəni irs və digər sahələrdə regional və beynəlxalq layihələrin həyata keçirilməsinə təşəbbüs göstərməli və bu sahələrdə olan problemlərimizin həlli istiqamətində konkret addımlar atılmalıdır. Bakının 2009-cu ildə İslam Mədəniyyətinin Paytaxtı elan edilməsi çərçivəsində burada keçirilən İslam Konfransı Təşkilatına üzv dövlətlərin mədəniyyət nazirlərinin konfransında konfransa üzv dövlətlərin nümayəndə heyətlərinin bəyanatları və onların islam dünyası üçün mədəni strategiyasının tətbiqi sahəsində səyləri barədə fikirləri dinlənilmişdir. Burada qəbul olunan sənədlər anlaşma və dialoq üçün mühüm rol oynayacaqdır.

“Mədəniyyət və kommunikasiya sahəsində İSESKO-nun fəaliyyəti”, “Dialoq və mədəni müxtəliflik və islama və müsəlmanlara KİV tərəfindən ləkə yaxma kampaniyalarının təkzib edilməsi” barədə qətnamə layihələri qəbul edilmişdir.

“Bakı - İslam Mədəniyyətinin Paytaxtı - 2009” mədəniyyət ili çərçivəsində keçirilən tədbirlər islam ölkələrinin həmrəyliyinə töhfə verməkdədir. Bu İSESKO ilə Azərbaycan arasında əlaqələrin yüksək səviyyədə olduğundan xəbər verir. 2015-ci ildən 2024-cü ilədək islam mədəniyyətinin paytaxt şəhərlərinin müəyyənləşdirilməsi üçün verilən təkliflər, ən əhəmiyyətli məsələ isə Naxçıvan şəhərinin 2018-ci ildə İslam Mədəniyyətinin Paytaxtı seçilməsi ilə yadda qaldı. Bu, Azərbaycan üçün əhəmiyyətli bir hadisədir.

Bu görüşlərdə, hətta Ermənistanın işğalı nəticəsində Azərbaycan abidələrinin dağıdılması ətrafında fikirlər də müzakirə olunmuşdur. Azərbaycan dövlətinin islam mədəniyyətinə aid abidələrin, tarixi irs nümunələrinin qorunması və mühafizəsi istiqamətində ən yüksək səviyyədə tədbirlər keçirildiyi halda, təəssüflər olsun ki, Ermənistanın işğalı altında olan ərazilərimizdə mədəniyyət ocaqları, dini abidələr, məscidlər dağıdılmışdır. Dağlıq Qarabağdakı abidələrin dağıdılmasının araşdırılması ilə bağlı İSESKO-da xüsusi komitə yaradılması qərara alınmışdır. Eyni zamanda, İslam Ölkələri Mədəniyyət Nazirlərinin 7-ci Konfransının 2011-ci ilin oktyabr ayında Əlcəzairin Klemsan şəhərində keçirilməsi qərara alınmışdır.

Hazırda Azərbaycan böyük inkişaf yolunu yaşayır. Azərbaycan dövləti öz imkanlarından istifadə edərək, başqa istiqamətlərdə olduğu kimi, mədəniyyət sahəsində islahatlar, proqramlar həyata keçirməkdədir. Ölkəmizin bütün mədəniyyət müəssisələrində yenidənqurma və bərpa işləri aparılır, onlar ən müasir texnologiyalarla təmin edilir. Bu istiqamətdə həm Avropa, həm də islam ölkələrinin mütərəqqi təcrübəsindən istifadə olunur. Bu istiqamətdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın xidməti xüsusidir.

Keçirilən beynəlxalq səviyyəli tədbirlər əməkdaşlığın genişləndirilməsinə müsbət təsir göstərəcəkdir. İrəli sürülən müxtəlif təkliflər, mövcud problemlər və onların həlli yollarında aparılan danışıqlar mədəniyyətlərarası dialoqun təşviqinə töhfəsini verəcəkdir.

2011-ci ildə Azərbaycanda “Ümumdünya mədəniyyətlərarası dialoq forumu” təşkil ediləcəkdir. Bu forum Azərbaycan Prezidenti İlham Əliyevin təşəbbüsü ilə reallaşacaqdır. Bu da Azərbaycanın mədəni əlaqələrinin dünya irsinə bir töhfəsi olacaq.

Zümrüd

Səs.- 2009.- 17 noyabr.- S. 12.