YAP- 17 il dövlətçilik uğrunda

Yeni Azərbaycan Partiyası ulu öndər Heydər Əliyev tərəfindən xalqı bəlalardan xilas etmək məqsədilə yaradıldı

(Əvvəli ötən sayda)

Məlum olduğu kimi, noyabrın 21-i Yeni Azərbaycan Partiyasının təsis olunması günüdür. Düz 17 il öncə, Azərbaycanda yaranmış ağır durum yeni bir siyasi təşkilatın- YAP-ın yaranma zərurətini meydana gətirdi. Ulu öndər Heydər Əliyevin yaratdığı partiya ötən zamanda ölkəni bəlalardan qurtardı və inkişaf yoluna doğru istiqamətləndirdi. Bu yazıda Yeni Azərbaycan Partiyasının 17-ci ildönümü ilə bağlı hakim partiyanın keçdiyi şərəfli tarixi yola nəzər salmağa çalışacağıq. Yeni Azərbaycan Partiyası yarandığı zaman mövcud olan tarixi şərait, ölkədəki ictimai-siyasi durum, müasir dövrdə partiyanın fəaliyyəti cəmiyyətdə əsas müzakirə mövzusu olub. Beləliklə, ilk öncə, bir suala aydınlıq gətirmək lazımdır. Yeni Azərbaycan Partiyası hansı tarixi zərurətdən yarandı? Bu suala partiyanın veteranlarının verdiyi cavabların daha doğru olacağı qənaətindəyik.

“YAP ümummilli liderin parlaq ideyalarının daşıyıcısı kimi cəmiyyətdə öz aparıcı rolunu günü-gündən möhkəmləndirir”

YAP Siyasi Şurasının üzvü, Milli Məclisin vitse-spikeri Ziyafət Əsgərov:

- YAP-ın yaranmasından 17 il keçir. Bu müddətdə ölkəmizdə çox böyük dəyişikliklər olub. Lakin bunlar özü-özünə baş verməyib. Bu müddətdə Azərbaycanın böyük dəyişikliyə məruz qalması ulu öndər Heydər Əliyev və onun yaratdığı Yeni Azərbaycan Partiyasının gərgin fəaliyyəti nəticəsində mümkün olub.

Yenicə müstəqilliyini əldə edən Azərbaycan ötən əsrin 90-cı illərinin əvvəllərində ağır duruma düşmüşdü. Ölkə müharibə şəraitində yaşamaqla bərabər, həm də iqtisadi-siyasi və sosial böhran keçirirdi. Ölkə ictimaiyyəti, xüsusən də, ziyalılar o zaman Naxçıvan Ali Məclisinin Sədri vəzifəsində çalışan ulu öndər Heydər Əliyevi xilaskar kimi görürdü.

1992-ci ildə ölkə ziyalıları xalqın iradəsini ifadə edərək ümummilli lider Heydər Əliyevə müraciət etdi. Ulu öndər isə həmin müraciətə cavab verdi və ölkəni ağır durumdan çıxarmaq yolunu nədə gördüyünü qeyd etdi. Ziyalıların müraciəti və ulu öndərin cavabı “Səs” qəzeti vasitəsilə xalqa çatdırıldı.

O zaman Heydər Əliyev Naxçıvan Ali Məclisinin Sədri vəzifəsində işləyirdi və onun blokada şəraitində yaşayan Naxçıvanı ağır durumdan çıxarmaq üçün göstərdiyi fəaliyyət ölkə ictimaiyyətinə çatdırılmırdı.

Sonrakı hadisələr hər kəsə məlumdur- xalqın çağrışına etinasız qalmayan ulu öndər Bakıya gəldi və Milli Məclisin Sədri seçildi. Daha sonra AXC-Müsavat hakimiyyəti ölkəni idarə edə bilmədiyini etiraf etdi və istefa verdi. Bundan sonra isə prezident seçkiləri keçirildi və Heydər Əliyev xalqın böyük əksəriyyətinin səsini qazanaraq prezident seçildi.

Heydər Əliyevin ölkəni və xalqı hansı bəlalardan qurtardığını və inkişaf etdirdiyini təkrar söyləməyə ehtiyac görmürəm- bu, hamımızın gözləri önündə olub. Ümummilli lider Heydər Əliyevin siyasi fəaliyyətinin mühüm bir hissəsi yaradıcısı və Sədri olduğu Yeni Azərbaycan Partiyası ilə sıx şəkildə bağlıdır.

Yeni Azərbaycan Partiyasının təsis konfransı 1992-ci il noyabr ayının 21-də Naxçıvan şəhərində keçirildi. Konfransda Azərbaycanın müxtəlif regionlarından təşəbbüs qruplarının 550-dən artıq nümayəndəsi iştirak edirdi. Konfrans Yeni Azərbaycan Partiyasının təsis edilməsi haqqında qərar qəbul etdi. Heydər Əlirza oğlu Əliyev konfrans nümayəndələri tərəfindən açıq səsvermə yolu ilə Yeni Azərbaycan Partiyasının Sədri seçildi.

Ümummilli lider Heydər Əliyevin 1993-cü ilin iyun ayında ümumxalq tələbi nəticəsində siyasi hakimiyyətə gəlməsi ilə YAP-ın inkişafında yeni mərhələ başladı. Həmin dövrdə YAP-ın qarşısında bir tərəfdən iqtidar partiyası kimi cəmiyyətin siyasi sistemində özünün aparıcı mövqeyini təsdiq etmək, digər tərəfdən isə, müstəqil dövlət quruculuğu proseslərində yaxından iştirak etmək vəzifəsi dayanırdı.

Heydər Əliyev Yeni Azərbaycan Partiyasının fəaliyyətini daim diqqətdə saxlayırdı. O, YAP-ın Sədri kimi partiyanın ildönümlərinə həsr edilmiş tədbirlərdə daim iştirak edər, proqram xarakterli nitqlər söyləyər, partiya həyatı və fəaliyyətilə əlaqədar zəruri tapşırıqlar verərdi.

Bu gün partiya ulu öndərin siyasi xətti inamla və dönmədən həyata keçirir. Məhz bu siyasətin nəticəsidir ki, o zamandan bəri ölkədə keçirilmiş bütün seçkilərdə YAP və onun lideri qalib gəlib. Öz sıralarında ictimaiyyətin bütün təbəqələrini təmsil edən 500 minə yaxın üzvü birləşdirən YAP, ümummilli liderin parlaq ideyalarının daşıyıcısı kimi cəmiyyətdə öz aparıcı rolunu günü-gündən möhkəmləndirməkdədir.

Heydər Əliyevin əsasını qoyduğu siyasəti uğurla davam etdirən Prezident İlham Əliyev Azərbaycanın tarixində heç bir dövrdə görünməmiş işlər həyata keçirir. Ulu öndərin hazırladığı iqtiadi islahatları, sosial siyasəti, neft strategiyasını həyata keçirən Prezidentimiz Azərbaycanı dünyanın ən sürətlə inkişaf edən ölkəsinə çevirib.

Azərbaycan indi təkcə iqtisadi cəhətdən deyil, həm də bütün digər sahələrdə sürətlə inkişaf edir. Ölkəmizdə demokratik islahatlar aparılır, söz və mətbuat azadlığı təsbit olunub, insan hüquqları dövlətin prioritet vəzifələrindən birinə çevrilib, bir sözlə, ölkəmiz, siyasi, iqtisadi, elmi, mədəni cəhətdən yüksəliş dövrünə qədəm qoyub, ordu quruculuğunda, idman sahəsində, təhsil və səhiyyədə böyük tərəqqi əldə edib.

“Bugünkü Azərbaycanı “Heydər Əliyevin Azərbaycanı” adlandırsaq, səhv etmərik”

YAP Siyasi Şurasının üzvü Vilayət Əliyev:

- YAP-ın yaranmasına gətirib çıxaran səbəblərlə bağlı iki məqamı qeyd etmək istəyirəm. Birinci məqam, bizim görmədiyimiz, əhəmiyyət vermədiyimiz tərəfdir. Bu, Moskva mühiti, sovet imperiyasının dağılması ilə bağlıdır. Hər hansı bir ölkədə iqtisadiyyat çökəndə, mənəviyyatsızlıq, özbaşınalıq baş alıb gedəndə, o dövlət dağılır.

Tarix boyu həmişə belə olub. Sovet imperiyası kimi nəhəng bir ölkə də həmin şəraitdə süqut etdi. Belə bir dövrdə ayrı-ayrı əyalətlərdə və respublikalarda çox ciddi proseslər gedirdi. Lakin burada ən çox əziyyət çəkən Azərbaycan idi.

Tarix boyu ölkəmizi həm şimaldan, həm də cənubdan digər dövlətlər məhv etməyə həmişə hazır olmuşlar. Onlar 20 Yanvar hadisəsi ilə xalqımıza göstərdilər ki, baş qaldırsanız, qanınızı tökərik. Bu məqamda yeganə şərt meydana çıxdı. Azərbaycan həqiqətini, yəni o faciəni bütün dünyaya bəyan etmək. Bunun da öhdəsindən ulu öndər Heydər Əliyev gəldi. Xalqımız Heydər Əliyev ideyalarının sədaqətinə, möhkəmliyinə və gələcəyinə inanırdı.

Bu gün ölkəmizin iqtisadiyyatını, onun siyasi qüdrətini dünyaya çatdıran ümummilli liderin davamçısı Prezident cənab İlham Əliyev oldu. O öz ailəsi və onu sevən ziyalılarla birlikdə mübarizəyə qalxdılar. O vaxt hər şey ola bilərdi. Məhz həmin dövrdə Heydər Əliyev həm siyasi, həm də mənəvi cəhətdən özünün Azərbaycana qayıdışını elan etdi.

Özünün məramnaməsini oxudu. Bu, bizə görünməyən tərəf idi. Əgər Heydər Əliyev kimi tarixi bir şəxsiyyət orada bu fikirləri qorxmadan söyləyirdisə, demək, Azərbaycan çalxalanırdı, meydan dağılırdı. Bu məqamda ölkəmizə düşünən bir beyin lazım idi ki, xalqı bəlalardan qurtarmaq üçün sükanı əlində düzgün saxlaya bilsin.

Heydər Əliyev Moskvadan Bakıya gəlməli idi. Lakin Onun ilk gəlişi mümkün olmadı. O vaxt ölkə rəhbərliyi Onun vətənə qayıdışına imkan vermirdi. “Qardaşlıq” cəmiyyətinin silahlı üzvləri, yəni təxribatçıları ulu öndərin gəlişini əngəlləmək məqsədilə aeroporta hamıdan qabaq getmişdilər.

O vaxt biz də Onu aeroportda qarşılamalı idik. Amma əks-qütbdən olanlar bizə mane olmaq istədilər. O vaxt bizə mane olan əsas qüvvə Ayaz Mütəllibov və onun müdafiəçiləri idi. AXC-Müsavat liderləri də Heydər Əliyevin Bakıya gəlişinə əngəl törətməyə çalışırdılar. Bu iki qüvvə ulu öndərə qarşı birləşmişdi. Ancaq insanlar oraya üz tutdular. Ondan sonra biz Heydər Əliyevi qarşıladıq, gətirdik. Xalq arasında böyük ruh yüksəkliyi var idi. İnsanlar sanki ölümü gözlərinin altına alaraq, oraya getmişdilər.

Onu sevənlər evinin qarşısına yığışırdılar. Axırda O, insanların təhlükəsizliyini qorumaq üçün özü çıxıb dedi ki, dağılışsınlar. Günlərin bir günü, camaat gördü ki, Heydər Əliyev şəhərdə gəzir. “Nizami” kinoteatrının yanından dənizə tərəf getdikcə, Onun ətrafındakı adamların sayı da çoxalırdı. İnanın ki, 40-50 nəfərlə başlanan yürüş sonradan minlərlə insanı əhatə etdi. Onlar ən son məqamda da Ona dəstək olduqlarını göstərirdilər.

O zaman, elə qələmə vermək istəyirdilər ki, guya Heydər Əliyev və Onun ətrafındakılar şəhərdə asayişi pozmağa cəhd edirlər. Amma hamı görürdü ki, belə deyil. İnsanlar dinc və sakit şəraitdə ulu öndərin başına yığışır və bununla da, Ona olan sevgilərini bildirirdilər. Heydər Əliyev o zaman Moskvadan müalicədən təzəcə qayıtmışdı.

Heydər Əliyev bütün Azərbaycan xalqının ümid bəslədiyi bir şəxsiyyət idi. İndinin özündə də ulu öndər böyük mif kimi hər zaman başımızın üstündə gəzir. İnsanlar Ona sipər çəkərək, göz bəbəkləri kimi qorudular. Amma Ona Bakıda qalmağa imkan vermədilər və O, Naxçıvana üz tutdu. Naxçıvanda Onu böyük coşqu ilə qarşıladılar. Həmin vaxt Azərbaycanda bənzəri olmayan, heç bir ölkədə görünməyən qarışıqlıq yaranmışdı.

O vaxtkı vəzifə başında oturanlar Azərbaycanı parçalayıb, müxtəlif respublikalar yaratmaq xəyalında idilər. Belə bir məqamda Azərbaycanın qeyrətli oğulları meydanda idilər. Belə ağır durumda xalq Heydər Əliyevə üz tutdu. Heydər Əliyev bunu nəzərə alıb paytaxta gəldi.

Artıq iyun ayının 15-də tam səlahiyyətli rəhbər kimi fəaliyyətə keçərək, ilk işi ölkəmizi və xalqımızı düşdüyü ağır vəziyyətdən qurtarmaq oldu. Heydər Əliyev birdən-birə hakimiyyətə gəlməyib. Onun ikinci dəfə siyasi hakimiyyətə qayıdışı sahib olduğu yüksək bacarığından, şəxsi potensialından, xalq arasında olan nüfuzundan, idarəetmə təcrübəsindən, dünya miqyasında olan hörmətindən irəli gəlirdi. Xalqımız ulu öndər kimi bir xilaskarı vətənə gətirməyə bilməzdi.

Bugünkü Azərbaycanı “Heydər Əliyevin Azərbaycanı” adlandırsaq, səhv etmərik. Çünki 1992-1993-cü illərdə Azərbaycan dağılmaq təhlükəsi ilə üzləşmişdi. Əgər ulu öndər Heydər Əliyev xalqın çağrışına müsbət cavab verməyib, Bakıya gəlməsəydi, Azərbaycan adlı dövlət olmayacaqdı. Ancaq Heydər Əliyev xalqının üzləşdiyi ağır və çətin problemlərə biganə qalmadı.

Məhz Onun uzaqgörən, təkrarsız siyasəti nəticəsində Azərbaycan xanlıqlara bölünmək təhlükəsindən xilas oldu. Məqsədyönlü iqtisadi siyasət sayəsində bir sıra qlobal layihələr həyata keçirildi, əhalinin sosial-iqtisadi rifah halı yaxşılaşdı.

(Ardı var)

Elçin Bayramlı

Səs.- 2009.- 18 noyabr.- S. 8-9.