İlham Əliyevin 2-ci dəfə Prezident seçilməsinin 1 ili tamam oldu

Beynəlxalq təşkilatların hesabatlarına görə, 2008-ci il oktyabrın 15-də Azərbaycanda ən demokratik seçkilər keçirilib

Azərbaycanda son 15 ildə seçki texnologiyalarının mükəmmələşdirilməsi, seçki qanunvericiliyinin təkmilləşdirilməsi və ölkədə azad siyasi fəaliyyət mühitinin yaradılması seçkidən-seçkiyə inkişafla müşahidə olunub. Son prezident seçkiləri isə ölkədə ən demokratik proses oldu və bu fakt bütün yerli və beynəlxalq təşkilatları, müşahidəçilər tərəfindən təsdiq olundu. Həmin seçkidə YAP-ın Sədri cənab İlham Əliyev seçicilərin 88.8 fazi səsini qazanaraq Prezident seçildi.

2008-ci il oktyabrın 15-də Azərbaycanda keçirilən prezident seçkiləri müstəqil ölkəmizin tarixində yeni səhifə açdı. Prezidentliyə namizədlərin sayının çoxluğuna baxmayaraq ölkə əhalisi ulu öndər Heydər Əliyev siyasətinin layiqli davamçısı İlham Əliyevi yenidən ən ali postda - Prezident kürsüsündə görmək istədi. Cənab İlham Əliyev şəffaf və demokratik seçkidə 88,73 % səs toplayaraq növbəti dəfə Azərbaycan Respublikasının Prezidenti seçildi.

“Bizim uğurlarımızın əsas mənbəyi Azərbaycan xalqının fəaliyyətidir, Azərbaycan xalqının iradəsidir” deyən Prezident İlham Əliyev 2008-ci ilin Prezident seçkilərinə bu amalı əldə rəhbər tutaraq qatıldı. Məhz Azərbaycan xalqının rəğbəti sayəsində İlham Əliyev 2008-ci ilin 15 oktyabrında keçirilən prezident seçkilərinin əsas favoriti olaraq siyasi mübarizədən qalib çıxdı. Xalq yekdilliklə Onu dəstəklədi və səsini ulu öndər Heydər Əliyevin siyasi kursunun davamçısına verdi.

Azərbaycanda keçirilən 2008-ci ilin prezident seçkiləri ölkədə və dünyada böyük rezonans doğurdu. Şəffaflığı ilə diqqəti çəkən bu seçkilər müstəqil Azərbaycanın tarixinə ən demokratik seçki kimi daxil oldu. Xalqın yenidən İlham Əliyevə etimad göstərməsi ötən beş ildə Onun həyata keçirdiyi siyasətin uğurları ilə bağlı oldu.

Böyük uğurla başa çatan prezident seçkilərində, gözlənildiyi kimi xalqın seçimi dəyişmədi. 2003-cü il prezident seçkilərində tərəqqiyə, inkişafa, ulu öndər Heydər Əliyev siyasətinə səs verən yenə də bu yola dəstək verdilər. Seçkilərin nəticələri ilə bağlı “ELS” Müstəqil Araşdırmalar Mərkəzinin, AVCİA-nın, eləcə də, Hüquqi və Demokratik İslahatlar Mərkəzinin keçirdikləri “exit-poll”un nəticələrinə görə də, Yeni Azərbaycan Partiyasının prezidentliyə namizədi cənab İlham Əliyev seçicilərin 88,8 faiz səsini qazandı.

Azərbaycanda seçkilərin demokratik və şəffaf keçirilməsi üçün bütün tədbirlər görülmüşdü. İstər beynəlxalq, istər yerli müşahidəçilərin çoxluq təşkil etməsi, istər məntəqələrdə veb-kameraların qurulması, bir daha deməyə əsas verdi ki, respublikamızda seçkilər, həqiqətən də, tam şəffaf və ədalətli keçirildi. 15 oktyabr prezident seçkiləri bir daha sübut etdi ki, Azərbaycan demokratik bir ölkə olmaqla seçiciləri də seçməyi bacarır.

Azad, ədalətli və demokratik seçiminə əsaslanan 15 oktyabr prezident seçkilərində uğurla fəallıq göstərən Azərbaycan vətəndaşları növbəti beş il üçün cənab İlham Əliyevə səs verdilər. Seçkinin nəticələri həm də hər bir kəsin arzuladığı, gözlədiyi və böyük ümid etdiyi, ən əsası isə inandığı nəticələri ortaya qoydu.

15 oktyabr prezident seçkisinin nəticələri belə bir tarixi həqiqəti də növbəti dəfə təsdiqləmiş oldu ki, ümummilli liderimiz Heydər Əliyev siyasi kursunun varisliyinin təmin olunması xalqın bu kursa olan dərin inamından, gerçək arzularından keçib gəlir.

Daim ictimaiyyətin diqqət mərkəzində qalaraq millətin saf və müqəddəs istəklərində, sabaha yönələn ümidlərində özünə yer tutmaq mühüm məsələdir. Bəlkə də, elə buna görədir ki, 2008-ci il oktyabrın 15-də vətəndaşların mütləq əksəriyyəti qəti mövqeyini ortaya qoyarkən, cənab İlham Əliyev amilini, ilk növbədə, dayanıqlı və təhlükəsiz sabah axtarışlarının cavabı olaraq önə çəkdilər.

Əslində, xalq öz seçimində haqlı idi və bu seçim son dərəcə mühüm siyasi, ideoloji və mənəvi prinsiplərə əsaslanır. Məhz bu inama əsaslanaraq, xalqımız ulu öndərimizin müəllifi olduğu milli dövlətçilik konsepsiyasını davam etdirə biləcək yeganə siyasi lider kimi növbəti dəfə, birmənalı olaraq, cənab İlham Əliyev fenomeni üzərində qərar tutdu.

Çünki bütün siyasi opponentlərindən fərqli olaraq İlham Əliyevin ulu öndərimiz Heydər Əliyev siyasi kursuna dair baxışlar sistemi institutlaşmış xarakter daşıyır. Seçkinin nəticələri həm də belə bir reallığı ifadə etdi ki, cənab İlham Əliyev xarizmatik liderdir və onun mütərəqqi siyasi keyfiyyətləri insanların Ona olan dərin inamında özünü büruzə verir.

Azərbaycan növbəti dəfə bütün dünyaya demokratik ölkə olduğunu, regionun iqtisadi cəhətdən lideri olmaqla yanaşı, demokratiklik cəhətdən də lideri olduğunu nümayiş etdirdi. Beynəlxalq müşahidə missiyasının verdiyi rəylər ölkəmizin beynəlxalq imicini daha da artıracaq, Azərbaycanın adının dünyada ən demokratik ölkələrlə yanaşı çəkilməsini şərtləndirəcək.

“Mənə yenidən böyük etimad göstərmiş, məni Prezident vəzifəsinə seçmiş bütün Azərbaycan xalqına öz dərin minnətdarlığımı bildirirəm. Azərbaycan xalqını yenidən əmin edirəm ki, mən bundan sonra da Azərbaycanın hərtərəfli inkişafı üçün öz səylərimi əsirgəməyəcəyəm”-deyən İlham Əliyev öz sözünə əməl etdi. Ötən 1 ildə dövlət başçısının həyata keçirdiyi siyasət ölkənin inkişafını sürətləndirdi və beynəlxalq mövqelərimizi möhkəmləndirdi.

İkinci müddətə Azərbaycan Respublikasının Prezidenti seçilən İlham Əliyevin xalqımıza verdiyi söz müasir Azərbaycanın inkişafına, tərəqqisinə yönələn fəaliyyətin konsepsiyasına çevrildi. Dövlət başçısı növbəti 5 ildə Azərbaycanı idarə etməyin strategiyasını bəyan etməklə yanaşı, xalqımızda siyasi və sosial-iqtisadi uğurlar seriyasının davamlı xarakter alacağına əminlik yaratdı. İlham Əliyevin xalqdan aldığı dəstəyin təməlində Onun ulu öndər Heydər Əliyev siyasətinə sadiqliyi dayandı. Ötən bir il Azərbaycanda bütün istiqamətlərdə böyük inkişafın müşahidə olunması, ölkəmizin bölgədə və dünyada mövqelərini gücləndirməsi ilə müşayiət olundu. Müstəqilliyimizin və ideoloji dayaqlarımızın daha da möhkəmləndirilməsinin, vətəndaş həmrəyliyinin bərqərar olmasının təməlində isə Azərbaycan dövlətinin milli maraqlarının qorunması dayandı.

“Müstəqillik bizim üçün ən böyük sərvətdir, ən böyük dəyərdir. Ancaq müstəqilliyi əldə etmək onu qoruyub saxlamaqdan, möhkəmləndirməkdən daha asandır. Bu gün Azərbaycan sözün əsl mənasında müstəqil ölkədir, biz həm daxildə, həm də xaricdə müstəqil siyasət aparırıq. Bizim siyasətimiz Azərbaycan xalqının maraqlarına xidmət göstərir. Azərbaycan xalqının maraqlarının qorunması, Azərbaycan dövlətinin möhkəmləndirilməsi, Azərbaycanın dövlət müstəqilliyinin möhkəmləndirilməsi mənim üçün və bilirəm ki, hər bir Azərbaycan vətəndaşı üçün ən başlıca vəzifədir, ən başlıca məqsəddir”-İlham Əliyev öz fikrini açıq ifadə edib.

Prezident İlham Əliyevin yürütdüyü siyasət Azərbaycanın müttəfiqlərinin və dostlarının sayını artırdı. Azərbaycan beynəlxalq müstəvidə layiqli yerini möhkəmləndirdi. Regional təşəbbüslər Azərbaycanın möhkəmlənməsinə, həm də bölgədəki əməkdaşlığın inkişafına xidmət etdi.

Milli mənafelərlə bağlı problemlərin həllinə həssas və fəal yanaşma uzaq və yaxın xaricin də diqqətindən yayınmadı. Azərbaycan Prezidentinin yürütdüyü uğurlu xarici siyasət nəticəsində artıq dünya və beynəlxalq təşkilatlar Ermənistanı işğalçı dövlət kimi tanıdı və Azərbaycan Prezidentinin bu məsələdəki birmənalı mövqeyi təsdiqlədi ki, Dağlıq Qarabağın Azərbaycandan ayrılma mexanizmi yoxdur.

“Azərbaycanın ərazi bütövlüyü danışıqların mövzusu deyil, olmayıb və heç vaxt olmayacaq. Dağlıq Qarabağa heç vaxt- nə bu gün, nə sabah, nə 10 ildən sonra, nə 50 ildən sonra müstəqillik verilməyəcək”- Azərbaycan dövlət başçısı bəyan edib.

Azərbaycanın Dağlıq Qarabağ bölgəsində Ermənistanın apardığı etnik təmizləmə və işğal siyasəti nəticəsində doğma torpaqlarından qovulan 1 milyona yaxın insanın həyat şəraitinin yaxşılaşdırılması, yeni qəsəbələrin salınması diqqətdə saxlanıldı.

Azərbaycanda ordu quruculuğu istiqamətində həyata keçirilən tədbirlər, silahlı qüvvələrin hərbi hazırlıq səviyyəsinin artırılması ilə bağlı görülən işlər Dağlıq Qarabağın Azərbaycandan qoparılması ilə bağlı bəzi dairələrdə yaranan əminliyi darmadağın etdi, xalqımızı ordumuzun etibarına inandırdı.

Bu dövrdə Azərbaycanın iqtisadi uğurları daha da böyüdü. İqtisadi inkişafına görə, dünyada lider dövlət olan Azərbaycanın dövlət büdcəsi, valyuta ehtiyatları, ölkəmizə sərmayə qoyuluşlarının həcmi artdı, güclü sahibkarlıq sinfi yarandı. Dünya Bankı və Beynəlxalq Maliyyə Korporasiyası “Duing business” hesabatında Azərbaycanı 2008-ci ilin ən islahatçı ölkəsi elan etdi.

Ölkədə 800 min yeni iş yeri açıldı, yoxsulluğun səviyyəsi 49 faizdən 13 faizə düşdü, əhalinin rifah halının daha da yaxşılaşdırılması istiqamətində dövlət proqramları icra edildi. Azərbaycanda qeyri-neft sektorunun inkişafı neft siyasətinin məntiqi davamı oldu.

Güclü iqtisadiyyatın hər bir ölkənin inkişafında mühüm amil olduğunu bəyan edən Prezident İlham Əliyev ölkə iqtisadiyyatında qeyri-neft sektorunun çəkisinin artırılması ilə bağlı tədbirlər gördü. Bu məsələ regionların sosial-iqtisadi inkişafı dövlət proqramının birinci və ikinci mərhələsində yetərincə əksini tapdı.

Nəhəng infrastruktur layihələrinin- Olimpiya idman-komplekslərinin inşası gənc nəslin sağlamlığının qorunmasına mühüm töhfələr verdi. Yüzlərlə səhiyyə ocağının, müalicə-diaqnostika mərkəzlərinin inşası səhiyyə sisteminin inkişafını göstərdi. Ölkədə nəqliyyat sisteminin yenidən qurulması Azərbaycanın dünyaya çıxışını təmin etdi.

1800-ə yaxın məktəbin tikilməsi isə təhsil sistemində ən uğurlu islahat kimi tarixə düşdü. Bütün bunların təməlində uğurlu enerji siyasəti dayandı. Azərbaycan neft-qaz sahəsində qazandığı uğurları davam etdirdi. Avropanın enerji təhlükəsizliyinin təmin olunmasında mühüm rol oynayan Azərbaycanda qazlaşdırmanın səviyyəsi 85 %-ə çatdı.

Ölkəmiz Asiyanı Avropa ilə birləşdirəcək Bakı-Tbilisi-Qars dəmir yolu xəttinin, Oğuz-Qəbələ-Bakı su kəmərinin çəkilməsi kimi iri regional və ölkədaxili layihələrin icrasına nail oldu. Azərbaycançılıq fəlsəfəsi İlham Əliyev siyasətinin mənəvi dayağına çevrildi, milli ləyaqət, milli qürur, dini tolerantlıq uğurlarımızın əsas şərtləri oldu. Prezident İlham Əliyevin yürütdüyü siyasət müasir Azərbaycanın güclənməsinə, milli-mənəvi dəyərlərimizin ən yüksək səviyyədə qorunmasına xidmət etdi. Prezident İlham Əliyev Azərbaycanın gələcəyinin etibarlı təminatını da həyata keçirdi.

Prezident İlham Əliyev dünya səviyyəsində Azərbaycanın söz sahibi olduğunu, həmçinin XXI əsrdə dövlətlərin böyüklüyünün, yaxud kiçikliyinin fərq etmədiyini, dövlətin müstəqil siyasət yeridə bilməsinin əsas olduğunu ortaya qoydu. Yeri gəlmişkən, beynəlxalq sorğuda İlham Əliyevin Şərqin lider dövlət başçısı seçilməsi də bunun nəticəsi idi.

Elə bu günlərdə İlham Əliyevin Kanadada “İlin adamı” seçliməsi də təsadüfi deyildi. Azərbaycan lideri bu ada Yer üzündə ümumi sülhün bərqərar olması işinə böyük töhfə verən XXI əsrin görkəmli siyasi xadimi kimi layiq görülüb. Göründüyü kimi, bu gün dünya ölkələri bu siyasətə böyük qiymət verirlər.

Prezidentimiz dünya səviyyəsində balanslaşdırılmış xarici siyasət həyata keçirir. Ötən ilin avqust ayında Gürcüstanda baş verən hadisələr də göstərdi ki, Azərbaycanın xarici siyasət konsepsiyası nə qədər düzgün və strateji əhəmiyyətlidir. Bu siyasət Azərbaycan xalqının mənafeyini, inkişafını və perspektivini müəyyənləşdirir. Azərbaycan demokratik, müstəqil və azad bir ölkə kimi tanınır. İnkişaf etmiş və yeni inkişaf yoluna qədəm qoymuş ölkələrlə qarşılıqlı əməkdaşlıq şəraitində müqavilələr bağlanılır.

Azərbaycanın xarici siyasətində balanslaşdırma ana xətdir. Ona görə də əksər ölkələr tərəfindən Azərbaycanın bu uğurları dəstəklənir. Xarici siyasət sahəsində başlıca problemlərimizdən biri Qarabağdır. İndi hər bir Azərbaycan vətəndaşı yaxşı anlayır ki, Prezident İlham Əliyev bütün görüşlərində, beynəlxalq aləmdə öz çıxışlarında bu məsələni ön plana çəkir. Azərbaycanın sərhədlərinin toxunulmazlığı məsələsi bu çıxışların əsasını təşkil edir.

Dağlıq Qarabağ münaqişəsinin sülh yolu ilə beynəlxalq hüququn prinsipləri əsasında həll olunması Azərbaycan Prezidentinin başlıca qayğısıdır və fəaliyyətinin əsasını təşkil edir. Düzdür, Qarabağ probleminə beynəlxalq səviyyədə ikili yanaşma halları bu gün də var. İlham Əliyev bu standartların aradan qaldırılmasını və problemin BMT çərçivəsində, beynəlxalq hüququn normaları, ərazi bütövlüyümüzün toxunulmazlığı əsasında çözülməsini tələb edir.

Dövlət başçısı Qarabağ probleminin təkcə sülh variantı həllinə çalışmaqla kifayətlənmir, Azərbaycanın qüdrətli, müasir və peşəkar Silahlı Qüvvələrinin formalaşdırılması işi ilə ciddi məşğul olur. Ötən il iyunun 26-da Silahlı Qüvvələrimizin 90 illik yubileyi münasibətilə Bakıda keçirilən möhtəşəm hərbi parad Azərbaycanın öz torpaqlarını istənilən yolla azad etmək iqtidarında olduğunu göstərdi.

Prezidentimizin ayrı-ayrı ölkələrə rəsmi səfərləri zamanı Azərbaycanın inkişafı, tərəqqisi, beynəlxalq aləmdə nüfuzunun artması, möhkəmlənməsi sahəsində mühüm işlər görülür. Prezidentimiz nəinki dünyanın inkişaf etmiş ölkələrinə səfərlər edir, eləcə də Azərbaycanın gələcəyi, xalqımızın mənafeyi üçün hardasa faydalı olacaq tədbirləri həyata keçirə bilən ölkələrlə də əməkdaşlığı zəruri hesab edir. Bu əlaqələr strateji müttəfiqlik səviyyəsinə yüksəlir.

Azərbaycanda tam ictimai-siyasi sabitlik hökm sürür. Bu sabitliyin təməlini ümummilli liderimiz ikinci dəfə hakimiyyətə qayıtdıqdan sonra qoyub. İlham Əliyev prezident seçildikdən sonra bu sabitliyin möhkəmlənməsinə öz töhfəsini verdi. Azərbaycanda insan hüquqlarının qorunmasına xüsusi diqqət yetirilir. Demokratik təsisatlar möhkəmləndirilir. Söz və mətbuat azadlığı, din azadlığı var. Bütün bunlar ölkədə ictimai-siyasi sabitliyə rəvac verir. Vətəndaş həmrəyliyinin möhkəmləndirilməsi sahəsində ciddi addımlar atılır.

Prezidentliyi müddətində İlham Əliyev bir çox humanist addımlar atıb, əfv fərmanları imzalayıb. Qeyd edilməlidir ki, bu məsələlərdə Heydər Əliyev Fondunun Prezidenti Mehriban xanım Əliyevanın da çox böyük xidmətləri var. Millət vəkili, YUNESKO-nun xoşməramlı səfiri, Heydər Əliyev Fondunun prezidenti Mehriban xanım Əliyevanın təşəbbüsü ilə Milli Məclisdə Amnistiya Aktı qəbul edilib. Bu sıranı xeyli genişləndirmək olar. Bütün bunlar isə, ölkədə vətəndaş həmrəyliyinə nail olunması deməkdir.

Ötən müddətdə ən böyük uğurlardan biri də iqtisadi inkişaf tempinə görə dünyada liderliyi ələ keçirmək və bu mövqeni bir neçə ildir ki qoruyub saxlamaqdır. Son illərdə Azərbaycanda iqtisadi artım orta hesabla 15 faiz təşkil edir. Cari ilin dövlət büdcəsi 15 milyarda çatıb, ilin sonuna strateji valyuta ehtiyatları 20 milyarda çatacaq. Son 5 ildə düvlət büdcəsi 10 dəfə, ümumi daxili məhsul isə 5 dəfə artıb. Bu göstəricilər ölkəmizin nə dərəcədə sürətlə inkişaf etdiyinin əyani sübutudur.

BVF-nin, MDB Statistika Komitəsinin son proqnozlarında da gələn il Azərbaycanda inkişaf tempinin dünya ölkələrin arasında ən çox olacağı qeyd olunur. Üstəlik, inflyasiyanın minimuma endirilməsi, sosial müdafiənin gücləndirilməsi haqqında da proqramlar həyata keçirilir.

Azərbaycanda insanların həyat şəraitinin yaxşılaşdırılması, onların sosial güzəranının yüksəldilməsi istiqamətində də ciddi işlər görülür. Demək olar ki, bütün sahələrdə çalışanların əməkhaqqları bir neçə dəfə artırılıb. İnsanların sosial müdafiəsi gücləndirilib. Müəyyən kateqoriyadan olanlara kompensasiya verilir, aztəminatlı ailələrə güzəştlər edilir.

Ölkədə azad sahibkarlığa geniş imkanlar yaradılıb. Başlıcası isə odur ki, regionların inkişafı daim Prezidentin diqqət mərkəzində olub. Həmçinin, regionların sosial-iqtisadi inkişafı ilə bağlı ciddi dövlət proqramları ardıcıl olaraq həyata keçirilir. Bölgələrdə infrastruktura xüsusi diqqət verilir. Bu ilin əvvəlindən tətbiqinə başlanan “vahid pəncərə” sisteminin sahibkarlığın inkişafına əlavə stimul yaratmasını da bu sahədə ciddi uğurlardan biri kimi qeyd etmək olar.

Bir neçə il bundan əvvəl ən geridə qalmış, sosial-iqtisadi cəhətdən axsayan regionlarda bu gün böyük dəyişikliklər göz önündədir. “Səs” qəzetinin ölkənin regionlarında təşkil etdiyi dəyirmi masalarda iştirak edərkən bunu öz güzlərimizlə gördük və əmin olduq ki, artıq ölkəmizin bütün bölgələri müasir və inkişaf etmiş infrastruktura və iqtisadiyyata malikdir.

Bütün bunlar həm də Azərbaycana böyük perspektivlər vəd edir. Regionların inkişafı həm də rayonlarda yeni iş yerlərinin açılması, adamların rahat yaşaması, bölgələrə qayıdış, həyatın canlanması deməkdir.

İlham Əliyevin prezidentliyi dövründə 800 minə yaxın yeni iş yeri açılıb. Bunların çoxu daimi iş yerləridir. Dövlət başçısı seçilməzdən əvvəl O, 5 il ərzində 600 minə yaxın iş yerinin açılacağını vəd etmişdi. Zaman və fakt göstərdi ki, İlham Əliyev xalqa verdiyi bütün sözlər kimi, bu sözünü də vaxtından əvvəl və artıqlaması ilə yerinə yetirib.

Bunun nəticəsində, Azərbaycanda işsizlik problemi artıq aradan qalxır. Yoxsulluğun səviyyəsi həddən artıq aşağı düşüb. İndi bu, 13 faizdən də aşağıdır. Son illərdə xeyli sayda yeni istehsal müəssisələri açılıb. Yeni yollar çəkilir, məktəblər açılır, səhiyyə obyektləri istifadəyə verilir.

Ümumilli liderimiz Heydər Əliyev enerji sektorunun inkişafına, neft müqavilələrinə böyük önəm verirdi. Prezident İlham Əliyev bu strategiyanı uğurla davam etdirir. Neftdən gələn gəlirlər xalqımızın mənafeyinə yönəldilir. Bununla yanaşı ölkədə qeyri-neft sahələri də inkişaf etməkdədir.

Özəl sektorun inkişafına ciddi diqqət verilir. Hökumətin ilin 6 aylıq yekunların həsr olunan iclasında da vurğulandı ki, artıq özəl bölmə ölkə iqtisadiyyatının 85 faizini təşkil edir. MDB məkanında inkişafa görə, növbəti dəfə lider olduğu elan olunan Azərbaycan artıq inkişaf etmiş ölkələr səviyyəsinə çatmaqdadır.

Azərbaycan hakimiyyətinin həyata keçirdiyi siyasətin əsasında əhalinin sosial-iqtisadi durumunun yaxşılaşdırılması dayanır. “Mənim bir məqsədim var- Azərbaycanı möhkəmləndirmək, ölkəmizin dünyadakı mövqelərini gücləndirmək, xalqın rifah halını yaxşılaşdırmaq, müxtəlif proqramların həyata keçirilməsi ilə Azərbaycanı müasir güclü ölkəyə çevirmək.”

Prezident İlham Əliyevin son 6 ildə həyata keçirdiyi tədbirlərə, imzaladığı fərman və sərəncamlara, təsdiqlədiyi Dövlət Proqramlarına diqqət yetirsək, onların hər birinin əsasında bu məqsədə nail olmaq istəyinin dayandığı özünü qabarıq şəkildə büruzə verir.

2004-2008-ci illəri əhatə edən “Regionların sosial iqtisadi inkişafına dair Dövlət Proqramı” uğurla başa çatdı. Hazırda proqramın II hissəsi (2009-2013) həyata keçirilir və bu mərhələdə daha böyük işlərin həyata keçirilməsi nəzərdə tutulub. İşsizlik, yoxsulluq problemlərinin həlli istiqamətində mühüm addımlar atılır. Bu gün yoxsulluq həddinin bir neçə il əvvəlki 49 faizdən 13 faizə endirilməsi həyata keçirilən layihələrin uğurlu nəticəsidir.

Beynəlxalq Valyuta Fondunun qənaətinə görə Azərbaycanda bugünkü iqtisadi inkişaf saxlanılarsa, çox qısa zamanda ölkədə bir nəfər də yoxsul olmayacaq. “Azərbaycanda yoxsul olmamalıdır”- bu tezis Prezident İlham Əliyevin həyata keçirdiyi siyasətin əsasını təşkil edir. Ölkənin bugünkü iqtisadi inkişafı və maliyyə imkanları bunu qeyd etməyə əsas verir.

Böyük enerji layihələrinin əsas iştirakçısı və təşəbbüsçüsü olan Azərbaycan onların reallığa çevrilməsi ilə iqtisadi qüdrətini daha artırır, eyni zamanda maliyyə imkanlarını genişləndirir. Bu isə əhalinin sosial-rifah halının yaxşılaşmasına zəmin yaradır. Əmək haqqları, pensiyalar ildə bir neçə dəfə artır.

Müxtəlif kateqoriyalardan olan vətəndaşlara konpensasiyalar verilir. Təbii ki, bir neçə il bundan öncə xalqın yaşayışı ilə bu günü müqayisə etsək, görərik ki, radikal müxalifətin söylədiklərinin əksinə olaraq iqtisadi göstəricilər rəqəmlərdə deyil, insanların gündəlik həyatında öz əksini tapıb. Bunlar gerçəkliyin sərt üzüdür.

Bu gün Azərbaycanda aparılan siyasət ulu öndər Heydər Əliyev siyasi kursunun davamıdır və yeganə düzgün siyasətdir. Prezident İlham Əliyev tərəfindən uğurla davam etdirilən bu siyasət Azərbaycanı xoş gələcəyə aparır. Bunu görməmək, qiymətləndirməmək və buna sevinməmək sadəcə olaraq mümkün deyil. Bunun üçün sadəcə, azərbaycanlı olmaq yetər.

Bu yazını isə, Prezident İlham Əliyevin xalqa verdiyi sözlə bitirmək istərdim- “Azərbaycan xalqını əmin etmək istəyirəm ki, bundan sonra da Vətənimizin uğurlu inkişafı üçün, Azərbaycanın çiçəklənməsi üçün mən əlimdən gələni əsirgəməyəcəyəm, Azərbaycan xalqına bundan sonra da xidmət edəcəyəm. Eşq olsun Azərbaycan xalqına! Yaşasın Azərbaycan!”

Elçin Bayramlı

Səs.- 2009.- 16 oktyabr.- S. 5-7.