Prezident İlham Əliyev xalqın etimadını qazanan liderdir

Məlum olduğu kimi, 15 oktyabr 2008-ci ildə cənab İlham Əliyev xalqın böyük etimadını qazanaraq, yenidən ölkə Prezidenti seçildi. Bu, xalqın ulu öndər Heydər Əliyev ideyalarına sadiqliyinin bariz nümunəsidir. Prezident İlham Əliyevin uğurlu siyasəti nəticəsində neft sektorunda, eləcə də sənayenin digər sahələrində uğurlar əldə edilmişdir.

Bununla yanaşı, qeyri-neft sektoruna da ölkə rəhbərliyinin diqqət və qayğısı nəticəsində bu sahədə də nailiyyətlər əldə edilib. Ölkə başçısı İlham Əliyevin uğurlu xarici siyasəti nəticəsində Azərbaycan beynəlxalq aləmdə böyük nüfuz sahibinə çevrilib və respublikamız regionun lider ölkəsinə çevrilib. Bu mövzu ilə bağlı fikirlərini öyrəndiyimiz ölkə siyasiləri də Prezident İlham Əliyevin ötən 1 il ərzində həyata keçirdiyi yeni uğurlu daxili və xarici siyasətindən bəhs etdilər.

Millət vəkili Vahid Əhmədov: “Daxili siyasətə nəzər salsaq, şahidi olarıq ki, Azərbaycan maliyyə sahəsində müvəffəqiyyətlər qazanıb”.

-2009-cu ilə nəzər salsaq görərək ki, ölkə başçısı cənab İlham Əliyevin səyi nəticəsində respublikamız istər daxili, istərsə də xarici siyasətdə uğurlar əldə edib. Daxili siyasətə nəzər salsaq, şahidi olarıq ki, Azərbaycan maliyyə sahəsində müvəffəqiyyətlər qazanıb. Belə ki, ölkəmiz beynəlxalq maliyyə böhranından az itki ilə çıxan bir ölkədir. Dövlət başçısı 1 il ərzində, əsasən, sosial sahəyə daha çox diqqət yetirib. Ötən il ərzində ÜDM-in artımına nail olunub. Ümumiyyətlə, Azərbaycanda iqtisadiyyat sahəsində uğurlu işlər görülüb və bu proses bu gün də davam etməkdədir. 740 mindən artıq yeni iş yerləri yaradılıb. Əhalinin ərzaq təminatı sahəsində də işlər görülüb ki, bu da son bir il ərzində aparılan uğurlu siyasətin nəticəsidir. Xarici siyasət sahəsində əldə edilən uğurlar ondan ibarətdi ki, Azərbaycan dövləti hər zaman balanslaşdırılmış siyasət həyata keçirir.

YAP Siyasi Şurasının üzvü, iqtisadçı-ekspert Aydın Hüseynov: “Cənab İlham Əliyev 2003 və 2008-ci illərdə xalqın dəstəyi ilə ölkə prezidenti seçildi. Çünki xalqımız Prezident İlham Əliyev cənablarına inanır”.

- Müstəqil Azərbaycanın qurucusu, ulu öndərimiz Heydər Əliyevin layiqli davamçısı, Prezident İlham Əliyevin həyata keçirdiyi uğurlu siyasəti nəticəsində yenicə müstəqillik əldə etmiş Azərbaycan Respublikası regionun lider ölkəsinə çevrilib. Bu, bir daha onu göstərir ki, ölkə Prezidenti düzgün xarici siyasət, o cümlədən, məqsədyönlü iqtisadi siyasət həyata keçirir. Azərbaycanda iqtisadi inkişaf strategiyasının əsasını qoyan ümumilli liderimiz iqtisadi islahatlar həyata keçirdi ki, bu islahatlar bu gün də uğurla həyata keçirilməkdədir. Bundan belə, respublikamızda neft sektoru ilə yanaşı, qeyri-neft sektoru da inkişaf etdirilməkdədir. Belə ki, regionların sosial-iqtisadi inkişafı, yoxsulluğun aradan qaldırılması istiqamətində qəbul edilən dövlət proqramlarının uğurlu icrası bir daha onu göstərir ki, Prezident İlham Əliyev elmə əsaslanan, ölkə vətəndaşlarının sosial müdafiəsinə yönələn iqtisadi siyasət həyata keçirir. Məhz bütün bunların nəticəsidir ki, ulu öndərin layiqli davamçısı Cənab İlham Əliyev 2003 və 2008-ci illərdə xalqın dəstəyi ilə ölkə Prezidenti seçildi. Çünki xalqımız Heydər Əliyev siyasətinə, Onun davamçısı Prezident İlham Əliyev cənablarına inanır. Azərbaycanın iqtisadi inkişafı ulu öndərimizin və ölkə başçısı İlham Əliyevin adı ilə bağlıdır.

YAP Siyasi Şurasının üzvü, professor Vilayət Əliyev: “İlham Əliyev Heydər Əliyev ideyalarını uğurla həyata keçirir”

- Fəxr edirik ki, Azərbaycanın İlham Əliyev kimi layiqli Prezidenti var. Dünyada xüsusi nüfuzu olan ölkəmizin həqiqətlərini beynəlxalq ictimaiyyətə çatdıran, Azərbaycanın daxili və xarici siyasətini uğurla həyata keçirən, ölkəmizdə quruculuq-abadlıq işlərinin aparılmasında, təhsil, səhiyyə, mədəniyyət ocaqlarının yenidən qurulmasında cənab İlham Əliyevin misilsiz xidmətləri var. Bu gün siyasi aləmdə Onun kimi siyasətçi tapmaq çətindir. Çünki İlham Əliyev ulu öndər Heydər Əliyev siyasi məktəbinin layiqli davamçısıdır. O, ulu öndər Heydər Əliyev ideyalarını uğurla həyata keçirir. Bütün bunların nəticəsidir ki, Azərbaycan günü-gündən inkişaf edir, çiçəklənir və dünyada söz sahibinə çevrilib. Mən bir daha bütün bunlara görə, cənab İlham Əliyevə minnətdarlığımı bildirirəm və Ona işlərində uğurlar arzulayıram.

“Yurddaş” partiyasının sədri Mais Səfərli: “Möhkəm təməllər üzərində qurulan respublikamızı inkişaf etdirən Prezident İlham Əliyev uğurlu siyasət həyata keçirir”.

- Cənab Prezidentimiz İlham Əliyev regionun liderinə çevrilib. Ölkəmiz MDB məkanında ən qabaqcıl ölkələr sırasındadır. Bütün bunlar hamısı, təbii ki, İlham Əliyevin rolu nəticəsində baş verib. Bütün bu uğurlu siyasətin əsası ümummilli liderimiz Heydər Əliyev tərəfindən qoyulub. Möhkəm təməllər üzərində qurulan respublikamızı inkişaf etdirən Prezident İlham Əliyev bu uğurlu siyasəti davam etdirir.

Məlumdur ki, bu il bütün dünya dövlətləri üçün gərgin il olub. Dünya ölkələri maliyyə böhranı ilə üzləşib. Bu böhran özünü iqtisadiyyatın bütün sahələrində göstərmişdir. Amma bu böhranın ağır nəticələrini biz öz həyatımızda duymuruq. Çünki Azərbaycan Prezidenti İlham Əliyev böhranın aradan qaldırılması üçün önləyici tədbirlər həyata keçirib.

Mən cənab Prezidenti bu gün münasibəti ilə təbrik edirəm və o cümlədən, xalqımızı da təbrik edirəm ki, bizim xalqına bağlı olan, millətini sevən Prezidentimiz var.

Vəhdət partiyasının sədri Tahir Kərimli: “Cənab İlham Əliyevin qətiyyətli mövqeyi nəticəsində tezliklə ölkəmizin ərazi bütövlüyü bərpa olunacaq”

-Mən, əvvəla, Prezident İlham Əliyevi bugünkü gün münasibəti ilə təbrik edirəm. Ölkə ictimaiyyəti kimi Vəhdət partiyası olaraq hər zaman cənab İlham Əliyevin siyasi kursunu dəstəkləyirik. Ölkə başçısı alternativi olmayan liderdir. Bunu həm ölkə vətəndaşları, həm də dünya ictimaiyyəti qeyd edir. Azərbaycanın ÜDM-si 50 mlrd. dollara yaxınlaşır. Paytaxtda, eləcə də regionlarda quruculuq-abadlıq işləri həyata keçirilir. Azərbaycanın ən böyük problemi olan Dağlıq Qarabağ probleminin həlli istiqamətində ölkə başçısı ciddi işlər görür. Cənab İlham Əliyev Azərbaycan Televiziyasına verdiyi son müsahibəsində bu məsələyə toxunaraq, qeyd etdi ki, bu problem Azərbaycanın ərazi bütövlüyü çərçivəsində həllini tapacaq. Bu, bizdə bir daha inamı artırdı. Mən düşünürəm ki, Cənab İlham Əliyevin qətiyyətli mövqeyi nəticəsində bu münaqişə də tezliklə ölkəmizin ərazi bütövlüyü çərçivəsində öz həllini tapacaq.

CAHİD SÜLEYMANOV,

ANAR MƏCİDZADƏ

Səs.- 2009.- 16 oktyabr.- S. 9.