Milli müstəqilliyimizin 18-ci ildönümüdür

Elman Nəsirov: “Sovet İttifaqının güclü olacağı tədqirdə, heç şübhəsiz ki, müstəqillik ideyasının reallaşması üçün münbit şərait olmazdı”

Məlum olduğu kimi, 18 oktyabr Azərbaycan milli müstəqilliyinin qəbul olunmasının 18-ci ildönümü tamam olur. Şübhəsiz ki, ölkəmizin inkişafında, milli müstəqilliyimizin qorunmasında ulu öndər Heydər Əliyevin xidmətləri misilsizdir. Milli müstəqillik tariximizin keçdiyi bu yolu siz necə qiymətləndirirsiniz? Bu mövzu ilə bağlı politoloq Elman Nəsirova müraciət etdik.

- Hər bir xalqın tarixində müstəqillik günü əvəzedilməz bir gündür. Məhz müstəqillik günü həm ölkənin, həm də xalqın gələcək tarixi üçün başlanğıc nöqtəsi idi. Bu, nöqteyi-nəzərdən də, 18 oktyabr tarixi Azərbaycan dövlətçiliyi üçün əhəmiyyətli günlərdən biridir və bu baxımdan da, hesab edirəm ki, sovet imperiyasında gedən proseslər, sovet dövlətinin özünün dağılması labüd idi. Əslində, Azərbaycan yeni bir dövlət yaratmırdı, sadəcə olaraq, 1918-ci ildə yaradılmış Azərbaycan dövlətçiliyi bərpa olunurdu. Bu baxımdan, bu proseslərə qiymət verərkən, mütləq nəzərə almaq lazımdır ki, müstəqilliyə aparan yol, ilk növbədə, sovet dövlətində baş verən sırf iqtisadi, siyasi, sosial proseslərin məntiqi davamı, məntiqi nəticəsi idi. Sovet İttifaqının güclü olacağı tədqirdə, heç şübhəsiz ki, müstəqillik ideyasının reallaşması üçün münbit şərait olmazdı. Ancaq Sovet İttifaqının dağılması prosesi artıq labüdləşmişdi. Təkcə Amerika ekspertlərinin hesablamalarına görə, Sovet İttifaqı hərbi xərclərinə büdcədən 50 faiz ayırırdı. Təbii ki, ABŞ-la yarışa və mübarizəyə Sovet İttifaqı davam gətirə bilməzdi. 1991-ci ildə onun dağılması labüd idi və bu, reallaşdı. Ondan sonra Sovet İttifaqı tərkibində olan bir çox xalqlar kimi, Azərbaycan da öz müstəqilliyini qazandı. Lakin ümummilli liderimiz Heydər Əliyevin təbirincə desək, müstəqillik qazanmaq işin başlıca cəhət olsa da, əsas məsələ həmin müstəqilliyi qoruyub saxlamaqdan ibarətdir. Çünki müstəqilliyin əldə edilməsi, hələ o demək deyildir ki, o, davamlı olaraq qalacaqdır. Ona görə ki, müstəqillik əldə edildikdən sonra bəzi qüvvələr baş qaldırır və yenidən əvvəlki vəziyyətə qayıtmaq istəyən qüvvələr fəallaşırlar. Eyni zamanda, biz Azərbaycanda da bunun şahidi olduq. 1994-cü ilin oktyabrında, 1995-ci ilin martında dövlət çevrilişinə cəhd hadisələri bunun əyani sübutudur. Bu, nöqteyi-nəzərdən, hesab edirəm ki, bütövlükdə, 18 oktyabr hadisəsi sovet məkanında baş verən geosiyasi proseslərin məntiqi nəticəsi idi və bu proseslərdən Azərbaycan xalqı səmərəli şəkildə istifadə etdi və öz müstəqilliyini elan edə bildi. Bütün bunlardan sonra, Azərbaycanın müstəqilliyinin möhkəmləndirilməsi və daha da yaxşı gücləndirilməsi artıq ümümmilli liderimiz Heydər Əliyevin adı ilə bağlıdır və ondan sonrakı dövrdə həm iqtisadi, həm siyasi və həm də digər sahələr üzrə Azərbaycan regionda böyük gücə və potensiala malik dövlətə çevrildi. Bu gün də həmin siyasət Prezident İlham Əliyev tərəfindən həyata keçirilməkdədir.

Gülyanə AĞAKƏRİMOVA

Səs.- 2009.- 16 oktyabr.- S. 9.