9 ayın yekunları Nəsimi rayon icra hakimiyyətində müzakirə olundu

Dünən Nəsimi rayon icra Hakimiyyətində 2009-cu ilin 9 ayı ərzində sosial-iqtisadi inkişafının yekunlarına dair müşavirə keçirildi. Müşavirəni giriş sözü ilə Nəsimi rayon icra hakimiyyətinin başçısı Nəsib Məhəməliyev açaraq, qeyd etdi ki, bu müddət ərzində ölkə iqtisadiyyatı öz dinamik inkişafını davam etdirib.

O bildirdi ki, son illər iqtisadi inkişaf sürətinə görə, dünyada lider olan Azərbaycan iqtisadiyyatı öz inkişaf tempini qoruyub saxlayıb: “2009-cu ilin 9 ayı ərzində ölkədə ÜDM-in artımı 6,1, sənaye istehsalının artımı 5, kənd təsərrüfatında artım 3, əhalinin pul gəlirləri 8 faiz, əhalinin banklara qoyduğu əmanət 11, rabitədə 10,4, nəqliyyatda 5,4 faiz artıb. Cari ilin 9 ayı ərzində inflyasiya 2,1 faiz olub, strateji valyuta ehtiyatları ilin əvvəli ilə müqayisədə 1 mlrd dollar artaraq 19,1 mlrd, səkkiz ay ərzində xarici ticarət dövriyyəsi 12,4 mlrd, o cümlədən, ixrac 8,6 mlrd, idxal 3,8 mlrd dollar təşkil edib, 4,8 milyard dollar həcmində müsbət saldo yaranıb. 9 ay ərzində orta aylıq əmək haqqı 15,5, əhalinin gəlirləri 9,8, adambaşına düşən gəlirlər 8,4, pullu xidmətlər isə 12,5 faiz artıb. Ərzaq məhsullarının tərkibinin adambaşına enerji miqdarı 24,20 kilokaloriyə çatdırılıb ki, bu da MDB məkanında ən yüksək göstəricilərdən biridir. Dünya İqtisadi Formununun 2009-2010-cu illər üçün hazırladığı “Qlobal Rəqabətlilik Hesabatı”nda Azərbaycan 18 pillə irəliləyərək, 133 ölkə arasında 51-ci yerə, MDB ölkələri arasında isə birinci yerə yüksəlib”.

İcra hakimiyyətinin başçısı onu da vurğuladı ki, pensiyalar artır, ünvanlı sosial yardım proqramı uğurla icra edilir və bu gün 150 min ailəyə ünvanlı sosial yardım göstərilib. Həmçinin, bölgələrdə infrastruktur layihələri uğurla davam etdirilir. 2003-cü ildən bu günə qədər Azərbaycanda 824 min yeni iş yerləri açılıb: “Ulu öndər Heydər Əliyevin müəllifi olduğu yeni neft strategiyasının davam etdirilməsi, Azərbaycanın enerji təhlükəsizliyinin möhkəmləndirilməsi, qeyri-neft sektorunun inkişafı, ölkədə əlverişli biznes və investisiya mühitinin formalaşdırılması, işsizlik, yoxsulluq problemlərinin həlli, əhalinin sosial müdafiəsinin gücləndirilməsi, infrastrukturun yeniləşdirilməsi kimi prioritet hədəflər 2009-cu ildə də cənab Prezidentin yeritdiyi iqtisadi siyasətin əsasını təşkil edir. Bütün dünya ölkələrində iqtisadi inkişafa ciddi zərbə vuran qlobal maliyyə böhranına rəğmən, Azərbaycanın bütün sahələrdə qazandığı yüksək nailiyyətlər, ilk növbədə, sistemli və düzgün koordinasiya olunmuş, fəaliyyətin məntiqi nəticəsidir. Fəal antiböhran tədbirləri həyata keçirən Azərbaycan dövləti ötən il milli iqtisadiyyatda müşahidə olunan yüksək inkişaf tempini qoruyub saxlamağa, hər bir mərhələ üçün qarşıda duran vəzifələri düzgün müəyyənləşdirməyə nail olub”.

N.Məhəməliyev onu da bildirdi ki, 2009-cu ilin 9 ayı ərzində Nəsimi rayonu üçün də bir çox sahələrdə əhəmiyyətli uğurların qazanılması ilə yadda qalıb: “2009-cu ilin yanvar-sentyabr aylarında Nəsimi rayonu sənayesində 113,5 mln manatlıq sənaye məhsulu istehsal edilib. Həmçinin, sənayenin dövlət sektorunda 16,9 mln, qeyri-dövlət sektorunda isə 96,6 mln manatlıq sənaye məhsulu istehsal edilib. Bu ay ərzində sənaye müəssisələrinin anbarlarında 1,2 mln manatlıq hazır məhsul yığılıb qalıb. “Bu müddət ərzində istehlak bazarı dinamik inkişaf etməkdə davam edib. Rabitə müəssisələri tərəfindən hüquqi və fiziki şəxslərə faktiki qiymətlərlə 4 mln manatlıq rabitə, nəqliyyat sektorunda fəaliyyət göstərən müəssisələr tərəfindən 202,3 mln manatlıq xidmət göstərilib”.

N.Məhəməliyev 2009-cu ilin dekabr ayının 23-də keçiriləcək bələdiyyə seçikiləri ilə əlaqədar qanuna müvafiq işlər görüldüyünü diqqətə çatdırdı. Qeyd etdi ki, dairə və məntəqə seçki komissiyalarının yerləşdiyi inzibati binalarda cari təmir işləri aparılaraq, müvafiq avadanlıqlarla təchiz olunub, namizədliyi qeydə alınmış şəxslərin seçicilərlə görüş keçirmələri üçün qapalı və açıq yerlər müəyyənləşdirilib, təbliğat vasitələrinin yerləşdirilməsi üçün stendlər təmir edilib.” Dövlət başçısının tövsiyə və göstərişlərini rəhbər tutaraq, rayon rəhbərliyinə edilən müraciətlərin heç biri cavabsız qalmır və vətəndaşların problemlərinin aradan qaldırılması üçün mütəmadi işlər görülür.

Təhsil sahəsinədki uğurlara toxunan icra başçısının birinci müavini Zahid Xəlilov bildirdi ki, 2008-2009-cu tədris ilində rayon məktəblərini 2170 şagird bitirmiş, 1120 nəfəri ali məktəblərə daxil olmuş, onlardan 2 nəfəri isə Prezident təqaüdünə layiq görülüb: “2008-2009-cu tədris ilində keçirilmiş “Ən yaxşı müəllim” müsabiqəsində rayonunun 13 müəllimi ilin müəllimi hesab edilmiş, “Ən yaxşı ümumtəhsil məktəbi” müsabiqəsində rayonun 3 məktəbi qalib olmuş, 1 müəllim “Əməkdar” müəllim adına, 1 müəllim isə “Tərəqqi” medalına layiq görülüb. Eyni zamanda, məktəblərdə əsaslı təmir işləri aparılıb, yeni tədris ocaqları tikilib. Bu işlər, həmçinin, səhiyyə sahəsində də eyni irəliləyişlər olub. Belə ki, yeni korpuslar tikilib, xəstəxanalarda əsaslı təmir işləri aparılıb. 9 ay ərzində rayon ərazisində 14 siyasi partiyanın yeni təşkilatı, 26 beynəlxalq təşkilat və 7 dini qurum fəaliyyət göstərib. Həmin təşkilatlar haqqında mütəmadi məlumatlar toplanmış, araşdırılıb və sistemləşdirilib”.

Z.Xəlilov onu da bildirdi ki, Nəsimi rayonu Qaz İstismarı İdarəsi istehlakçılara verilən təbii qazın istismarı və satışını uğurla həyata keçirib. Onun sözlərinə görə, idarə 9 ay ərzində istehlakçılara 92016,1 min manat, o cümlədən, əhaliyə 57006,9 min manat təbii qaz satılıb: “Həmçinin, “Azərsu” ASC Nəsimi rayon filialı 55394 abonentə xidmət edir. Nəsimi rayon filialı üzrə 9 ay ərzində istehlakçılara 2177,7 min manat su satıb: “Nəsimi rayonu ərazisində “Azəristiliktəhcizat” ASC-yə məxsus 1 ədəd rayon istilik qazanxanası, məhəllədaxili qazanxana və 28 istilik məntəqəsi fəaliyyət göstərir ki, bu istilik mənbələri hesabına rayon ərazisindəki binalar istilik enerjisi ilə təmin olunurlar. 321 yaşayış binasından 184-ü, 23 orta məktəb, 14 uşaq bağçası, 5 səhiyyə obyekti və 30 digər təyinatlı obyektlər istilik enerjisi ilə təmin olunur”.

Qeyd edək ki, rayon ərazisində ilin əvvəlindən başlanılmış genişmiqyaslı abadlıq və yenidənqurma işləri davam etdirilib. Bir neçə prospektlərdə yeni yaşıllıq zolaqları salınmış, müxtəlif növ ağac və dekorativ kollar əkilib.

Müşavirədə bir çox məsələlərə toxunuldu.

Sevinc NƏZƏROVA

Səs.- 2009.- 24 oktyabr.- S. 10.