Ölkədə təhsilin inkişafı üçün böyük perspektiv yaranıb

YAP üzvləri “Elitar” gimnaziyada şagirdlərlə görüş keçiriblər

Dünən Yeni Azərbaycan Partiyasının Sədr müavini, İcra katibi, Milli Məclisin üzvü Əli Əhmədov, YAP İdarə Heyətinin üzvləri, Prezident Administrasiyasının ictimai-siyasi məsələlər şöbəsinin müdiri Əli Həsənov, YAP İcra katibinin müavini, millət vəkili Siyavuş Novruzov, Milli Məclisin vitse-spikeri Bahar Muradova, təhsil naziri Misir Mərdanov, Kərim Kərimov, millət vəkili Nizami Xuduyev, Bakı Dövlət Universitetinin rektoru, millət vəkili Abel Məhərrəmov və “Yeni Azərbaycan” qəzetinin baş redaktoru Hikmət Babaoğlu və digər qonaqlar “Elitar” gimnaziyada yaradılmış şərait şagirdlərin dərs hazırlığı ilə tanış olmuşlar. “Elitar” gimnaziya ilə qonaqları tanış edən təhsil naziri Misir Mərdanov sentyabrın 15-də dərs günü ilə əlaqədar olaraq cənab Prezident İlham Əliyev və onun xanımı Mehriban Əliyevanın iştirakı ilə açılışı edilən təhsil ocağında yaradılmış müasir şəraitdən və şagirdlərin bilik səviyyəsindən söhbət açmışdır. Nazir qeyd etmişdir ki, builki qəbul imtahanlarında gimnaziyanın məzunu olmuş 76 abituriyentdən 70-i yüksək balla ölkənin ən aparıcı ali məktəblərinə daxil olmuşlar. O cümlədən, bu təhsil müəssisəsində aşağı siniflərdə şagirdlər üçün tədris edilən etik normaları əhatə edən tədris prosesinin, onların gələcək perspektivi üçün müsbət əhəmiyyətini də qonaqların diqqətinə çatdıran M.Mərdanov gimnaziyanın sinif otaqları, kitabxanası, oxu zalı, idman zalı və digər guşələrini də təhsil ocağına gəlmiş qonaqlara təqdim etmişdir. Təhsil ocağında yaradılmış yüksək şəraitdən və burada mövcud müasir standartlara cavab verən təhsil avadanlıqları, təcrübə otaqlarının zəruri səviyyədə olmasını qeyd edən YAP İcra katibi Əli Əhmədov burada təhsil alan məktəblilər üçün hər bir şəraitin mövcud olduğunu qeyd etmişdir. Ə.Əhmədov ölkənin əksər elm və təhsil müəssisələrində də bu cür şəraitin olduğunu bildirərək, şagirdlərdən sadəcə yüksək elm almaq bacarığı tələb olunduğunu bildirmişdir. İcra katibi cənab Prezident İlham Əliyevin də açılışında iştirak etdiyi bu gimnaziyanın Azərbaycan təhsilinə və ölkədə savadlı kadrların hazırlanması istiqamətində böyük töhfələr verəcəyini vurğulamışdır: “Bu gimnaziyada yaradılmış şərait mövcud labarotor və digər kabinələr, sinif otaqları, dünyanın ən qabaqcıl təhsil müəssisələri ilə müqayisə edilə bilər. Ölkəmizdə təhsilə və elmə dövlət tərəfindən çox yüksək diqqət və qayğının olması hər kəsin gözü önündədir. Çünki savadlı və intellekti olan gənc kadrlara hər zaman ehtiyac duyulur. Bu baxımdan da, gimnaziyada təhsil alan və yüksək biliyə sahib olan gənclərin ölkəmizin ictimai-siyasi və digər sahələrində layiqli yer alacağına əminik. İnanırıq ki, burada təhsil alan hər bir gənc onlar üçün yaradılmış bu cür şəraitdən məharətlə istifadə edərək, gələcəyimizin savadlı və potensial kadrları kimi yetişəcəklər” deyən Ə.Əhmədov yeni tədris ilinin başlanğıcında ölkəmizin hər bir təhsil müəssisəsində elm alan gənclərə uğurlar dilədi.

Tapdıq QURBANLI

Səs.- 2009.- 18 sentyabr.- S. 5.