Məhərrəmlik ayının fəziləti çox böyükdür

Hacı İsmayıl: "Bu ayda insanlara haram, xoşəgəlməz əməllərdən uzaq durmaq tövsiyə olunur"

Hazırda hicri təqvimlə Məhərrəmlik ayıdır. İslamiyyətdə bu ayın öz fəziləti, öz dəyəri var. Bu ay bütün islam dünyasında mənəvi paklıq, saflaşma, ilahi hidayət ayı kimi qeyd edilir. Bəlli olduğu kimi, Məhərrəmlik ayında bütün müsəlmanlara nəyi etmək və ya nəyi etməməklə bağlı xüsusi tövsiyələr edilir. Azərbaycan müasir, dünyəvi dövlət olmaqla yanaşı, islam dünyasında böyük nüfuzu, öz yeri olan ölkədir. Ölkə vətəndaşlarının böyük əksəriyyəti məhz islam dininə etiqad edir. Odur ki, islama etiqad edən hər bir azərbaycanlı Məhərrəmlik ayında nəyi necə etmək, necə davranmaq barədə götür-qoy edir. Məhz bu zərurətə uyğun olaraq, hər bir müsəlman Məhərrəmlikdə xüsusi qaydalara əməl etməyə çalışır, nəyin doğru, nəyin yanlış olması barədə dərindən düşünür. Bunu nəzərə alaraq, müvafiq suallarla Qafqaz Müsəlmanları Ruhani İdarəsinin qazisi Hacı Əjdər bəy məscidinin axundu Hacı İsmayıla müraciət etdik. O, Azərbaycanda və yaxud ölkəmizdə milli dəyərlərin qorunub saxlanılması və təbliği istiqamətində görülən işlərin dünyanın əksər ölkələri üçün nümunəyə çevrildiyini söylədi:

- Hər bir müsəlman üçün Məhərrəmlik ayının fəziləti çox böyükdür. Allah-Taala Qurani-Kərimdə buyurub ki, o şəxslər ki, Quran- islam yolunda xalqımızın istiqlaliyyəti yolunda, vətəni, namusu yolunda şəhid olurlar, onlara siz ölü deməyin. Onlar ölü deyillər. Biz onları nemətləndiririk. Bu, Allah-Taalanın buyurduğudur. Bunlar o adamlardır ki, şəhid olublar, din uğrunda, xalqının namusu yolunda çalışıblar. Allah-Taala şəhidlərə nə qədər qiymət veribsə, onlara da o qədər, bəlkə də ondan da çox dərəcədə xoşbəxtlik verib. Allah-Taala buyurub ki, Məhərrəmlik ayında müsəlmanlar kafirlərlə müharibə aparmasınlar. Əgər müharibə olsa, onda həmin insanlar özlərini müdafiə etsinlər. Məhərrəmlik ayında möminlər insanları əyləndirən işlərdən uzaq olsalar yaxşıdır. Onun əvəzinə, Allah yolunda namaz qılsa, Quran oxusa, hansısa bir imkansıza istər maddi, istərsə də mənəvi cəhətdən əl tutsa, uşaq evlərində minlərlə valideyn himayəsindən məhrum olan uşaqlara köməklik göstərsələr, imamlarımıza və peyğəmbərlərimizə ehsan verdikləri kimi, şəhid ailələrinə də baş çəkib, onların həyatları ilə maraqlansalar, daha yaxşı olar və savab qazanmış olarlar. Əgər kimsə ad gününü qeyd etmək istəyirsə, deməlidir ki, Allahım mənim bu oğlum və ya qızımın ad gününü İmam Hüseyn Əleyhissəlamın (s) ruhuna sadağa kimi qəbul et. İndiki dövrdə insanlarımız belə başa düşür ki, namaz qılmaq və ya oruc tutmaq bir tək mollalara aiddir. Ancaq bu, belə deyil, namaz qılmaq, oruc tutmaq bütün müsəlman əhlinə aiddir. Lakin Allah-Taala tərəfindən hansısa əməllərə qadağa qoyulubsa, o əməlləri bizim müsəlman bacı-qardaşlarımız əməl etməməlidir. Bir sözlə, bütün bəd əməllərdən çəkinməli, əl çəkməlidirlər.

Məhərrəmlik ayında 72 insan din yolunda şəhid olub və peyğəmbərlərimiz məhz səfər ayında dünyasını dəyişib. Bu ayda insanlara haram, xoşəgəlməz əməllərdən uzaq durmaq tövsiyə olunur. Ümumiyyətlə, insanlarımız halal yolla ruzi qazanırlarsa, onların gələcəkləri də Allah-Taala tərəfindən işıqlı olacaq. Əgər haram yolla ruzi qazansalar, Allah-Taala onların ruzilərini kəsər. Bir sözlə, Məhərrəmlik ayında hər bir insan xeyirli əməllərlə məşğul olmalı və ilahi savab qazanmalıdır.

Gülyanə AĞAKƏRİMOVA

Səs.- 2009.-16 yanvar.- S.16.