Azərbaycan gəncliyi hər zaman dövlətin diqqət və qayğısını hiss edir

Müsahibimiz MM-in deputatı, Azərbaycan Gənclər Təşkilatları Milli Şurasının sədri Fuad Muradovdur

- Fuad müəllim, qarşıdan Azərbaycan gəncləri üçün əlamətdar hadisə olan 2 Fevral Gənclər Günü gəlir. Ümummilli liderimiz Heydər Əliyevin Azərbaycan gəncliyinə qayğısının tərənnümü olan bu gün hər il ölkədə yüksək səviyyədə qeyd edilir. Ümumiyyətlə, əsası ulu öndərimiz tərəfindən qoyulan dövlət gənclər siyasətinin əhəmiyyəti haqqında nə deyə bilərsiniz?

- Əlbəttə, dövlətimizin gənclər siyasəti ulu öndər Heydər Əliyevin adı ilə bağlıdır. Bilirsiniz ki, sovetlər ittifaqı dağılan ərəfədə və müstəqilliyimizin ilk illərində respublikada, bütün sahələrdə olduğu kimi, gənclərlə də iş yox səviyyəsində idi. Dövlətin diqqətindən kənarda qalan gənclər ölkəni ya tərk edir, ya da zərərli vərdişlərə qurşanırdılar. 1993-cü ildə ulu öndərimiz hakimiyyətə gələndən sonra artıq dövlət səviyyəsində gənclər siyasəti həyata keçirilməyə başlandı.

Ulu öndərin müəyyənləşdirdiyi strategiyanın tərkib hissəsi olaraq Azərbaycan gənclərinin inkişafı mərhələsi başladı və müxtəlif gənclər təşkilatları yarandı. Həmçinin, 1994-cü ildə Gənclər və İdman Nazirliyi də təsis olundu.

Xüsusilə qeyd etmək istəyirəm ki, hər zaman fəaliyyətinin bir hissəsini Azərbaycan dövlətçiliyinin inamlı və parlaq gələcəyi sayılan gənclərə həsr edən Prezident İlham Əliyev,dövləti tərəqqi yoluna çıxaran ulu öndər Heydər Əliyevin siyasi kursunu uğurla davam etdirdiyini sübut edir. Ümummilli liderin zəngin və möhtəşəm dövlətçilik fəaliyyətində gənclər siyasəti hər zaman xüsusi yer tutub. Ümidvaram ki, ölkə gəncləri tərəfindən böyük ruh yüksəkliyi ilə qarşılanan diqqət və qayğı Azərbaycan gəncliyinin cəmiyyətin həyatında tutduğu mövqeyin daha da möhkəmləndirilməsinə mühim təkan verməklə yanaşı əbədi müstəqillik, milli mənafe, bərabərhüquqlu sivil cəmiyyət kimi sağlam əqidə ətrafında birləşən gənclərimizin həyatında yeni səhifə açmaqdadır. Görülən işlər onu deməyə əsas verir ki, dövlətin gənclər siyasəti geniş bir sahəni əhatə edir.

- Parlament tərəfindən gənclərin cəmiyyətimizdə rolunun artırılması, onların təhsil almaq, işləmək, sosial problemlərinin həll edilməsi istiqamətində qanunlar qəbul edilib. Sizcə, bu qanunvericilik aktları qarşıya qoyulan məqsədlərə çatmaq üçün yetərlidirmi?

- Doğrudur, Milli Məclis "Dövlət gənclər siyasəti haqqında" qanun qəbul edib və bu qanun gənclərin hüquqlarını kifayət qədər qoruyur. Eləcə də, digər qanunlarda da müvafiq olaraq gənclərlə əlaqədar müddəalar öz əksini tapıb. Milli Məclisdə təmsil olunan gənc millət vəkilləri də vaxtaşırı olaraq bu qanunların təkmilləşdirilməsi üçün öz təkliflərini verir. Məsələn, bizim təklifimiz əsasında qanunvericiliyə belə bir müddəa əlavə edildi ki, əgər gənc işləyirsə və hərbi xidmətə yollanarsa, xidməti borcunu yerinə yetirəndən sonra öz işinə bərpa olunmalıdır. Ümumiyyətlə, dövlətimiz hər zaman çalışır ki, ölkəmizin gələcəyi olan gənclər barədə düşünülmüş addımlar atılsın.

- Azərbaycanda xeyli sayda gənclər təşkilatları fəaliyyət göstərir. Necə hesab edirsiniz, bu təşkilatlar müstəqil dövlətimizin inkişafına, möhkəmlənməsinə öz töhfələrini verə bilirmi?

- 1995-ci ildə yaranmış Gənclər Təşkilatlarının Milli Şurası 2000-ci ilin aprel ayında Avropa qitəsində ən nüfuzlu qeyri-hökumət təşkilatı olan Avropa Gənclər Forumuna tamhüquqlu üzv, 2002-ci ilin yanvar ayında isə BMT-nin İqtisadi Sosial Şurasına müşahidəçi seçilib. Həqiqətən, bu məqamlar müstəqil Azərbaycan gəncliyinin formalaşma və inkişaf mərhələsində kuliminasiya nöqtələri hesab olunar. Ümummilli liderimizin "biz dövlətin və cəmiyyətin idarə edilməsində gənc nəslin qüvvəsinə arxalanacaq, onların imkanlarından maksimum istifadə edəcəyik" cümləsi istedadlı və geniş potensiala sahib gənclərimiz üçün bir növ çağırış rolu oynadı. Bu fikir o zamanlar indi olduğu kimi ölkə gəncləri qarşısında geniş üfüqlər açdı, həyatda öz təsdiqini tapdı. Gənclər Milli Məclisin üzvü, nazir müavini və digər mühüm dövlət və hakimiyyət orqanlarında məsul vəzifələrə irəli çəkildilər.

Rəhbərlik etdiyim Azərbaycan Gənclər Təşkilatlarının Milli Şurası hazırda öz ətrafında 80-ə yaxın gənclər təşkilatını birləşdirir. Təşkilatlar öz fəaliyyətlərində ali məqsəd kimi dövlətimizin inkişafında rol oynamaq, ölkə Prezidentinin həyata keçirdiyi siyasətə dəstək olmaqdır. Gənclərimiz, həmçinin, xarici ölkələrdə Azərbaycanın təbliğatının aparılması ilə məşğul olur.

Mən bu gün tam əminliklə deyə bilərəm ki, Azərbaycan gəncləri öz intellektual səviyyələri ilə digər inkişaf etmiş ölkələrlə rəqabətə girir və tam məsuliyyətlə deyirəm ki, ölkəmizdə gənclərin intellektual bazası bir sıra öncül ölkələrlə bərabər səviyyədədir. Bu gün biz bunu görürük. İstər kütləvi informasiya vasitələrində işləyən, istərsə də dövlət qurumlarında çalışan, istər parlamentdə təmsil olunan, istərsə də beynəlxalq qurumlarda ölkəmizi təbliğ edən gənclər, təbii ki, dövlətin qayğısını öz üzərlərində daim hiss edirlər və onlara göstərilən etimadı doğrultmağa çalışırlar.Bu yöndə Azərbaycanda mövcud olan gənclər təşkilatları dövlətimizə köməklik məqsədilə müxtəlif sosial-siyasi-iqtisadi layihələr həyata keçirirlər.

- Azərbaycan Prezidentinin 2007-2015-ci illərdə "Azərbaycan gənclərinin xarici ölkələrdə təhsili üzrə Dövlət Proqramı"nın təsdiq edilməsi barədə sərəncamı gəncliyə göstərilən diqqətin daha bir parlaq təzahürüdür.

- Ölkə Prezidentinin sərəncamı ilə bu proqram əsasında 5000 gənc dünyanın nüfuzlu ali məktəblərində təhsil alacaqdır. Mən deyərdim ki, bu, çox faydalı bir proqramdır. Bunun müsbət nəticələrini biz gələcəkdə görəcəyik. Avropada təhsil alan gənc, təbii ki, ölkəsinə qayıdacaq və orda qazandığı bilikləri ölkəmizin inkişafı naminə sərf edəcək. Bütün bunlar, təbii ki, Azərbaycanın prioritetlərinin göstəricisidir.

Qeyd edim ki, proqram həyata keçiriləndə müəyyən araşdırmalar aparıldı və belə bir nəticə əldə edildi ki, xaricdə təhsil alan tələbələrin əksəriyyəti vətəninə qayıdır. Çünki bu gün ölkəmizdə işləmək üçün imkanlar çoxdur. Əgər gələcəkdə dövlətin xaricdə oxutdurduğu gənc xarici ölkədə qalsa belə, bunun ölkəmizə elə bir zərəri yoxdur. Çünki o, ölkəmizi xaricdə təmsil edə bilər. Etiraf etməliyik ki, bəzi sahələrdə boşluqlar var. Ona görə də, xaricdə təhsil almış gənclərimiz qayıdıb bu boşluqları doldurmalıdırlar. Bizim çalışdığımız odur ki, Azərbaycan gənci hər zaman dövlət qayğısını hiss etsin. Buraya, həmçinin,gənclərin asudə vaxtlarının səmərəli təşkili və yeni iş yerlərinin açılması məsələsi də daxildir. Təbii ki, ən vacib məsələlərdən biri də odur ki, Azərbaycan gənci dünyada baş verən qlobal məsələlərdən də kənar qalmasın.

- Gənclərin ölkənin ictimai-siyasi həyatında fəallığını necə qiymətləndirmək olar?

- Mən deyərdim ki, gəncliyimiz bu gün müxtəlif sahələrdə inkişaf edib. Bizim təşkilatımızın əsas vəzifələrindən biri də odur ki, hər bir gəncin istədiyi sahəyə yönəlməsinə yardımçı olaq. Şərt o deyil ki, gənclərin hamısı siyasətçi olsun. Siyasətə gedən yol da sosial-ictimai işlərdən keçir. Hansı sahədə çalışmasından asılı olmayaraq, dövlətin mənafeyini müdafiə etsin. Azərbaycan gənci hər zaman istər sosial-ictimai, istər siyasi məsələlərdə öz gücünü sınayıb. Bu istək genetikdir, dövlətçiliyin qorunması tarixən ali məsələ hesab olunub. Sirr deyil ki, prezident seçkilərində gənclər daha aktiv oldular və ölkədəki siyasəti dəstəklədilər. Mən deməzdim ki, gəncliyimiz tam siyasiləşib, sadəcə, belə bir təbəqə yaranıb ki, onlar öz gələcəklərini ancaq siyasətdə görürlər. Ümumiyyətlə, dövlətin hər bir addımı cəmiyyətin maariflənməsinə xidmət etməlidir. Martın 18-də ölkədə keçiriləcək referendum da bu qəbildən olan bir addımdır və bu məsələdə də gənclər çox aktivdir.

- Bəs bu təbəqənin əsas problemləri hansıdır və bu problemlər necə həll edilir?

- Müasir ictimai-siyasi arenanın sürətli inkişaf mərhələsinə şahidlik etdiyimiz bir zamanda Azərbaycan gəncliyinin problemlərinə baxış prizması yenilənməlidir. Əlbəttə, gənclərə diqqət və qayğı dövlət siyasətinin prioritet istiqamətlərindəndir. Lakin düşünürəm ki, fəal tərbiyə və gənclərin ictimai və dövlət quruculuğuna cəlb edilməsi bu qayğı və dəstəyin real təzahürü ola bilər. Demokratik, sivil cəmiyyətin təkamülü və inkişafı prosesində cəmiyyətimizdə cərəyan edən bir sıra sosial-iqtisadi, habelə, ictimai innovasiyalar ölkə gənclərinin həyatına inkişafla birlikdə mənfi və müsbət ünsürlər də daxil etmişdir. Həyat tərzi hər bir gəncin mənəvi güzgüsüdür. Gənclərin sağlam mənəviyyatı, dünyaya baxışı, ətrafındakılara münasibəti onun həyat tərzinə təsir edir. Məsələn, götürək cəmiyyətimizin özül və təməlini təşkil edən, gələcəyimizin aynası gənc ailələrimizi. Gənclər siyasətinin prioritet məsələlərindən biri də gənc ailələrin mənzil problemidir. Bu məsələ daim dövlət orqanları və hökumətin diqqət mərkəzindədir və ipoteka şərtlərinin sadələşdiriliməsi üçün konkret olaraq tədbirlər görülür.

İkinci məqam gənclərin əmək birjalarının respublika üzrə təşkil olunmasıdır. Azərbaycanda əmək yarmarkalarının təşkili əhali arasında işsizliyin aradan qaldırılmasında müəyyən rol oynayır. Digər tərəfdən, əxlaqi-mənəvi oriyentirlərin deformasiya etdiyi, zəif və iradəsiz gənclərin asanlıqla kriminogen çarxa düşdüyü və narkomaniya kimi bütün dünyanı sarsıdan bəlaya aludə olduğu bir şəraitdə, krizis yardım mərkəzlərinin açılması və mərkəz daxili psixoloqların pulsuz konsultasiyası zərurəti meydana çıxır.

Prezident İlham Əliyevin Sağlam həyat tərzi və sosial proqramlar sektorunun inkişafı məqsədilə imzaladığı fərmana əsasən respublika üzrə tikilib istifadəyə verilən milli olimpiya komplekslərini qeyd edərək, bu növ qurumların sağlam gənc nəslin yetişməsində, respublikamızda idman hərəkatının genişlənməsində, gənclərimizin pis vərdişlərdən ayrılmasında, onların cəmiyyətimiz üçün layiqli, fiziki və mənəvi cəhətdən güclü vətəndaş kimi formalaşmasında əvəzsiz rolunu vurğulamaq istərdim.

- Bu gün Azərbaycanın ən böyük problemi olan Dağlıq Qarabağ məsələsində gənclərimizin mövqeyi qənaətbəxş sayıla bilərmi?

- İlk növbədə, qeyd etmək istərdim ki, erməni faşistlərinin törətdiyi bəşəri miqyaslı cinayətlər və soyqırımlar, əfsuslar olsun ki, dünya ictimaiyyəti tərəfindən hələ də tanınmayıb. Düşüncəli, vətənpərvər, xalqını və torpağını sevən Azərbaycan gəncliyi də bu faktı anlayır və təbii ki, bu dəhşət dolu cinayətlərin beynəlxalq, siyasi-hüquqi arenada qiymətsiz qalmasına təəssüflənir. Təəssüf hissi etiraz hissini ucaltmaq istəyi doğurur. Müxtəlif ölkələrdə təhsil alan gənclərimizin bəzən yerli diaspor təşkilatları ilə, bəzən isi fərd və kiçik bir qrup olaraq səslərini ucaltmaq cəhdlərini müşahidə etmişəm. Rəsmi və qeyri-rəsmi qaynaqlardan əldə olunan şəkil və yazı materiallarının kütləvi yayımı, yerli radiolarda soyqırım və işğal günlərində gənc tələbələrimizin etdiyi çıxışlar, ilk baxışda dəryada bir damla kimi görünə bilər. Amma bu dünya ictimaiyyətinin gözündə mövqelərimizi möhkəmlədəcək, alqışa layiq və bizi zəfərə götürəcək addımlardır. Qarabağ dəhşəti unudulmamalıdır. Bu baxımdan, xüsusilə, təhsil ocaqlarında işğal günlərinin, soyqırım tarixlərinin yüksək səviyyədə qeyd olunmasını, Şəhidlər Xiyabanına, Fəxri Xiyabana ziyarətləri, ölkəmizin tarixi abidələrinə, muzeylərə ekskursiyaları, Qarabağ müharibəsi iştirakçıları ilə mütəmadi olaraq görüşlərin təşkilini məqsədəuyğun hesab edirəm.

Səs.- 2009.- 30 yanvar.- S. 6.