PREZİDENT İLHAM ƏLİYEV DAVOS İQTİSADİ FORUMUNUN "ENERÆİ OUTLOOK-2009" MÖVZUSUNDA İCLASINDA İŞTİRAK EDİB

İlham Əliyev: "Azərbaycanın enerji ehtiyatlarına Avropada tələbat böyükdür"

Xəbər verildiyi kimi, yanvarın 29-da Dünya İqtisadi Forumunun "Enerji Outlook-2009" mövzusunda iclası keçirilib. Böyük əhəmiyyətə malik bu iclasda Azərbaycan Prezidenti İlham Əliyev iştirak edib. Forumun əsas tədbirlərindən olan "Enerji Outlook-2009" iclasını açan "CNN-İnternational" televiziya kanalının aparıcısı Con Defterios Prezident İlham Əliyevi və digər qonaqları salamladı, bu iclasda qlobal iqtisadiyyatla bağlı ən aktual məsələlərin müzakirə olunacağını bildirdi. Son vaxtlar neftin qiymətinin aşağı düşdüyünü xatırladan Con Defterios bildirdi ki, bir il öncə dünya bazarında neftin 1 barrelinin dəyəri 100 dollardan yuxarı olanda ilin sonuna qədər "qara qızıl"ın qiymətinin 200 dollara çatması proqnozlaşdırılırdı. İndi isə neftin 1 barrelinin qiyməti 40 dollara bərabərdir. Bu baxımdan da iclasın əsas müzakirə mövzuları dünyada enerji təhlükəsizliyi, neftin qiymətinin hansı səbəbdən aşağı düşməsi və sabitləşməsi məsələləri olacaqdır.

HƏR ŞEY TƏLƏBATDAN ASILI OLACAQ

Con Defterios ilk sözü Azərbaycan Prezidentinə vermək istədiyini bildirərək dedi ki, OPEK-in Əlcəzairdə keçirilən son iclasında Azərbaycan quruma üzv olmayan hasilatçı ölkə kimi gündəlik hasilatı 300 min barrel aşağı salmağı, yəni son 2 ildə hasilatı ən aşağı həddə endirməyi təklif etmişdir. Bu iclas 2002-ci ildən bəri OPEK üzvü olan və üzvü olmayan ölkələrin bir araya gəldiyi ən böyük toplantıdır.

İclasın aparıcısı Prezident İlham Əliyevdən "2009-cu ilin proqnozuna dair deyilənlər nəzərə alınarsa, OPEK ölkələri, habelə Azərbaycan indi neft hasilatını kifayət qədər azaldıbmı, yoxsa bundan da az neft çıxarılmalıdır?" sualına cavab verməyi xahiş etdi.

Prezident İlham Əliyev suala cavabında dedi:

- Hesab edirəm ki, neft hasilatında elan edilmiş və hazırda həyata keçirilən azaldılma tədbirləri qiymətin sabit səviyyədə saxlanılması üçün kifayət edəcəkdir. Əlbəttə ki, hər şey tələbatdan, hasilatdan və öhdəliklərin hansı şəkildə yerinə yetirilməsindən asılı olacaqdır.

Azərbaycana gəldikdə isə, hasilatın həcmi hələ ki, o qədər yüksək deyildir. Lakin biz ümumi işə öz töhfəmizi verməyə çalışırıq. Biz də müxtəlif vasitələrlə qiymətin tarazlaşdırılmasına və enerji təhlükəsizliyində öz rolumuzu oynamağa çalışırıq. Hər iki məsələ bir-biri ilə əlaqəlidir və vacibdir. 5-6 il bundan əvvəl enerji təhlükəsizliyi məsələləri heç müzakirə edilmirdi. İndi isə bu, nəinki istehlakçılar, o cümlədən hasilatçılar üçün böyük bir problemə çevrilibdir. Hasilatçı ölkə kimi Azərbaycan öz enerji təhlükəsizliyinin təmin edilməsi üçün dünya bazarlarına müxtəlif çıxış marşrutlarının olmasında maraqlıdır.

Hesab edirəm ki, neft hasil edən ölkələrin birgə səyləri, eləcə də enerji siyasətinin bütün iştirakçıları - hasilatçılar, tranzit ölkələr və istehlakçılar arasında qarşılıqlı anlaşma hamımız üçün daha yaxşı şərait yaradacaqdır.

NABUKKO UZUNMÜDDƏTLİ ENERJİ TƏHLÜKƏSİZLİYİ DEMƏKDİR

Sonra iclasın aparıcısı Con Defterios bildirdi ki, Nabukko kəməri layihəsi 2003-cü ildən bəri dəfələrlə müzakirə olunubdur. Lakin Rusiya ilə Ukrayna arasındakı mübahisə bu layihənin reallaşmasına, belə demək olarsa, təkan vermişdir. Azərbaycan Prezidentinə ünvanlanan növbəti sual belə oldu: "İndi Azərbaycandan və Xəzər regionundan həmin kəmər üçün hasilatı əldə etməyin vaxtıdırmı?"

Azərbaycan Prezidenti İlham Əliyev suala cavabında dedi:

- Bizim üçün potensial bazarları dəqiq bilməyimiz çox vacibdir. Bu vaxta qədər Azərbaycan öz qazını qonşu ölkələrə ixrac edir. Hazırda Azərbaycanın qaz hasilatı mövcud infrastruktur və bazarlarla əhatə olunur. Lakin biz daha böyük miqdarda qaz hasil etmək ərəfəsindəyik. Növbəti beş il ərzində biz bu həcmi 2 dəfə artırmağı planlaşdırırıq. Məhz bu səbəbdən mövcud bazarlar kifayət deyildir.

Nabukko layihəsinin bir çox problemləri var idi: siyasi dəstək, siyasi iradə, maliyyə öhdəliyi və tranzit məsələləri. Bu layihəyə bir çox iştirakçılar cəlb olunmuşdur. Hesab edirəm ki, bütün iştirakçıların birgə səyi və güclü maliyyə dəstəyi bu layihənin irəlilədilməsinə yardımçı ola bilər. Biz öz təcrübəmizdən bilirik ki, ehtiyatlar olmadan boru kəmərini tikmək necə çətindir. Lakin biz öz tərəfdaşlarımızla - bp və digər şirkətlərlə bunu etdik. Biz neftin qiyməti təxminən 30 dollar olan vaxtda Bakı-Tbilisi-Ceyhan neft kəmərini tikdik. O zaman Azərbaycanın gündəlik neft hasilatı 200 min barrelə bərabər idi. Biz gündəlik həcmi 1 milyon barrel olan boru kəmərinə sərmayə qoymağa başladıq.

Bu səbəbdən hesab edirəm ki, Nabukko ölkələri və bu layihəni dəstəkləyən təşkilatlar daha cəsarətli olmalı, onlar bu layihəyə təkcə gəlir mənbəyi kimi baxmalı deyillər. Bu, enerji təhlükəsizliyidir. Enerji təhlükəsizliyi ümumi təhlükəsizliyə və uzunmüddətli müstəqilliyə aparır. Bu səbəbdən hesab edirəm ki, daha güclü siyasi iradə, daha aydın maliyyə dəstəyi olmalıdır. Azərbaycan kimi ölkələr həm tranzit, həm də təchizatçı ölkə rolunu oynayaraq, bu layihəyə dəstək vermək üçün əlindən gələni etməyə hazırdır.

İclasın aparıcısı dəyərli fikirlərinə görə Azərbaycan Prezidentinə təşəkkür etdi və bu məsələyə yenidən qayıdılacağını bildirdi.

Con Defterios OPEK-in baş katibinə müraciət edərək, 2008-ci ilin dördüncü rübündə dünya bazarında hasilatın azalmasının təşkilatda hansı narahatlıq yaratdığını və neftin qiymətini 40 dollar həddində saxlamaq üçün nə etməyin lazım olduğunu soruşdu.

OPEK-in baş katibi Abdullah Səlim Əl-Bədri bildirdi ki, istehsalın həcmi ilə bağlı məsələ qurumun martın 15-də keçiriləcək iclasında yenidən müzakirə olunacaqdır. Neft istehsal edən ölkələrin mövqeyi ondan ibarətdir ki, "qara qızıl"ın indiki qiyməti çox aşağıdır və hasilatçı ölkələri təmin etmir. Neft hasil edən ölkələr enerji sahəsi ilə yanaşı, infrastruktura da sərmayə qoyur. Bizi hətta neftin barrelinin 50 dollar olması da qane etmir. Ötən əsrin 80-ci illərində baş verən hadisələrin təkrarlanmasını istəmirik. O zaman biz yüksək peşəkar işçiləri ixtisar edirdik və yeni sərmayələr qoymurduq.

"Biz artan tələbata hazır olmalıyıq" deyən OPEK-in baş katibi bildirdi ki, məqsəd neftin qiymətini 60-80 dollar səviyyəsində saxlamaqdır. Neftin qiymətinin aşağı düşməsinə baxmayaraq, hasilatı genişləndirmək üçün əlavə infrastruktura sərmayə qoymaq vacibdir, çünki tələbat artdığı halda, istehsalçı ölkələr buna hazır olmalıdır.

OPEK-in baş katibi onu da bildirdi ki, hazırda təşkilatın neft ehtiyatları mövcud nəql marşrutlarının ixrac edəcəyi həcmdən qat-qat çoxdur.

Neft hasilatının indiki səviyyədə qalıb-qalmaması ilə bağlı suala isə BP şirkətinin prezidenti Toni Heyvord cavab verdi. O dedi ki, bunu proqnozlaşdırmaq çox çətindir, çünki gələcəkdə baş verə biləcək hadisələr qlobal iqtisadiyyatdan asılıdır. Hazırda dünya ölkələrində iqtisadi artım, demək olar ki, dayanmışdır. Bu səbəbdən də "qara qızıla" tələbat o qədər də böyük deyil və bu, nəticə etibarilə neftin qiymətinin aşağı düşməsinə səbəb olmuşdur. Hesab edirəm ki, münasib qiymət 60-80 dollar arasında olmalıdır. Bu qiymət OPEK-ə üzv ölkələrə büdcələrini tarazlaşdırmağa, zəruri sosial proqramları maliyyələşdirməyə, habelə gələcək enerji ehtiyatlarının təminatçısına çevriləcək yeni yataqlara sərmayələr yatırmağa şərait yaradacaqdır.

bp prezidenti iqtisadi dirçəliş bərpa olunduqdan sonra "qara qızıla" tələbatın yenidən artacağını da dedi.

Hindistanın "Reliance İndustries" şirkətinin sədri Mukeş Ambani "Neftin qiymətinin aşağı düşməsi sizi hasilata sərmayə qoymaqdan çəkindirməyəcəkmi?" sualına cavabında bildirdi ki, onun ölkəsi neftin təxminən 80 faizini idxal edir. Buna baxmayaraq, bu il Hindistanda iqtisadi artım sürətinin ikirəqəmli olması proqnozlaşdırılır. Ölkənin şərq hissəsində yataqlar var və hazırda bu yataqların işlənilməsi prosesi gedir. Növbəti aylarda biz neft hasilatını nəzərdə tuturuq və əlverişli qiymətə satacağıq.

Mukeş Ambani dedi ki, dünyanın bundan sonrakı 100 il üçün neft ehtiyatı var. Bu baxımdan bütün ölkələr ekoloji cəhətdən təmiz dünyaya körpü salmalıdırlar. İnkişaf etmiş ölkələr isə bu körpünün yaradılması ilə bağlı dünyaya təqdim oluna biləcək platformalar hazırlaya bilər. Sonra Fransanın EDF enerji şirkətinin prezidenti Pyer Qadeniya "Avropanın nüvə enerjisi ilə bağlı növbəti 10 il ərzində hədəfi nə olmalıdır?" sualına cavab verdi. O, "iqtisadi dirçəliş bərpa olunduqdan sonra "qara qızıla" olan tələbat yenidən artacaq" fikri ilə razı olduğunu bildirdi.

Pyer Qadeniya dedi ki, indi neft və qaza alternativ olan sahələrə, o cümlədən rəhbərlik etdiyi şirkətinin də cəlb olunduğu nüvə enerjisi sahəsinə sərmayə qoymağın vaxtıdır. Enerji sektorunun uzunmüddətli perspektivinin hazırda yaşadığımız iqtisadi böhranla heç bir əlaqəsi yoxdur. Bildiyiniz kimi, dünya iqtisadiyyatı yenidən öz inkişaf xəttinə qayıdacaqdır. Bunun neçə aylar, yoxsa illər sonra baş verəcəyini heç kim deyə bilməz. Lakin biz bilirik ki, bu, baş verəcəkdir.

EDF şirkətinin prezidenti lazım olan enerjinin nüvə sahəsində də mövcud olduğunu, bu sahəyə sərmayə yatırmağın zəruriliyini diqqətə çatdırdı. O, təmsil etdiyi şirkətin Fransa, Böyük Britaniya, Çin və Amerikada nüvə enerjisi sahəsinin yeniləşdirilməsində əsas rol oynamağa hazır olduğunu dedi.

Pyer Qadeniya onu da etiraf etdi ki, nüvə enerjisi istehsalçılarının üzləşdiyi ən böyük maneə ictimaiyyətin bu sahənin təhlükəsiz və ekoloji cəhətdən əlverişli olmasına dair şübhələridir.

Müzakirələrə Birləşmiş Ştatların "Bunge Limited" şirkətinin sədri Alberto Vayzer də qoşuldu. O, bioyanacağın da neft və qaza alternativ olduğunu bildirdi və onun faydası ilə bağlı fikirlərini bölüşdü. Onun sözlərinə görə, bioyanacağın istehsalı üçün tələb olunan ərazi ondan alınan faydanı üstələyə bilər. Alberto Vayzer bioyanacaq üçün zəruri olan kənd təsərrüfatı məhsullarını daha çox müxtəlifləşdirməyə çağırdı. Hazırda dünyada kənd təsərrüfatı və ümumiyyətlə ərzaq və qida məhsullarına artan tələbata baxmayaraq, "Bunge Limited" şirkətinin sədri bu növ yanacağın müəyyən töhfə verəcəyinə ümidvar olduğunu dedi.

ENERJİ BAZARININ BÜTÜN İŞTİRAKÇILARININ MARAQLARI NƏZƏRƏ ALINMALIDIR

Növbəti sual yenə Azərbaycan Prezidenti İlham Əliyevə ünvanlandı. Aparıcı dövlətimizin başçısına müraciətlə bildirdi ki, son iki ildə hasilatçı və tranzit ölkələr arasında yaranan müəyyən mübahisələrdən ən çox istehlakçılar əziyyət çəkir. Əgər son iki ildə siyasi səbəblərdən ehtiyatlar bağlı saxlanılırsa, o zaman beynəlxalq əməkdaşlıq necə olmalıdır?

Prezident İlham Əliyev suala cavabında dedi:

- Bu münasibətlər davranış, enerji siyasəti və belə demək olarsa, enerji fəlsəfəsi məsələsidir. Azərbaycana gəldikdə isə, biz artıq sübut etmişik ki, ölkəmiz etibarlı tərəfdaşdır. Biz öz istehlakçılarımız qarşısında bütün öhdəliklərimizi yerinə yetirmişik və regionumuzda hasilatçı, tranzit və istehlakçı ölkələr arasında çox səmərəli əməkdaşlıq var.

Şübhəsiz ki, biz öz enerji ehtiyatlarımıza ilk növbədə milli maraqlar və davamlı inkişaf nöqteyi-nəzərindən baxırıq. Eyni zamanda, biz bu ehtiyatlardan əməkdaşlığı daha da gücləndirmək və bu sahədə bizdən asılı olan dostlarımıza və ölkələrə dəstək məqsədi ilə istifadə etməyə çalışırıq. Bu halda o ölkələr nəzərdə tutulur ki, hazırda onlar qazın bazar qiymətləri ilə ayaqlaşa bilmir. Biz realist olmalıyıq. Bu səbəbdən də ədalətli qiymət və uzunmüddətli maraqlar arasında tarazlığı tapmaq çox vacibdir. Düşünürəm ki, bu yaxınlarda baş verənlərin müxtəlif səbəbləri ola bilər. Lakin əsas fərq yanaşmadadır. Əgər siz öz enerji ehtiyatlarınız vasitəsilə daha çox şey əldə etməyə və ya ərazinizdən istifadə edərək, daha ucuz qiymət əldə etməyə çalışırsınızsa, onda bu cür böhranlar qaçılmazdır. Əgər enerji bazarının bütün iştirakçılarının maraqlarını nəzərə alırsınızsa, onda uğur əldə etmək olar. Zənnimcə, bu mənada bizim təcrübəmiz nümunə ola bilər. Biz bu təcrübəni bölüşə və sübut edə bilərik ki, enerji ehtiyatları münaqişə və ya ayrı-seçkilik aləti kimi deyil, dostluq aləti kimi istifadə oluna bilər.

Sonra "Enerji təhlükəsizliyi və təchizatı, o cümlədən münasib qiymətlə bağlı beynəlxalq əməkdaşlıq necə olmalıdır" mövzusunda müzakirələr başlandı.

OPEK-in baş katibi Abdullah Səlim Əl-Bədri bildirdi ki, 2008-ci ildə neftin 1 barelinin qiyməti 147-150 dollar olanda məlum idi ki, bu, tələbatdan yox, möhtəkirlik yolu ilə yaranmışdır. O, tələbata zərbə vuran bu cür bazar möhtəkirliyinin gələcəkdə qarşısını almaq üçün beynəlxalq qaydaların hazırlanmasına çağırdı. Əl-Bədri dedi ki, biz sui-istifadə hallarının qarşısını tam ala bilmərik, bu, daim olacaqdır. Lakin hesab edirəm ki, bu prosesə qarşı müəyyən qaydalar tətbiq olunmalıdır. Bu mənada istehlakçı və təchizatçı tərəflərin əməkdaşlığı və dialoqu vacibdir.

Daha sonra iclas iştirakçılarının diqqətinə 2000-ci ildən bəri neftin qiymətində müşahidə edilən dəyişikliklər təqdim olundu. Bildirildi ki, son 9 ildə neftin 1 barrelinin qiyməti orta hesabla 50 dollar 12 sent təşkil etmişdir.

İclasın aparıcısı dedi ki, Səudiyyə Ərəbistanında keçirilən toplantıda neft nazirləri bildirmişlər ki, növbəti 10-20 ildə "qara qızılın" hasilatını planlaşdırmaq üçün neftin bir barrelinin qiyməti 75 dollar olmalıdır.

"Qlobal iqtisadiyyata ziyan vurmadan və sərmayə yatırımlarını həvəsləndirmək üçün neftin münasib qiyməti nə qədər olmalıdır?" sualına cavabında bp şirkətinin prezidenti Toni Heyvord bildirdi ki, növbəti 20 ildə qlobal enerji sənayesinə ildə 25-26 trilyon dollar həcmində sərmayə qoymalıdır ki, dünyada tələbat təmin olunsun. Neftin qiyməti isə sərmayə qoyulmasına sövq edəcəkdir. Bir sözlə, hasilatçı ölkələrin sosial yönümlü sahələri maliyyələşdirməsi və enerji sahəsinə yeni investisiyalar yatırması üçün neftin bir barrelinin qiyməti 60-80 dollar arasında olmalıdır.

Fransanın EDF şirkətinin sədri Pyer Qadeniya isə bildirdi ki, neftin bir barrelinin qiymətinin 60-80 dollar civarında saxlanılması üçün hökumətlər səylər göstərməlidir. Amma nüvə enerjisi bu qiymətdən daha əlverişlidir və bu növ enerjini istehsal etməyə imkan var, ondan da istifadə olunmalıdır. Buna nail olmaq və bu növ enerjinin təhlükəsiz olduğuna inandırmaq üçün ictimai rəy də formalaşmalıdır.

Yenidən müzakirələrə qoşulan "Reliance Industries" şirkətinin sədri Mukeş Ambani isə neftin 60-80 dollar arasındakı qiymətinin həm hasilatçılar, həm də istehlakçılar üçün münasib olduğunu bildirdi. Bununla belə, tərəflər arasında şəffaflıq amilinin və neftin qiymətinin tarazlaşdırılması üçün müəyyən mexanizmin olmasının vacibliyini vurğuladı.

Daha sonra "Enerji Outlook-2009" iclasının iştirakçılarına suallar verildi.

ÖLKƏMİZ ŞAXƏLƏNDİRMƏ İLƏ BAĞLI YARANAN ÇƏTİNLİKLƏRDƏN ƏZİYYƏT ÇƏKMƏYƏCƏK

Londonda yerləşən Beynəlxalq Strateji Araşdırmalar İnstitutunun baş icraçı direktoru Con Çip Azərbaycan Prezidenti İlham Əliyevə sualla müraciət etdi:

- Sualım Prezident İlham Əliyevə və bp-nin prezidenti Toni Heyvordadır. Dünən Rusiya hökumətinin sədri Vladimir Putin Şərqdən Qərbə gedən boru kəmərlərinin şaxələndirilməsindən danışdı. Zənnimcə, o, Rusiyadan və ona dost münasibətdə olan ölkələrin ərazisindən keçən boru kəmərlərini nəzərdə tuturdu. Lakin Nabukkonu xüsusi olaraq təriflədiyini eşitmədim. Dünən Almaniya kansleri Angela Merkel də Avropa İttifaqı ilə Rusiya arasında uzunmüddətli və etibarlı münasibətlərin əsas meyarı kimi enerjidaşıyıcıları kəmərlərinin müxtəlif marşrutlarının olmasının zərurətini vurğuladı. Sualım hər iki natiqədir. Rusiya ilə Avropa İttifaqı arasında bu cür enerji durumu baxımından siz hansı məsləhətləri verərdiniz? Eyni zamanda, Avropa İttifaqı-Rusiya enerji təhlükəsizliyi paketinə salına biləcək hansı məsələləri siz istənilməz hesab edərsiniz? Buyurun, Prezident Əliyev və Toni Heyvord.

Prezident İlham Əliyev suala cavabında dedi:

- Azərbaycana gəldikdə, onu deyim ki, planlaşdırdığımız bütün layihələri vaxtında və yüksək səmərə ilə başa çatdırmışıq. Bu gün bizim şaxələndirmə ilə bağlı heç bir problemimiz yoxdur. Əksinə, bizim karbohidrogen ehtiyatlarımızı müxtəlif istiqamətlərə nəql edə biləcək 7 neft və qaz kəmərimiz var. Biz təkcə bir marşrutdan və yeganə bir bazardan asılı deyilik.

Ətrafımızda yerləşən ölkələr bizim ehtiyatlarımıza ehtiyac duyur. Bu, bir az qəribə görünə bilər, lakin hətta bizdən daha çox neft, qaz hasil edən ölkələr də bizim neft və qazı almaq üçün təkliflər irəli sürmüşlər. Bu səbəbdən də növbəti illər ərzində biz şaxələndirmə ilə bağlı yaranan çətinliklərdən əziyyət çəkməyəcəyik.

Biz hazırda yeni bazarların necə tapılması və istədiyimiz qədər neft çıxara bilmək üçün mövcud boru kəmərlərini necə genişləndirmək haqqında düşünürük. Bunu etmək üçün bizə yeni bazarlar lazımdır. Yeni bazarlar hazırdır. Onlar Qərbdə, Mərkəzi Avropada yerləşir və yeni bazarlar Nabukko kəməri, Türkiyə, Yunanıstan, İtaliya, Transadriatik kəməri və digərləri ola bilər.

Beləliklə, hazırda bizim ehtiyatlara tələbat mövcud infrastruktur vasitəsilə təchiz oluna biləcək miqdardan qat-qat artıqdır. Beləliklə, biz növbəti illər ərzində qonşuluğumuzda bəzən o qədər də xoşa gəlməyən hadisələrin inkişafını izləyəcəyik. Şübhəsiz ki, biz regionda daha sıx əməkdaşlıq görmək istəyirik, çünki bu və ya digər halda bu gərginliklər öz mənfi təsirini göstərir. Bu da, öz növbəsində, qlobal enerji sektorunda əlavə gərginlik yaradır. Biz bunu görmək istəmirik. Biz gözlənilən və davamlı təchizat marşrutlarını və bütün iştirakçılar arasında qarşılıqlı anlaşmanı görmək istəyirik.

AZƏRBAYCAN ENERJİ TƏRƏFDAŞI KİMİ DİGƏR ÖLKƏLƏRƏ NÜMUNƏDİR

Sonra bp şirkətinin prezidenti Toni Heyvord iki məsələni vurğuladı. Bunlardan birincisi açıq, azad, şəffaf və yaxşı idarə olunan enerji bazarı, ikincisi isə sabit fiskal və tənzimləyici rejimlər.

"Azərbaycan bu mənada nümunə ölkə kimi göstərilə bilər" deyən Toni Heyvord bildirdi ki, bütün bunlar bp və onun tərəfdaşlarını son on ildə 25 milyard dollar sərmayə qoymağa sövq etmişdir. Bu isə Azərbaycan Prezidentinin də dediyi kimi, enerji infrastrukturunun yaradılmasına imkan vermişdir.

"Biz Azərbaycanla çox uğurlu tərəfdaşlıqdan məmnunuq. Çünki Azərbaycan açıq, azad, şəffaf və yaxşı idarə olunan enerji bazarı qaydalarına riayət etmişdir, sabit fiskal və tənzimləyici rejimlər isə bizə Azərbaycanda müxtəlif istiqamətlərə infrastruktur qurmağa imkan yaratmışdır" deyən bp şirkətinin rəsmisi onu da əlavə etdi ki, bu da öz növbəsində çoxsaylı istehlakçı deməkdir.

Toni Heyvord bunun Azərbaycana böyük fayda gətirdiyini, xüsusilə də siyasi müstəqillik, enerji və maliyyə sahəsində müstəqillik verdiyini diqqətə çatdırdı. Daha sonra iclas iştirakçıları digər suallara cavab verdilər.

NAİB NİFTƏLİYEV

Səs.- 2009.- 31 yanvar.- S. 2-3.