Şərq" qəzeti də seçildi

Jurnalist Qadınlar Assosiasiyası qalibləri mükafatlandırıb

Ötən ilə yekun vuran Jurnalist Qadınlar Assosiasiyası (JQA) ötən gün media qurumlarını və ayrı-ayrı şəxsləri mükafatlandırıb.

Muğam klubunda keçirilən təqdimetmə mərasimində assosiasiyanın prezidenti Sevinc Yusifova bildirib ki, rəhbərlik etdiyi qurum milli mətbuatın inkişaf etdirilməsi, müstəqil KİV-in fəaliyyəti üçün münbit şəraitin yaradılması, qadınlar arasında liderlik keyfiyyətinin aşılanması, milli mətbuatın texniki bazasının yaxşılaşdırılması və dövlətlərarası jurnalist mübadiləsi sahəsində işlərini davam etdirir: "Təşkilatın məqsəd və məramına uyğun olaraq hər il "İlin ən yaxşı jurnalist qadını"nı seçir və jurnalistikamıza öz töhfələrini verən mediaya dəstək olan diplomatlara, dövlət məmurlarına, hüquqi şəxslərə mükafatlar təqdim edirik. Bu gün də ənənəsinə sadiq qalan JQA 2009-cu ilin yekunlarına əsasən müxtəlif nominasiyaların qaliblərini elan edəcək. Bu addımı atmaqla biz ictimaiyyətin diqqətini medianın mövcudluğuna cəlb edərək müstəqil mətbuatın inkişafının vacibliyini və əhəmiyyətini cəmiyyətin diqqətinə çatdırmaq istəyirik. Qaliblər təşkilatın idarə heyəti üzvlərinin, ekspertlər qrupunun rəyləri və sosioloji sorğunun nəticələri əsasında müəyyənləşdirilib".

Bundan sonra nominasiyaların qalibləri mükafatlandırıldı.

Prezident Administrasiyasının ictimai-siyasi şöbəsinin müdiri Əli Həsənov "Azərbaycanda milli mətbuatın inkişafındakı xidmətlərinə görə" diplomu ilə təltif olunub. ATƏT-in Bakı ofisinin rəhbəri Əli Bilgə Cankorel "Mətbuata açıq diplomat", xarici işlər nazirinin müavini Hafiz Paşayev isə "Mətbuata açıq dövlət məmuru" seçilib.

İlin yekunlarına görə, AzərTAc "İlin informasiya agentliyi", ELTV, "Kəpəz TV", "Kanal F" "İlin regional televiziyası", AzTV "İlin televiziyası", "Day.az" "İlin ən yaxşı xəbər portalı", "Azərbaycan qadını" jurnalı "İlin ən yaxşı qadın jurnalı", "Media forum" "İlin internet qəzeti", Təranə Məhərrəmova ("Kaspi" qəzeti), Gülşən Əliyeva (İTV) "İlin jurnalist qadını", Samirə Mustafayeva (ATV) "İlin xəbər aparıcısı", "İdman Azərbaycan" "İlin ən yaxşı idman kanalı", "Aktual xəbər" ("Xəzər TV") "İlin ictimai-siyasi verilişi" nominasiyalarında qalib gəliblər.

"Türk dünyası, türk xalqlarının ortaq tarixi haqqında maarifləndirmə, təbliğat işlərinə görə" mükafatı "Şərq" və "Olaylar" qəzetlərinə, "İlin region qəzeti" mükafatı "Mingəçevir işıqları"na, "Reportyor işinə görə" mükafatı Vüsalə Rüstəmovaya ("Bizim yol" qəzeti), "Jurnalistikaya verdiyi töhfələrə görə" mükafat Mətbuat Şurasının sədri Əflatun Amaşova, "Qadın və sağlamlıq məsələləri, "Genefondumuzu qoruyaq!" layihəsinin təşkilində göstərdiyi xidmətlərə görə" mükafatı "Qazelli" MMC-nin prezidenti Zərifə Həmzəyevaya, "Mətbuata göstərdiyi dəstəyə görə" mükafatı "Azercell Telekom" MMC-yə verilib.

Tədbir şirniyyat və çay süfrəsi ilə davam etdirilib.

Anar

Şərq.- 2010.- 5 mart.- S. 3.