Şəhidimiz qayıtdı

Hamı MÜBARİZ dərsindən "beş" aldı

Torpaq yalnız şəhidini belə ehtirasla qucaqlaya bilər

Vətən torpağı şəhidini qoynuna aldı... 4 ay sonra! Əvvəlcə o, qanını halal etdi Vətənə. İndi isə Vətən torpağını ona halal edir. Yəni başqa bir kimsənin torpağı bu qədər haqq etməsi mümkün deyil. Alim ola bilər, dövlət xadimi, lider ola bilər, Vətən üçün, xalq üçün ömrü boyu çalışan birisi ola bilər. Amma Vətən torpağını bunca haqq edən, torpağa bu qədər yaraşan birisi ola bilməz. Şəhiddən savayı! Şəhid, Vətəndir. Şəhid, Torpaqdır. Şəhid, bu millətin Özüdür! Onu millət uğrunda can verdiyi torpağa tapşırır. Srağagün Mübarizi, Fəridi tapşırdığı kimi. Sonuncu dəfə bu boyda izdihamı nə vaxt görmüşdü Bakı?!. 20 Yanvar şəhidlərini dəfn edərkən!.. Yenə də şəhid... Hansı yöndən baxsaq, şəhiddən savayı bunca elliklə, bunca kükrərti ilə kiminsə dəfn edildiyini görmək mümkün deyil. Torpaq yalnız şəhidini belə ehtirasla qucaqlaya bilər. Onların bir-birinə sevgisi inkarolunmazdır. Və əbədidir!..

Nəhayət, Mübariz 4, Fərid isə 2 aydan sonra Vətənə qayıtdı. Qayıtdı sözünü dırnaqarasına almaq da lazım deyil. Hansı mənada istəyirsiniz, başa düşün. Həqiqətən, şəhidimiz qayıdıb. Başlar üzərində gətirilib. Milyonlarla çiyin, əl, göz və ürək qarşılayıb şəhidlərimizi. Bu, əsl qayıdışdır. Millətin ürəyində olan birisinin, təkrar onun ürəyinə - Vətən torpağına qayıdışıdır. Hazırda haqqında ən çox danışılan məhz bu qayıdışdır. Ən çox baxılan məhz bu qayıdışı əks etdirən kadrlardır. Budur, Azərbaycan insanını haldan-hala salan, ürəyini dağa döndərən, qəlbini riqqətə gətirən. Və həmin dəfn mərasimində Ali Baş Komandanın iştirakı və çıxışı:

"Bu ilin iyun və sentyabr aylarında ölkəmizin ərazi bütövlüyü uğrunda gedən döyüşlərdə hərbçilərimiz Mübariz İbrahimov və Fərid Əhmədov qəhrəmancasına həlak olublar. Bu aylar ərzində biz çalışdıq ki, tezliklə onları Vətənə qaytaraq. Baxmayaraq ki, bu, çox çətin idi.

Ermənistan tərəfi heç bir sivil qaydalara əməl etmədən qəhrəman övladlarımızın meyitlərini qaytarmaqdan imtina edirdi. Bu, misli görünməmiş vəhşilikdir. Heç bir mənəviyyata, heç bir dini normalara sığmayan bir hərəkətdir... Mübarizlə Fərid Vətən uğrunda öz torpağında həlak olublar. Onlar əsl qəhrəmanlıq, rəşadət göstəriblər. Mübariz İbrahimov qeyri-bərabər döyüşdə 5 düşməni məhv edərək, 3-nü yaralayaraq şəhid olub. Mübariz yaxşı bilirdi ki, o döyüşdən sağ-salamat çıxa bilməyəcək. Ancaq Vətən, torpaq sevgisi, onda olan vətənpərvərlik ruhu onu şəhidlik zirvəsinə ucaltdı. Mübariz bütün gənclər üçün örnəkdir, nümunədir. Fərid Əhmədov da döyüş vəzifəsini icra edərkən həlak olub. Hər ikisi ölümündən sonra Azərbaycan dövləti tərəfindən yüksək mükafatlarla təltif olunublar. Mən şəhidlərimizin valideynlərinə, onların qohumlarına, yaxınlarına başsağlığı verirəm. Allah onlara rəhmət eləsin!

Şəhidlərimizin valideynlərinə minnətdarlığımı bildirmək istəyirəm ki, onlar Vətən üçün belə qəhrəmanlar böyüdüblər. Onların verdiyi tərbiyə - vətənpərvərlik tərbiyəsi Mübarizi və Fəridi mənəviyyat zirvəsinə ucaldıb. Təmas xəttində hər bir itki bizi sarsıdır, hər bir itki bizim üçün ağırdır. Ancaq biz müharibə şəraitində yaşayırıq və Mübarizlə Fərid öz həyatı ilə, öz qəhrəmanlığı ilə düşmənə sübut etdilər ki, Azərbaycan xalqı, Azərbaycan gəncləri Vətən uğrunda canlarından keçməyə də hazırdırlar. Bu, böyük qəhrəmanlıq, hünər, vətənpərvərlik nümunəsidir... Mən bilirəm, bütün bu aylar ərzində vətəndaşlarımız, müxtəlif bölgələrdə yaşayan vətəndaşlar şəhid övladlarımızın ailələrinə baş çəkib başsağlığı vermiş, öz həmrəyliyini göstərmişlər. Mübarizin və Fəridin qısa və şərəfli həyatı Azərbaycan xalqını daha da birləşdirdi. Bu gün, eyni zamanda, çox şərəfli bir gündür. Çünki biz öz övladlarımızı burada böyük ehtiramla son mənzilə yola salırıq. Əminəm ki, onların əziz xatirəsi Azərbaycan xalqının qəlbindən heç vaxt silinməyəcək. Bizim ordumuzda minlərlə, onminlərlə Mübariz, Fərid kimi qəhrəmanlar var. Onlar Ali Baş Komandanın əmrini gözləyirlər. Onlar öz doğma torpaqlarını azad etmək üçün hər an hazırdırlar. Azərbaycan Ordusu Cənubi Qafqazda ən qüdrətli, ən peşəkar, ən mübariz ordudur və şəhidlərimizin qəhrəmanlığı bunu bir daha sübut edir. Bizdə nəinki böyük sayda silah-sursat, hərbi texnika, döyüş imkanları vardır, eyni zamanda, ordumuzda böyük ruh yüksəkliyi var. Çünki bizim işimiz haqq işidir. Biz heç bir ölkənin torpağını zəbt etməmişik. Bizim torpaqlarımız uzun illərdir ki, işğal altındadır. Bizim heç bir başqa dövlətin torpağına iddiamız yoxdur. Amma öz torpağımızdan heç kimə bir qarış verməyəcəyik. Biz öz ərazi bütövlüyümüzü bərpa edəcəyik. Mübarizlə Fərid başqa ölkənin ərazisində həlak olmayıblar, öz doğma torpağında şəhid olublar.

Prezident bildirib ki, Azərbaycan gec-tez öz torpaqlarını işğaldan azad edəcək. "Biz istəyirik ki, bunu danışıqlar yolu ilə həll edək. Biz istəmirik ki, gənclərimiz şəhid olsun. Biz istəyirik ki, gənclərimiz yaşasınlar, oxusunlar, Vətən üçün, dövlət üçün çalışsınlar. Hər bir döyüş bölgəsində verilmiş itki bizim üçün ağırdır. Ona görə biz çalışırıq ki, bu məsələ öz həllini sülh yolu, danışıqlar yolu ilə tapsın. Danışıqlar prosesində Azərbaycanın mövqeləri getdikcə güclənir. Nəinki siyasi və hüquqi həqiqət bizim mövqeyimizi dəstəkləyir, bu gün istənilən parametr üzrə Azərbaycan Ermənistandan bir neçə dəfə üstündür. Bu üstünlüyü biz yaratmışıq, Azərbaycan xalqı yaradıb. Həm siyasi, həm iqtisadi, həm hərbi cəhətdən üstünlüyümüz artıq hər kəs üçün açıq-aydın görünür. Ancaq bununla bərabər, bu gün bu şərəfli gündə bir daha bəyan etmək istəyirəm ki, biz danışıqları sadəcə olaraq danışıqlar naminə aparmayacağıq.

Danışıqların imitasiyası ilə məşğul olmaq üçün Ermənistana imkan verməyəcəyik. Biz o vaxta qədər danışıqlar aparacağıq ki, ərazi bütövlüyümüzü bu yolla bərpa edə biləcəyimizə ümidimiz qalacaqdır. Əgər görsək ki, bu mümkün deyil, onda Azərbaycan dövləti hərbi yoldan istifadə edərək, öz ərazi bütövlüyünü bərpa edəcək. Mən şübhə etmirəm ki, bunun üçün bizdə bütün imkanlar - döyüş hazırlığı, maddi-texniki təchizat, kifayət qədər silah-sursat, peşəkar ordu, ruh yüksəkliyi və Azərbaycan xalqının iradəsi var. Biz ərazi bütövlüyümüzü istənilən anda hərbi yolla bərpa edə bilərik. Düşmən də bunu bilməlidir və bilir".

Ölkə başçısı Azərbaycanın ərazi bütövlüyünün danışıqlar mövzusu olmadığını və olmayacağını da bildirib: "Azərbaycan ərazi bütövlüyünü bərpa edəcək, Dağlıq Qarabağ bizim doğma, əzəli torpağımızdır. Əsrlər boyu Azərbaycan xalqı Dağlıq Qarabağda və ətraf bölgələrdə yaşayıb, yaradıb. Bugünkü Ermənistan dövləti tarixi Azərbaycan torpaqları üzərində qurulub. İrəvan xanlığı, Zəngəzur mahalı bizim tarixi torpaqlarımızdır. Biz heç vaxt imkan verə bilmərik ki, doğma torpağımız olan Dağlıq Qarabağda ikinci erməni dövləti yaradılsın. Heç vaxt Azərbaycan xalqı bu vəziyyətlə barışmayacaqdır. Bu gün məsələni həll etmək üçün bütün imkanlarımız var. Sadəcə olaraq çalışırıq ki, danışıqlar prosesindən maksimum dərəcədə istifadə edək. Biz istəmirik ki, müharibə olsun. Kim istəyər ki, müharibə olsun. Ancaq biz bu vəziyyətlə də heç vaxt barışmayacağıq. Biz bu gün bütün səylərimizi səfərbər etmişik ki, qarşıda duran vəzifəni icra edək. Bu gün şəhid övladlarımızın şücaəti, qəhrəmanlığı bir daha onu göstərir ki, biz buna qadirik".

Şəhidlərimizin nəşinin qaytarılması və izdihamlı dəfn mərasimi Qarabağ döyüşçülərinin də ürəyincə olub. Qarabağ Qaziləri İctimai Birliyinin sədri Etimad Əsədov "Şərq"ə açıqlamasında şəhidlərimizin dəfn mərasiminin ictimaiyyətdə yüksək ruh yüksəkliyinə səbəb olduğunu dedi:

- Şəhidlər hər zaman diridir. Bunu Rəbbimiz müqəddəs kitabımız "Qurani Kərim"də buyurur. Bu baxımdan Mübarizin ruhu da daim diridir. Ermənilər meyiti 4 ay qaytarmamaqla öz iyrəncliklərini təsdiqləyirdilər. Mübarizin ruhu 4 ay bundan əvvəl Vətən torpağına qovuşmuşdu. Dünən isə onun nəşi torpağa tapşırıldı. Və çox sevindiricidir ki, Azərbaycanın əsl milli qəhrəmanları, xalqın sevimlisinə çevrilmiş şəhidlərimizin dəfni dövlət səviyyəsində bu cür yüksək şəkildə təşkil olundu. Bu, ilk növbədə dövlət, Vətən qarşısında xidməti olan insanlara layiq olduqları qiymətin verilməsidir. Mən bu mərasimdə Prezident İlham Əliyevin iştirakını xüsusi vurğulamaq istəyirəm. Prezident bu mərasimdə əsl Ali Baş Komandan kimi çıxış etdi. Dəfn mərasimlərinin bu şəkildə təşkili və xalqın da kütləvi şəkildə axın etməsi cəmiyyətdə milli-vətənpərvərlik ruhunun yüksəlməsinə xidmət edir. Biz bu cür dəfn mərasimlərini adətən Türkiyə televiziyalarında izləyirdik. Ancaq dünənki (srağagünkü - red) mərasim sübut etdi ki, Azərbaycan xalqı da öz şəhidinin qiymətini, dəyərini bilir. Uzun illərdir belə izdihamlı, möhtəşəm mərasim olmamışdı. Bunu bizə şəhidlərimiz yaşatdı. Bu mərasim həm də bunu bir daha sübut etdi ki, torpaqlarımızın işğaldan azad edilməsi üçün hərb variantına üstünlük veriləcəyi təqdirdə Mübarizin, Fəridin yolunu davam etdirəcək oğullar var. Və onlar torpaqlarımızı azad etməyə qadir olacaqlar.

Vətəndaş Həmrəyliyi Partiyasının sədri, millət vəkili Sabir Rüstəmxanlı isə "Şərq"ə açıqlamasında Mübariz və Fəridin məzarının hər bir azərbaycanlının ürəyində olduğunu dedi:

- Biz Mübarizgilin ailəsini böyük bir dəstə ilə ziyarət etmişdik və İbrahimovların mənzilində divarda bu sözləri yazmışdıq: "Sənin məzarın bizim ürəyimizdir". Əslində, bu dəfn mərasimi simvolik bir hadisə idi. Çünki həqiqətən də, Mübariz, Fərid hər bir azərbaycanlının ürəyində yer qazanıb. Mən eyni sözləri Macarıstanda Ramil Səfərovla görüşərkən də demişdim. Orda gördüm ki, Ramil kitabın arasında Mübarizin şəklini saxlayır. Bilirsiniz, millətimiz qələbə həsrətindədir. Beynəlxalq güclər, Rusiya, həmişə Azərbaycanı Ermənistanın ayağına verməyə çalışırlar. Mən Azərbaycan Prezidenti İlham Əliyevin Azərbaycan Ordusunun şəhid hərbçiləri Mübariz İbrahimovla Fərid Əhmədovla vida mərasimindəki çıxışına da toxunmaq istəyirəm. Azərbaycan Prezidenti özünü əsl Ali Baş Komandan kimi apardı. Azərbaycan xalqına Mübariz kimi oğullar gərəkdir. Və bu cür mərasimlər xalqda ruh yüksəkliyinin artmasına səbəb olur.

Məlahət Rzayeva

Şərq.- 2010.- 9 noyabr.- S. 8.