Hafiz Nəsiroğlunun fərdi sərgisi açılıb

Rəssamlar İttifaqında Əzim Əzimzadənin 130 illik yubileyi ilə əlaqədar karikaturaçı rəssam Hafiz Nəsiroğlunun fərdi sərgisinin açılışı oldu.

Sayca üçüncü fərdi sərgisini keçirən rəssam 100-dən artıq əsərini nümayiş etdirir. Eyni zamanda 30 iilik sənət yubileyini qeyd edən rəssam karikaturalarından ibarət kataloqu da təqdim etdi.

Sərgidə karikaturaçılarla yanaşı, sənətçilər və rəsmilər də iştirak edirdi. Bu il altmış illiyini qeyd edən Hafiz Nəsiroğlunu təbrik üçün gələnlər maraqlı karikaturalar arasında öz dostluq şarjları ilə də rastlaşdılar.

Dostluq şarjını görən xalq artisti Yaşar Nuri rəssamın əsərlərindən məmnun qaldığını dedi. "Bu gün gülməli olmayan yumorlardan bezənləri Hafizin karikaturaları düşündürür. 60 illiyini təbrik edirəm. Arzu edirəm ki, Hafizin əsərləri hər zaman güldürsün, düşündürsün".

İlk karikaturası 1991-ci ildə Hafiz Nəsiroğlu tərəfindən "Kirpi" jurnalına yerləşdirilən Bəhram Bağırzadə də təbrikə qatılaraq yeniliklərdən xəbər verdi: "Hafiz müəllimi təbrik edirəm. O gün olsun, 70-80-90 illiklərində görüşək."

Şərq.- 2010.- 1 oktyabr.- S. 14.