Mənsum İbrahimov - sevilməyə haqqı olan Məcnun

Azərbaycanın musiqi aləmində oktyabr ayı xalq artisti, mahir muğam ifaçısı Mənsum İbrahimovun 50 illik yubiley tədbirləri ilə yadda qaldı. Zəngin muğamlarımızı, xalq mahnılarımızı sevə-sevə ifa edən, onlara yeni ruh, yeni nəfəs verən xanəndənin yubileyinin belə təntənəli şəkildə qeyd olunması yaşanmış illərin mənasız və hədər keçmədiyini bir daha sübuta yetirir.

Mənsum İbrahimov o sənətkarlardandır ki, məqsədinə çatmaq üçün keçəcəyi yolların ağırlığını, çətinliyini duya-duya fikrindən dönməyib, muğam sənətinin inkişafı üçün bütün yaradıcılıq imkanlarını bu sahədən əsirgəməyib. Mərhum sənətkarımız Şövkət xanım Ələkbərovanın xeyir-duası və tövsiyəsi ilə Azərbaycan Dövlət Akademik Opera və Balet Teatrının səhnəsinə qədəm qoyan Mənsum İbrahimov 1993-cü ildən bu günə qədər Məcnun "yükünü" sonsuz məhəbbət və sədaqət hissləri ilə çiyinlərində daşıyır. O, təkcə səhnədə Leylisinin Məcnunu deyil, ailəsində öz xanımının, dostlar arasında dostlarının, ən ali və kövrək hisslərində Qarabağın Məcnunudur. O, heç vaxt belə görünməyə çalışmır, o, sadəcə dünyaya belə gəlib. Təsadüfi deyil ki, yubileyi ərəfəsində işıq üzü görmüş, Mustafa Çəmənlinin onun haqqında yazdığı kitab məhz "Məcnunun Məcnunu" adlanır.

Mənsum İbrahimov öz sənətinə təmənnasız xidmət edən sənətçilərdəndir. O, çəkdiyi zəhmətin bəhrəsini gözləmədən yeni-yeni uğurlara imza atır, tükənmir, usanmır. Təvazökarlığına baxmayaraq Mənsum İbrahimov zaman-zaman öz layiqli qiymətini alır. Ən böyük mükafatı xalqın ona olan böyük sevgisidir. Elə bəlkə də bunun nəticəsidir ki, konsertlərində ifa etdiyi muğamların, mahnıların sonluğu tarda Elçin Həşimovun, kamanda Elnur Əhmədovun müşayiəti ilə deyil, tamaşaçı alqışları ilə tamamlanır. İki dəfə Prezident mükafatına, xalq artisti fəxri adına layiq görülməsi, Azərbaycan Prezidenti İlham Əliyevin fərmanı ilə muğam sənətinin inkişafındakı xidmətlərinə görə "Şöhrət" ordeni ilə təltif olunması dövlət səviyyəsində Mənsum İbrahimova verilən qiymətin təzahürüdür.

Mənsum müəllim on ildən artıqdır ki, pedaqoji fəaliyyətlə də məşğul olur. Vaxtının azlığına baxmayaraq o, bu sahəyə olduqca ciddi yanaşır, xüsusi diqqət yetirir, gənc nəslin muğam sənətinin incəliklərinə yiyələnməsi üçün bilik və bacarığını əsirgəmir. Bu gün onun müəllim kimi mənəvi haqqı var ki, yetişdirdiyi və artıq respublikamızda yaxşı tanınan tələbələri haqqında qürur hissi ilə danışsın.

Muğamın, milli musiqimizin təbliğ olunması, dünyada tanınması Mənsum İbrahimovun yaradıcılıq fəaliyyətində ən önəmli yerlərdən birini tutur. O ABŞ-da, Kanadada, Belçikada, Fransada, İranda, Türkiyədə, İraqda, Lüksemburqda Azərbaycan muğamını böyük məharətlə təbliğ etmiş, muğam sənətinin sirli-sehrli bir möcüzə olduğunu dünya xalqlarına sübuta yetirməyə nail olmuşdur. Belə konsertlərin biri də bu ilin mart ayında Ukraynanın paytaxtında baş tutmuşdur. Kiyevdə yaşayan soydaşımız, Azərbaycan mədəniyyətinin yorulmaz təbliğatçısı Burzu Əliyevin təşəbbüsü və dəstəyi ilə Ukrayna Milli Akademik Opera və Balet Teatrında keçirilən simfonik muğam gecəsində Mənsum İbrahimovun ifası təkcə azərbaycanlıların deyil, gecədə iştirak edən ukraynalıların, digər xarici qonaqların Azərbaycan muğamına böyük marağına və məhəbbətinə səbəb olmuşdu.

Təbii ki, bütün əxlaqi dəyərləri özündə cəmləşdirməyi bacaran, sadəliyi ilə seçilən, "Şöhrət" ordenli xalq artisti Mənsum İbrahimova yubiley günlərində dostları, doğmaları, həmkarları, pərəstişkarları ən səmimi arzularını çatdırırlar. Ancaq ömrün əllinci aşırımında Mənsum müəllimin müsahibələrinin birində söylədiyi kimi özünün də özünə bir arzusu var: " Özümə arzu edirəm ki, inşallah, Cıdır düzündə oxuyum. Allah o günü mənə və hər birimizə qismət eləsin ki, Qarabağda bayramımızı qeyd edək. Çünki səbrimiz tükənib, Qarabağsız yaşamaq mümkün deyil".

Musiqidən, muğamdan yoğrulmuş Mənsum İbrahimov ömrü davam edir. Yəqin ki, hələ görüləsi işləri, həyata keçirəcəyi layihələri çoxdur. Yəqin ki, hələ yeni-yeni uğurları ilə pərəstişkarlarını daha çox sevindirəcək. Və qısa bir zaman kəsiyindən sonra Mənsum müəllim arzularının gerçəkləşdiyi günün də şahidi olacaq. Azərbaycanın musiqi beşiyi olan Qarabağda, Ağdamda, Şuşada, tac mahalımız Cıdır düzündə ən möhtəşəm konsertlərini verəcək, şah əsərini - "Qarabağ şikəstəsi"ni ifa edib Üzeyir bəyin ruhunu şad edəcək. Bax elə həmin gün Məcnun Mənsum İbrahimov öz sevgisinə qovuşacaq.

"Şərq" qəzeti vasitəsilə Mənsum İbrahimovun Ukraynada yaşayan pərəstişkarları sevimli xanəndəmizi ən xoş arzularla təbrik edir, sevilməyə haqqı olan Məcnuna daha böyük sevgilər diləyir. Tanrı səsinizdən Qarabağ ruhunu əskik etməsin. 50 yaşınız mübarək!

Azər Qardaşlı

Şərq.- 2010.- 28 oktyabr.- S. 14.