İki sahil" qəzetinin xüsusi buraxılışı nəşr edilib

Buraxılış Xoşbəxt Yusifzadənin 80 illiyinə həsr edilib

"İki sahil" qəzetinin neftçi-alim, akademik Xoşbəxt Yusifzadənin 80 illik yubileyi ilə bağlı xüsusi buraxılışı nəşr edilib. Redaksiyadan "OLAYLAR"İA-ya verilən məlumatda bildirilib ki, 40 səhifəlik xüsusi buraxılış akademik Xoşbəxt Yusifzadənin "Hələ ki, yaşayır, çalışır, düşünür, sözümü deyirəm və hərdən bu barədə fikirləşəndə yadıma dünyagörmüş kişilərin sözü düşür:

-Biz əlimizdən gələni, bacardığımızı etdik. Qoy bizdən sonra gələnlər onlara etibar edilən işləri bizdən də yaxşı görsünlər" fikri ilə başlayır. İkinci səhifədə ümummilli lider Heydər Əliyevin "Şahdəniz" yatağında əldə edilmiş nəticələrin təqdimat mərasimindəki nitqində Xoşbəxt Yusifzadə barədə söylədiyi fikirlər əksini tapıb. Sonrakı səhifələrdə Xoşbəxt Yusifzadənin neft sənayesində keçdiyi böyük həyat yolu, sevimli neftçi peşəsi, həmkarları, doğmaları, dostları haqqında fikirləri yer alıb. Ayrı-ayrı illərdə rastlaşdığı təsadüflərin Xoşbəxt Yusifzadəyə qazandırdığı uğurlar xüsusi buraxılışda diqqətə çatdırılır. Müstəqil Azərbaycanın ali mükafatları-"İstiqlal", "Şərəf" və "Şöhrət" ordenləri ilə təltif olunması, 80 illik yubileyinin keçirilməsi haqqında prezident İlham Əliyevin sərəncamı da xüsusi buraxılışın səhifələrində önəmli yer tutur.

Şərq.- 2010.- 15 yanvar.- S. 4.