Azərbaycan əfsanələr paytaxtı

Turizm İli çərçivəsində Şabran şəhərinə gələn turistlərin sayı əvvəlki illərlə müqayisədə 2 dəfə artacaq

Qədim Şabran şəhəri 2011-ci ildə Azərbaycanın əfsanələr paytaxtıdır. Turizm ili çərçivəsində 150-yə qədər tarixi tapıntılarla zəngin olan Şabran şəhərində bərpa işləri aparılacaq. Bu da rayona gələn turistlərin sayının əvvəlki illərlə müqayisədə 2 dəfə artacağına zəmanət verəcələr.

Azərbaycanın qədim Şabran şəhəri Mədəniyyət və Turizm Nazirliyinin təsis etdiyi (Xalq yaradıcılığı paytaxtları) proqramına əsasən, 2011-ci ilin Əfsanələr paytaxtı elan edilib. Şabran Tarix və Mədəniyyət Qoruğunun direktoru Məmmədmusa Məmmədov da faktı təsdiqləyir. Bildirir ki, uzun illərdir açıq havada qalan bu qədim şəhər nümunələri təbii hadisələrdən erroziyaya uğrayır. Əgər vaxtında burada bərpa işləri görülməsə, aşkar edilən bu əraziləri də itirə bilərik, Amma direktor son illər burada İcra Hakimiyyətinin dəstəyi ilə bir sıra abadlıq işlərinin görüldüyünü də deyir.

Qədim Şabranın yerləşdiyi Şahnəzərli kəndinin tarix müəllimi Əsədulla Hüseynov burada tapılan müxtəlif məmulat və əşyaların çoxşaxəli və tekrarolunmaz olduğunu bildirir. Onun sözlərinə görə, burada ən qədim dövrdə xüsusi tərkibə malik olan şüşə istehsalı ilə məşğul olublar; "Şabran şəhərində də özünə məxsus şüşə istehsalı ilə də məşğul olublar. Tərkibində silisium birləşməsini zənginləyir və yüksək oda davamlığı, odda bişirilməsi, şüşənin şəffaflığını və çin şüşəsinə bərabər bir formada düzəldilirdi".

Müxtəlif illərdə Milli Elmlər Akademiyasının Arxeologiya və Etnoqrafiya İnstitutu əməkdaşlarının qədim Şabran qoruğunda apardığı arxeoloji qazıntılar zamanı aşkar edilmiş müxtəlif eksponatlar indi rayon Tarix və Diyarşünaslıq Muzeyinin qiymətli eksponatları sırasındadı. Qədim Şabranda tapılan əşyalar sırasında o vaxt əraziyə çəkilən su və kanalizasiya xətlərinin nümunələri, qədim su əşyaları da diqqəti cəlb edir. Nəzərə alsaq ki ,53 000-dən artıq əhalisi olan Şabran rayonuna kanalizasiya xətti hələ bu il çəkiləcək, onda qədim Şabranın su təsərrüfatı əşyaları doğrudan da olduqca qiymətlidir.

Şabran Tarix və Diyarşunaslıq Muzeyinin baş fond mühafizi Vəfa Hüseynova deyir ki, bu muzeydə həm də qədim Şabran şəhərindən tapılmış çirkab suların axıdılmasında, şəhərə 14 km-dən çəkilən su xəttində istifadə edilən su tüngüləri nümayiş etdirilir. Onun sözlərinə görə, bütün bu nümunələrə görə, qədim Şabran şəhərindən tapılan eksponatlar onu göstərir ki, Şabran şəhəri qədim tarixə malikdir.

Ümumilikdə, Şabran rayonunda 150 tarixi abidə var ki, onlardan ən möhtəşəmi qədim Şabran və Çıraqqala abidələridir.

Şabran rayon Mədəniyyət və Turizm Şöbəsinin müdiri Əhməd Səmədov bütün bunları nəzərə alaraq bildirir ki, Turizm ili olan 2011- ci ildə rayona gələn turistlərin sayı əvvəlki illərlə müqayisədə 2 dəfə artacaq. Qədim Şabranın yenidən bərpa edilməsinə gəlincə isə Ə.Səmədov açıqladı ki, bu nazirliyin 2011-ci ildə rayonda Əfsanələr paytaxtı titulu ilə bağlı keçirəcəyi çeşidli tədbirlər planına salınıb.

Şərq.-2011.-7 aprel.- S.13.