9 yaşlı Fariz Bədəlovun ölümündən 40 gün keçir

Şəhid balamızın xatirəsinə anım mərasimi keçirilib

Erməni gülləsinin qurbanı olan 9 yaşlı Farizin ölümündən 40 gün keçir. Bununla əlaqədar Qaçqın və Məcburi Köçkün Gənclər Təşkilatı, "Qadın və uşaqların problemlərinin araşdırılması" İctimai Birliyi, Xocalı Soyqırımını Tanıtma İctimai Birliyinin birgə təşkilatçılığı ilə şəhid balamızın xatirəsinə anım mərasimi keçirilib.

Mərasimdə çıxış edən Qaçqın və Məcburi Köçkün Gənclər Təşkilatının sədri Vüqar Qədirov 9 yaşlı uşağın qətlini insanlığa sığmayan hərəkət adlandırıb. Təşkilat sədri qeyd edib ki, Ermənistan dövləti azərbaycanlılara qarşı məqsədli şəkildə soyqırım siyasəti həyata keçirir və 9 yaşlı Fariz Bədəlovun qətlə yetirilməsi də bu silsilədəndir. Ermənistanı terrorçu, təcavüzkar dövlət adlandıran V.Qədirov F.Bədəlovun təhsil aldığı Ağdamın Aşağı Qərvənd kənd orta məktəbinə onun adının verilməsini təklif edib.

Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Milli Məclisin deputatı Fuad Muradov, "Qadın və uşaqların problemlərinin araşdırılması" İctimai Birliyinin sədri Kəmalə Qliyeva, Təkamül və İnteqrasiya Beynəlxalq ictimai Birliyinin sədri Arzu Qədirova, Xocalı Soyqırımını Tanıtma İctimai Birliyinin sədri Şamil Sabiroğlu, Milli QHT Forumunun prezidenti Rauf Zeyni Fariz Bədəlovun ölümünün müharibə qanunlarına, insanlığa sığmayan bəşəri bir cinayət olduğunu vurğulayıblar. Mərasimdə Farizin anası Şirinnar Bədəlova da iştirak edib. Ş.Bədəlova dünya analarına müraciət edərək bu faciəyə biganə qalmamağa, erməni vəhşiliyinə göz yummamağa çağırıb.

Tədbirin sonunda dünya ictimaiyyətinə və beynəlxalq təşkilatlara müraciət qəbul olunub.

Məlahət

Şərq.-2011.- 15 aprel.- S. 7.