Mübariz İbrahimovun xatirəsinə həsr olunan festivalda istedadlı gənclər seçildi

4 aydır ki, davam edən Azərbaycanın Milli Qəhrəmanı Mübariz İbrahimovun xatirəsinə həsr olunmuş Gənclərin I Ümumrespublika Teatr Festivalı başa çatdı. Gənc Tamaşaçılar Teatrında keçirilən festivalın yekunlarına həsr olunmuş konsertdə eyni zamanda festivalın qalibləri açıqlanıb və onlar mükafatlandırılıb.

Gənclər və idman, Mədəniyyət və turizm nazirliklərinin dəstəyi ilə keçirilən festivala 4 bölgə - İsmayıllı, Ucar, Mingəçevir, Zaqataladan və 8 paytaxt truppasından ümumilikdə 110 gənc qatılıb. İlkin mərhələdə 20-dən çox ssenari təqdim olunub. Təşkilat Komitəsi onlardan 12-sini seçib. Həmin ssenarilərin hər biri ayrı-ayrı rejissorlar tərəfindən səhnələşdirilib. Festival çərçivəsində ölkədə ilk dəfə yaradıcı Art Kamp keçirilib. Festivalın ideya müəllifi, millət vəkili Jalə Əliyeva, icraçı direktoru Ramil Ağasıyev, bədii rəhbəri Əfsələddin Ağalarovdur. Heydər Əliyevin "Mən həmişə fəxr etmişəm, bu gün də fəxr edirəm ki, mən azərbaycanlıyam", - fikri festivalın devizi kimi seçilib.

Tədbir Mahirə Əsədovanın "Mən azərbaycanlıyam" adlı sənədli filminin nümayişi ilə davam edib. Bakı Musiqi Akademiyasının tələbəsi Ramil Xələfov konsert boyu vətənpərvərlik mövzusunda olan mahnıları səsləndirib.

Daha sonra festival qaliblərinin adları açıqlanıb. Qaliblər Xalq artisti Amaliya Pənahova, teleaparıcı Nərgiz Cəlilova, rejissor Vaqif Əsədov, teatrşünas Aydın Talıbzadə və aktrisa Yaqut Paşazadədən ibarət münsiflər heyətinin rəyi əsasında 3 gün ərzində göstərilən 12 tamaşa arasından seçilib. Ucar mədəniyyət evinin təmsilçisi Elçin Aslangil "Mühakimə" tamaşasındakı roluna görə "Ən yaxşı aktyor işi" nominasiyasında qalib olub. Larisa Məmmədovanın xatirəsinə həsr olunmuş "El axtarışında" tamaşasındakı roluna görə, Yuğ Teatrının nəzdində fəaliyyət göstərən Gənc Təşəbbüslər Mərkəzinin üzvü Lamiyə Xəlilova "Ən yaxşı aktrisa işi" nominasiyasına layiq görülüb. Azər Cəfər "Ən yaxşı ssenari müəllifi" seçilib.

Festivalın həvəsləndirici mükafatlarını azyaşlı uşaqlar qazanıb - 12 yaşlı Ayla Qasımzadə və Zaqataladan gələn Elnur Aslanov.

Tədbirin həyəcanlı anları üç yerin qalibinin adları açıqlanan zaman yaşanıb. Beləliklə, "Q.A.T.A.R" yaradıcılıq studiyası "Qisasın rəngi" tamaşası ilə müsabiqənin birincisi (1500 AZN) elan olunub. Slavyan Universitetinin "Totem" yaradıcılıq studiyası ikinci (1000 AZN), Mingəçevir xalq yaradıcılıq teatrı isə üçüncü yerə (750 AZN) layiq görülüb.

Sonda isə festivalın icraçı direktoru Ramil Ağasiyev festival iştirakçılarının Azərbaycan prezidenti cənab İlham Əliyevə olan müraciətini səsləndirib.

Qeyd edək ki, festival Azərbaycanın istedadlı gənclərinin aşkar olunması, onların əməyinə verilən qiymət və bir çox parametrlərinə görə müsbət dəyərləndirilir. Layihənin vətənpərvərlik mövzusuna aid olması və Milli Qəhrəman Mübariz İbrahimovun xatirəsinə həsr olunması müharibə vəziyyətində olan Azərbaycanın mövcud durumu baxımından yüksək dəyərləndirilir. Qeyd edək ki, festivalın gedişi zamanı gənc ssenaristlər maraqlı və yaddaqalan görüşlər keçiriblər.

Layihə ilə bağlı tanınmış sənət adamları, ictimai-siyasi xadimlər də fikirlərini bildiriblər. Tanınmış rejissor, ssenarist Aydın Dadaşov hesab edir ki, festival Azərbaycanın ədəbi-bədii mühitinə töhfə verəcək işlərin ortaya qoyulması üçün əhəmiyyətli hesab oluna biləcək əlaqələrin yaranmasına yardımçı olacaq. "Mədəniyyət və İncəsənət Universitetinin tələbələri və müxtəlif teatrların nümayəndələri, başqa sahələrdə çalışan insanlar bu festival sayəsində bir yerə toplanacaq, tanış olacaqlar. Mənim hər bir festivala münasibətim müsbətdir. Çünki festival yaradıcılar, fərdlər arasında ünsiyyət yaradır, potensialları ortaya çıxarır".

Rejissor bu qənaətdədir ki, festival xüsusilə gənclər üçün çox gözəl fürsətdir. "Teatr festivalı bir sənət bayramıdır. Hər kəs öz repertuarıyla, öz sənətiylə bir-birinin qarşısına çıxacaq. Mən inanıram ki, festival öz missiyasını yerinə yetirəcək". Respublikamızın ən böyük probleminin torpaq azadlığı ilə bağlı olduğunu söyləyən A.Dadaşov hesab edir ki, bu səbəbdən də torpaq azadlığına həsr olunmuş pyeslər, tamaşalar, mahnılar və s. həmişə gündəmdədir. "Festivalın da vətənpərvərlik mövzusunda olması onu diqqət mərkəzinə çevirəcək. Düşünürəm ki, belə festivallar tez-tez keçirilməlidir. Bütün kollektivə uğurlar arzulayıram.

Millət vəkili Sevinc Fətəliyeva o düşüncədədir ki, Azərbaycan teatr tarixində ilk dəfə gənclər arasında keçiriləcək bu festival Azərbaycan xalqının fəxri olan Milli Qəhrəman Mübariz İbrahimovun xatirəsinə böyük ehtiram nümayiş etdirməklə yanaşı, yeniyetmə və gənclərimizin vətənpərvərlik ruhunda tərbiyə olunmasına, bu ruhun aşılanmasına xidmət etmiş olacaq. "Digər tərəfdən isə vətənpərvərlik mövzusunda yeni ssenarilərin yaranmasına, gənclər arasında bu janr üzrə gənc istedadların üzə çıxmasına imkan verəcək". Millət vəkili vurğulayıb ki, ölkəmizin iqtisadi inkişafı, regionda artan nüfuzu bilavasitə gəncliyimizin həyatına da öz təsirini göstərir. "Bu gün Azərbaycan gəncləri ictimai-siyasi proseslərdə yaxından iştirak edir, ümummilli məsələlərə prinsipial vətəndaşlıq mövqeyindən yanaşırlar. Xaricdə təhsil alan gənclərimizin sayı ildən-ilə artır. Çox sevindirici haldır ki, onlar təhsillərini bitirdikdən sonra doğma vətənə qayıdır, əldə etdikləri bilik və təcrübəni respublikamızın inkişafına sərf edirlər. Gənclərin elm, təhsil, idman, mədəniyyət, incəsənət sahəsində əldə olunan çoxsaylı nailiyyətləri cəmiyyətdə müstəqil dövlətimizin gələcəyinə olan inamını daha da artırır. Təbii ki, qarşıdakı illərdə gənclərin üzərinə ciddi vəzifələr düşür. Gənclərimiz müstəqil dövlətimizin daha qüdrətli olması üçün fəaliyyətlərində maksimum bilik, bacarıq, mənəvi saflıq, məsuliyyət, həmçinin birlik, mütəşəkkillik və yeni ideyalar təqdim edərək, onları həyata keçirmək yolunda yorulmadan çalışmalı olacaqlar. Bu, Azərbaycanımızın davamlı inkişafının və parlaq gələcəyinin təminatıdır".

Gənclik və onun problemlərinin daim dövlətin diqqət mərkəzində olduğunu söyləyən S.Fətəliyeva bildirib ki, əsası ümummilli lider Heydər Əliyev tərəfindən qoyulan "Dövlət Gənclər Siyasəti" bu gün də prezident İlham Əliyev tərəfindən uğurla davam etdirilir. "Ötən dövrlər ərzində dövlət gənclər siyasətinin ən vacib istiqamətlərindən biri vətənpərvərlik və vətəndaşlıq tərbiyəsinin aşılanması, milli-mənəvi dəyərlərinin qorunub saxlanılması, Azərbaycan tarixinin, dövlətçilik ənənələrinin öyrənilməsi, gənclərlə iş sahəsində beynəlxalq əlaqələrin qurulması, onların elm, təhsil, mədəniyyət sahəsində əldə etdikləri uğurlar dövlətimizdə gəncliyə olan qayğının və diqqətin bariz nümunəsidir". Deputatın qənaətincə, gənclərin intellektual inkişafına, vətənpərvərlik tərbiyəsinin artırılmasına, məşğulluq sahəsində əmək bazarına uyğun yeni ixtisasartırma kurslarının keçirilməsinə yönəlmiş fəaliyyət gücləndirilməlidir. "Bu ilin iyul ayında cənab İlham Əliyevin sərəncamı ilə "Azərbaycan gəncliyi 2011-2015-ci illərdə" Dövlət Proqramı təsdiq edilib. Dövlət Proqramının əsas məqsədi Azərbaycan Respublikasında gənclər siyasətini daha da inkişaf etdirmək, gənclərin menecment sahəsində fəal iştirakına şərait yaratmaq, gənc mütəxəssislərin işlə təminatı və digər sosial-iqtisadi problemlərinin həllini təmin etməkdir. Başlıca vəzifə bugünədək əldə olunmuş nailiyyətləri qoruyub saxlamaq və onları artırmaqdır". S.Fətəliyeva güman edir ki, festival nəinki iştirakçı gənclərin, eləcə də ölkə gənclərinin həyatında önəmli yer tutacaq. "Qəlbi vətən sevgisi ilə döyünən gənclik Mübariz adlı vətənpərvərlik səlnaməsi yaradacaq. Qəlblərdə əbədi yer almış xalqın mərd oğlunun adı öz yaşıdlarının qələminin və istedadının qüdrəti ilə səhifələrə süzüləcək, səhnələrdə təqdim olunacaq. Mübariz kimi qəhrəmanların əziz xatirəsi heç vaxt unudulmayacaq, illər keçəcək, analar yeni doğulmuş övladlarına onun adını qoyacaq, onun vətənsevərliyi neçə-neçə nəsillərin örnəyinə çevriləcək".

Festivalda diqqətçəkən məqamlardan biri də Art Kampdır. Qeyd edək ki, bu, Azərbaycanda ilk dəfə tətbiq olunur. Bu səbəbdən də geniş ictimaiyyətə onun mahiyyətini izah etmək zərurəti var. Festivalın icraçı direktoru, gənc rejissor Ramil Ağasıyev vurğulayıb ki, Art Kamplar əcnəbi ölkələrdə hər il keçirilir və onlar ödənişli olur. "Azərbaycanda ilk dəfə olaraq bunu biz edirik və bu Art Kamp Gənclər və İdman Nazirliyinin dəstəyinə görə tamamilə ödənişsizdir. Festivalda iştirak edən 100-ə yaxın gəncin hər biri burada aktiv iştirak edə bilər. Biz onlar üçün rejissor, aktyor dərsləri, səhnə hərəkəti, səhnə danışığı və bir çox yaradıcı baxımdan lazım olan treninqləri təşkil etmişik. Bunun üçün biz düşərgəyə mütəxəssislər, yaradıcı insanlar dəvət edəcəyik. İstəyimiz və hədəfimiz birdir: yaradıcı gəncliyə vətənpərvərliyi daha aydın və audio - vizual vasitələrdən istifadə edərək aşılamaq".

Qeyd edək ki, festivalın ideya müəllifi millət vəkili Jalə Əliyeva olub. Deputat müəllifi olduğu ideya ilə bağlı bəzi mətləblərə aydınlıq gətirib. O, festivalın sırf gənclər arasında keçirilməsi məsələsinə də toxunub. "Mübariz İbrahimovun özü gənc idi. İkincisi, bu tərbiyəvi festival və əxlaqi mövzular mənəviyyatı, əxlaqı artıq oturuşmuş olan insanlara nisbətən yetişməkdə olan nəsil üçün daha əhəmiyyətlidir. Çünki hələ özünü təsdiqləməyə çalışan gəncin sağlam düşüncəli və sağlam ruhda olması cəmiyyətimiz üçün ən önəmli məsələlərdəndir". Millət vəkili bildirib ki, layihədə məqsədləri festivala gələn gəncləri tanınmış mədəniyyət və incəsənət xadimlərimizin ustad dərsləri ilə tanış etmək və onlarda olan yaradıcılıq meyillərini daha da stimullaşdırmaqdır. "Buna görə qərara gəldik ki, belə bir yenilik edək. Bu yolda bizə Gənclər və İdman Nazirliyi tərəfindən çox yüksək səviyyədə dəstək göstərildi".

Firdovsi Fərzəliyev

Şərq.- 2011.- 3 dekabr.- S. 11.