Gənc alimimiz uğura imza atıb

Yusif Alıyev İstanbulda beynəlxalq elmi konfransda iştirak edib

29 aprel - 4 may 2012-ci il tarixlərində Türkiyə Cümhuriyyətinin İstanbul şəhərində keçirilən fizikanın ifratkeçiricilik və magnetizm sahəsinə həsr olunmuş "3rd İnternational Conference on Superconductivity and Magnetism - İCSM-2012" konfransında dünyanın yüzdən çox ölkəsindən 1500 alim iştirak edir.

2008-ci ildən başlayaraq iki ildən bir təşkil olunan "İnternational Conference on Superconductivity and Magnetism" konfransı elmi yenilik səviyyəsinə və nəticələrinin etibarlılığına, sənayedə, istehsalatda tətbiqi baxımından xüsusi əhəmiyyətə malikdir. Dünyanın bir çox ölkələrinin aparıcı elmi mərkəzlərində araşdırılması böyük aktuallıq kəsb edən müxtəlif tərkibli maqnit keçiricilər və ifratkeçiricilərin tədqiqi ilə məşğul olan tanınmış alimlərin (xüsusən gənc alimlər üstünlük təşkil edir) tədqiqat işlərinin yeniliyinin təqdimatı məhz ilk olaraq bu konfransda - İCSM nümayiş olunur. Həmçinin yeni innovativ texnologiyaların da nümayişi həyata keçirilən bu beynəlxalq elmi konfransda cari və perspektiv elmi problemler də müzakirə olunur.

Azərbaycan da bu beynəlxalq elmi konfransda 2008-ci ildən təmsil olunur və təşkilat olaraq Azərbaycanı AMEA Fizika İnstitutu təmsil edir. Azərbaycanlı alim, Fizika İnstitutunun aparıcı elmi işçisi, Ankara Universitetinin professoru İman Əsgərbəyli İCSM-2012-nin təşkilat komitəsinin üzvüdür. Fizika İnstitutunun böyük elmi işçisi, Bakı Pedaqoji Kadrların İxtisasartırma və Yenidənhazırlanma İnstitutunun təbiət elmləri kafedrasının müdiri, fizika üzrə fəlsəfə doktoru Yusif Alıyev ilk dəfə bu mötəbər elmi konfransda iştirak etmiş və gənc alim olaraq Azərbaycanı təmsil etmişdir. Belə ki, 2008-ci ildə Türkiyə Cümhuriyyətinin Antalya şəhərində keçirilən "İCSM-2008" Beynəlxalq elmi konfransında Yusif Alıyev tərəfindən "The structure and magnetic properties of Fe1.2In1.87Se4 single crystals" adlı elmi-tədqiqat işi məruzə olunmuş və nəticələri yüksək qiymətləndirilərək dünyaca nüfuzlu elmi jurnal olan "Æournal of Physics, 153, 2009" çap olunmuşdur. Həmçinin azərbaycanlı alimlərin tədqiqat işləri dünya alimlərinin diqqətini çəkmiş və birgə əməkdaşlıq haqqında razılığa gəlinmişdir.

Son illər AMEA Fizika İnstitutunun bir qrup alimi CuFeSe2 maqnit kristalı üzərində geniş rentgen-tədqiqat işi aparırlar. Bu tədqiqatlar nəticəsində alınmış bəzi elmi yeniliklər ümumiləşdirilərək məruzə halında İstanbulda keçiriləcək İCSM-2012 elmi konfransına təqdim edilmişdir. Həmin məruzə "İnvestigation of thermal expansion of magnetic semiconductor crystall CuFeSe2 using high temperature rontgen-diffraction" adı altında AMEA Fizika İnstitutunun gənc alimi, fəlsəfə doktoru Yusif Alıyev tərəfindən 03 may 2012-ci il tarixində məruzə edilmişdir. Məruzə zamanı və məruzədən sonra bir sıra elmi diskusiyalar olmuşdur. Azərbaycanlı alimlər tərəfindən aparılan elmi tədqiqat işləri haqqında dünya elm mərkəzləri məlumatlandırılmış və qarşılıqlı əlaqələr baxımından bir sıra addımlar atılmışdır. Əhatəli işləmək baxımından İCSM-2012 konfransının əhəmiyyəti çox önəmlidir. Həmçinin bu konfranslar vasitəsilə müasir innovasiya texnologiyalarının Azərbaycana yönəldilməsi kimi aktual işlər də ön planda olur.

Konfransın təşkilat komitəsi növbəti konfransın 2014-cü ildə yenidən Türkiyədə keçirilməsini qərara almışdır.

Şərq.-2012.- 8 may.- S. 12.