MEDİA KİFAYƏT QƏDƏR FƏAL OLDU

“Bakı 2015”in xarici və yerli KİV-də işıqlandırılması müsbət qarşılanıb

"Bakı 2015” Avropa Oyunlarının 6 günü arxada qalıb. Oyunlar başlayandan bu yana müxtəlif idman sahələri üzrə çoxsaylı yarışlar keçirilib və idmançılarımız 8 qızıl olmaqla, 18 medal qazanıblar. Təbii ki, bu göstərici son deyil, qalibiyyətlərin davamı gələcək və idmançılarımız daha çox qızıl, gümüş və bürünc mükafatlar əldə edəcəklər. Məlumat üçün deyək ki, 6 gün ərzində qələbə və məğlubiyyətlərlə yanaşı, müxtəlif maraqlı, sevindirici və kədərli hadisələr də yaşanıb.

Həm yarışlar, həm də baş verən maraqlı məqamlar dünyanın 50-dən çox ölkəsinin media qurumları tərəfindən diqqətlə izlənilməkdədir. Birinci Avropa Oyunları haqqında materiallar xarici KİV-lərin baş xəbərlərinə çevrilib. Qədimliyin və müasirliyin bənzərsiz vəhdət təşkil etdiyi Azərbaycan coğrafi mövqeyi ilə hər zaman dünyanın marağını özünə cəlb edə bilib. Bu mühüm amil Birinci Avropa Oyunlarının açılış mərasimində dünyanın müxtəlif ölkələrinin dövlət və hökumət başçılarının, parlament rəhbərlərinin, nazirlərin, Milli Olimpiya Komitələri prezidentlərinin, görkəmli mədəniyyət və idman xadimlərinin iştirak etməsi ilə bir daha təsdiqini tapdı. İndi beynəlxalq media məkanında "Bakıda möhtəşəm açılış mərasimi”, "Bakı dünyanın ən gözəl şəhərlərindən biridir”, "Unudulmaz idman bayramı”, "Avropanın idman nəbzi Bakıda döyünür”, "Avropa Oyunlarını Azərbaycan reallığa çevirdi”, "Azərbaycan qitənin idman tarixini yazdı”, "Dünyanın məşhur idmançıları Bakıda görüşür” və digər ifadələrə hər gün rast gəlmək mümkündür. Qardaş Türkiyə mediası da Birinci Avropa Oyunları barədə xəbərlərə geniş yer ayırır. "NTV Spor” kanalının rəsmi internet səhifəsində "Bakıda tarixi açılış” sərlövhəli məqalə yerləşdirilib. Rəsmi yayımçı olan kanal, həmçinin yarışların gedişindən bəhs edən operativ informasiyalar və gündəlik icmallar təqdim edir.

"Haberler.com” portalı "Bakıda Avropa Oyunları üçün möhtəşəm açılış mərasimi” sərlövhəsi ilə geniş yazı verib. Məqalədə 68 min yerlik möhtəşəm Bakı Olimpiya Stadionunda təşkil edilən bənzərsiz açılış mərasiminin bütün dünyanı heyrətləndirdiyi diqqətə çatdırılır. "Haberturk.com” saytında yer alan yazı isə belə adlanır: "Bakıda Avropa Oyunları coşqusu”. Yazıda bir çox ölkələrin dövlət və hökumət başçılarının, yüksək dövlət rəsmilərinin iştirak etdikləri açılış mərasimində Azərbaycanın milli dəyərləri ilə yanaşı, Avropa dəyərlərini də əks etdirən kompozisiyaların nümayiş olunduğu vurğulanır. Britaniyanın gündəlik "London Evening Standard” qəzetində dərc edilmiş geniş məqalədə "Bakı-2015” ilk Avropa Oyunları Əməliyyat Komitəsinin əməliyyatlar üzrə baş direktoru Saymon Kleqin fikirləri yer alıb. Kleq bu Oyunların ən çox diqqət çəkən layihə ola biləcəyini, belə bir mötəbər tədbirin ilk dəfə keçirildiyini qeyd edib.

"Bakı-2015” Birinci Avropa Oyunları ABŞ mediasının da gündəmindədir. Məşhur "Getty Images” foto agentliyinin saytında Oyunların açılış mərasimindən çəkilmiş fotoşəkillər yerləşdirilib. Fotosessiyada iyunun 12-də Bakıda Birinci Avropa Oyunlarının açılış mərasiminin möhtəşəmliyini əks etdirən rəngarəng görüntülər yer alıb. "The Washington Post” qəzetinin internet səhifəsində də Birinci Avropa Oyunları ilə bağlı 26 foto yerləşdirilib. Fotosessiya hazırda Azərbaycanda olan David Ramos, Kril Kusryatsev, Sergey Dolzeko, Dan Mulan, Bernd Sissen kimi məşhur fotomüxbirlərin "Bakı-2015” Birinci Avropa Oyunlarının açılış mərasimindən çəkdiyi fotoşəkillər əsasında tərtib olunub. "Bristol Herald Courier” qəzetinin dərc etdiyi məqalədə tanınmış dünya ulduzu Ledi Qaqanın Birinci Avropa Oyunlarının açılış mərasimindəki çıxışından bəhs olunub.

Almaniyanın məşhur "Deutsche Welle” media agentliyində "Bakı Birinci Avropa Oyunlarının açılışını qeyd edir” sərlövhəli məqalə dərc edilib. İtaliyanın "Opinione Pubblica”, "Avvenire” xəbər saytları da Azərbaycanda idmanın inkişafı istiqamətində qəbul olunmuş dövlət proqramları, icra olunan layihələr, keçirilən tədbirlər barədə ətraflı məlumat verirlər. Bildirilir ki, Olimpiya Hərəkatının genişləndiyi bu ölkənin idmançıları nüfuzlu yarışlarda yüksək nailiyyətlər əldə edirlər. Xəzərin sahilində yerləşən Azərbaycan bu cür önəmli idman tədbirinə ev sahibliyi etmək iqtidarındadır. Qonşu Rusiya Federasiyasının populyar və aparıcı KİV-ləri də Bakıda keçirilən Avropa Oyunlarının açılış mərasimini geniş şəkildə işıqlandırır. Amma aydındır ki, Oyunlar müddətində, xüsusən, idman yarışlarının anbaan işıqlandırılmasında əsas məsuliyyət Azərbaycan mediasının üzərinə düşür. Ötən müddət ərzində Azərbaycanda fəaliyyət göstərən əksər media qurumları müxtəlif arenalarda və fərqli saatlarda keçirilən idman yarışlarını operativ və obyektiv şəkildə ölkə ictimaiyyətinə çatdırmağa çalışır. Ancaq bəzi xarici, hətta bir sıra yerli media qurumları Azərbaycan əleyhinə yazılar tirajlayaraq, ictimaiyyəti yanıltmağa səy göstərirlər. Bu baxımdan Azərbaycan mətbuatının üzərinə mühüm öhdəlik düşür. Belə ki, Azərbaycan KİV-ləri mütəmadi olaraq Avropa Oyunlarını işıqlandırmaqla yanaşı, həm də mötəbər tədbiri qaralamağa çalışan "media qurumlarını” zərərsizləşdirməlidir. Bəs, görəsən, yerli KİV-lər bunun öhdəsindən gələ bilirmi? Ümumiyyətlə, Azərbaycan mediasının Oyunlar müddətindəki fəaliyyətini, operativliyini qənaətbəxş hesab etmək olarmı?

"Bakı xəbər” qəzetinin baş redaktoru Aydın Quliyev bu istiqamətdə Azərbaycan mediasının fəaliyyətini çox yüksək qiymətləndirib: "Avropa Oyunlarının uğurla başlaması, açılış mərasiminin çox böyük təntənə ilə həyata keçirilməsi, idmançılarımızın müxtəlif arenalarda yüksək nəticələr göstərməsi, qaralama kampaniyalarına qarşı birgə mübarizə aparılması Avropa Oyunlarının Təşkilat Komitəsinin əməyinin nəticəsi olmaqla yanaşı, həm də Azərbaycan mediasının zəhmətinin bəhrəsidir. Oyunların təbliğ olunmasında, nəticələrin müdafiəsində və dünyada tanıdılmasında ölkə mətbuatı üzərinə düşən öhdəliyi yerinə yetirir”.

Baş redaktor bildirib ki, digər proseslərə o qədər də ciddi yanaşmaq lazım deyil: "Azərbaycan idmançıları komanda hesabındakı medalların sayına görə, ikinci yerdədir və birinciliyə iddialı olmaq üçün əlimizdə kifayət qədər əsaslar var. İdmançılarımızın qısa müddət ərzində bu qədər böyük bir nəticə əldə etməsi indiyə kimi Avropa Oyunlarını qaralamağa çalışanlara ən tutarlı cavabdır. 5-6 ay ərzində Avropa Oyunlarına qarşı kampaniya aparan qüvvələr idmançılarımızı ruhdan sala biləcəklərinə ümid edirdilər. Amma təmsilçilərimiz ard-arda qələbələr qazanaraq, həm özlərinin, həm də Azərbaycanın idman şərəfini layiqincə qorudular. Mən onların uğurunu yüksək qiymətləndirirəm”.

"Yeni Azərbaycan” qəzetinin baş redaktoru Hikmət Babaoğlu da deyib ki, Azərbaycan idmançılarının əldə etdiyi uğurlar ayrıca bir hadisədir və Azərbaycan idman tarixinin ən parlaq, şərəfli səhifələrindəndir: "Avropa Oyunları kimi möhtəşəm bir tədbirin Azərbaycanda bu cür əfsanəvi, nağılabənzər və ecazkar şəkildə təşkil olunması xaricdə və daxildə bizi sevməyən qüvvələr tərəfindən narazılıqla qarşılandı. Anti-Azərbaycançı mərkəzlər bu hadisədən istifadə edərək ölkəmiz əleyhinə neqativ informasiyalar yazmağa başladı. Bu istiqamətdə bir sıra jurnalist təşkilatları, bəzi QHT-lər də onlara qoşuldu. Amma ötən günlər onu göstərdi ki, Azərbaycanın bütün media ictimaiyyəti və əksər QHT-lər çox fəal və obyektiv şəkildə işlədilər. Ayın 12-də Avropa Oyunlarının açılış günü bir sıra mətbu orqanlarda start götürən neqativ xəbər yayma planı baş tutmadı. Azərbaycan dövləti və xalqı öz gözəllikləri ilə ön plana çıxdı. İdmanımızın gözəl səhifələri mediamız vasitəsi ilə bütün dünya ictimaiyyətinə çatdırıldı. Ayrı-ayrı xarici ölkələrdə birbaşa yayımlar vasitəsi ilə Azərbaycanda nə qədər sağlam idman mühitinin, mədəni şəraitin, tolerant bir cəmiyyətin mövcud olduğu ortaya çıxdı. Artıq əminliklə deyə bilərəm ki, anti-Azərbaycançı mərkəzlərin bizə qarşı hücumu tam fiaskoya uğradı. Azərbaycan informasiya mübarizəsində duruş gətirə, mübarizədən qalib çıxa bildi və idman sahəsində yeni tarix yazdı”.

H.Babaoğlu qeyd edib ki, istər çap mediası, istər sosial media kifayət qədər fəaldır: "Bir-iki neqativ nüansları nəzərə almasaq, ümumilikdə mediamız üzərinə düşən tarixi missiyanı yerinə yetirməyi bacardı və prosesdən üzüağ çıxdı. Bu prosesdə ölkəmizin fəal gəncliyi də xüsusi rol oynadı. Anti-Azərbaycançılığa qarşı mübarizə aparmaq təckə KİV-lərin gücü daxilində deyildi. Vurğulamaq lazımdır ki, sağlam və intellektual əsaslarla formalaşmış yeni, mübariz Azərbaycan gəncliyi milli maraqları qorumaqda mediaya çox kömək etdi”.

"Yeniçağ.az” saytının baş redaktoru Aqil Ələsgər deyib ki, bu gün Obamadan daha çox ABŞ-ı müdafiə edən medianın öz dövlətini gözdən salmaq üçün əl atdığı fəndləri gördükdə, təəssüflənməmək olmur: "Avropa Oyunları öncəsi turistlərin və idmançıların Bakıya gəlməməsi üçün çox ciddi fəaliyyət göstərildi. Heç erməni diasporu bu qədər canfəşanlıq göstərmədi. Heyvan ölümü, sonra başqa iddialarla insanların beyinlərini bulandırmağa çalışdılar. Yerli bəzi qüvvələr də onlara qoşuldu. Bu, artıq iqtidar-müxalifət savaşı yox, Vətənə qarşı xəyanətdir. Əlbəttə, o fikirdə deyiləm ki, kim Avropa Oyunlarını xoşlamırsa, deməli o, xaindir. Kiminsə Avropa Oyunlarından xoşu gəlməyə bilər. Fəqət burada məsələ Avropa Oyunlarından xoşu gəlməmək deyil, dövlət əleyhinə təbliğatdır. Nəticədə avropalı bizim ölkənin məmurunu bəyənsə nə dəyişəcək, bəyənməsə nə olacaq? Olan Azərbaycanın imicinə olacaq. Bunlar sözdə iqtidara qarşı savaş aparsalar da, əslində Azərbaycanın imicini ləkələyirlər. Mediada işıqlandırılmağa gəlincə, mən bir sıra xarici ölkələrdə tədbirlərdə iştirak edən jurnalist olaraq etiraf etməliyəm ki, Avropa Oyunlarında medianın fəaliyyət göstərməsi üçün çox əla şərait yaradılıb”.

(davamı var)

İsmayıl

Şərq.-2015.-18 iyun.- S.11.