“Mən GƏNC QALMAQ ÜÇÜN HANSISA ƏLAVƏ VASİTƏLƏRDƏN İSTİFADƏ ELƏMİRƏM”

Qulu Məhərrəmli: “Ruhumun gənc qalması ətrafımdakı insanların mənə qarşı sevgisi və səmimiliyi ilə bağlıdır”

Dünən Azərbaycanın tanınmış jurnalisti, teletənqidçi, filologiya elmləri doktoru, BDU-nun professoru, Əməkdar jurnalist Qulu Məhərrəmlinin doğum günü idi. Təkcə yaşca yox, elə xaraktercə də ağsaqqal mövqeyinə sahib olan Qulu müəllimin 62 yaşı tamam olub. Və ən əsası odur ki, o, bütün ömrü boyu şəxsiyyəti təsdiq edən sınaqlardan uğurla və bacarıqla çıxıb, əxlaqi baxımdan da yüksəkdə dayanan dəyərlərə tapınıb.

Əslində elə Qulu Məhərrəmlini sevdirən də onun bütün insani keyfiyyətləri özündə cəmləşdirməsidir. Onun qələmi də, yaradıcılığı da ən az xarakteri qədər ləyaqətli və vicdanlıdır. Obyektivliyinə isə söz ola bilməz. Mübaliğəsiz deyə bilərik ki, Qulu Məhərrəmli jurnalistikadakı insanlar üçün peşəkarlıq etalonudur, Azərbaycanın televiziya və radio tarixinin ayrılmaz parçasıdır. Onun bu 62 ildə gördüyü işlər 100 il bundan sonrası üçün də kifayət edər. İctimaiyyət onu Vətənini, xalqını qəlbən sevən bir ziyalı, hadisələrə obyektiv yanaşan bir jurnalist, şərəfli pedaqoq peşəsinə sadiq bir müəllim, fəal vətəndaşlıq mövqeyi ilə fərqlənən bir şəxs kimi tanıyır, elə o cür də sevir. Qulu müəllim haqqında çox şey yazmaq, onunla çox şeydən danışmaq olar. Amma istedadla şəxsiyyəti özündə birləşdirmək potensialına sahib olan bu insan həddindən artıq da təvazökardır. Deyir "Mənim haqqımda çox şişirdilmiş sözlər yazmayın, sonra inanıram”.

"Həm "Şərq” qəzeti kollektivi adından professoru təbrik etmək, həm də ad günü təəssüratlarını öyrənmək üçün Qulu Məhərrəmli ilə əlaqə saxladıq. Həmişəki kimi suallarımıza səmimi cavab verən professor adəti üzrə təvazökarlığından da geri qalmadı.

Ad gününü ailəsi və yaxın dostları ilə qeyd edən Q.Məhərrəmli təmtəraqlı məclisləri xoşlamadığını deyib: "Ad günümlə bağlı təbriklər, tədbir, qonaqlıq təklifləri çox gəlir. Hətta rayonlara belə dəvət edirlər. Hamısına öz minnətdarlığımı bildirirəm, amma budəfəki ad günümü sadəcə yaxın dostların əhatəsində olacam.

- Ad günlərini qeyd etməyi sevmirsiniz, yoxsa ...

- 50 yaşım olanda Mətbuat Klubunda qeyd etmişəm. Bir də 60 yaşımı yubiley formasında qeyd elədik. Hətta dostlarım uzun müddət piarımı da apardılar bu məqsədlə. Sözün açığı, ad günümün böyük bir səs-küyə səbəb olmağını heç arzulamıram da. Bu qədər insanın mənə diqqət ayırmağına daxilən sevinsəm də, insanların vaxt sərf eləməsi bir az da utandırır məni.

- Uşaqlıqdan ad günü həvəsində olmamısınız, yoxsa sizdə də qocalmaq xofu var?

- Ümumiyyətlə, nə uşaqlıqda, nə tələbəlikdə ad günümü təmtəraqlı qeyd etmək həvəsində olmuşam. Amma istər-istəməz insan çalışdığı kollektivə uyğunlaşmaq məcburiyyətində qalır. Ad günlərini qeyd etmək də məndə sonradan bir növ zərurət xarakteri aldı. Amma hələ də o fikirdəyəm ki, ad günlərini geniş şəkildə qeyd etməyə ehtiyac yoxdur. Sadəcə ictimai şəxs olduğum üçün ad günümü gizlətmək imkanlarım məhduddur. Hətta buna çalışsam belə, feysbuk imkan verməz. Sosial şəbəkələrdə mənə ünvanlanan təbriklərə anında cavab verə bilməsəm də, bütün həmkarlarıma, dövlət qurumlarında çalışan insanlara, millət vəkillərinə, dostlarıma, tələbələrimə təşəkkür edirəm.

- Qulu müəllim, nə xarici görünüşdən, nə də ruhən sizə 62 yaş vermək olur. Maraqlıdır, daxilən özünüzü neçə yaşda hiss edirsiniz?

- Sözsüz ki, hər yaşın öz diktəsi var. Amma önəmli olan insanın ruhunun hər zaman gənc qalması, işığının əskik qalmamasıdır. Allah verən görkəm, xasiyyətdir. Mən gənc qalmaq üçün hansısa bir əlavə vasitələrdən istifadə eləmirəm ki! (gülür). Ruhumun gənc qalması da ətrafımdakı insanların mənə qarşı sevgisi və səmimiliyi ilə bağlıdır.

- Deyilənə görə, 60 yaşdan sonra hədəflər, ambisiyalar azalır. Sizdə eləmi oldu?

- Əvvəldən ambisiyalı biri olmamışam. Heç vaxt böyük zirvələri fəth etmək kimi bir hədəfim olmayıb. Əsas işim yaradıcılıq və dilimizin qorunması ilə bağlı olub. Bu gün də həmin fəaliyyətimi davam etdirirəm. Əlavə bir istəyim də yoxdur. Əsas məqsədim bu sahədəki peşəkarlığımı daha da artırmaqdan ibarətdir.

- Gənclik səhifənizi vərəqləyəndə ən çox nəyin təəssüfünü çəkirsiniz? "Kaş ki, filan vaxt filan şeyi etsəydim” dediyiniz olubmu heç?

- Ta uşaq yaşlarımdan jurnalistikanın yolunu tutmuşdum. 7-8-ci siniflərdə oxuduğum vaxtlardan telejurnalist olmaq həvəsinə düşmüşdüm. Ölkələri gəzmək, reportajlar hazırlamaq, maraqlı telelayihələr hazırlamaq mənim ən böyük arzum idi. Allaha çox şükür ki, bütün istəklərimə artıqlaması ilə nail olmuşam. Amma daha çox iş görə bilərdim. Bəzən buna görə təəssüflənirəm. Sonra da elədiklərimlə ovaxtkı mühiti, şəraiti tərəzinin gözünə qoyanda, baxıram ki, heç də az iş görməmişəm.

- Bəs, elədiklərinizin qarşılığını necə, ala bilmisiniz?

- İnsan gördüyü işin qarşılığında nəsə güdürsə, ala bilməyəndə həddindən artıq məyus olur və həvəsdən düşür. Xoşbəxtlikdən mən belə biri deyiləm. Hansısa addım atmazdan əvvəl oturub, qarşılığında alacaqlarımın siyahısını tutmamışam. Universitetdə dərs deməyə başlayanda gördüm ki, uşaqların dərs vəsaitləri yoxdur. Dərhal düşündüm bütün enerjimi sərf edib dərslik yazmalıyam ki, tələbələrim daha yaxşı təhsil alsınlar. Əlimdən gəldiyi qədər ustadlarımız televiziyanın, radionun tarixi haqqında yazdıqlarını cilalamağa, müasir dövrün tələblərinə uyğunlaşdırmağa çalışdım. Yazdıqlarım, ortaya qoyduqlarım özümü tam qane eləməsə də, mövcud şərait daxilində az iş görmədiyimi düşünürəm. Amma qarşıda da xeyli görəcəyim işlər var, heç bir qarşılıq güdmədən.

- Ad günündən danışıb, hədiyyə məsələsinə toxunmamaq olmaz. Yaddaqalan hədiyyəniz olubmu heç?

- 50 illik yubileyimdə qızlarımın mənə hədiyyə etdiyi şəkil mənimçün çox dəyərlidir. Aradan uzun müddət keçməsinə baxmayaraq hələ də saxlayıram və hər o şəkli görəndə məni gülmək tutur. Şəklimi çərçivəyə saldırıb, üstünə də Azərbaycan, rus və ingilis dillərində "Ulduzun doğulması” yazdırmışdılar.

- Bəs, tələbələrinizdən hədiyyə almısız?

-Tələbələrimin mənim üçün yazdıqları ürək sözləri ən böyük hədiyyədir. Hətta əksəriyyəti auditoriyada cəsarət edib deyə bilmədikləri sözləri feysbuk vasitəsilə ünvanlayırlar. Sözün açığı, tələbələrimin mənim haqqımda tərif və xoş sözlər yazması məni bir az da təəccübləndir ki, necə olur ki, mənim kimi tələbkar müəllimi tələbləri bu qədər çox sevir (gülür). Tələbələrimin mənə ən böyük hədiyyəsi dərslərimə diqqətlə yanaşmaları və müzakirələrdə fəal olmalarıdır. Ona görə ki, ünsiyyət olmadan heç bir müəllim birgə fəaliyyətə nail ola bilməz.

Qeyd edək ki, Q.Məhərrəmli 1954-cü ildə Zəngilan rayonunda anadan olub. Orta təhsilini Şuşa şəhərində alıb. 1978-ci ildə Bakı Dövlət Universitetinin Jurnalistika fakültəsini bitirib. Həmin ildən təyinatla Azərbaycan televiziyasına göndərilib. Uzun illər AzTV-də müxtəlif vəzifələrdə çalışan Q.Məhərrəmli 2007-ci ilin oktyabrın 3-dən "Xəzər” TV-də fəaliyyətini davam etdirib. Müxtəlif mövzularda 20-yə yaxın sənədli televiziya filminin ssenari müəllifidir. Bu filmlərin bəziləri beynəlxalq festival və müsabiqələrdə nümayiş etdirilib. Bir neçə xarici çoxseriyalı filmin Azərbaycan dilinə dublyajının bədii rəhbəri olub. 1982-ci ildən elmi fəaliyyətlə məşğul olan Q.Məhərrəmli 1989-cu ildə "Radiodramaturgiya dili” mövzusunda namizədlik, 2004-cü ildə isə "Televiziya dili: funksiya və struktur” mövzusunda doktorluq dissertasiyası müdafiə edib. Jurnalistika üzrə ölkədə ilk elmlər doktorudur. Elmi araşdırmalarında jurnalistikanın və medianın ümumi nəzəriyyəsi, televiziya və radionun tarixi, aktual elmi-nəzəri problemləri, o cümlədən ekran-efirin mürəkkəb dil sisteminin öyrənilməsi əsas yer tutur. Q.Məhərrəmli 1991-ci ildən Bakı Dövlət Universitetində pedaqoji fəaliyyətə başlayıb, 1998-ci ildə baş müəllim, 2002-ci ildə dosent vəzifələrini tutub. 2006-cı ildən Televiziya və radio jurnalistikası kafedrasının professorudur. 30-a yaxın kitabın, o cümlədən bir neçə monoqrafiya, dərslik və dərs vəsaitinin, həmçinin izahlı lüğətlərin müəllifidir. Jurnalistika və elmi-pedaqoji fəaliyyəti ilə əlaqədar 60-a yaxın xarici ölkədə olub. Media problemlərinə həsr edilmiş nüfuzlu beynəlxalq toplantılarda, media forumlarında dəfələrlə Azərbaycan jurnalistikasını və jurnalistika elmimizi təmsil edib.

P.S. Biz də "Şərq” qəzeti olaraq Qulu Məhərrəmlini ad günü münasibəti ilə təbrik edir, ona cansağlığı və yeni-yeni yaradıcılıq uğurları arzulayırıq. İnanırıq ki, Qulu müəllim özünün böyük potensialından bundan sonra da jurnalistikamız və dövlətimiz naminə səmərəli şəkildə istifadə edəcək.

Şəymən

Şərq.- 2016.- 3 noyabr.- S.7