“MƏTBUATDAN BAŞQA HEÇ BİR SAHƏDƏ ÇALIŞMAMIŞAM”

Əflatun Amaşov: “Əmək kitabçamda sadəcə jurnalistika yazılıb”

Mətbuat Şurasının sədri, Milli Məclisin deputatı, Əməkdar jurnalist Əflatun Amaşovun 60 yaşı tamam oldu. Əflatun Amaşov MŞ sədri kimi 30 ildən artıq müddətdə ölkədə ictimai fikrin və jurnalistikanın inkişafına xidmət etməklə mənalı ömür yolu keçib. 2015-ci ildə parlament üzvü seçilən MŞ sədri media ilə bağlı prioritet məsələlərin parlamentdə gündəmə gətirilməsi ilə bağlı mühüm təşəbbüslər irəli sürüb. Ə.Amaşov qanunverici orqanda hər zaman aktual problemlərlə bağlı çıxışları ilə diqqət çəkib və mətbuat sahəsində özünəxas mövqeyi ilə böyük hörmət qazanıb."Şərq” qəzeti olaraq Əflatun Amaşovun keçdiyi dəyərli ömür yolu, xüsusən media aləmindəki peşəkar fəaliyyəti ilə ümumi tanış olmaq üçün millət vəkili ilə qısaca söhbətləşmək qərarına gəldik. Millət vəkili vaxtının məhdud olmasına baxmayaraq, ad günündə bizi geri çevirmədi və suallarımıza cavab verdi...

- Əflatun müəllim, yubileyinizlə bağlı çoxlu təbriklər alırsız. Diqqət mərkəzində olmaq necə bir duyğudur, ümumiyyətlə, 60 illik ömür sizin üçün nə anlama gəlir?

- Əgər ad gününmüzü heç kim təbrik eləməsə, yada salmasa, qədim dövrdəki kimi ömrümüzü səssiz-səmirsiz başa vurar, qocalaraq haqq dünyasına qovuşarıq. Ancaq indiki şəraitdə ömürlər nəinki illərlə, hətta gün, saat və saniyələrlə ölçülür. Ona görə də istər-istəməz tarix neçə yaşında olduğumuzu bizə xatırladır, yaşımızı unutmağa qoymur. Mənim üçün 60 yaşı başa vurmaq və xoş təbriklər almaq çox qəribə hissdir. İstər-istəməz gəldiyin yola, 60 yaşa qədər keçdiyin həyata nəzər salmalı olursan. Bu müddət ərzində nə etdiyini düşünürsən. Sonrakı illəri göz önünə gətirirsən, həyatını saf-çürük edirsən. Həmçinin, digər insanlarla müqayisələr aparırsan ki, filankəs 60 illik ömrünə nələri sığdırıb. Məsələn, Cəfər Cabbarlı 50 yaşında haqq dünyasına qovuşub. Amma o yaşa kimi artıq öz sözünü demişdi. Düşünürəm ki, çox illər arxada, az illər isə irəlidə qalıb. Həyata keçməyən arzularımı qarşıdakı illərə sığdırmaq istəyirəm. Amma bilmirəm ki, gələcəkdə səhhətim necə olacaq, sağlamlığım xəyalları reallaşdırmağa imkan verəcəkmi?! Yəqin, hamıda belə hisslər olur..

- 60 illik ömrün nə qədərini mətbuata həsr etmisiz? Ya da jurnalistikadan başqa əlavə hansı sahə ilə məşğul olmusuz?

- Mən ümumiyyətlə, mətbuatdan başqa heç bir sahədə çalışmamışam. Orta məktəbi bitirdikdən və 2 illik hərbi xidməti başa vurduqdan sonra ali məktəbə daxil olmuşam. İlk iş yerim AzərTac olub. Orada 1985-ci ildə müxbir kimi fəaliyyətə başlamışam. O zaman mətbu orqanın adı "Azərinform” idi. Sonra "Yeni Nəsil” Jurnalistlər Birliyində çalışmışam. 1998 -ci ildə yaradılan "RUH” Azərbaycan Jurnalistləri Müdafiə Komitəsinə rəhbərlik etmişəm. Daha sonra isə Mətbuat Şurasına sədr seçilmişəm. Həmin dövrdən bugünə kimi jurnalistika sahəsində çalışıram. Əmək kitabçamda sadəcə jurnalistika yazılıb.

- Mətbuat Şurasına sədrlik etməklə yanaşı, həm də Milli Məclisin üzvüsüz. Hər iki sahədə işləriniz kifayət qədər çoxdur. İki ağır missiyanı paralel daşımaq sizi yormur ki?

- İlk növbədə hər iki sahə mənim üçün çox maraqlıdır. Əsas odur ki, insan işini düzgün qursun, planlaşdırmanı doğru aparsın. Bir də hər bir peşəyə məsuliyyətlə yanaşmaq lazımdır. Əgər maraq, planlaşdırma və məsuliyyət varsa, hesab edirəm ki, insan hər cür ağır işin öhdəsindən gələ bilər. Məsələn, uzun illərdir jurnalistikanın içindəyəm və bu sahədə xeyli problemlərlə üzləşmişəm. Amma bütün problemlərin öhdəsindən gəlməyə çalışmışıq. Son 10-15 ildə ölkə mediasında müsbət nələr baş veribsə, orada mütləq Mətbuat Şurasının adı olub. İstər qanunvericilik sahəsində, istər mətbuatla bağlı həyata keçirilən məsələlərdə qırmızı xəttimiz seçilib. Deputat seçilməkdə məqsədim ondan ibarət olub ki, mətbuatla bağlı məsələləri məhz parlament müstəvisində gündəmə gətirmək şansı əldə edim. Əgər fikir versəniz, görərsiniz ki, çıxışlarımın əksəriyyəti sırf media ilə bağlıdır. Çalışmışam ki, jurnalistika ilə bağlı qəbul edilən qanunlarda, dəyişikliklərdə öz fikrimi ortaya qoyum, təklifimi verim. Həmçinin, Saatlı sevdiyim rayondur. Oranın sakinlərinə böyük sevgim, hörmətim var. İnsanlarla görüşüb, onların problemlərini dinləyirəm və parlamentdə məsələ qaldırıram. Problemlər şəxsidirsə, məsələyə fərdi yanaşıram. Əgər işıq, su, yol və s. məsələlərlə bağlı ümumi problemlərdirsə, o zaman müvafiq dövlət qurumları ilə müzakirələr aparıram. Təbii ki, insanlara yardım etdiyim zaman özümü xoşbəxt hiss edirəm. Regionlarda çox ciddi islahatlar gedir. Ölkənin təxminən 80 faizi qazlaşdırılıb, yolların çəkilişi sürətlə davam etdirilir. İnsanların sosial həyatının yaxşılaşması, məktəblərin, xəstəxanaların tikilməsi istiqamətində işlər onsuz da aparılır. Mənə elə gəlir ki, deputat görülən işləri bir qədər sürətləndirə, unudulan problemləri yenidən gündəmə gətirə bilər. Millət vəkili çalışmalıdır ki, ölkənin müxtəlif bölgələrində görülən abadlıq işləri onun üçün doğma olan rayonda da həyata keçirilsin. Fikrimcə, deputatlar nə qədər aktiv olsalar, təmsil etdikləri rayonlarda görülən işlərə də o qədər təkan verə bilərlər. Şübhəsiz ki, deputat kimi yerlərdə olan digər problemlərə də münasibət bildirirəm. Təmsil etdiyim rayon kənd təsərrüfatı rayonudur. Orada pambıqçılıq əsas sahələrdəndir. Ərazilərin vaxtında əkilməsi, toxum və gübrənin zamanında təmin edilməsi, suvarma işlərinin yubadılmaması üçün əlimdən gələni edirəm. İnsanların şəxsi problemləri ilə maraqlanıram, xəstə şəxslərin müayinəsi və müalicəsi üçün müvafiq qurumlarla əlaqə yaradıram. Adamları dinləmək, qayğılarına qalmaq, dərdlərinə şərik olmaq lazımdır. Əgər insanda bunları etmək həvəsi varsa, gördüyü işi ürəkdən görürsə, o zaman bütün işlər asanlaşır, vəzifə sənə yük kimi gəlmir.

- Prezident İlham Əliyevin Sərəncamı ilə "Şöhrət” ordeni ilə təltif edildiz. Ad gününüzdə dövlət başçısı tərəfindən ən böyük mükafatı almaq sizə necə təsir bağışladı?

- Cənab Prezidentə öz təşəkkürümü bildirirəm. Mən bu mükafatı sadəcə özümə yox, ümumilikdə Azərbaycan mediasına verilən yüksək dəyər kimi qiymətləndirirəm. Əslində, "Şöhrət” ordeni mənim üçüncü böyük mükafatımdır. 2010-cu ildə mən Əməkdar jurnalist adına layiq görülmüşəm. 2015-ci ildə Prezidentin sərəncamı ilə 3-cü dərəcəli "Vətənə xidmətə görə” medalı ilə təltif edilmişəm. Şübhəsiz, insan dövlət rəhbəri tərəfindən bu cür dəyərli mükafatlar alanda bir daha əmin olur ki, əgər bu ölkədə kim sevib-seçdiyi sahəsinə, peşəsinə xidmət edirsə, inkişafına çalışırsa, onun zəhməti qətiyyən hədər getmir, əvəzsiz qalmır. Eyni zamanda bu təltif insanda yeni məsuliyyət, cavabdehlik hissi yaradır. Görüləsi işlər çoxdur. Ölkə mediasına rəhbərlik edən bir qurumun sədri olmaq məni heç də yeni təşəbbüslərdən kənar qoymur, arxayınlaşdırmır. Gündəlik yaşam tərzimdə üzərimə düşən missiyanı yerinə yetirməyə çalışıram, öhdəliyimin fərqinə varıram. Azərbaycan mətbuatı hər zaman öz dövlətinin qayğısını hiss edib. Ölkə başçısı mətbuatın inkişafına öz töhfəsini verib və bundan sonra da verəcək. Bütün bunlar məndə böyük ruh yüksəkliyi yaradır.

- Media nümayəndələrinin MŞ sədri kimi sizdən gözləntiləri çoxdur. Ancaq görünən odur ki, mətbuat aləmində bütün həmkarları razı salmaq mümkün deyil. "Reket jurnalistika”ya qarşı mübarizə ilə bağlı təklifinizin birmənalı qarşılanmamasına münasibətiniz necədir?

- Təbii qarşılayıram, fikirlərimə birmənalı olmayan fikirlər səsləndirilə bilər. Əgər bütün cəmiyyət bir fikir üzərində cəmləşsəydi, əksinə, o zaman düşünmək lazım gələrdi. Söhbət ondan gedir ki, "reket jurnalistika”ya qarşı mübarizə komissiyasının tərkibiniin genişlənməsi vacib idi. Çünki məqsədimiz bu komissiyanın daha şəffaf fəaliyyət göstərməsidir. Əvvəllər komissiya üzvləri sadəcə MŞ-nin üzvləri vəayrı-ayrı KİV-lərdə çalışan jurnalistlərdən ibarət idi. İndi həm orada təmsil olunan baş redaktorların sayını çoxaldırıq, həm də üstəlik, komissiyaya hüquq-mühafizə orqanlarının nümayəndələrini dəvət edirik. Bəzi insanlar bu məsələdə haqlı, ya haqsız olaraq bizi tənqid edirlər. Daha doğrusu, bu dəyişikliyi medianın fəaliyyətinə məhdudiyyət kimi dəyərləndirməyə çalışırlar. Əslində, burada narahat olmağa heç bir əsas yoxdur. Mən Mətbuat Şurasının sədri kimi bunu deyirəm. Çox təəssüf ki, cəmiyyətdə aktiv olan bir sıra insanlar başqa yerlərdə uğursuzluğa düçar olduqları üçün media sahəsində öz fəaliyyətlərini qurmağa çalışırlar. Ancaq onların məqsədi ölkəni informasiya ilə təmin etmək deyil, şəxsi mənafelərini güdməkdir. Özlərinə qrup yaradıb rəqib qüvvələrə qarşı mübarizə aparmaq niyyəti daşıyırlar. Biz onları "reket jurnalistika” adlandırırıq. Məsələnin iki tərəfi var, biri reket jurnalistlərdirsə, digər tərəfi qanunsuz işlərlə məşğul olan rüşvətxor məmurlar və başqa şəxslərdir. Düşünürük ki, komissiyaya dəvət olunan dövlət orqanlarının nümayəndələrinin fikirləri müzakirələrdə böyük əhəmiyyət kəsb edəcək. Əlbəttə, bu metod kimlərəsə sərf etməyəcək. Gördüyünüz kimi, sərf etməyən qüvvələr açıqlamaları ilə özlərini büruzə verirlər.

- Jurnalistikanın içində olan şəxs kimi medianın problemlərinə daha yaxşı bələdsiz. Parlamentdə gələcəkdə qaldıracağınız məsələlər hansılar olacaq, bu istiqamətdə fəaliyyət planınız varmı?

- Təəssüflər olsun ki, hələ də Azərbaycan mediası iqtisadi baxımdan problemlərini həll edə bilməyib. Söhbət media orqanlarının maddi baza cəhətdən təkmilləşməsindən gedir. Bu sahədə ciddi problemlər mövcuddur. Reklam bazarı ilə bağlı vəziyyət də arzuolunan səviyyədə deyil. Heç bir baş redaktor istəməz ki, onun redaksiyasında peşəkar insanlar deyil, qeyri-obyektiv şəxslər çalışsın, cəmiyyətə yanlış informasiya versinlər. Bu cür problemlərin başında iqtisadi məsələlər durur. Daha sonra onlayn jurnalistika ilə bağlı məsələlər gündəmə gətirilməlidir. Artıq internet media resursları cəmiyyətin ictimai fikrinin formalaşmasında əsaslı rola malikdir. Bu sahə ilə bağlı Milli Məclisdə ayrı-ayrı qanunlara düzəlişlər olub. Amma onları daha da təkmilləşdirmək lazımdır. Eyni zamanda informasiya təhlükəsizliyi məsələsini gündəmə gətirməyi düşünürük. Azərbaycan müharibə şəraitində olan ölkədir. Artıq savaşlar yalnız top-tüfənglə deyil, həmçinin, informasiya üsulları ilə aparılır. İnformasiya sahəsində kifayət qədər çevik olmalıyıq, kiber hücumların qarşısını almalıyıq. Eyni zamanda hesab edirəm ki, qanunvericilikdə unudulan diffamasiya məsələsini də gündəmə daşımalıyıq. Bunlar şəxsən mənim parlamentdə qaldırmaq istədiyim problemlərdir. Sonda "Şərq” qəzetinə ad günümlə bağlı göstərilən xüsusi diqqət və qayğıya görə öz minnətdarlığımı bildirirəm. "Şərq” hər zaman özünəməxsus yazıları ilə öndə dayanıb.

İsmayıl

Şərq.- 2017.- 27 aprel.- S.5