HAQQ SƏSİMİZİ XARİCİ MEDİAYA ÇIXARMALIYIQ

Qarabağ mövzusu KİV-lərin diqqət mərkəzindədir, ancaq daha çox iş görmək olar

Ermənistanın Azərbaycana qarşı təcavüzü və işğalçılıq müharibəsinin tarixi kökləri dərindir və bu təcavüzkarlıq siyasəti erməni tarixinin mahiyyətindən qaynaqlanır, bu millətə məxsus xüsusiyyətləri əks etdirir. Bunun nəticəsidir ki, beynəlxalq və daxili vəziyyətin imkan verdiyi tarixi şərait yaranan kimi ermənilər xəyanətkar niyyətlərini reallaşdırmaq üçün bütün vasitələrdən istifadə ediblər. Bu gün də bunu davam etdirirlər. Qlobal dünyada, informasiya müharibəsi şəraitində erməni təcavüzünün və Azərbaycan reallıqlarının dünyaya çatdırılması vacib amillərdən sayılır. Bu proses çərçivəsində Azərbaycan mediasının üzərinə böyük vəzifə düşür.

Sovet dönəmində Azərbaycanda müstəqil informasiya resurslarının mövcud olmaması 20 Yanvar faciəsinin və sonrakı dövrdə xalqımıza qarşı törədilən digər ağır cinayətlərin beynəlxalq ictimaiyyətin diqqətinə çatdırılmasını xeyli çətinləşdirirdi. Azərbaycanın informasiya blokadasına alınması Dağlıq Qarabağ münaqişəsinin ilk illərində ermənilərin törətdikləri qanlı cinayətlərin ört-basdır edilməsilə nəticələnirdi.Məhz bu kimi səbəblərdən 90-cı illərin əvvəllərində beynəlxalq ictimaiyyət Qarabağda baş verənlər barədə demək olar ki, ancaq ermənilərin maraqlarına uyğun və əksər hallarda saxta informasiyalarla qidalanırdı. Bu səbəbdən də dünya ictimaiyyətində Azərbaycanın təcavüzkar, işğalçı, vandal obrazı yaranmışdı. Amma daha sonra vəziyyət nisbətən dəyişdi. Hazırda ölkəmizdə dünyanın nüfuzlu xəbər istehsalçıları ilə əməkdaşlıq edən xeyli sayda KİV orqanı fəaliyyət göstərir və Azərbaycan KİV-lərinin, media qurumlarının beynəlxalq əlaqələri elə də pis deyil, əksinə, qənaətbəxşdir.

Hazırkı vəziyyətdə erməni təcavüzünün, Azərbaycanın işğal həqiqətlərinin və ümumilikdə Dağlıq Qarabağ münaqişəsinə aid bütün məsələlərin mediada əks olunmasındakı real vəziyyəti qiymətləndirən ekspertlər də "Şərq”ə açıqlamasında mövcud sahədəki inkişaf və boşluqlara toxunublar.

"Yeni Müsavat” qəzetinin redaktoru Elşad Məmmədli Qarabağ problemi və ermənilərin təcavüzkarlığı ilə bağlı mövzuların Azərbaycan mediasının daim xüsusi diqqət yetirdiyi məsələlər olduğunu deyib. Onun sözlərinə görə, erməni təcavüzü, torpaqlarımızın işğalı faktı Azərbaycan mediasında maksimum işıqlandırılır:

"Erməni işğalçılığını dünyaya çatdırmaq üçün xarici dillərdə də saytlar yaradılıb. Ümumi götürəndə bu məsələdə vəziyyət qənaətbəxşdir. Yəni hər kəs bu məsələdə əlindən gələni edir. Bizim problemimiz medianın erməni təcavüzünü mediada işıqlandırmaqla bağlı deyil. Dərdimiz, faciəmiz odur ki, dünyada Azərbaycanın haqq səsi hələ də eşidilmir. Baxın, erməni vəhşiləri Füzuli rayonunun Alxanlı kəndini atəşə tutaraq, 2 yaşlı körpəmiz Zəhranı və onun nənəsini qətlə yetiriblər. Həmsədrlər isə bəyanat verib ki, tərəflər hərbi əməliyyatları dayandırsın. Azərbaycan mediası, habelə sosial şəbəkələrdəki fəallar bütün dillərdə bu vəhşiliyi dünyaya çatdırıblar və hər kəsdə məlumat var dünyada. Ancaq bu vəhşiliyə dünyadan adekvat reaksiya yoxdur. Biz erməni vəhşiliyinə don geyindirməyə çalışanları anlatmalıyıq. Onların anlaması üçün gərək biz bütün beynəlxalq vasitəçilərdən imtina edib, torpaqlarımızı azad etmək, erməni təcavüzünə son qoymaq üçün hərbi əməliyyatlara başlayaq. Dünyanın susqunluğu bizə artıq başqa yol qoymur”.

"Azadinform” informasiya agentliyinin baş redaktoru Niyaz Niftiyev isə mövcud durumda Azərbaycan mediasının peşəkarlıq nümayiş etdirdiyini hesab edir:

"Əlbəttə, istisnalar var və onlar da zaman-zaman aradan qaldırılır. Ümumilikdə isə bu istiqamətdə müsbət tendensiya var, iki il əvvələ qədər isə bu mövzuda müsbət nə isə söyləmək çətin idi. Konkret dünən Füzuli rayonunda baş verən hadisəni götürsək, Azərbaycan mediası faktın dünya ictimaiyyətinə çatdırılması istiqamətində çox böyük işlər görür. Bu gün bir çox internet resurslarımız rus, ingilis və digər dillərdə də xəbər istehsalı ilə məşğuldurlar. Onların imkanları ermənilərin törətdikləri məlum qətliamın beynəlxalq ictimaiyyətə çatdırılmasında əvəzedilməz rol oynayır. Bizə bu tip xəbərlərin daha çox dildə yayılması lazımdır ki, baş verənlərdən hamı xəbərdar olsun. Düşünürəm ki, buna da nail oluruq”.

Milli.az saytının baş redaktoru Anar İmanov da bu sahədəki vəziyyəti qənaətbəxş hesab etdiyini deyib və boşluqların da olduğunu istisna etməyib:

"Bunlar nədən ibarətdir? Fikrimcə, bütün KİV-lərdə mütləq Azərbaycan dili ilə yanaşı, xəbərlər həm də rus və əsasən ingilis dilində paylaşılmalıdır. Türk, çin, fars və fransız dilində də belə xəbərlərin dünya ictimaiyyətinə çatdırılması mütləqdir. Erməni təcavüzü və Qarabağ münaqişəsi haqda bütün dünya bilməlidir. Bu məsələdə təkcə media yox, diasporamız və səfirliklərimiz də fəaliyyətlərini artırmalıdırlar. Başqa bir vacib məqam sosial şəbəkələrlə bağlıdır. Kifayət qədər ciddi iş gedir orada bizim tərəfimizdən, sadəcə, mübarizəni daha da yaxşı aparmaq lazımdır. Hazırda insanların çoxu xəbərləri sosial şəbəkələrdə görür, oxuyur”.

"Azadinform” informasiya agentliyinin baş redaktorunun müavini Elçin Bayramlı isə mediamızda bu mövzuya diqqətin az olduğunu deyib. Onun sözlərinə görə, bu mövzu ancaq faciələr və ya döyüşlər baş verəndə aktuallaşır:

"Bizim tariximizdə müharibə dövrü mətbuatının təcrübə və ənənəsi olub. Böyük Vətən Müharibəsi dövründə və ondan sonra mətbuat əsgərlərin həyatından göstərdikləri qəhrəmanlıqdan yazır, tərxis olunmuş əsgərlərin, veteran zabit və generalların xatirələrini verir, müharibədən zərər çəkmiş mülki əhalinin təəssüratlarını dərc edir, müharibənin viran qoyduğu yerləri göstərir və yazırdı. Təəssüf ki, indi ancaq qısa xəbərlərlə kifayətlənirik.

Yazılar isə çox vaxt layihə çərçivəsində hazırlanır”. Verilən yazı və xəbərlərin isə bir çox hallarda milli və dövlət maraqlarına zərərli olduğunu vurğulayan E.Bayramlının fikrincə, unutmamalıyıq ki, bu yazıları beynəlxalq təşkilatların nümayəndəlikləri, səfirliklər, həmçinin düşmənlərimiz də izləyir:

"Hansısa dövləti söymək, erməniləri qıracağıq, qırmalıyıq kimi ifadələr işlətmək bəzi hərbi məsələləri və mövqeləri, əməliyyat zamanı qoşunların dislokasiyası kimi məsələləri vermək olmaz. Qəhrəmancasına həlak olmuş hərbçinin pis vəziyyətə düşmüş cəsədinin, onun ailəsinin faciəli fəryadını vermək, göstərmək olmaz. Bu, insanlara, xüsusilə əsgər analarına, çağırışçı yaşa çatmaqda olan gənclərə ciddi psixoloji təsir göstərir, qorxu aşılayır. Ümumiyyətlə, bu sahədə medianın fəaliyyətinə hansısa bir orqan nəzarət etməlidir, dövlət və ictimai təşkilatların birgə koordinasiyası ilə işləyən komissiya. Redaksiyalar bu məsuliyyətli işi təcrübəsiz gənclərə yox, peşəkar və təcrübəli əməkdaşlara həvalə etməlidir. Çox sayda xırda saytlara və sosial şəbəkə səhifələrinə nəzarət edilməlidir”.

Əsas müharibənin informasiya və təbliğat müharibəsi olduğunu deyən redaktor müavini bizim bu müharibədə uduzduğumuzu böyük təəssüf hissi ilə əlavə edib:

"Bu müharibə ölkə mediasında yox, xarici KİV-də aparılmalıdır. Bizdə bu sahədə dövlət təkbaşına mübarizə aparır, xaricdəki on milyonlarla soydaşımızın və diaspor təşkilatlarımızın fəaliyyəti çox zəifdir. Ermənilərdə isə dünyanın müxtəlif yerlərində yaşayan milyonlarla erməni Ermənistan dövləti ilə birgə mübarizə aparır.

Təəssüf ki, reallıq belədir. Lakin vəziyyəti dəyişmək üçün imkan var, sadəcə, bütün dünyadakı azərbaycanlılar vahid ideologiya - azərbaycançılıq ətrafında birləşməli, bu müharibədə Azərbaycan dövlətinə hər cür dəstək verməlidir. Xüsusilə böyük dövlətlərdəki diasporamız, nəhayət, ciddi fəaliyyətə keçməlidir. Bunları etməsək, ideoloji və informasiya müharibəsində uduzacağıq və bu halda antiterror əməliyyatına başlamaq üçün lazım olan zəmini və beynəlxalq rəyi hazırlaya bilməyəcəyik”.

"Azxəbər.com” saytının həmtəsisçisi Əfsələddin Ağalarov da deyib ki, hazırda gündəmin əsas xəbər başlığı 2 yaşlı Zəhranın erməni gülləsinin qurbanı olmasıdır: "Bu xəbərlə bağlı biz çox işlər görə bilərik. Ölkə mətbuatında məlumatlar vermək önəmlidir. Təəssüflər olsun ki, biz işin böyük hissəsini yerli mətbuatda yaymaqla kifayətlənirik. Amma cənab Prezident İlham Əliyev də jurnalistləri bu cür vəziyyətlərdə xarici media ilə əlaqə qurmağa, onları təşviq etməyə səsləyir. Ölkə xaricində işlər görmək üçün çalışmaq lazımdır. Biz haqq səsimizi xarici mediaya çıxartmalıyıq”.

Şəymən

Şərq.- 2017.- 7 iyul.- S.11.