“İNGİLİS DİLİNDƏ MÜKƏMMƏL ŞƏKİLDƏ DANIŞA BİLİRƏM”

 

Bilal Əliyev: “Bir dəfə tərcüməçi dedi ki, soruşurlar ki, əcəb belə güclü səs sahibi ingilis dilində danışa bilmir? Düzünü desəm, bu söz mənə təsir etdi, utandım

Dünya musiqisini diqqətdən keçirdim. Bəyəndiyim musiqilər oldu ki, onları seçib lentə aldırdım

 

Xeyli vaxtdı mətbuatda, efirlərdə görünməyən Xalq artisti Bilal Əliyev sükutunu "Şərq”ə pozdu. Xalq artisti yaradıcılığından danışdı.

- Bilal Əliyev çoxdandı gözə dəymir. Səhnədən küskün düşməmisiz?

- Qətiyyən. Sənətimlə məşğulam. Yeni mahnılar üzərində çalışıram. Onların bir neçəsi ingilis dilində olan musiqilərdi. Enyi zamanda Azərbaycan adlı yeni bir bəstəni lentə aldırmışam.

- Niyə məhz ingilis dilində musiqilərə marağınız yaranıb? Bu, xaricdə olan qastrol səfərlərinizlə bağlıdı?

- Qastrol səfərlərində çox oluram. Məndən dəfələrlə xarici musiqilər istəyiblər. Bir dəfə tərcüməçi dedi ki, soruşurlar ki, əcəb belə güclü səs sahibi ingilis dilində danışa bilmir? Düzünü desəm, bu söz mənə təsir etdi. Utandım. Onlara bildirdim ki, sizə söz verirəm ki, iki il ərzində mükəmməl ingilis dilində danışacam. Ordan gəlib başladım ingilis dilini öyrənməyə.

- Yəni ingilis dili kurslarına getmisiz...

- Bəli, həm Bakıda ingilis dili kurslarına getdim, həm yeddi dəfə İngiltərəyə gedərək orada ingilis dili kurslarında iştirak etdim.

- Yəni Bilal Əliyev artıq sərbəst ingilis dilində danışa bilir?

- Bəli. Artıq mükəmməl ingilis dilində danışa bilirəm. (Red: T.M - Xalq artisti zarafatyana hələ bizimlə bir az ingilis dilində danışdı).

- İngilis dilini bilmək yaradıcılığınıza qədər təsirini göstərə bilib?

- İngilis dilini öyrəndikdən sonra dünya musiqisini diqqətdən keçirdim. Bəyəndiyim musiqilər oldu ki, onları seçib lentə aldırdım.

- Bayağı musiqilərə maraq çoxalıb.

- Həqiqətən musiqi zövqümüzü korlayan elə mənasız mahnılar eşitməli oluruq ki... Bu musiqilər Azərbaycan ladlarından çox uzaqdı. İndi hamı oxuyur, hamı mahnı yazır. Amma bizim özümüzə aid bir musiqi kökümüz var. Gəlmə musiqilərlə milli musiqi ənənələrini korlamayaq. Yad nəfəsləri gətirməklə milli musiqimizi korlayırlar.

- Bilal Əliyev niyə konsert proqramı ilə çıxış etmir?

 

- Əslində konsert proqramı vermək niyyətim var. Artıq repertuar üzərində işləyirəm. Bu konsertdə həm retro musiqilər, həm klassik musiqilər, muğam parçaları yer almalıdı. İmkan qədər istəyirəm ki, milli musiqimizi dünya səhnələrində layiqincə təmsil edək. Qüdrətli bir dövlətdə yaşayırıq. Biz azərbaycanlı olmağımızla da qürurlanmalıyıq. Yeri gəlmişkən, fürsətdən istifadə edib ölkə başçısının sərəncamı ilə milli Mətbuat Günü münasibətilə ev alan bütün jurnalistləri təbrik edirəm. Həqiqətən şərəfli məsuliyyətli bir peşənin sahiblərisiz. Bizləri xalqa sevdirən , tanıdan da məhz mətbuat nümayəndələri, jurnalistlərdi. Ev alan jurnalistlər arasında dostlarım da var. Sizlərə yalnız Prezidentin hədiyyə etdiyi evdə firavan həyat arzulayıram.

 

Tahirə

Şərq.- 2017.- 21 iyul.- S.13.