“UŞAQLARIN ÜZÜNÜ AZ GÖRÜRƏM”

Gülyanaq Məmmədova: “Həm səhnədə olmaq, həm övlad böyütmək asan deyil”

“Mən ailəni heç nəyə qurban verə bilmərəm. Bəlkə şanslıyam ona görə ki, mənim ailəm məni başa düşüb, səhnədə mənə dəstək olub”

Sənət səhnədə olan hər kəsdən məsuliyyət, səhnəyə sevgi, tamaşaçıya sayğı tələb edir. Təbii ki, səhnənin görünən və görünməyən tərəfləri var. Tamaşaçı görə bildiyini səhnə önündə seyr edir, görə bilmədiyini isə kulis arxası dedi-qodu olaraq eşitmək imkanı əldə edir. İstənilən halda bu gün səhnə arxasında heç nə sirr qalmır. Az sənətçilər tapılar ki, onların kulis qalmaqalları olmasın, adları qalmaqallarda hallanmasın. Bu dəfə "Şərq”in qonağı Xalq artisti, qalmaqallarda heç zaman adının hallanmasına imkan yaratmayan Gülyanaq Məmmədovadı.

- Çoxdandı görüşmürdük. O vaxtdan bu günədək "Şərq”in oxucuları üçün yəqin siz də darıxmısız...

- Sizlərlə həmsöhbət olmaq mənə həm xoşdu, həm də məsuliyyətlidi. Çünki sənət aləmindən, şou-biznes aləmindən bu gün yazanlar da, mətbuat orqanları da yetərincədi. Amma peşəkar mətbuatla ünsiyyətdə olmaq sənətçiyə xüsusi zövq verir. Təbii ki, sizin oxucular arasında məni sevənlərin olduğuna əminəm deyə sevərək danışmaq həvəsindəyəm. Sizdən suallar gəlsin, mən də cavab verməyə çalışım.

- Yenidən ana oldunuz. 4-cü dəfə ana olmaq hər sənətçinin qisməti deyil.

- Allah bütün ailələrə övlad payı qismət etsin. Ailədə çox övladın olmasının nəyi pisdir ki? Biz də çoxuşaqlı ailədə böyümüşük. Mənə elə gəlir ki, ruzini verən də Allahdı. Əgər imkanın, səhhətin buna yol verirsə, ailə nə qədər böyük olsa, o qədər güclü olar. Həm səhnədə olmaq, həm övlad böyütmək asan deyil.

- Bəs siz bunu necə çatdırırsız. Həm səhnədə fəaliyyət göstərmək, həm 4 övlada, ailəyə sahib çıxmaq çətin deyil?

- Demirəm ki, asandı. Amma əgər ailəyə diqqət yetirmək istəsən, bunu çatdırmaq olar. Bir də əgər səni başa düşən, səni anlayan həyat yoldaşın varsa.

- Yəni həyat yoldaşınızın dəstəyi olmasa, bunları tək başına idarə etmək olmur.

- Təbii ki, həyat yoldaşım mənə dəstək olmasa, mən səhnədə bu gün əldə etdiyim uğurları bəlkə də qazana bilməzdim. O həm mənə dost həm məsləhət verənim, həm də həyat yoldaşım olub. Bilirsiz, 4 uşağı təbii ki, böyütmək çətindi. İstər maddi baxımdan, istər mənəvi baxımdan buna insanın gücü çatmalıdır. Deyim ki, mən uşaqlarıma yetərincə vaxt ayırıb, onların qulluğunda dura bilirəm, bu yalan olar. Təbii ki, mənə bu işdə kömək edən insanlar var. Amma ən böyük dəstəyim yoldaşımdı. O mənə mənən dəstəyini göstərməsə, mən bu qədər sənətimə özümü həsr edə bilməzdim. Uşaqların üzünü az görürəm, ancaq müəyyən tətil vaxtlarında bir neçə gün ailəmlə birgə dincəlməyə, harasa istirahətə getməyə imkanımız olur. Qalan vaxtlarda mən səhər evdən çıxıram, sənətimlə, yaradıcılığımla, pedaqoji fəaliyyətimlə məşğul oluram. Tədbirlər, çəkilişlər, toylar, bütün bunları çatdırmaq inanın asan deyil. Mən evə gələndə çox vaxt uşaqlar yatır. Amma yenə də evdə olanda çalışıram onların nazını çəkim, onlara özüm qulluq edim.

- Səhnədə olan xanım üçün gəlin olmaq necə, çətindi?

- Mənə o qədər çətin olmadı. Çünki qayınanam mənə hörmət edir, sənətimə dəyər verir. Əslində mən gec ailə qurmuşam, bəlkə mənim yaşımda olan xanımlar bu gün özləri artıq qayınana olublar. Amma mən bu yaşda gəlinəm. Yoldaşımın ailəsindən həmişə sənətimə də, özümə də hörmət görmüşəm. Bu baxımdan həqiqətən şanslı sənətçiyəm. Mən xaraktercə ailəyə bağlı insanam.

- Sənət qurban tələb edir fikri ilə razılaşa bilirsiz? Doğrudanmı sənət ailəni qurban verməyə əsaslı səbəb ola bilər?

- Mən ailəni heç nəyə qurban verə bilmərəm. Bəlkə yenə deyirəm, şanslıyam ona görə ki, mənim ailəm məni başa düşüb, səhnədə mənə dəstək olub. İnsan ailəsinə dəyər verməyi bacarmalıdı. Hər xırda söz-söhbətə görə ailə dağıtmaq düzgün deyil. Mən evimdə valideynlərimdən də ailəyə dəyər görmüşəm. Mən bu gün də valideyn adı gələndə uşaq kimi doluxsunuram. Ailə olmasa, sənin səhnədə əldə etdiyin uğurların bir anlamı varmı? Sadəcə səhnə bu sahədə olan hər kəsdən işgüzarlıq, məsuliyyət tələb edir. Məsuliyyət qurban demək deyil. Sənət aləmində olan insanın hər saatı planlanmış şəkildə olmalıdır ki, o, ailəsinə də, sənətinə də zaman ayıra bilsin.

- Gülyanaq xanım Opera və Balet Teatrının səhnəsində Leyli kimi də çıxış edib. Opera səhnəsinə çıxmaq digər səhnələrə çıxmaqdan doğrudanmı fərqli hissdi?

- Çox fərqli hissdi. Hər səhnənin öz ab-havası olur. Opera fərqli bir aləmdi.

- Nə qədər sənətçidən məsuliyyət tələb edir?

- Opera səhnəsində olmaq sənətçidən ikiqat məsuliyyət tələb edir. Hər sənətçi opera səhnəsində çıxış edə bilməz. Operada təkcə sənətçidən səs tələb olunmur. Burda sənətçinin eyni zamanda aktyorluq potensialı vacib amillərdən sayılır. Operanın səhnəsində solo konsert vermək, xanəndə kimi muğam konserti təşkil etmək başqadır. Amma bu səhnədə obraz oynamaq daha çətin, daha çox zəhmət və məsuliyyət tələb edən səhnədi. Operada bir partiyanı oynamaq bilirsiz nə qədər çətindi? Opera səhnəsində tamaşada oynamaq üçün rejissor, aktyor və tərəf-müqabilinin oyunu biri-birini tamamlamalıdır. Burda xanəndə həm də aktyor olaraq peşəkar olmağı bacarmalıdı. Bu səhnədə nə oxumaq tərzində, nə də aktyorluq imkanlarını təqdim edərkən quruluşdan kənara çıxmaq olmaz. Ona görə də çox çətindi. Həm gözəl hissdi, həm də ağırdı. Mən iki dəfə Leylini Opera və Balet Teatrının səhnəsində oynamışam, hələ də o təəssürat məni izləyir. 2 dəfə Leyli kimi opera səhnəsində çıxış etmişəm. Nə tamaşaçı məndən doyub, nə mən tamaşadan, tamaşaçımdan doymuşam.

- Bir də Leyli olaraq səhnədə olmaq arzunuz varmı?

- Çox istərəm. Mən müqavilə əsasında Opera Teatrında çıxış etmişəm. Əgər teatr təşkilati işləri öz üzərinə götürsə, bir də o həyəcanı yaşamaq, opera səhnəsində oynamaq istərdim.

- Leyli olmaq üçün nə qədər zaman tələb etdi? Axı Leylini yaratmaq asan deyil?

- Adətən Leylini yaratmaq üçün ən azı 6 ay vaxt lazım olur. Mən bir aya Leyli olmağa məcbur qaldım. Tərəf-müqabilim Mənsum İbrahimov və Təyyar Bayramov olub. Mənə Leyli obrazını yaratmağa Gülyaz xanımın böyük köməyi olub. Gülyaz xanım özü ən gənc Leylilərdən olub. Karifeylərdən sonra, Səkinə İsmayılovadan sonra ilk ən gənc Leyli Gülyaz Məmmədova olub. Mənsum İbrahimov ilk Məcnununu, Gülyaz xanım da ilk Leylisini bir yerdə oynayıblar. Mən də o tamaşanı görüb Leyli və Məcnuna bir də vuruldum. 1993-cü ildə ilk dəfə Mənsum müəllimlə Gülyaz Məmmədova səhnəyə çıxıb bu möhtəşəm tamaşanı oynayıblar. Mən də onların Leyli və Məcunlarını sevmişəm. Sonralar Nəzakət Teymurova Mənsum müəllimlə duet ortağı oldular. Mənim Leylimə gəlincə, mən bir aya Leylini hazırlamalı oldum. Amma sevərək Leyli olmuşam. Leylini yaşamadan, o obrazı ruhunla dərk etmədən oynamaq olmaz. Opera səhnəsi çox məsuliyyətli səhnədi. Kənardan çox asan görünə bilər. Kimsə sinəsinə vura bilər ki, Leylini oynamağa nə var ki, amma inanın, opera səhnəsində ən xırda obrazı oynamaq belə həm ağırdı, həm də məsuliyyətlidi. O həyəcanı yaşamadan başa düşmək olmaz. Mikrofonsuz 1000 tamaşaçının qarşısında oynamaq o qədər asan deyil. Xanəndə elə ifa etməlidir ki, zalın son oturacağında oturan tamaşaçı da səni eşidə bilsin.

- Opera Teatrına gələn tamaşaçı da əslində digərlərindən fərqlənir. Akademik zövqü və musiqi duyumu olan tamaşaçı qarşısında çıxış etmək məsuliyyəti də ayrıca yükdü...

- Təbii, Opera və Balet Teatrına gələn tamaşaçının həqiqətən zövqü də akademik zövqdür. O, digər tamaşaçıdan bu baxımdan fərqlənir. Opera Teatrına təsadüfi tamaşaçı gəlmir. Ora gələn tamaşaçı səhnədə olan ifaçıdan, aktyordan əsl peşəkar ifa və mükəmməl obraz tələb edir. Sənin opera səhnəsində qüsura yol verməyə ixtiyarın yoxdu. Gülyaz xanım mənə məsləhət verirdi ki, "Leyli və Məcnun” tamaşasında Leylinin şam tutan partiyasını ifa edərkən ağlama, çünki ondan sonra sənə daha güclü səs lazım olacaq. Çünki o partiyadan sonra Qatar şöbəsini ifa etməlisən. Bacıma dedim ki, o hissədə ağlamağı bacarmıram. Çünki içimdən yaşayaraq Leylini oynayıram. Mənə elə gəlir ki, hər bir xanəndə Leyli olmaq arzusu ilə yaşayır. Mən elə gəlir mən öz Leylimlə fərqli olmağı bacarmışam.

Tahirə

Şərq.- 2017.- 30 uyun.- S.13.