Ölüm Ona yaraşmırdı

Hamı Kamran İsrafilovu yerini bilən, mədəni insan kimi tanıyırdı

"Əziz dostlar! Biri var idi, biri yox idi. Bir Kəs və bir Nakəs var idi. Kəs gözəl əməllərlə tanınırdı. Nakəs isə babaykalıq edib, pislik yayardı. Bir gün Nakəs dözməyib, Kəsə yaxınlaşdı. Sual etdi ki, bəs necə edirsən ki, səni sevirlər? Kəs məsləhət verdi ki, sevgi ilə danışıram, sevgi ilə yaşayıram. Sən də et. Mütləq alınacaq. Nakəs düşündü. Elə bu vaxt yağış yağmağa başladı...” Bu onun - aktyor Kamran İsrafilovun son paylaşımı olub.Bakı şəhər Mədəniyyət və Turizm İdarəsinin şəbəkəsinə daxil olan Mərdəkan Mədəniyyət sarayının bədii rəhbəri, aktyor Kamran İsrafilov 39 yaşında vəfat etdi. Aktyor beyin qansızması nəticəsində dünyasını dəyişib. Mərhum Şüvəlan qəsəbəsində, "Mirmövsüm ağa” ziyarətgahının yanında dəfn olunub.

Qeyd edək ki, 1979-cu il təvəllüdlü K.İsrafilov Heydər Əliyev Fondunun təşəbbüsü ilə baş tutan Novruz Bahar Festivalının keçirilməsində, Strasburqda YUNESCO-nun qərargahında Azərbaycan Dövlət Gənclər Simfonik Orkestrinin və Uşaq Xorunun iştirakı ilə "Azərbaycanın xoşməramlı mələkləri” adı altında keçirilən konsertin lentə alınmasında və bir sıra digər tədbirlərin işıqlandırılmasında yaxından iştirak edib.Həmçinin, İTV-də uşaq və digər verilişlərdə aparıcı olub, Arzu Əliyevanın prodüserliyi ilə çəkilmiş "Əbədi ezamiyyət” sənədli filmində Ə.Topçubaşovun obrazını canlandırıb.Tanıyanlar isə onun nə qədər sakit, kübar əxlaqa sahib olduğunu bilirdi. Elə tamaşaçı yaddaşında Kamran saf bir insan olaraq qala bildi. Xüsusilə də uşaqların sevimlisi ola bilmişdi. Uşaq verilişlərinin aparıcısı olan Kamran balaca tamaşaçıların sevimlisinə çevrilə bilmişdi. Onların təmiz ürəklərində yer tutmuşdu.Onunla tanışlığım İTV telekanalındakı uşaq verilişindən başladı. Təxminən 12-13 il əvvəl oğlumla onun verilişində qonaq olduq. Elə o gündən dostluq edə bildik. O gün bir də Kamranı tanımaq, onun istər insan, istərsə də aktyor olaraq görünməyən tərəflərini kəşf etmək imkanım oldu. Sadəliyi, dürüstlüyü, səmimiyyəti məndə sanki illərlə dostluq etdiyim insanı mənə xatırlatdı. Elə bu gün hamı onu belə insan olaraq xatırlamağa çalışdı.

Aparıcı Hacı Nuran Kamranın vaxtsız ölümünə təsirləndiyini dilə gətirdi: "Gözəl münasibətimiz olub. Bir çox tədbirlərdə bir yerdə iştirak etmişik. Onun ölməyi həqiqətən vaxtsız, vədəsiz oldu. Gözlənilməz ölümlər insana daha çox təsir edir. Yaşamağı sevən insan idi. Heyif ki, ölüm bəzən sevdiklərimizi bizdən tez alıb aparır. Allah rəhmət eləsin!”Şeyx Əbdül Mahmudbəyov onu belə xatırladı: "Gözəl insan, maraqlı aparıcı kimi yaddaşımda qalıb. Kamranla bir neçə verilişdə bir yerdə olmuşuq, bir çox tədbirlərdə iştirak etmişik. Yerini bilən, mədəni bir insan idi. Çox səliqəli idi. Məsuliyyətli olduğu aparıcısı olduğu hər tədbirdə hiss olunurdu. Eşitdim, pis oldum. Ona ölüm yaraşmırdı. Düzünü desəm, inanmaq istəmədim. Amma həyat bizi acı oyunları ilə imtahana da çəkir. Allah rəhmət eləsin”.

Sinif yoldaşı, yazar Valeh Əhmədov isə Kamranın ölüm xəbərindən sarsıldığını bildirdi:

"Əslində inanmaq da istəmirəm. O qədər maraqlı, səmimi insan idi ki, onunla dostluqdan heç vaxt yorulmamışam. Çox həssas, diqqətə önəm verən bir insan idi. Bəzən özümə belə qəribə gəlirdi ki, insan nə qədər həssas ola bilər. Uşaqları çox sevirdi. Pozitiv insan idi. Ən çətin günlərində belə heç kimin qəlbini qırmazdı. Hərdən deyirdim ki, bir az dəyiş. Sən bu zəmanənin adamı deyilsən. Yaradıcı ruhlu insan idi. Allah rəhmət etsin. Dost itkisi ağır olur. Həqiqətən dəyərli dostumu itirdim”.

İctimai Televiziyanın aparıcısı Saleh Bağırov da həmkarı barədə bunları söylədi:

"Onun ölümü hər birimizə təsir etdi. Həmişə hamıya hörmətlə yanaşırdı. Uşaq verilişlərinin aparıcısı olduğu müddətdə onun körpələrlə, studiyaya gələn balacalarla nə qədər səmimi, mehriban olduğunu görəndə bir az təəccüb edirdim. İnsanda bu qədər səbir olarmı? Kamran hər birimizin yaddaşında özünə hörmət etməyi bacaran insan kimi qaldı. Allah rəhmət eləsin!”

Tahirə Məmmədqızı

Şərq.- 2018.- 14 fevral.- S.13.