Media aktiv olmalıdır

Jurnalistlərimiz Rusiyadan olan həmkarları ilə informasiya mübadiləsi aparmalıdırlar

Unutmayaq ki, Dağlıq Qarabağ problemimiz var və Rusiya münaqişənin həllində vasitəçi ölkədir. Şimal qonşumuzda münaqişənin həlli ilə bağlı milli maraqlarımıza uyğun informasiyaların yayılması vacibdir

(Əvvəli ötən sayımızda)

Bakıda Mətbuat Şurası ilə Rusiya Jurnalistlər İttifaqı arasında əməkdaşlıq haqqında Memorandum imzalandı. Sənədə Rusiya Jurnalistlər İttifaqının sədri Vladimir Solovyov və MŞ sədri, millət vəkili Əflatun Amaşov imza atıb. Bu münasibətlə Mətbuat Şurasında keçirilmiş mərasimdə çıxış edən Ə.Amaşov rəhbərlik etdiyi qurumun fəaliyyət istiqamətlərindən söz açıb. MŞ sədri həmçinin Azərbaycanda söz və ifadə azadlığı sahəsindəki vəziyyətin xarakterik xüsusiyyətlərinə diqqət çəkib. Ə.Amaşov qurumun beynəlxalq əlaqələri barədə də məlumat verib və bildirib ki, Rusiyadan Azərbaycana, Azərbaycandan isə Rusiyaya jurnalist səfərləri gerçəkləşməkdədir. Mətbuat Şurası ilə Rusiya Jurnalistlər İttifaqı arasındakı əməkdaşlıq Memorandumu bu prosesin daha təkmil formada reallaşdırılmasını təmin edəcək, faydalı nəticələr verəcək: "Mətbuat Şurası və Rusiya Jurnalistlər İttifaqı arasında imzalanan Memorandum iki ölkə jurnalistləri arasında əlaqələri daha da inkişaf etdirəcək. Bu vaxta qədər də iki ölkə arasında jurnalistika sahəsində əlaqələr mövcud idi. İmzalanmış memorandumun da əlaqələrimizin möhkəmləndirilməsinə töhfəsini verəcəyinə inanırıq. Qeyd etmək istərdim ki, hər iki ölkə jurnalistlərinin qarşılıqlı səfərləri planlaşdırılır. Mayda Azərbaycan jurnalistləri Rusiyaya səfər edəcəklər”.

Rusiya Jurnalistlər İttifaqının sədri V.Solovyov da əməkdaşlıq Memorandumunun iki ölkənin media qurumları, eləcə də jurnalistləri arasındakı təmasın daha sistemli şəkildə qurulması üçün etibarlı baza rolunu oynayacağına əminliyini vurğulayıb. Bildirib ki, Rusiya Jurnalistlər İttifaqı Avropanın ən böyük jurnalist təşkilatlarındandır. Tərkibində 100 min nəfəri birləşdirən ittifaqda 82 regional təşkilat, 40 yaradıcılıq birliyi, assosiasiyası təmsil olunur. Görüşdə həm Mətbuat Şurasının, həm də Rusiya Jurnalistlər İttifaqının jurnalist hüquqlarının qorunması, onların təhlükəsizliklərinin təmin olunması, qanunvericilik bazasının təkmilləşdirilməsi, eləcə də jurnalistika sahəsində gerçəkləşdirdikləri müxtəlif fəaliyyət növlərinin oxşar və fərqli cəhətləri müzakirə edilib. Məlumat üçün deyək ki, Mətbuat Şurası ilə Rusiya Jurnalistlər İttifaqı arasında imzalanmış əməkdaşlıq Memorandumunda jurnalistlərin və KİV nümayəndə heyətlərinin biri-birinin fəaliyyəti ilə tanış olmaları üçün qarşılıqlı səfərlərin təşkili, təcrübə mübadiləsi, birgə layihə və proqramların həyata keçirilməsinə dəstək göstərilməsi, jurnalistikaya dair təlim vasitələrinin hazırlanmasında və nəşrində birgə iştirak, tərəflərin iştirakı ilə konfranslar, treninqlər, müsabiqə və seminarlar təşkil etmək, qarşılıqlı maraq doğuran məsələlərdə informasiya mübadiləsi aparmaq və sair məqamlar nəzərdə tutulub.Bir məqamı da qeyd edək ki, Rusiyanın Jurnalistlər İttifaqının sədri Vladimir Solovyovu Azərbaycan Prezidenti İlham Əliyev də qəbul edib. Dövlət başçısı Azərbaycan ilə Rusiya arasında digər sahələrdə olduğu kimi, kütləvi informasiya vasitələri nümayəndələrinin arasında da əlaqələrin fəallaşdırılmasının vacibliyini vurğulayıb. Prezident bildirib ki, Azərbaycan və Rusiya KİV nümayəndələrinin mütəmadi qarşılıqlı səfərləri ictimaiyyətin ölkələrimizdə baş verən proseslər barədə daha çox məlumatlı olması işinə kömək edə bilər.Rusiya-Azərbaycan mediası arasındakı əlaqəni "Şərq”ə dəyərləndirən Demokratik Jurnalistlər Liqasının sədri Yadigar Məmmədli deyib ki, Mətbuat Şurası ilə digər ölkələrin jurnalist təşkilatları arasında müqavilələr imzalanması çox mütərəqqi haldır. Xüsusən, qonşu ölkələrlə, Türkiyə, İran və Rusiya kimi dövlətlərlə bu istiqamətdə imzalanan sənədlər mühümdür:

"Ancaq əsas məsələ memorandum imzalandıqdan sonra görüləcək işlərdir. Sözün açığı, indiki vəziyyət bizi qane etmir. Müqavilədən sonra işlər nizamlı və peşəkarlıqla görülməlidir. Belə memorandumlar imkan verir ki, tərəfləri təmsil edən jurnalistlər, media qurumları bir-biri ilə birbaşa əlaqə yaratsınlar, informasiyanı ilk mənbədən alsınlar. Hər qonşu ölkədə medianın durumu fərqlidir. Bizim jurnalistlərimiz bu fərqlilikdən yararlanmalıdır. Ən əsası isə öz həmkarlarından dolayı yolla deyil, birbaşa məlumat almalıdırlar. Çox zaman informasiyanı digər qurum üzərindən alırıq. Məncə bu, doğru deyil, çünki bəzən ciddi problemlərə səbəb olur. O baxımdan müxtəlif media mühitləri, ələlxüsus qonşu dövlətlərin media məkanı ilə birbaşa əlaqə çox önəmlidir. Unutmayaq ki, Dağlıq Qarabağ problemimiz var və Rusiya münaqişənin həllində vasitəçi ölkədir. Şimal qonşumuzda münaqişənin həlli ilə bağlı milli maraqlarımıza uyğun informasiyaların yayılması vacibdir. Bu baxımdan memorandum qarşımızda böyük perspektivlər açır”."Yeni Müsavat” qəzetinin redaktoru Elşad Məmmədli də "Şərq”ə deyib ki, Rusiya və Azərbaycan tarixi qonşulardır. Rusiya regionda böyük gücdür və proseslər göstərir ki, bu ölkə ilə bütün sahələrdə əməkdaşlıqları gücləndirmək zəruridir: "Ötənlərdə analitik-təhlili yazılarımda Rusiya ilə daha sıx işləməyin vacibliyi barədə yazmışdım. Təbii ki, Rusiya mediası ilə əməkdaşlıq daha mühümdür. Çünki informasiya mübarizəsi hazırda dünyanın əsas prioritetidir və media ən güclü silahdır. Nəzərə alsaq ki, Rusiya mediası kifayət qədər güclü və nüfuzludur, onlara çıxış imkanlarını artırmaq olduqca mühümdür. Sizə bir fakt deyim. Bildiyiniz kimi, QHT sektorunun təmsilçisiyəm. QHT Şurasının dəstəyi ilə avqust-noyabr ayları ərzində "Göyçə, Zəngəzur, İrəvan – Azərbaycanın tarixi torpaqları və mədəni irsimiz” – mətbuatda və sosial şəbəkələrdə böyük təbliğat kampaniyası” adlı uğurlu bir layihə icra etmişəm. Bu məsələyə Cənab Prezident İlham Əliyev də YAP-ın son qurultayında çıxışı zamanı xüsusi diqqət ayırdı. Prezident "bu tarixi torpaqlar unudulmamalıdır və biz bu torpaqları unutmuruq” dedi: "Bu da gələcək fəaliyyətimiz üçün istiqamət olmalıdır, necə ki, biz bu gün də bu istiqamətdə iş görürük. Bizim tarixi torpaqlarımız İrəvan xanlığıdır, Zəngəzur, Göyçə mahallarıdır. Bunu gənc nəsil də, dünya da bilməlidir. Mən şadam ki, bu məsələ ilə bağlı – bizim əzəli torpaqlarımızın tarixi ilə bağlı indi sanballı elmi əsərlər yaradılır, filmlər çəkilir, sərgilər təşkil olunur. Biz növbəti illərdə bu istiqamətdə daha fəal olmalıyıq və dünyanın müxtəlif yerlərində sərgilər, təqdimatlar keçirilməlidir”. Bu çağırışdan sonra qeyd etdiyim layihəni QHT Şurasının dəstəyi ilə icra etdik. Prosesin gedişində heyrətamiz bir mənzərə üzə çıxdı. Biz çalışdıq ki, tarixi torpaqlarımızla bağlı topladığımız faktları, məlumatları Rusiya medialarında da çap etdirək. Lakin müraciət etdiyimiz Rusiya KİV-ləri bunda maraqlı olmadılar. Çünki diaspor təşkilatlarımız ötən illər ərzində Rusiya mediası ilə əməkdaşlıq qurmayıblar. Yeri gəlmişkən qeyd edim ki, bu çatışmazlıqları aradan qaldırmaq üçün Diaspor Komitəsinin sədri Fuad Muradov bu posta təyin olunduğu gündən var gücü ilə çalışır. İnanıram ki, yaxın illərdə bu, öz nəticəsini göstərəcək. Mühüm olan odur ki, Azərbaycanın media təmsilçiləri və qurumları Rusiya mediası ilə sıx işləməli, əməkdaşlıq etməlidir. Bu, yalnız xeyrimizədir”.Sosial Media Mərkəzinin direktoru Azər Niftiyev də "Şərq”ə bildirib ki, Azərbaycanla Rusiya arasında tarixi qonşuluq münasibətləri var: "Biz müxtəlif dönəmlərdə Rusiya ilə bir dövlətdə təmsil olunmuşuq. Hazırda münasibətlərimiz yüksək səviyyədədir. Hər iki dövlət başçısı arasında səmimi dostluq münasibətləri var. Digər yandan Rusiya ən çox azərbaycanlının yaşadığı ölkədir. Qeyri-rəsmi məlumatlara görə, milyondan artıq soydaşımız Rusiyada yaşayır. Azərbaycanın ən güclü diaspor təşkilatları da məhz Rusiyada fəaliyyət göstərir. Dünya Azərbaycanlıları Konqresi, "AMOR” və digər qurumlar buna misal göstərilə bilər. Hesab edirəm ki, Mətbuat Şurası ilə Rusiya Jurnalistlər İttifaqı arasında əməkdaşlıq vacibdir. Bu əməkdaşlıq imkan verəcək ki, həm diaspor təşkilatlarının fəaliyyətində canlanma yaranasın, həm də ölkəmizə qarşı erməni lobbisi tərəfindən aparılan qara piar kampaniyasına tutarlı cavab verə biləcəyik”.

"Azxəbər.com” saytının baş redaktoru Əfsələddin Ağalarov da vurğulayıb ki, Rusiya Azərbaycan üçün təkcə qonşu bir dövlət deyil, eyni zamanda yaxın tərəfdaş, həm də böyük ictimai-siyasi auditoriyanı özündə birləşdirən mühüm məkandır: "Rusiya bizim üçün hər zaman açar rolunu oynayıb. Təkcə siyasət və iqtisadiyyatda deyil, həmçinin, ictimai məsələlərdə də bizə geniş çıxış imkanı verib. Ona görə də hər iki ölkə arasında media əlaqələrinin tənzimlənməsi və bu istiqamətdə işlərin başlanması mühümdür. Ümid edirik, proses uğurla nəticələnəcək. Düzdür, Rusiyada erməni media aparatlarının təbliğat maşını nisbətən güclüdür. Məsələ ondadır ki, Rusiyada biznesmen kimi fəaliyyət göstərən ermənilərin özlərinə məxsus media orqanları var, ya da hansısa qurumu maliyyələşdirirlər. Məhz bu sayədə erməni lobbiçiliyini inkişaf etdirir, rus saytlarında öz maraqlarına uyğun materiallar dərc edirlər. Təbii ki, aparılan işin böyük miqyası Azərbaycana qarşı qarayaxma kampaniyasından ibarət olur. O baxımdan Rusiya-Azərbaycan arasında media əməkdaşlığı daha sürətli və genişmiqyaslı olmalıdır. Bu gün Rusiyada çalışan çoxlu sayda Azərbaycan jurnalistləri var. Əksəriyyəti nüfuzlu televiziya və qəzetlərdə çalışır. Koordinasiyalı şəkildə onlarla mütəmadi görüşlər keçirilməli, ümumi fəaliyyətə cəlb edilməlidirlər”.

İsmayıl

Şərq.- 2018.- 28 noyabr.- S.11.