27 YAŞLI “SƏS”

Azərbaycan mətbuatı tarixində bu qəzetin məxsusi yeri var

Yanvar ayının 11-də respublikanın çoxsaylı mətbu orqanları arasında özünəməxsus dəst-xətti ilə seçilən "Səs” qəzetinin 27 yaşı tamam oldu. Bu müddət mətbuat orqanı üçün o qədər böyük dövr sayılmasa da, qəzetin kollektivi Azərbaycan mətbuatının inkişafında, söz və fikir azadlığının müdafiəsində, vətəndaşların hüquq və azadlıqlarının qorunmasında öz sözünü deyə bilib. Ötən ilin müşahidələri göstərir ki, informasiyaların ictimaiyyətə qərəzsiz, obyektiv çatdırılmasında "Səs”in çox böyük rolu və təcrübəsi var. Təbii ki, Azərbaycanın ictimai-siyasi həyatında kifayət qədər rolu və xidmətləri olan mətbu orqanların hər birinin mövqeyi, cəmiyyətdəki yeri oxucularının sayı ilə bəlli olur.Bu baxımdan "Səs”i öndə gedən qəzetlərdən saymaq olar. Söz və mətbuat azadlığının davamlı inkişafda olduğu, KİV-ə dövlət dəstəyinin artdığı müasir dövrdə ölkəmizdə kifayət qədər mətbu orqan olsa da, "Səs” bu bolluqda imzasına sadiq qəzetlərdən olduğunu təsdiqləyib. Təcrübəsi çox olan bu qəzet cəmiyyətdə öz mövqeyi, operativliyi, jurnalist peşəsinə verdiyi diqqət və məsuliyyəti ilə seçilir. "Səs” qəzeti 1990-cı illərin əvvəllərində, müstəqilliyimizin təhlükə altında olduğu vaxtlarda əsl vətəndaşlıq mövqeyini ortaya qoyub. Daxili və xarici bədxahlara qarşı sözün qüdrəti ilə mübarizə aparıb. Dövlətimiz və xalqımız üçün taleyüklü bir dövrdə əsası qoyulmuş bu mətbu orqan daim cəmiyyətin aktual problemlərini qətiyyətlə ictimai müzakirəyə çıxarıb. "Səs” qəzeti 1990-cı ilin noyabrında "Əlincə” Azərbaycan Xeyriyyə Cəmiyyətinin orqanı olaraq qeydiyyatdan keçib. 1991-ci il yanvarın 11-də dərc olunmağa başlayıb. Qəzetin ilk redaksiyası Azərbaycan Milli Elamlər Akademiyasının Fizika İnstitutunun 6-cı mərtəbəsində olub. Fəaliyyətə başladığı vaxtdan həftədə 2 dəfə 8 səhifə həcmində və 5-10 min tirajla dərc olunub. Ağabəy Əsgərovun baş redaktorluğu ilə nəşr olunan qəzet müxalifət mövqeyindən çıxış edərkən, yəni 1992-ci ildən tirajı 15 mindən yuxarı olub. 1993-cü ildə isə 25 minə çatıb. Bir sıra hallarda tiraj sayı hətta 35 mini keçib. 1994-cü ildən 16 səhifə həcmində çap olunmaqla yanaşı, 1998-ci ildən etibarən gündəlik işıq üzü görməyə başlayıb. 1991-ci ildən etibarən qəzetin səhifələrində tanınmış şəxslərin məqalələri dərc olunub. Mətbu orqan yarandığı vaxtdan ulu öndər Heydər Əliyevin müdafiəçisi rolunda çıxış edib. Ümummilli liderin Naxçıvandakı fəaliyyətini ölkə ictimaiyyətinə çatdırıb. Qəzetin 1991-93-cü illər saylarında ulu öndərin müsahibələrini və onun haqqında məqalələri, həmçinin, ölkə parlamentindəki çıxışlarını oxucularına təqdim edib. Heydər Əliyevin xarici mətbuata verdiyi müsahibələri tərcümə edərək, ölkə ictimaiyyətinə çatdırıb.1993-cü ilin iyunundan başlayaraq, "Səs” qəzeti hakim Yeni Azərbaycan Partiyasının informasiya bazası rolunu oynayıb və partiya yarandıqdan sonra onun əsas mətbu ruporu kimi fəaliyyətini davam etdirib. Partiyanın bəyanatlarını, yığıncaqlarını və s. tədbirlərini öz səhifələrində geniş işıqlandırıb. 1992-ci il oktyabrın 16-da ölkənin 91 nəfər tanınmış ziyalısının Heydər Əliyevə müraciəti və oktyabrın 24-də ulu bndərin həmin müraciətə cavabı da məhz "Səs” qəzetində dərc olunub. Ümummilli lider hakimiyyətə gəldikdən sonra "Səs” qəzetini özü üçün doğma qəzet adlandırıb və qeyd edib ki, "Səs” qəzeti tarixə düşmüş bir qəzetdir. Ulu öndərin sözləri qəzet kollektivinin əməyinə verilən böyük dəyər idi: "Səs” qəzeti artıq tarixə düşmüş qəzetdir. "Səs” qəzeti mənim üçün çox əziz qəzetdir. 1990-cı ilin fevral ayında Azərbaycanda kommunist hakimiyyəti dövründə mən Ali Sovetdə çıxış edəndən sonra çıxışım xatirinizdədir. O vaxt mənim çıxışımı hörmətdən salmağa çalışdılar, onu dərc etmək istəmədilər. Amma mənə lazım idi ki, o dərc olunsun. Çıxışım "Səs” qəzetində dərc edildi. Mən Naxçıvanda işləyərkən bizim bir neçə tədbirlərimiz barədə yazıları "Səs” qəzetində dərc edə bildik. Nəhayət, "Səs” qəzeti "91-lər”in müraciətini dərc edib. Ona görə "Səs” qəzeti bizim partiyanın tarixində ən mötəbər yer qazanmış bir qəzetdir. Görürəm ki, son vaxtlar özünün xüsusiyyətini itirmədən modernləşir, yaxşılaşır. Arzu edirəm ki, daha da modernləşsin və yaxşılaşsın”.

"Səs” qəzeti hazırda fəlsəfə üzrə fəlsəfə doktoru Bəhruz Quliyevin baş redaktorluğu ilə eyni kursu davam etdirir və ölkə mətbuatında özünün xüsusi yeri ilə seçilir. Əlamətdar tarixi günlərdə qəzetin xüsusi buraxılışları, multimedia diskləri və digər əlavələri buraxılır. Qəzet xarici ölkələrdə yaşayan hər bir azərbaycanlının tribunasına çevrilməklə soydaşlarımızın həyatı, fəaliyyəti barədə də maraqlı yazıları ilə diqqət çəkir. Əsas işi xəbər yaymaq olsa da, milliliyi, azərbaycançılığı başlıca prinsip olaraq təbliğ edir. Hazırda qəzet gündəlik 5 min tirajla nəşr olunur, redaksiya heyəti 40 nəfərə yaxındır. "Səs” qəzeti "SƏS Media Qrupu”na daxildir. Bu qrupda qəzetlə yanaşı "Səs” informasiya agentliyi (SİA), "Səs” internet televiziyası (SəsTV) da fəaliyyət göstərir.Mətbu orqanın baş redaktoru Bəhruz Quliyev deyib ki, "Səs” qəzetinin müstəqillik tarixində xüsusi yeri və izi var: "Məhz buna görə də, ulu öndərimiz Heydər Əliyev dəfələrlə öz çıxışlarında "Səs” qəzetinin onun ən əziz qəzeti olduğunu dilə gətirərək adını qızıl hərflərlə tarixə yazıb. Bu, bütün dövrlər üçün qürurvericidir.Zamanında yüzlərlə vətənpərvər insanın ruporuna çevrilərək "Səs” qəzeti xalqla ulu öndər arasında olan sevgini tərənnüm etdirib. Bu gün də qəzet öz əqidəsindən dönmədən ümummilli liderimizin ideyalarını həyata keçirən cənab İlham Əliyevin sadiq dostudur. Mən "Səs” ailəsini və onunla birgə hələ o dövrdən bu günə qədər sədaqətlə ulu öndər ideyalarına, dövlətə və xalqa xidmət edən insanların hər birini ürəkdən təbrik edir, bu müqəddəs işdə böyük uğurlar arzulayıram. Bu yoldan dönmək yoxdur, yalnız irəli”.Qəzetə rəhbərlik etmiş "Azərbaycan” nəşriyyatının baş direktoru Ağabəy Əsgərov "Səs” qəzetinin 27 illik tarixində yer almasını xoşbəxtlik kimi dəyərləndirib: "13 il qəzetin baş redaktoru olmuşam. Qəzet yaranan dövrdə həftədə bir dəfə dərc olunurdusa, hazırda gündəlik, çoxtirajlı bir qəzet kimi fəaliyyət göstərir. Qəzet ilk dövrlərində bir neçə dəfə ozamanki hakimiyyət tərəfindən bağlanıb. O zaman vəziyyət çox ağır idi, biz hər gün ciddi təzyiqlər altında işləyirdik. Ayaz Mütəllibovun vaxtında qəzetə qarşı bir çox təzyiqlər və təqiblər olmuşdu. Amma buna baxmayaraq həmişə "Səs” qəzetinin birmənalı mövqeyi olub və bir xətt üzrə gedib. Qəzet həmişə Azərbaycan dövlətinin, dövlətçiliyinin mənafeyində dayanan bir mətbu orqan olub. Bu gün "Səs” qəzeti dinamik şəkildə inkişaf edir. Qəzetin çox yaxşı, mütəşəkkil, yüksək səviyyəli bir kollektivi var. "Səs” qəzeti bundan sonra daha çox inkişaf edəcək”.Mətbuat Şurasının sədri, millət vəkili Əflatun Amaşov da bildirib ki, "Səs” qəzeti müasir Azərbaycan tarixində son dərəcə mühüm missiya yerinə yetirmiş mətbuat orqanıdır: "Bu missiya ölkəmizin müstəqilliyinin əldə edilməsi, dövlətçiliyimizin möhkəmlənməsi baxımından təkrarsız və bənzərsizdir. Əsl fədakarlıq nümunəsidir. Məhz buna görə də, nəşr geniş oxucu auditoriyası tərəfindən sevilib. Ötən 27 ilin təhlili göstərir ki, "Səs” öz ənənələrinə sadiq qalıb. Nəşrin əldə etdiyi ən böyük uğur isə dövlətçiliyimizə, ulu öndər Heydər Əliyev ideyalarına sadiqliyi peşəkar jurnalistika prinsipləri ilə çulğalaşdırmaqdan, ali dəyər və prinsiplərini parlaq yaradıcılıq dəst-xəttinə çevirərək, inkişaf etdirməkdən ibarətdir. Bu səbəbdəndir ki, nəşr nəinki öz oxucularının sevimlisidir, bütövlükdə, Azərbaycan cəmiyyətində qəbul edilən mətbuat orqanıdır. "Səs” qəzetinin rəhbərliyini və əməksevər kollektivini nəşrin fəaliyyətə başlamasının 27 illiyi münasibəti ilə ürəkdən təbrik edirəm. İnanıram ki, bu qəzetdə çalışan həmkarlarım gələcək yaradıcılıq uğurları ilə "Səs”in daha yüksək zirvələr fəth etməsinə özlərinin layiqli töhfələrini verəcəklər. Bu işdə onların hər birinə möhkəm cansağlığı arzulayıram”.Mətbuat Şurasının sədr müavini, BAMF-nin prezidenti Umud Mirzəyev da bəyan edib ki, "Səs” qəzeti xalqın sevimlisinə çevrilib: "Qəzetin 27-ci ildönümü münasibətilə bütün redaksiya heyətini öz adımdan və rəhbərlik etdiyim qurum adından təbrik edirəm. "Səs”in öz səsi və auditoriyası var. Bu qəzet bizim müstəqil mediamızın ilk nümunələrindən biridir. Azərbaycan mətbuatı tarixində öz yeri, dəsti-xətti və xüsusi çəkisi olan qəzet 27 illik fəaliyyəti dövründə çox şərəfli bir yol keçib. Respublikamızın ictimai-siyasi, mədəni və sosial həyatını geniş oxucu auditoriyası üçün obyektiv işıqlandırıb. Təhsil və mədəniyyət işçilərinin, elm xadimlərinin sevimli mətbuat orqanına və onların səsini ictimaiyyətə çatdıran tribunaya çevrilib. Bu qəzet Azərbaycanın siyasi, iqtisadi, mədəni həyatında baş verən hadisələri dolğun işıqlandırıb, dövlətimizin apardığı uğurlu daxili və xarici siyasəti obyektiv qiymətləndirib.

Dərin analitik yazıları, sanballı araşdırmaları ilə fərqlənmiş və xalqın sevimlisinə çevrilib. Qəzet düzgün idarəetmə sayəsində böyüyərək iri Holdinqə dönüb”. Mətbuat Şurasının sədr müavini qeyd edib ki, rəngarəngliyi, aktual mövzuları ilə oxucuların dərin sevgisini qazanan qəzet sözün məsuliyyətini dərindən dərk edən və jurnalistikanın şərəfli ənənələrini yaşadan mətbu orqan milli-mənəvi dəyərlərimizin qorunub-saxlanmasında və inkişaf etdirilməsində əvəzsiz xidmətlər göstərib.Yeni Azərbaycan Partiyasının icra katibinin müavini, Dini Qurumlarla İş üzrə Dövlət Komitəsinin sədri Mübariz Qurbanlı da "Səs”i təbrik edib. M.Qurbanlı deyib ki, "Səs” qəzeti YAP-ın ideoloji-siyasi kursunun təbliğində mühüm rol oynamaqdadır: "Fəxrlə deyə bilərik ki, əsası ümummilli liderimiz Heydər Əliyev tərəfindən qoyulan mətbuat siyasəti ilə bağlı ənənələr bu gün dövlət başçımız tərəfindən uğurla davam etdirilir. Prezident İlham Əliyevin mətbuatın inkişafında xidmətləri olan jurnalistlərin fəxri adlarla, orden və medallarla təltif edilməsi, qəzet redaksiyalarına maddi yardımların göstərilməsi, eləcə də, media nümayəndələrinin mənzil şəraitinin yaxşılaşdırılması ilə bağlı imzaladığı sərəncamlar dediklərimin bariz nümunəsidir. Dövlətimizin hərtərəfli dəstək və qayğısı ilə əhatə olunan, Azərbaycan mətbuatı tarixində xüsusi yeri və dəst-xətti olan, 27 illik fəaliyyəti dövründə şərəfli bir yol keçən "Səs” qəzeti ümummilli liderimizin ideyalarına sadiq qallb. Əminliklə deyə bilərik ki, bu qəzet cəmiyyətimizin bütün sahələrini, ictimai maraq kəsb edən aktual mövzuları, o cümlədən, Prezident İlham Əliyev tərəfindən uğurla həyata keçirilən inkişaf strategiyasını hər zaman diqqət mərkəzində saxlayır. Ölkəmizin ictimai-siyasi, mədəni və sosial həyatını geniş oxucu auditoriyası üçün obyektiv işıqlandıran "Səs” qəzetinin dövlətimizin din siyasətinin, eyni zamanda, mənəvi dəyərlərimizin təbliği istiqamətində gördüyü işlər də, xüsusilə, vurğulanmalıdır. "Səs”in kollektivinə yeni-yeni yaradıcılıq uğurları arzulayıram”.

İsmayıl

Şərq.- 2018.- 13 yanvar.- S.11.