”Ustad dərsləri” yaxşı təşəbbüsdür

Gənc jurnalistlərlə yaşlı nəslin qələm adamlarının fikir mübadiləsinə ehtiyac var

"Yaşlı nəsil təcrübəli jurnalistlərin çox yaxşı ədəbi dili var. Onlar zamanında bir hərfin, hətta nöqtənin belə qəzetdə səhv getməsinə imkan verməmiş adamlardılar"

(Davamı ötən sayımızda)

Azərbaycan Mətbuat Şurası Ahıl Jurnalistlər Məclisinin ötən il həyata keçirdiyi "Keçmişə ehtiramla, gələcəyə inamla!” layihəsi çərçivəsində tədbirlər maraqla qarşılanmaqdadır. Bu müddət ərzində Ahıl Jurnalistlər Məclisi jurnalistikanın inkişafı ilə bağlı bir sıra maraqlı layihələr həyata keçirib. Bu dəfə Ahıl Jurnalistlər Məclisi mətbuatda öz sözünü demiş, imzası ilə tanınmış veteran jurnalistlərin gənc qələm sahibləri ilə vaxtaşırı görüşünü və "Ustad dərsləri”ni təşkil etmək istəyir. Bununla bağlı məlumatı qocaman jurnalist Məzahir Süleymanzadə verib. Onun sözlərinə görə, ilin sonunda bu maraqlı və faydalı söhbətlər gözəl bir kitab halına da salınacaq: "Ustad söhbətlərinin geniş yayılması üçün sosial şəbəkələrdən də geniş istifadə olunacaq. Bu maraqlı layihənin daha maraqlı alınması üçün həm yaşlı, həm də gənc nəsli təmsil edən jurnalistlərin, eləcə də ictimaiyyətin müxtəlif təbəqələrini təmsil edən ziyalıların, mütəxəssislərin məsləhətlərinə, təkliflərinə ehtiyacımız var”.

Ahıl Jurnalistlər Məclisinin təşəbbüsü ölkənin KİV nümayəndələri tərəfindən də müsbət qarşılanıb. Məsələyə münasibət bildirən mətbuat adamları təcrübəli jurnalistlərlə gənc müxbirlərin dialoqunu təqdirəlayiq hesab ediblər. Ekspertlər vurğulayıblar ki, müasir medianı keçmiş jurnalistika ilə müqayisə etmək olmaz. Jurnalistika məzmun, kontent, üslub və janr baxımından yenilənir, daim inkişaf edir. Hazırda jurnalistikada xeyli yeni metodlar meydana gəlir. Amma məsələnin başqa tərəfləri də var. Elə məqamlar olur ki, jurnalistlərin geriyə nəzər yetirməsinə ehtiyac yaranır. Hətta günümüzdə buna daha çox zərurətin olduğu hiss olunur. Məsələn, jurnalistikada Azərbaycan dilinin inkişaf etdirilməsi, milli-mənəvi dəyərlərin qorunması, KİV-lərin sosial məsuliyyəti, etik davranış qaydaları və s. məqamlar hər zaman mühafizəsi zəruri sayılan amillər hesab olunur.

Təşəbbüsü "Şərq”ə dəyərləndirən "Bakı-Xəbər” qəzetinin baş redaktoru Aydın Quliyev deyib ki, Ahıl Jurnalistlər Məclisi layihənin detalları ilə bağlı geniş bilgilər verəndən sonra daha tutarlı fikirlər söyləmək mümkün olacaq. Lakin baş redaktor layihənin ümumi anlamda çox əhəmiyyətli olduğunu vurğulayıb:

"Müxtəlif jurnalist nəsilləri arasında yaradıcılıq təcrübəsinin mübadiləsi, ənənənin itib-batmaması üçün gənc nəsillərə ötürülməsi, hazırda birgə fəaliyyət göstərən yaşlı və gənc nəsil jurnalistlər arasında işgüzar əməkdaşlığın təmin olunması vacib məqamlardır. Nəzərə alaq ki, bu gün yaşlı və gənc nəsil jurnalistlər arasında müxtəlif məsələlərə baxışlarda fikir ayrılıqları meydana çıxır. Hətta bəzi hallarda fikir ayrılıqları xoşagəlməyən münasibətlərə çevrilir. Ona görə də nəsillər arasında yaradıcılıq platformalarının biri-birinə yaxınlaşdırılması, onların doğmalaşdırılması, qarşılıqlı tanınma körpüsünün təsis edilməsinə ciddi ehtiyac var. Əminəm ki, layihə bu istiqamətdə öz faydasını verəcək”.

Baş redaktorun sözlərinə görə, Azərbaycanda gənc və yaşlı jurnalistlər arasında, xüsusən, bir sıra məsələlərdə sıx əməkdaşlığa zərurət olduğu ortadadır: "Müasir texnika, informasiya-kommunikasiya texnologiyaları nə qədər inkişaf etsə də, media sahəsində heç də dünənki təcrübəni əvəz edə bilmir. İnkişaf edən texnologiya əsasən jurnalistlərlə xəbər mənbələri arasında əlaqənin qurulması sahəsinə aiddir. Əvvəlki dövrlərdə heç bir texniki vasitə yox idi, müxbirlər birbaşa özləri gedərək xəbəri əldə edirdilər. Ancaq indi telefonlar və internet mövcuddur. Yəni jurnalistlərlə xəbər mənbələri arasında ünsiyyətin formaları dəyişib və yenilənib. Həmçinin, redaksiya ilə oxucu arasında əlaqə yaratmağın üsulları da dəyişilib. Əvvəllər daha çox qəzet yayımı ilə məşğul olurduqsa, indi qəzetin internet saytı vasitəsi ilə oxucuya birbaşa çatdırılması üsulu meydana gəlib. Ancaq yenə deyirəm ki, texnikanın inkişafı konkret sahələri əhatə edir. Amma elə sahələr var ki, xüsusən də jurnalistin yaradıcılığı, milli-mənəvi dəyərlərin və keçmiş jurnalist nəslinə mənsub olan yaradıcılıq təcrübəsinin qorunub saxlanması və gələcək nəsillərə ötürülməsi prosesi ancaq bu cür layihələrlə mümkündür. Bunun üçün isə hansısa texniki vasitələrə ehtiyac duyulmur. Müxtəlif nəsildən olan jurnalistlərin canlı dialoqu və sağlam işgüzar əməkdaşlıq qurması ilə buna nail olmaq mümkündür”.

Mətbuat Şurasının İdarə Heyətinin üzvü Azər Həsrət də "Şərq”ə açıqlamasında bildirib ki, jurnalistikada yaşlı qələm sahiblərinin təcrübələrini öyrənmək çox faydalıdır:

"Şəxsən özüm o qədər gənc olmasam da, ağsaqqal jurnalistlərin təcrübəsinə hər zaman ehtiyac duymuşam. Şübhəsiz, bundan sonra da ehtiyac duyacam. Yaşlı nəsil jurnalistlərimizin gənclərə hansı istiqamətdə və nə öyrədə biləcəkləri məsələsinə gəldikdə isə nəzərə almalıyıq ki, gənclər daha çox yeni texnologiyalar üzərindən işləməyə üstünlük verirlər. Faktiki olaraq indiki gənc nəsil jurnalistlər ordusu 30-40 il bundan qabaq qocaman jurnalistlərin etdiklərini görməyiblər. O baxımdan belə məsələlər ətrafında konkret seminarların və təlimlərin keçirilməsi məqsədəuyğun olmayacaq. Çünki keçmiş üsullarla indiki texnologiyalar tamamilə fərqlidir. Əvvəlki texnologiyalar artıq tarix olub. Bəs ağsaqqallarımız bizə nə öyrədə bilərlər? Hansı məsələlərə ciddi ehtiyacımız var? Vurğulamaq istəyirəm ki, yaşlı nəsil təcrübəli jurnalistlərin çox yaxşı ədəbi dili var. Onlar zamanında bir hərfin, hətta nöqtənin belə qəzetdə səhv getməsinə imkan verməmiş adamlardılar. Dil məsələsinə çox həssas yanaşıblar. Eyni zamanda dilləri çox nəzakətli və ədəb çərçivəsindədir. Hesab edirəm ki, indiki şəraitdə gənclərimizə daha çox bu istiqamətdə yol göstərilməsi faydalı olar. Buna həddən artıq ciddi zərurət var. Ümumilikdə götürəndə nəsillər arası körpü yaratmaq və təmasları intensivləşdirmək təşəbbüsünü alqışlayıram. Ən azından keçirilən görüşlərdə təcrübə mübadiləsi ediləcək və jurnalistikaya yeni başlayan gənclərimiz xeyli bilgilər əldə edəcəklər”.

"Kaspi” qəzetinin baş redaktoru İlham Quliyev də düşünür ki, nəsə öyrətmək və öyrənmək hər dövrdə vacibdir. Ona görə də bu cür layihələrə hər zaman dəstək vermək lazımdır:

"Uzun yol qət etmiş insanların yolun başında olan gənc jurnalistlərə deyiləsi çox sözü var. Amma reallıq odur ki, hazırda müasir jurnalistikamızda, xüsusən onlayn mediada çox ciddi vaxt məhdudiyyəti var. Hətta KİV-lər arasında bir-iki dəqiqə uğrunda ciddi mübarizə gedir. Belə bir şəraitdə jurnalistlərin kütləvi şəkildə seminarlara cəlb edilməsi müəyyən problemlər yarada bilər. Amma ideya olaraq çox yaxşıdır. Nəsillər arası dialoqun təmin olunması, ahıl jurnalistlərin təcrübəsinin gənclərə aşılanması maraqlıdır. Əgər Mətbuat Şurası layihəyə dəstək verərsə, "ustad dərsləri”ni təsis etmək mümkün olar. Xeyli gənc jurnalist bundan yararlana bilər”.

İ.Quliyev son zamanlarda media sahəsində müzakirə olunan problemlərə də münasibət bildirib:

"Azərbaycan dilinin mediada qorunması, informasiya alınacaq mənbələrlə münasibətlərin qurulması sahəsində yaşlı nəslin təcrübəsini öyrənmək çox mühümdür. İstənilən halda təcrübəli qələm sahiblərinin məsləhətlərinə qulaq asmaq vacibdir. Bir reallığı diqqətə çatdırım ki, mediada çalışan həmkarlarımızın böyük əksəriyyəti jurnalistika fakültəsini bitirməyən şəxslərdir. O baxımdan media ilə bağlı dinləmələrin, təlimlərin keçirilməsi müsbət təsir göstərə bilər. Düzdür, müxtəlif dövlət təşkilatları, özəl qurumlar tərəfindən spesifik mövzularda seminarlar təşkil edilir və jurnalistlər bundan yararlanırlar. Ancaq "ustad dərsləri”nin təşkili praktiki baxımdan daha məqsədəuyğun olar”.

Tanınmış jurnalist Azər Qaramanlı da bildirib ki, təcrübəli media nümayəndələrinin gənc jurnalistlərlə görüşləri, debatları təqdir olunası hadisədir:

"Məncə, hər iki tərəfin buna ehtiyacı var və hər iki tərəf biri-birlərinə bir çox şeylər ötürə bilərlər. Bütün dövrlərdə yaşlı və gənc nəslin fərqli dünyaları və dünyagörüşləri olub. Bu dünya görüşlərinin paylaşılmasından iki tərəf də qazanclı çıxa bilər. Təbii ki, əgər bu layihə formal "layihə” naminə edilməsə və səmimi ortamda həyata keçirilsə, daha faydalı olar. Bu, həm də nəsillərin biri-birlərini tanıması baxımından çox önəmlidir. Mən layihənin debatlar şəklində həyata keçirilməsini daha uğurlu hesab edirəm.

Yaşlı nəslin gənc nəsillə kəsişən və ayrılan baxışları bu yolla daha bariz şəkildə ortaya çıxacaq. Yəni yaşlı və gənc nəslin biri-birlərinə boğazdan yuxarı tərif yağdırmalarına ehtiyac yoxdur. Ya da gənc nəslin sadəcə oturub yaşlı nəslin "dərsinə” qulaq asmasını doğru hesab eləmirəm. Mətbuatın problemlərinə, yaradıcılıq problemlərinə gənc və yaşlı nəslin mübahisəli baxışları hər iki tərəf üçün stimul yaradan effektlər doğura bilər. Bu söhbətlərin canlı olaraq, ya da daha sonra sosial şəbəkələrdə yayılması da layihənin uğurunu gücləndirə bilər”.

İsmayıl

Şərq.- 2019.- 9 aprel.- S.11