Sahibkarlara daha rahat imkan yaradılır

Azad sahibkarlığın və liberal iqtisadiyyatın təşviqi

Dəyişikliyin müsbət tərəfi odur ki, sahibkar bütün işlərini elektron kabinet üzərindən vaxta qənaət etməklə görə biləcək

Prezident İlham Əliyev “e-KOB evi” portalı haqqında Əsasnamə”nin təsdiq edilməsi barədə fərman imzalayıb. Fərmana əsasən, Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi “Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları”nın təsdiq edilməsi və elektron hökumətlə bağlı bəzi tədbirlər haqqında” Azərbaycan Respublikası Prezidentinin 2018-ci il 12 sentyabr tarixli 263 nömrəli Fərmanına uyğun olaraq “e-KOB evi” portalının (bundan sonra – portal) Elektron Hökumət İnformasiya Sisteminə (bundan sonra − EHİS) inteqrasiyası ilə bağlı zəruri tədbirlər görməlidir.

İqtisadiyyat Nazirliyi yanında Kiçik və Orta Biznesin İnkişafı Agentliyi isə portalın formalaşdırılması və aparılması ilə bağlı zəruri tədbirlər görməli, dövlət orqanları (qurumları) tərəfindən kiçik və orta biznes evlərində göstərilən və Dövlət Xidmətlərinin Elektron Reyestrinə daxil edilmiş, habelə EHİS-ə inteqrasiya olunmuş elektron xidmətlərin, EHİS vasitəsilə portal üzərindən elektron formada göstərilməsini təmin etməli, Xüsusi Rabitə və İnformasiya Təhlükəsizliyi Xidməti ilə birlikdə portalın təhlükəsizliyinin təmin edilməsi üçün zəruri tədbirlər görməli, Nəqliyyat, Rabitə və Yüksək Texnologiyalar Nazirliyi ilə birlikdə portalın “Hökumət buludu”na keçidinin təşkili ilə bağlı tədbirlər görməlidir. Dövlət orqanları (qurumları) isə Əsasnamənin 1.2-ci bəndinə uyğun olaraq məlumatların mərkəzləşdirilmiş qaydada əldə edilməsini və həmin Əsasnamənin 3.3-cü və 3.4-cü bəndlərində nəzərdə tutulan xidmətlərin bu Fərmanın 3.2-ci bəndinə uyğun olaraq göstərilməsini təmin etmək məqsədilə aidiyyəti dövlət informasiya ehtiyatlarının və sistemlərinin EHİS-ə inteqrasiyası üçün zəruri tədbirlər görməlidirlər.

Dövlət başçısının digər fərmanı ilə, Kiçik və Orta Biznesin İnkişafı Agentliyinin (KOBİA) Nizamnaməsində dəyişiklik edilib. Dəyişikliyə əsasən, Agentlik sahibkarlıq fəaliyyətinin həyata keçirilməsi üçün zəruri olan məlumatların (sahibkarlıq fəaliyyətinin həyata keçirilməsi üçün normativ hüquqi aktlarda nəzərdə tutulan sənədlər, ödəniləcək vergi və rüsumlar, hesabatlar, lisenziya və icazələr və s.) mərkəzləşdirilmiş qaydada əldə edilməsini asanlaşdırmaq məqsədilə “e-KOB evi” portalının (bundan sonra – portal) yaradılmasını, fəaliyyətini, portalda “Sahibkarın elektron kabineti” və “Biznes Naviqator” altsistemlərinin yaradılmasını, dövlət orqanları (qurumları) tərəfindən KOB evlərində göstərilən və Dövlət Xidmətlərinin Elektron Reyestrinə daxil edilmiş, habelə Elektron Hökumət İnformasiya Sisteminə (bundan sonra − EHİS) inteqrasiya olunmuş elektron xidmətlərin, EHİS vasitəsilə portal üzərindən elektron formada göstərilməsini təmin etməlidir.

İndiyə qədər KOBİA sadəcə “e-KOB evi” portalının (bundan sonra – portal) yaradılmasını, fəaliyyətini, portalda “Sahibkarın elektron kabineti” bölməsinin və “Elektron sahibkar” sisteminin yaradılmasını, elektron xidmətlərin mərkəzləşdirilmiş dövlət informasiya sistemləri ilə inteqrasiyasını təmin etməli idi.

Mövzu ilə bağlı iqtisadçı-ekspert Rauf Qarayev "Şərq"ə açıqlama verib.

O bildirib ki, portal kiçik və orta biznes evlərində (KOB evləri) kiçik və orta biznes subyektlərinə göstərilən xidmətlərin elektron formada, vahid platforma üzərindən göstərilməsi üzrə müraciətlərin təqdim edilməsini, qəbulunu, emalını, cavablandırılmasını, uçotunun aparılmasını həyata keçirir: "İlk olaraq qeyd edim ki, sahibkar özünün kabineti vasitəsi ilə sahibkarlıq fəaliyyətinin həyata keçirilməsi üçün normativ hüquqi aktlarda nəzərdə tutulan sənədlər, ödəniləcək vergi və rüsumlar, hesabatlar, lisenziya və icazələr və s. əldə etmək imkanına sahib olur. Bunu misalla belə izah etmək olar. Mənim "A" şirkətim var. Mən hər hansı sənədlər üçün müxtəlif saytlara girməliyəm. Vergi üçün verginin, lisenziyalar üçün lisenziya aid sayta və sair. Yeni sərəncama əsasən, artıq sahibkara imkan yaradılacaq ki, "sahibkarın elektron kabineti" vasitəsilə bu işləri birbaşa görsün. Xalq dili ilə desək, yaradılmış marketə əlavə məhsullar gətirilir. Siz də o marketin müştərisi olduğunuz üçün o məhsulları başqa yerdən yox, birbaşa sizin evinizə gətirmək şərti ilə əldə edə bilməyiniz üçün imkan yaradılır. Yəni siz məhsulunuzu elektron vasitə ilə evinizdən seçirsiniz və xidmət də birbaşa sizə göstərilir. Yəni bunun ən müsbət tərəfi sahibkar olaraq vaxta qənaət etmiş olursunuz. Və sizə lazım olan məhsul əlinizin altındadır".

R.Qarayev əlavə edib ki, yeni fərmanın sahibkarlar üçün ən önəmli tərəflərindən biri də odur ki, artıq sahibkarlar rüsumları birbaşa kabineti vasitəsilə ödəyəcək:

"Sığorta, bank və s. xidmətlər üçün ödəniş seçimi birbaşa kabinetdən mümkün olacaq. Prezidentin yeni fərmanı sahibkarın işini rahatlaşdıracaq və seçim imkanını genişləndirəcək".

Poliklinikada maska taxmayan qeydiyyatçılar cərimələndi

Aynurə Pənahqızı

Şərq 2021.- 11 avqust.- S.11.