90-cı illərdən əleyhimizə çalışırlar

"Sərhədsiz reportyorlar” Azərbaycana qarşı qərəzli mövqeyini davam etdirir

"Onların cavabını həmişə verməliyik, çünki meydanı boş buraxsaq bu cür yalanları, təxribat xarakterli informasiyaları daha da çox tirajlayacaqlar"

Azərbaycan Mətbuat Şurası “Sərhədsiz reportyorlar” təşkilatının xidməti fəaliyyətini yerinə yetirən ispaniyalı jurnalistlərin Ermənistan-Azərbaycan sərhədinin Kəlbəcər rayonu ərazisində Azərbaycan hərbçiləri tərəfindən guya ölümlə hədələndiklərinə dair tvitter hesabındakı paylaşımı ilə bağlı beynəlxalq təşkilatlara və xarici media qurumlarına müraciət ünvanlayıb.

Şuradan verilən məlumata görə, müraciətdə bildirilib:

- “Sərhədsiz reportyorlar” təşkilatı özünün tvitter hesabında xidməti fəaliyyətini yerinə yetirən ispaniyalı jurnalistlərin Ermənistan-Azərbaycan sərhədinin Kəlbəcər rayonu ərazisində Azərbaycan hərbçiləri tərəfindən guya ölümlə hədələndiklərinə dair paylaşım edib.

Azərbaycan Mətbuat Şurası olaraq bildiririk ki, Ermənistan müharibə müddətində söz və ifadə azadlığı müstəvisində çoxsaylı manipulyasiyalara, Azərbaycanın nəzarətində olan ərazilərdə hadisələri işıqlandıran jurnalistlərə qarşı hücumlara yol verib. Ermənistan hakimiyyəti eyni zamanda media təmsilçilərini bilərəkdən döyüş intensivliyi ilə seçilən bölgələrə, beynəlxalq hüquqla Azərbaycanın tərkib hissəsi sayılan ərazilərə aparıb ki, onların həyatları üçün təhlükə yaransın və bunu jurnalistikaya təzyiq kimi qiymətləndirsin. Həmin vaxt “Sərhədsiz reportyorlar” məsələni susmaqla qarşılayıb, heç bir münasibət bildirməyib. Təşkilat işğaldan azad edilmiş Kəlbəcər rayonunda azərbaycanlı jurnalistlərin mina partlayışı nəticəsində həyatlarını itirmələrinə də səssiz qalıb. Belə bir vəziyyətdə qurumun ispaniyalı jurnalistlərin həyatlarından guya narahatlıq ifadə etməsi, bunu heç bir real fakta əsaslanmadan göstərməsi təəssüf doğurur. Aydındır ki, bu, “Sərhədsiz reportyorlar”ın Azərbaycana qarşı növbəti qərəzidir.

Təşkilat Azərbaycana münasibətdə o qədər qərəzlidir ki, Ermənistanla sərhəddə dayanmış Azərbaycan hərbi qulluqçusunun əlindəki silahla qarşı tərəfi nişanda saxlamaq kimi vəzifə borcunu hədə olaraq qəbul edib. Qurumun tvitter paylaşımındakı foto görüntüdən bu qənaətə gəlmək mümkündür. İspan jurnalistlərin guya ölümlə hədələnmələrinin sübuta yetirilməsi cəhdi çox gülünc və absurddur. Azərbaycan hərbçiləri qarşı tərəfə atəş açmayıb.

Bir daha bildiririk ki, "Sərhədsiz reportyorlar" təşkilatı Azərbaycana qarşı qərəzli mövqeyini davam etdirir. Tvitter səhifəsindəki paylaşım bunun real sübutudur. Dünyada tanınmış media qurumunun Azərbaycanla bağlı bu sayaq ucuz və bəsit gedişlərə yol verməsi ölkəmizin media ictimaiyyətində dərin hiddət hissi doğurur. İstərdik ki, sizlər də əsl həqiqətlərdən xəbərdar olasınız, söz və ifadə azadlığı müstəvisindəki manipulyasiyaların qarşısının alınması üçün səfərbərlik nümayiş etdirəsiniz. Biz bu qənaətdəyik ki, bəşəri dəyərlər heç bir maraqlı tərəf və ya tərəflərin, o cümlədən "Sərhədsiz reportyorlar" təşkilatının əlində alətə çevrilməməlidir.

Mövzu ilə bağlı Mətbuat Şurası sədrinin müavini, Jurnalistlərin Həmkarlar İttifaqının rəhbəri Müşfiq Ələsgərli "Şərq"ə açıqlamasında vurğulayıb ki, "Sərhədsiz reportyorlar" təşkilatının Azərbaycana qarşı bu cür yalançı, neqativ informasiya yayması ilk dəfə deyil. O qeyd edib ki, "Sərhədsiz reportyorlar" 90-cı illərdən başlayaraq bu günə kimi birmənalı şəkildə Azərbaycana qarşı yalançı, neqativ rəyin formalaşması üçün çalışıb: "Bu təşkilat əlinə düşən hər fürsətdə bu addımı atıb.

Hətta qeyd edim ki, İkinci Qarabağ savaşında və ondan sonrakı dövrlərdə də "Sərhədsiz reportyorlar" tərəfindən Azərbaycana qarşı qərəzsiz siyasətin həyata keçirildiyini çox aşkar şəkildə gördük. Misal olaraq bir neçə nümunə deyə bilərik. Məsələn, hamımız bilirdik ki, İkinci Qarabağ savaşı dövründə Ermənistan media üzərindən informasiya manipulyasiyaları həyata keçirirdi. Bu məqsədlə xaricdən olan bir çox jurnalistləri cəbhə bölgəsinə gətirib atəşin altına salmaqla, dünyaya belə bir fikir aşılamaq istəyirdi ki, guya, Azərbaycan tərəfindən Ermənistan jurnalistlərinə qarşı atəş açılıb. Hansı ki, bunlar tamam yanlış informasiyalar idi. Ancaq Azərbaycanın özünün jurnalistləri Ermənistan ordusu tərəfindən dəfələrlə atəşə məruz qaldılar".

M.Ələsgərli diqqətə çatdırıb ki, müharibə dövründə də "Sərhədsiz reportyorlar" haqsız olaraq Azərbaycana qarşı bəyanat yaydılar: "Təşkilat müharibə dövründə tvitter hesabından açıqlama yaydı ki, guya, Dağlıq Qarabağın Xankəndi şəhərində 80 yerli və xarici jurnalist qalıb və Azərbaycan beynəlxalq jurnalistləri mühasirədə saxlayır. Onların çıxıb getməsinə imkan vermir. Yəni çoxsaylı belə nümunələri göstərmək olar. Qeyd edim ki, həmin vaxtlar "Sərhədsiz reportyorlar" məhz erməni şəbəkəsinin tərəfindən çıxış edərək onların maraqlarına uyğun olan informasiyaları yayırdı. Hansı ki, həmin vaxtda "Sərhədsiz reportyorlar"ın Ermənistana qarşı bəyanat verməsi üçün kifayət qədər faktları var idi. Məsələn, bildiyiniz kimi, o vaxt Fransa TF1 kanalı Qarabağda həqiqətləri səsləndirdiyi üçün erməni icması tərəfindən hücuma məruz qaldı və terror aktı ilə hədələndi. Lakin həmin vaxtlarda "Sərhədsiz reportyorlar" susdu. Çünki orda cinayəti törədən erməni tərəfi idi. Lakin onlar buna layiqli cavab verə bilmədi. Belə nümunələr çoxdur. Yaxud da ki, iyunun 4-də bilirsiniz ki, azərbaycanlı jurnalistlər Kəlbəcərdə ermənilərin basdırdıqları minaya düşərək həlak oldular. Həmin hadisə barədə bütün beynəlxalq təşkilatlar bəyanat verdilər, amma bu təşkilat yalnız beş gündən sonra ümumi bir münasibət bildirən açıqlama yaydı. Bütün bu nümunələr onu göstərir ki, "Sərhədsiz reportyorlar"ın fəaliyyətində daimi olaraq Ermənistan tərəfini haqlı, Azərbaycan tərəfini isə haqsız göstərməyə yönəlmiş bir siyasət yürüdülür. Bu isə beynəlxalq təşkilata yaraşmayan hadisədir. Yəni beynəlxalq təşkilat obyektiv, neytral olmalı və hər kəsə bərabər gözlə baxmalıdır. Amma biz bunu "Sərhədsiz reportyorlar"da görmürük".

M.Ələsgərli əlavə edib ki, "Sərhədsiz reportyorlar" uzun müddətdir ki, Azərbaycana qarşı bu cür qərəzli davranış nümayiş etdirirlər:

"Son bir il müddətində onun bu cür fəaliyyəti Azərbaycanın media ictimaiyyəti tərəfindən daim izlənilir. Onun yanlış hərəkətinin ifşa olunması üçün bir sıra proseslər həyata keçirilir və yanlışlıqlarına qarşı obyektiv cavablar verilir. Bu baxımdan Azərbaycan Mətbuat Şurasının, Azərbaycan Jurnalistlərinin Həmkarlar İttifaqının, eyni zamanda ayrı-ayrı media qurumlarının "Sərhədsiz reportyorlar"ın bu cür yanlış hərəkətləri barədə bəyanatlar səsləndirilir. Hesab edirəm ki, onların Azərbaycana qarşı bu qərəzsiz fəaliyyətinin ifşa olunması baxımından bəyanatların verilməsi lazımlı bir addımdır. Qeyd edim ki, bütün bunlar artıq öz nəticəsini verməkdədir. Nəzərə çatdırım ki, bu cür bəyanatlar, açıqlamalar cavabsız qalmır. Həmçinin bunlar beynəlxalq digər ictimai təşkilatların nəzərinə çatdırılır və onlar "Sərhədsiz reportyorlar"a qarşı düzgün addımlar atmaq üçün artıq istiqamətləndirilirlər.

Mövzu ilə bağlı "Şərq"ə açıqlamasında Mətbuat Şurasının İdarə Heyətinin üzvü Azər Həsrət Azərbaycana qarşı belə bir yanaşmanı qərəzdən doğan hal kimi qiymətləndirib: "Yəni bunun özü onun göstəricisidir ki, Azərbaycana yanaşma qərəzlidir və bunun heç bir əsası yoxdur. Çünki Azərbaycan o ölkələrdəndir ki, burada dövlət heç bir halda medianın fəaliyyətinə maneçilik törətmir, eyni zamanda heç bir formada müdaxilə etmir. Qeyd edim ki, "Sərhədsiz reportyorlar"ın paylaşımı anonim xəbərçilik kateqoriyasına aid bir paylaşımdır.

Çünki konkret ad çəkilmir, hansısa ispaniyalı jurnalistlərin guya ölümlə təhdid edildiyi deyilir. Mən "Sərhədsiz reportyorlar"ı paylaşımlarının altında ciddi xəbərçiliyə dəvət elədim. Hətta bunun saxta xəbərçilik olduğunu qeyd elədim.

Qeyd edim ki, "Sərhədsiz reportyorlar" Azərbaycan, Türkiyə və ümumən türk dünyasına qərəzli mövqeyi ilə seçilir. Parisdə yerləşən bu təşkilat ənənəvi anti-türk əhvallı bir təşkilatdır və bizi sevmir. Bu təşkilat Türkiyədə, Azərbaycanda və türk dövlətlərində nə baş verərsə, araşdırmadan dərhal onu paylaşırlar. Amma göründüyü kimi, Azərbaycan jurnalistlərinin Kəlbəcərdə minaya düşməsi ilə bağlı onlar bir açıqlama yaymadılar. Amma indi hansısa anonim jurnalistlərin, guya, Azərbaycan əsgəri tərəfindən ölümlə təhdid edildiyi haqqında bir paylaşım ediblər. Təbii ki, bu, Azərbaycana qarşı qərəzdir və düşmən münasibətdir. Düşünürəm ki, Azərbaycan Mətbuat Şurası çox doğru bir addım atdı və beynəlxalq qurumlara bununla bağlı müraciət göndərdi.

Biz bunların arxasınca daim getməliyik. Onlar daim nəfəsimizi boyunlarının arxasında hiss etməlidirlər. Çünki meydanı boş buraxsaq bu cür yalanları, təxribat xarakterli informasiyaları daha da çox tirajlayacaqlar".

Aynurə Pənahqızı

Şərq 2021.- 26 iyun.- S.11.