İnam artır:Artıq bələdiyyələr cəmiyyət tərəfindən qəbul olunur

Yaxın gələcəkdə yerli özünüidarəetmə daha səlahiyyətli və məsuliyyətli qurum statusunu əldə edə biləcək

İctimai və dövlət maraqlarının müdafiəsi;

Yerli özünüidarəetmə sisteminin formalaşdırılması prosesi Azərbaycanda demokratik inkişafın əyani nümunəsidir. Hüquqi dövlət və vətəndaş cəmiyyətinin qurulması, dövlət və cəmiyyətin idarə olunmasının səmərəliliyinin artırılması istiqamətində atılan addımlar bələdiyyələrin fəaliyyətində öz ifadəsini tapmaqla yanaşı, respublikamızda yerli idarəetmə orqanlarının işinin təşkilinə mühüm töhfə verir. Ulu Öndər Heydər Əliyev dövlət və cəmiyyətin idarə olunmasında bələdiyyələrin rolunu yüksək qiymətləndirərək qeyd edirdi:

"Yerli özünüidarəetmənin yaradılması Azərbaycanda gedən demokratik proseslərin böyük bir hissəsi, böyük bir qoludur. Demokratik, hüquqi dövlət, dünyəvi dövlət qurmaq prosesinin bir hissəsi, bir sahəsidir". Ümummilli Liderimizin fikirləri bu gün real həyatda öz əksini tapmaqdadır. Heydər Əliyev ideyalarından qaynaqlanan bələdiyyə institutu təkmilləşir, formalaşır, Azərbaycanın ictimai-siyasi və sosial-iqtisadi həyatında öz mövqeyini durmadan möhkəmləndirir. "Yerli özünüidarəetmə haqqında" Avropa Xartiyasının müddəalarına uyğun olaraq respublikamızda da yerli özünüidarəetmə sistemi konstitusiya və qanunvericilik əsasında qurulur. Beynəlxalq normalara uyğundur. Ölkəmizin demokratik şəraitdə idarə olunmasında vətəndaşların rolu artır və onlara yeni, daha geniş imkanlar yaradılır. Bununla əlaqədar yerli özünüidarəetmə sisteminin hüquqi bazasının yaradılması üçün əsaslı tədbirlər həyata keçirilib. Milli Məclis tərəfindən bələdiyyələrin fəaliyyətinin əsas sahələrini əhatə edən mühüm qanunlar, normativ hüquqi aktlar qəbul edilib. Qanunvericiliyin təkmilləşdirilməsi prosesi davam edir və bələdiyyələrin formalaşdırılması, onların sosial-iqtisadi sahədə fəaliyyətinin artırılması və genişləndirilməsi üçün yeni qanunlar hazırlanır, bəzi qanunlara əlavə və dəyişikliklər edilir. Yerli özünüidarəetmə orqanlarının müstəqilliyinin təminatı və səlahiyyətlərinin artırılması ictimaiyyətlə bərabər dövlətin də diqqət mərkəzindədir. Bələdiyyələr dövlətin ən mühüm funksiyalarından biri olan yerli əhəmiyyətli sosial-iqtisadi, ekoloji, sosial müdafiə vəzifələrinin həyata keçirilməsinə xidmət etdikləri üçün onların düzgün istiqamətləndirilməsi, daha yaxşı və səmərəli işləmələrinə şərait yaradılması vacibdir.

Xatırladaq ki, ötən gün Ədliyyə Nazirliyinin təşkilatçılığı ilə Ümummilli Lider Heydər Əliyevin anadan olmasının 100 illik yubileyi münasibətilə “Heydər Əliyev Azərbaycanda yerli özünüidarəetmənin banisidir” mövzusunda konfrans keçirilib. Ədliyyə nazirinin müavini Vilayət Zahirov Ümummilli Lider Heydər Əliyevin zəngin dövlətçilik irsindən bəhs edərək ölkəmizə rəhbərliyinin bütün dövrlərində xalqımız və dövlətimiz qarşısında misilsiz xidmətlərini, müstəqilliyimizin möhkəmləndirilməsində xilaskarlıq missiyasını vurğulayıb. Bildirib ki, demokratik hüquqi dövlətin möhkəm təməlini qoyan Ulu Öndər Heydər Əliyev azad cəmiyyətin əsasını təşkil edən yerli özünüidarəetmənin banisidir. Azərbaycan üçün ən gənc təsisat olan yerli özünüidarəetmənin yaradılması prosesi məhz Ümummilli Liderin müəllifi olduğu Konstitusiyamızda bələdiyyələrin təşkilinin və fəaliyyətinin əsas prinsiplərinin təsis edilməsi ilə başlanıb. Ulu Öndərin ideyalarına uyğun olaraq yerli özünüidarəetmə fəaliyyətinin ölkə Prezidenti İlham Əliyevin rəhbərliyi ilə respublikamızın hərtərəfli inkişafına uyğun olaraq təkmilləşdiyini bildirən V.Zahirov müasir üsul və vasitələrdən istifadə edilməklə bələdiyyələrin fəaliyyətində qanunçuluğun gücləndirilməsi üçün inzibati nəzarət, həmçinin fəaliyyətin qanunauyğun təşkili məqsədilə mütəmadi keçirilən profilaktik və maarifləndirmə tədbirlərini qeyd edib, bu sahədə Ədliyyə Nazirliyinin fəaliyyətinə toxunub: “Ötən dövrdə 1 milyona yaxın bələdiyyə aktı hüquqi ekspertizadan keçirilib, profilaktik tədbirlərin gücləndirilməsi və hüquqi maarifləndirmənin yaxşılaşdırılması məqsədilə bələdiyyələrə 75 mindən çox tövsiyə göndərilib, 90 min bələdiyyə üzvü və qulluqçusu Ədliyyə Akademiyasında və digər qurumlarda təşkil edilmiş maarifləndirmə tədbirlərinə cəlb olunub, bələdiyyələr üçün 300 metodik vəsait hazırlanıb”. Nazir müavini torpaqlarımızın Ermənistan tərəfindən işğalı dövründə həmin ərazilərdə yerli özünüidarəetmənin təşkilinin mümkünsüz və bir milyondan artıq soydaşımızın özünüidarəetmə hüququndan məhrum olduğunu bildirib, Müzəffər Ali Baş Komandan, Prezident İlham Əliyevin rəhbərliyi ilə Vətən müharibəsində Böyük Qələbəmizlə işğala son qoyularaq tarixi ədalətin bərpa edildiyini xüsusi vurğulayıb. Bildirilib ki, yerli əhalinin rifahı naminə həyata keçirilən tədbirlərdə fəal iştirak edən bələdiyyələr də Vətən müharibəsi və sonrakı dövrdə səmərəli fəaliyyətləri ilə seçilirlər. Ötən müddətdə bələdiyyələr tərəfindən Vətən müharibəsi veteranlarının və şəhid ailələrinin yerli özünüidarəetmə fəaliyyəti ilə bağlı çoxsaylı müraciətləri həll edilib. Həmçinin şəhidlərimizin xatirəsinin əbədiləşdirilməsi məqsədilə 900-dən çox abidə və abidə kompleksi, xatirə lövhəsi və bulağı istifadəyə verilib, onların yaşadıqları evlər və küçələr abadlaşdırılıb. Tədbirdə Ədliyyə Nazirliyi tərəfindən müasir tələblərə uyğun hazırlanmış və səmərəli yerli özünüidarəetmə fəaliyyətinə töhfə olan “Bələdiyyələrlə iş portalı”nın təqdimatı keçirilib. Bələdiyyələrin fəaliyyətində səmərəliliyin və aşkarlığın artırılması məqsədilə portalda ictimaiyyət üçün açıq olan faydalı bölmələr, o cümlədən ölkəmizdə yerli özünüidarəetmə sisteminin tarixi, hazırkı dövrədək keçirilən bələdiyyə seçkiləri və onların nəticələri, hər bir bələdiyyə sədri, üzv və qulluqçuları, əlaqə vasitələri, geolokasiyası və s. barədə məlumatlar yerləşdirilib. Eyni zamanda portalda yerli özünüidarəetmə sahəsində Ədliyyə Nazirliyinin gördüyü işlər – metodoloji yardım və inzibati nəzarət tədbirləri öz əksini tapıb. Portal bələdiyyələrin fəaliyyətinə inzibati nəzarət icraatının avtomatlaşdırılmış rejimdə aparılmasını, o cümlədən elektron sənəd mübadiləsini mümkün etməklə, həmçinin bələdiyyələrə şəxsi kabineti vasitəsilə iclas protokollarını (aktlarını) elektron qaydada tərtib etmək imkanı yaradır. Təqdimat zamanı portalın funksional imkanları əyani nümayiş etdirilib, onun ictimaiyyət və bələdiyyələr üçün faydası qeyd olunub.

Millət vəkili Naqif Həmzəyev "Şərq"ə açıqlamasında bildirib ki, Ulu Öndər Heydər Əliyev, ümumiyyətlə, müasir Azərbaycanın banisi və qurucusudur. Deputat qeyd edib ki, Ulu Öndər ikinci dəfə hakimiyyətə gəldikdən sonra ilk növbədə hüquqi dövlətin qurulması üçün zəruri addımlar atdı:

"Konstitusiya yaradıldı, referendum keçirildi və Azərbaycan Parlamenti yenidən formalaşdırıldı. Bütün bunlarla yanaşı, torpaq islahatları həyata keçirildi. 1999-cu ildə ilk dəfə olaraq bələdiyyə seçkilərinin keçirilməsinə nail olundu. Bu, Azərbaycan cəmiyyəti üçün yeni bir dövrün başlanğıcıdır. Faktiki olaraq yerli özünüidarəetmə, seçkilər yolu ilə bələdiyyələrdə təmsil olunmaq tam yeni yanaşma idi. 1999-cu ildən başlayaraq bələdiyyə seçkiləri Azərbaycanda keçirilir. Mütəmadi olaraq bu təsisatın gücləndirilməsi üçün bəzi dəyişikliklər edilir. Ümid edirik ki, yaxın illərdə bələdiyyələrin statusları, hüquq və səlahiyyətləri daha da artacaq. Nəticə etibarı ilə yerli özünüidarəetmə məhz bələdiyyələr vasitəsilə həyata keçiriləcək. Artıq bələdiyyələr cəmiyyət tərəfindən qəbul edilir. Əvvəlki dövrlərdən fərqli olaraq bələdiyyələr yalnız torpaqların vətəndaşlara verilməsi ilə yox, həmçinin bir çox sosialyönümlü və məhəllədaxili icmaların maraqlarını qorumaq məqsədilə layihələr həyata keçirdir.

Bələdiyyələr yerli icmalarla sıx işləyərək vətəndaşların yerlərdəki narahatlıqlarının aradan qaldırılmasında birbaşa töhfə verməkdədir. Bu təsisat cəmiyyətimiz üçün yenidir. Daha da uğurlu fəaliyyət göstərməsi üçün hər kəs çalışmalıdır. İnanırıq ki, yaxın gələcəkdə yerli özünüidarəetmə daha səlahiyyətli və məsuliyyətli qurum statusunu əldə edə biləcək. İstənilən halda Ulu Öndər Heydər Əliyev tərəfindən yerli özünüidarəetmənin yaradılması ilə bağlı verilən qərar çox düzgün və lazımlı bir addım idi. Hazırda fərqli idarəetmə üsulundan istifadə etsək də, bələdiyyələr yerli özünüidarəetmədə yaxından iştirak edir. Bəzi əlavə düzəlişlər və dəyişikliklərlə bu strukturların gücünü daha da artıra biləcəyik".

İsmayıl Qocayev

Şərq .- 2023.- 13 aprel.- S.6.