Qürur mənbəyimiz və güvənc yerimiz...

Azərbaycan Ordusu bundan sonra da regionun ən güclü ordusu olacaq

Azərbaycan Silahlı Qüvvələrinin yaranmasının 105 ili tamam olur. Milli Ordumuzun bu müddətdə keçdiyi döyüş yolunun zirvəsi, sözsüz ki, Vətən müharibəsində qazanılmış möhtəşəm Qələbə - Qarabağ Zəfəridir. Dönə-dönə vurğulandığı kimi, xalqımızın çoxəsrlik tarixində buna bənzər Qələbə olmayıb. 1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə ilk müntəzəm hərbi hissə – əlahiddə Azərbaycan korpusu yaradıldı. Hökumət tərəfindən 25 min nəfərlik ordu yaratmaq vəzifəsi qarşıya qoyuldu. Həmin il avqustun 1-də Azərbaycanın Hərb Nazirliyi təsis olundu, ilk nazir Xosrov bəy Sultanov təyin edildi. Sonra – dekabrın 25-də general Səməd bəy Mehmandarov hərbi nazir, general-leytenant Əlağa Şıxlinski nazir müavini təyin olundular. Hərb sahəsində ilk uğur sentyabrın 15-də qazanıldı. Milli Ordu Nuru Paşanın komandanlıq etdiyi Qafqaz İslam Ordusu ilə birlikdə Bakını və ətraf qəzaları erməni-bolşevik işğalından azad etdi. Azərbaycanda ilk hərbi parad 1919-cu ildə Bakıda indiki Muzey Mərkəzinin yerləşdiyi ərazidə keçirildi. 1920-ci ilin aprelində Azərbaycan Xalq Cümhuriyyəti süqut etdikdən sonra bolşevik hökuməti Milli Ordunu ləğv etdi. Onun rəhbərlərinin əksəriyyəti, o cümlədən 15 general Nargin adasında güllələndi, bir çox vətənpərvər hərbçilər repressiyaya məruz qaldı. Müasir Milli ordunun yaradılmasına 1991-ci ildə dövlət müstəqilliyinin bərpasından sonra başlandı. Lakin müstəqilliyin ilk illərində ölkəmizə rəhbərlik edənlər Ermənistanın torpaqlarımızı işğal etdiyi bir vaxtda ordu quruculuğu kimi vacib və məsuliyyətli işinin öhdəsindən gələ bilmədilər. Həmin dövrdə nizami ordudan əsər-əlamət yox idi. Müxtəlif hərbi dəstələr ayrı-ayrı qüvvələr tərəfindən idarə olunurdu. Bundan istifadə edən düşmənin torpaqlarımıza təcavüzü getdikcə daha geniş miqyas alırdı. Azərbaycan müstəqilliyin itirilməsi təhlükəsi ilə üz-üzə qalmışdı. Belə bir ağır vaxtda xalqın çağırışı ilə hakimiyyətə qayıdan Ulu Öndər Heydər Əliyev başıpozuq silahlı dəstələri ləğv edərək nizami ordu quruculuğu prosesinə start verdi. Azərbaycan Silahlı Qüvvələrinin şərəfli tarixi xalqımızın Ümummilli Lideri Heydər Əliyevin adı ilə bilavasitə bağlıdır. Müasir Azərbaycan Ordusunun qurulması, inkişafı və möhkəmlənməsi Heydər Əliyevin yorulmaz fəaliyyətinin, dövlətçilik təfəkkürünün, siyasi uzaqgörənliyinin və təşkilatçılıq qabiliyyətinin məntiqi nəticəsidir. Tarixə nəzər salsaq, görərik ki, Ulu Öndər hələ sovet dövründə Azərbaycana rəhbərlik etdiyi illərdə böyük uzaqgörənliklə gələcəyi düşünür, milli zabit kadrların yetişdirilməsinə çalışırdı. 1971-ci il iyunun 20-də Cəmşid Naxçıvanski adına ixtisaslaşdırılmış hərbi məktəbin yaradılmasına nail olundu. Heydər Əliyev azərbaycanlı gəncləri, həmçinin SSRİ-nin qabaqcıl hərbi məktəblərinə təhsil almağa göndərirdi. Azərbaycan Silahlı Qüvvələrin formalaşmasında Cəmşid Naxçıvanski adına Hərbi Liseyin yetişdirdiyi milli zabit kadrlarımızın müstəsna rolu olub. Onlar Birinci Qarabağ müharibəsində, Aprel döyüşlərində, Vətən müharibəsində misilsiz igidliklər göstəriblər.

Müstəqil Azərbaycanda ordu quruculuğu prosesi Prezident İlham Əliyevin hakimiyyəti dövründə keyfiyyətcə yeni mərhələyə qədəm qoydu. Ulu Öndərin ordu quruculuğu siyasətini uğurla davam etdirən və zənginləşdirən Prezident, Ali Baş Komandan İlham Əliyevin diqqət və qayğısı sayəsində hərbçilərin peşəkarlığının artırılması, şəxsi heyətin döyüş ruhunun və mənəvi-psixoloji hazırlığının yüksəldilməsi, Silahlı Qüvvələrimizin ən müasir silah və texnika ilə təchizatı istiqamətində davamlı addımlar atıldı. Bu ali diqqət və qayğı nəticəsində Azərbaycan Silahlı Qüvvələri qısa müddətdə regionun ən qüdrətli ordusuna çevrildi. Prezident İlham Əliyevin rəhbərliyi ilə güclü dövlət quruculuğu strategiyasının uğurla reallaşdırılması, güclü iqtisadi potensialın və böyük maliyyə imkanlarının yaradılması müasir ordu quruculuğu və hərbi məsələlərin yüksək səviyyədə həll edilməsinə imkan yaratdı. Bu məqsədlə hər il dövlət büdcəsində müdafiə xərclərinə böyük vəsait ayrıldı, ölkənin müdafiə sənayesi yaradıldı, ordu ən müasir silahlarla təchiz edildi, ölkəmizin hərbi sahədə əməkdaşlıq əlaqələri genişləndirildi. Modernləşdirilən, ən müasir texnika ilə təmin olunan Azərbaycan Ordusunun gücü, qüdrəti bu gün beynəlxalq səviyyədə etiraf edilir. Silahlı Qüvvələrimiz indi dünyanın ən güclü 50 ordusu sırasında qərarlaşıb. Hazırda Azərbaycanın müdafiə sənayesi müəssisələrində mindən çox hərbi təyinatlı məhsul istehsal edilir.

2020-ci il sentyabrın 27-də başlayan Vətən müharibəsində rəşadətli Ordumuzun qazandığı şanlı Qələbə tariximizə qızıl hərflərlə yazıldı. Müzəffər Ali Baş Komandanın rəhbərliyi ilə Ordumuz düşmənə sarsıdıcı zərbə vuraraq, 44 gün ərzində 5 şəhər, 4 qəsəbə və 300-dək kəndi işğaldan azad etdi. Təsadüfi deyil ki, XXI əsrin müharibəsini aparan Azərbaycan Ordusunun döyüş əməliyyatları, xüsusən Şuşa əməliyyatı bu gün dünyanın qabaqcıl hərbi məktəblərində öyrənilir. Vətən müharibəsində 2900-dən çox əsgər və zabitimiz doğma torpaqlarımızın azad edilməsi uğrunda şəhid oldu.

Azərbaycan Həmrəylik Komitəsinin sədri, Birinci Qarabağ müharibəsinin iştirakçısı Əlisahib Hüseynov deyib ki, qalib ölkələrin postmüharibə dönəmində total qələbə eyforiyasına qapılmaları adətən onların sonrakı məğlubiyyətləri ilə nəticələnir. Lakin bizim dövlətimiz və xalqımızın isə belə bir təhlükəli halla üzləşmək qorxusu yoxdur: "Bəli, 44 günlük müharibədə Azərbaycan şanlı Zəfər qazandı və öz ərazi bütövlüyünü bərpa etməyə nail oldu. Lakin Birinci Qarabağ müharibəsində torpaqlarımızı işğal etmələri ilə öyünən və reallıq hissini itirən ermənilərdən fərqli olaraq, biz İkinci Qarabağ müharibəsində qazandığımız tarixi Qələbəyə görə eyforiya burulğanına düşmədik, müvəffəqiyyətdən başgicəllənməsinə uğramadıq. Əksinə, biz ordu quruculuğunun davam etdirilməsini dövlət siyasətinin əsas prioritetlərimizdən birinə çevirdik. Çünki təcrübə göstərdi ki, 44 günlük müharibədə torpaqlarımızın erməni işğalından azad edilməsinin əsas səbəblərindən biri də son 30 ildə məhz ordu quruculuğunu daim diqqət mərkəzində saxlamağımız, bu sahədə davamlı təkmilləşdirmələrin, modernizasiyanın aparılması oldu. Biz nəyə görə məhz bu yolu seçmişdik? Çünki 30 il ərzində beynəlxalq təşkilatlar, güc mərkəzləri, o cümlədən artıq tarixin arxivinə qovuşmuş olan Minsk qrupu münaqişənin real həlli üçün hansısa bir əməli addım atmadı. BMT, ATƏT kimi nüfuzlu beynəlxalq təşkilatlar təcavüzkar dövləti işğal altında saxladığı ərazilərimizdən çıxmağa məcbur etməliydilər. Lakin əfsuslar olsun ki, bu qurumların fəaliyyəti işğalçı ilə təcavüzə məruz qalan tərəf arasında bərabərlik işarəsi qoymaqdan və “status-kvo”nu qoruyub saxlamaqdan uzağa getmədi. Təcavüzkar Ermənistan və onun havadarları bizi işğal faktı ilə barışdırmaq üçün 30 il ərzində min cür ssenari cızdılar. Lakin Azərbaycan isə bütün bunların fonunda işğal illərində xoş məram nümayiş etdirərək bir tərəfdən fəal surətdə sülh danışıqları aparırdısa, digər tərəfdən isə torpaqlarımızın güc yoluyla işğaldan azad ediləcəyi variantını da istisna etməyərək tamamilə haqlı olaraq müharibə hazırlıqları aparırdı. Bu, çox düzgün seçilmiş taktika idi. Prezident İlham Əliyev həmişə qətiyyətlə bildirirdi ki, Azərbaycan xalqı işğal faktı ilə heç vaxt razı olmayacaq, münaqişə sülh yolu ilə həllini tapmasa, hərb yolu seçiləcək. Zaman İlham Əliyevin haqlı olduğunu göstərdi. 44 günlük müharibədən əvvəlki mərhələdə respublikamızda həyata keçirilən ordu quruculuğu həqiqətən də öz müsbət nəticəsini verdi. Bu baxımdan, güclü iqtisadiyyata əsaslanmaqla müasir ordu quruculuğuna nail olunması ölkəmizin böyük uğurudur. Bu uğurun təməli isə Ümummilli lider Heydər Əliyev tərəfindən qoyulub. Pərakəndə silahlı dəstələrin, könüllü özünümüdafiə batalyonlarının əvəzinə, vahid komandanlığa tabe olan müasir ordunun yaradılması məhz Heydər Əliyevin adı ilə bağlıdır".

Ekspert vurğulayıb ki, müstəqilliyin ilk illərində Azərbaycanda ordu quruculuğu sahəsində hərcmərcliyin hökm sürməsi bu gün heç kimə sirr deyil: "Ulu Öndər tərəfindən əsası qoyulan müasir ordu quruculuğu prosesi sonradan Prezident İlham Əliyev tərəfindən uğurla davam etdirildi. Məhz İlham Əliyevin son 20 il ərzində ordu quruculuğuna müstəsna diqqət və qayğı göstərməsi nəticəsində güclü ordunun yaradılması real fakta çevrildi. Ordunun gücləndirilməsinin dövlət siyasətimizin əsas prioritet sahələrdən birinə çevrilməsi, bu sahəyə diqqət və qayğının davamlı şəkil alması son nəticədə böyük Zəfərə imza atmağımıza və Silahlı Qüvvələrimizin dünyanın ən güclü 50 ordusu sırasına daxil olmasına gətirib çıxardı. Prezidentin siyasi iradəsi ilə ordu quruculuğu istiqamətində ardıcıl və məqsədyönlü tədbirlər bu gün də intensiv şəkildə həyata keçirilir, kompleks tədbirlər görülür. Xüsusən də 44 günlük Vətən müharibəsinin qələbə ilə başa çatmasından sonra ordunun döyüş imkanlarının artırılması istiqamətində tədbirlərin həyata keçirilməsi ardıcıl xarakter alıb. Dövlət büdcəsindən Silahlı Qüvvələrin möhkəmləndirilməsinə hər il kifayət qədər böyük vəsait ayrılır. Azərbaycan Ordusunun maddi-texniki təchizatı getdikcə daha yüksək səviyyəyə çatdırılır. İndi Azərbaycan Ordusu yeni inkişaf mərhələsinə qədəm qoyub. Azərbaycan Silahlı Qüvvələri yeni dövrün çağırışları əsasında və NATO standartlarına uyğun olaraq komplektləşdirilir. Bu da Ordumuzu quruda, suda və havada istənilən döyüş tapşırıqlarını yerinə yetirmək və ölkəmizi istənilən hücumdan müdafiə etmək potensialına malik olan qüdrətli hərbi gücə çevirir.

Ordumuzun gücləndirilməsi, modernləşdirilməsi bundan sonra da davam etdiriləcək. Biz burada bir məqamı da xüsusi olaraq vurğulamalıyıq ki, məğlub Ermənistandan fərqli olaraq bizim iqtisadi gücümüz imkan verir ki, ordumuz üçün yeni silahların, yeni texnikaların alınmasına və eləcə də yeni döyüş birləşmələrinin yaradılmasına lazımi dərəcədə dövlət vəsaiti ayrılsın. Cənab Prezident də sözügedən mərasimdəki çıxışında bu məsələyə ayrıca toxunaraq bildirdi ki, Vətən müharibəsindən sonra yeni silahların alınması prosesi davam edir və bu istiqamətdə artıq bir çox müqavilələr imzalanıb, həm yeni pilotsuz uçuş aparatları, həm də uzaqmənzilli raketlər artıq ölkəmizə gətirilib. Eyni zamanda Ali Baş Komandanın tapşırığı ilə ordumuzda yeni təyinatlı Komando hərbi hissələri yaradılır. Bu hərbi birliklər qardaş Türkiyə Silahlı Qüvvələrinin təcrübəsi əsasında yaradılmaqdadır. Prezident İlham Əliyev qeyd etdi ki, Komando qüvvələrinin sayı get-gedə artırılacaq".

Ə.Hüseynov bəyan edib ki, bütün bunlar bir daha onu göstərir ki, müharibənin başa çatmasından dərhal sonra Ordumuzun daha da gücləndirilməsi Ali Baş Komandan tərəfindən qarşıya qoyulan əsas prioritetlərdən biridir: "Bu sahədə görülən işlər Azərbaycan Ordusuna bundan sonra da regionun ən güclü ordusu, qalib ordusu statusunu qoruyub saxlamağa imkan verəcək. Bu gün Azərbaycan Ordusu sözün əsl mənasında milli qürur mənbəyimiz və güvənc yerimizdir. Biz əminik ki, Azərbaycan Silahlı Qüvvələri ölkəmizə xain gözlərlə baxan istənilən düşməni məhv etmək qüdrətinə malikdir. Yeri gəlmişkən, bu il Ordumuz üçün həm də ona görə əlamətdar ildir ki, iyunun 26-da Silahlı Qüvvələrimizin yaranmasının 105-ci ili tamam olur. Odur ki, fürsətdən istifadə edib Azərbaycan Silahlı Qüvvələrinin yaranmasının 105 ilinin tamam olması və 26 iyun - Silahlı Qüvvələr Günü münasibətilə Ali Baş Komandan İlham Əliyevi, bütün əsgər və zabitlərimizi, qazilərimizi ürəkdən təbrik edir, onlara ölkəmizin ərazi bütövlüyünün və təhlükəsizliyinin qorunması kimi şərəfli missiyanı davam etdirmək naminə sarsılmaz güc və qələbə əzmi arzulayırıq. Yaşasın Azərbaycan Ordusu!".

İsmayıl

Şərq.- 2023.- 26 iyun. S. 6.