Qarabağ Universitetinə şamil edilən güzəştlər sevindiricidir

Elmi-Kütləvi, Mədəni-Maarif, Təhsil Proqramlarının Hazırlanması

Təhsilin inkişafına xidmət edən hər bir yenilik, icra olunan hər bir proqram alqışlanmalıdır

Azərbaycan dövləti təhsilin inkişafı v əlçatanlığının təmin edilməsi istiqamətində daim yeniliklər həyata keçirir. Təhsilin inkişafını prioritet sayan dövlətimiz gənclərin ali təhsil alması üçün mümkün vasitələri maksimum dərəcədə icraya yönəldir. Bu günlərdə verilən məlumatlardan biri budur ki, Qarabağ Universitetində bir sıra ixtisaslar üzrə təhsil alacaq tələbələr təhsil xərclərindən azad olunacaqlar. Buraya ödənişli təhsil alan tələbələr də daxildir. Bu barədə Elm və Təhsil üzrə Dövlət Agentliyinin məlumatında bildirilib. Məlumatda 2024/2025-ci tədris ilində Qarabağ Universitetinin bakalavriat səviyyəsində SABAH qruplarına tələbə qəbulu aparılacaq ixtisaslar açıqlanıb. Bunlar, Azərbaycan dili və ədəbiyyatı müəllimliyi, İbtidai sinif müəllimliyi, Riyaziyyat müəllimliyi, Xarici dil müəllimliyi (ingilis dili), Hüquqşünaslıq, Beynəlxalq münasibətlər, Maliyyə və Mühasibat ixtisaslarıdır. Qarabağ Universitetinin SABAH qruplarında təhsil alacaq tələbələr bir sıra üstünlüklər əldə edəcək. Qarabağ Universitetinin ilk tələbəsi olmaqla onlar ödənişsiz təhsil, ödənişsiz yataqxana, hər bir tələbəyə təqaüd, yüksək bal toplayanlara əlavə təqaüd, hər bir tələbəyə kompüter, müasir maddi-texniki bazası olan universitet kampusu, yeni məzmunlu təhsil proqramları, peşəkar yerli və əcnəbi professor-müəllim heyəti, beynəlxalq, yerli ikili diplom və mübadilə proqramları, elmi-tədqiqat və startap layihələrinin dəstəklənməsi imtiyazları əldə edəcəklər.

Qeyd edək ki, təhsilin inkişafı istiqamətində vacib addımlar atan hökumət təqaüd xərclərinin optimallaşmasını nəzərdə tutur. Əmək və əhalinin sosial müdafiəsi nazirinin müavini Anar Əliyev Milli Məclisin Əmək və sosial siyasət komitəsinin iclasında müzakirə edilən “Məşğulluq haqqında” qanuna dəyişikliyin müzakirəsi zamanı bildirib ki, təqaüd xərclərinin optimallaşdırılması hər il əlavə 10 min şəxsin peşə hazırlığına cəlb olunmasına imkan yaradacaq. Peşə hazırlığına cəlb olunanlara əməkhaqqı deyil, təqaüd ödənilir. Eyni zamanda onların nəqliyyat xərcləri İşsizlikdən Sığorta Fondunun vəsaiti hesabına kompensasiya olunur. Təqaüdün məbləğininsə aylıq minimum əməkhaqqının məbləği ilə bağlantısı yenə də saxlanılacaq. "Növbəti dövrdə minimum əməkhaqqı artdıqca, təqaüdün məbləği də artacaq. Peşə hazırlığına cəlb olunan şəxs əvvəlcədən bilməlidir ki, harada işləyəcək. Peşə hazırlığı heç bir halda təqaüd almaq məqsədilə proqrama daxil olmanı stimullaşdırmamalıdır”, - deyə nazir müavini əlavə edib. Qeyd edilir ki, “Məşğulluq haqqında” qanuna dəyişiklikliyə əsasən, Azərbaycanda peşə hazırlığına cəlb olunmuş şəxslərə verilən təqaüd məbləği minimum əməkhaqqının 50 faizi dəyərində müəyyən edilir. Təhsilin inkişafı məqsədilə həyata keçirilən proqramlar arasında olimpiadaların təşkili də xüsusi əhəmiyyət daşıyır. Fənn olimpiadaları orta məktəb şagirdləri, həm də ali məktəb tələbələri arasında təşkil olunur. Bu günlərdə Azərbaycan Memarlıq və İnşaat Universiteti Tələbə Elmi Cəmiyyətinin təşkilatçılığı ilə Ulu Öndər Heydər Əliyevin anadan olmasının 101-ci ildönümünə həsr edilmiş fənn olimpiadalarının qaliblərinə diplomlar təqdim edilib. Təqdimat mərasimində AzMİU-nun elm və innovasiyalar üzrə prorektoru professor Nigar Aslanova çıxış edərək olimpiada haqqında məlumat verərək bildirib ki, fənn olimpiadaları materiallar müqaviməti, statika, inşaat mexanikası, riyaziyyat, fizika, ingilis dili (rus dili), informatika olmaqla 7 fənn üzrə keçirilib. Hər fənn üzrə müvafiq kafedraların müəllimləri tərəfindən olimpiadaya hazırlıq dərsləri keçirilib. Olimpiadalarda qalib gələn tələbələr pul ilə mükafatlandırılıb. Belə ki, hər fənn üzrə I yerin qalibi 300 AZN, II yerin qalibi 200 AZN, III yerin qalibi isə 100 AZN qazanıb. AzMİU-nun Fizika və kimiya kafedrasının müəllimi dosent Hüseynağa Hüseynov, Mexanika və İnformasiya texnologiyaları fakültəsinin dekanı dosent Sabir Məmmədov, Mexanika kafedrasının müdiri dosent Ceyhun Musayev və Ali riyaziyyat kafedrasının müəllimi dosent Mehralı Əliyev çıxış edərək olimpiada, tələbələrin hazırlıq prosesi və nəticələrlə bağlı fikirlərini bildirib, təkliflər səsləndiriblər. Tələbə Elmi Cəmiyyətinin sədri Günel İmanquliyeva isə çıxışında yaradılan şərait və dəstək üçün tələbələr adından universitet rəhbərliyinə təşəkkürünü bildirib. Sonda rektor professor Gülçöhrə Məmmədova çıxış edərək olimpiadaların əhəmiyyətinə toxunub və qeyd edib ki, qarşıdakı illərdə universitet tərəfindən respublika fənn olimpiadasının təşkil edilməsi hədəflənir: “İdmançıların fiziki hazırlığının səviyyəsini yüksəltmək üçün yarışlar, olimpiadalar təşkil olunduğu kimi, tələbələrin, tədqiqatçı gənclərin də zehni hazırlığının səviyyəsini yüksəltmək üçün yarışlar, olimpiadalar lazımdır. Əvvəllər universitetimizdə keçirilən fənn olimpiadalarına fasilə verilməsi bizi çox narahat edirdi. Sevindirici haldır ki, bu bilik yarışması yenidən təşkil olundu. Ümidvaram ki, növbəti illərdə bizim digər zəkalı tələbələrimiz də bu olimpiadada iştirak edəcək, onların sayı ilbəil artacaq, daha yüksək nəticələr toplayacaqlar. Olimpiada bilikli və hazırlıqlı tələbələr üçün əlavə motivasiyadır. Hədəfimiz bu prosesi daha da kütləviləşdirmək və respublika fənn olimpiadasına çevirməkdir”. Qalib və iştirakçı tələbələri təbrik edən rektor onları bilikli və hazırlıqlı yoldaşlarını da bu prosesə cəlb etməyə səsləyib.

Həmçinin bu günlərdə Bakıda I Türk İnteqrasiya Olimpiadası keçirilib. Və sevindirici olan budur ki, Gürcüstan vətəndaşı olan azərbaycanlı məktəblilər də bu olimpiadada iştirak edib və yüksək nəticələr göstəriblər. Azərbaycan Respublikasının Gürcüstandakı fövqəladə və səlahiyyətli səfiri Faiq Quliyev olimpiada qalibləri ilə görüşündə qeyd edib ki, Gürcüstandakı soydaşlarımızla bağlı məsələlər hər zaman Azərbaycan Respublikasının Prezidenti cənab İlham Əliyevin diqqətindədir. Gürcüstandakı gənc soydaşlarımızın təhsilinə dair Ümummilli Lider Heydər Əliyev tərəfindən atılmış əməli addımlar bu gün də Azərbaycan Respublikasının Prezidenti cənab İlham Əliyev tərəfindən uğurla davam etdirilir. Gürcüstandakı icma təşkilatları nəzdində fəaliyyət göstərən təhsil mərkəzləri gənc soydaşlarımızın təhsili ilə bağlı əhəmiyyətli layihələr icra edir. Təhsil eksperti Kamran Əsədov “Sherg.az"a açıqlamasında qeyd etdi ki, təhsilin inkişafına xidmət edən hər bir yenilik, icra olunan hər bir proqram alqışlanmalıdır:

"Qarabağ Universitetinin “Sabah” qruplarında təhsil alacaq tələbələrə, peşə təhsili üzrə təhsil alanlara şamil edilən güzəştlər sevindiricidir. Bunlar gənclərin elmə, təhsilə yolunu açır, təhsil almalarını asanlaşdırır. Sevindirici hallardan biri də budur ki, işğaldan azad olunuş Füzuli şəhərində inşa edilmiş və görkəmli alim, eyni zamanda Teymurilər sülaləsinin hökmdarı olmuş Mirzə Uluqbəy adına 1 nömrəli tam orta məktəbi bitirənlər Özbəkistan universitetlərinə imtahansız qəbul ediləcəklər. Özbəkistanın ali təhsil, elm və innovasiya naziri Konqratbay Şaripov bildirib ki, həmçinin bu məktəbdə Özbəkistandan da müəllimlər gəlib dərs deyəcəklər. Füzuli şəhərinə səfər çərçivəsində onlar məktəbdə yaradılmış şəraitlə tanış olublar. Məktəbin müəllim və şagird kollektivi ilə görüşüblər. Və qeyd edilib ki, məktəbi bitirən azərbaycanlı uşaqlar gələcəkdə Mirzə Uluqbəy adına məktəbin attestatını daşıyacaqlar. Gələcəkdə birgə əməkdaşlıq daha da genişləndiriləcək. Bu məktəbi bitirən uşaqlar həm də Özbəkistanın uşaqları sayılır. Ona görə də onlar Özbəkistanın ali təhsil müəssisələrinə imtahansız qəbul olunacaqlar. Əlbəttə ki, fənn olimpiadalarının keçirilməsi də önəmlidir. Fənn olimpiadalarında şagird və tələbələr bilik və bacarıqlarını realizə edə bilir, təhsillə bağlı gələcək istiqamətləri, ixtisaslarını müəyyən edə bilirlər. Bu, gənclərimizə bəlli bir istiqamət üzrə irəliləməyə imkan verir".

Məlahət Rzayeva

Şərq .- 2024.- 5 iyun, № 98.- S.6.