Zəfər mesajı dünyaya yayıldı

Diaspor quruculuğu, lobbiçilik və dünya azərbaycanlılarının həmrəyliyi;

Azərbaycan öz övladlarını Xankəndidə qarşılayır - bu, təkcə tədbir deyil, manifestdir

Diaspor gəncləri üçün bu cür tədbirlər milli kimliklərini qorumaq və gücləndirmək baxımından əvəzolunmazdır

Xankəndi şəhərində “Konstitusiya və Suverenlik İli”nə həsr olunan Diaspor Gənclərinin VI Yay Düşərgəsinin rəsmi açılış mərasimi keçirilib. Mərasim Dövlət Himninin səsləndirilməsi və şəhidlərin xatirəsinin yad olunması ilə başlayıb. Açılış mərasimində Diasporla İş üzrə Dövlət Komitəsinin (DİDK) sədri Fuad Muradov, Xankəndi şəhərində, Ağdərə və Xocalı rayonlarında Prezidentin xüsusi nümayəndəsi Elçin Yusubov, Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdir müavini Nigar Hacıyeva, Heydər Əliyev Fondunun nümayəndəsi Aydan Ramazanova, Qarabağ Universitetinin rektoru Şahin Bayramov, Gənclər Fondunun icraçı direktoru vəzifəsini icra edən Yusif Vəliyev çıxış ediblər. Çıxışlarda yay düşərgəsinin Xankəndidə keçirilməsinin xüsusi əhəmiyyətinə toxunulub, Prezident İlham Əliyevin rəhbərliyi ilə həyata keçirilən çoxşaxəli diaspor siyasətinin uğurlu nəticələrindən danışılıb. Tədbirdə dövlət başçısının Xankəndidə bayraq qaldırmasının, oradakı tarixi çıxışının yer aldığı videoçarx nümayiş olunub, həmçinin Diaspor Gənclərinin Yay Düşərgələrinin tarixi ilə bağlı fakt və rəqəmlər səsləndirilib. DİDK-nın şöbə müdiri Vəsilə Vahidqızının və Rəvan Rədin aparıcılıq etdikləri açılış mərasimi bədii hissə ilə davam edib. Qeyd edək ki, avqustun 9-dək davam edəcək Diaspor Gənclərinin VI Yay Düşərgəsi Azərbaycan Respublikasının Diasporla İş üzrə Dövlət Komitəsinin və Heydər Əliyev Fondunun birgə təşkilatçılığı ilə gerçəkləşdirilir. Diaspor Gənclərinin VI Yay Düşərgəsində dünyanın 61 ölkəsindən 128 gənc iştirak edir. Bundan əvvəlki düşərgələr Şəki, Şamaxı, Şuşa, Naxçıvan və Laçın şəhərlərində baş tutub, düşərgələrə hər il 60-dan çox ölkədən ümumilikdə 700-dən artıq gənc qatılıb.

Diasporla İş üzrə Dövlət Komitəsinin sədri Fuad Muradov Xankəndinin sülh, əməkdaşlıq və inkişaf simvoluna çevrildiyinə diqqət çəkib, düşərgəyə gənclərin ildən-ilə daha çox maraq göstərdiklərini, bu platformanın ilk gündən özünü doğrultduğunu ifadə edib. Sədr bildirib ki, bir həftə ərzində onlar ölkəmizdə həyata keçirilən islahatlar, Qarabağ bölgəsində gedən bərpa və quruculuq işləri haqqında məlumat alacaq, həmçinin ziyalılar, şəhid ailələrinin üzvləri, döyüş iştirakçıları, idmançılar və müxtəlif sahələrdə uğur qazanan şəxslərlə görüşəcəklər: "Diaspor Gənclərinin Yay Düşərgəsi layihəsi 2018-ci ildən etibarən həyata keçirilir və bu il də gənclər tərəfindən böyük maraqla qarşılanıb. Yay düşərgəsinə ildən-ilə artan maraq var. Artıq ikinci ildir ki, biz yalnız azərbaycanlı gənclərlə kifayətlənmirik, Azərbaycana dost olan xalqların nümayəndələrini də seçim mərhələsindən keçiririk". Komitə sədri düşərgənin bu il Xankəndidə keçirilməsini xüsusi rəmzi məna daşıyan hadisə kimi dəyərləndirib: “Xankəndi Azərbaycanın gücünün, müstəqilliyinin və suverenliyinin simvoludur. Bu torpaqlarda keçirilən düşərgə həm də şəhidlərimizə olan borcumuzun ifadəsidir. Əldə olunan uğurların arxasında Prezident İlham Əliyevin siyasi iradəsi dayanır. Məqsədimiz budur ki, bu gənclər gələcəkdə Azərbaycan diaspor hərəkatının öncül liderlərinə çevrilsinlər”. O əlavə edib ki, əvvəlki illərdə yay düşərgələri Laçın və Şuşada da təşkil olunub və bu ənənə davam etdiriləcək.

Xankəndidə keçirilən Diaspor Gənclərinin VI Yay Düşərgəsinin iştirakçısı Əliəşrəf Abdullayev Latviyanın Riqa şəhərindən gəldiyini deyib. Onun sözlərinə görə, Diaspor Gənclərinin VI Yay Düşərgəsində iştirak etmək, Xankəndi şəhərində olmaq mənim üçün böyük fəxrdir: "Yay düşərgəsi iştirakçıların dünya görüşünün artmasında mühüm rol oynayacaq. Mən yay düşərgəsinin təşkilatçılarına minnətdarlığımı bildirirəm". Düşərgəyə İtaliyadan qatılan Toğrul Əliyev Genuya şəhərində yaşadığını söyləyib: "Beynəlxalq təhlükəsizlik və siyasi araşdırmalar üzrə tədqiqatçıyam. Doktoranturada təhsil alıram. Bu gün Azərbaycanın Xankəndi şəhərində olmaq hər bir Azərbaycan gənci kimi mənim üçün də böyük qürur və fəxarətdir. Ali Baş Komandanın rəhbərliyi ilə qüdrətli Ordumuzun azad etdiyi torpaqlarımızda quruculuq işlərinin sürətlə aparılması bizim üçün böyük fəxarət hissi doğurur. Diaspor Gənclərinin VI Yay Düşərgəsində iştirak edirəm. “Konstitusiya və Suverenlik İli” ilə bağlı təşkil edilən bu tədbirdə çoxsaylı görüşlərimiz olacaq. Eyni zamanda, Azərbaycanın milli-mədəni dəyərləri ilə yaxından tanış olacağıq. Dünyanın dörd bir yanından gəlmiş yüzdən artıq azərbaycanlı gənc burada öz milli-mənəvi dəyərlərinə, kökünə, etnik kimliyinə yenidən sahib olur və bu dəyərləri mənimsəyir".

Tədbirə İspaniyadan qatılan, Pənahəli xanın nəslinin nümayəndəsi Zeynəb Əkbərzadə bildirib ki, Qarabağda olmaqdan çox qürurludur: "Həm ulu babamın təməlini qoyduğu şəhəri görmək, həm də burada dövlətimizin keçirdiyi tədbirin iştirakçısı olmaqdan məmnunam. Yay düşərgəsində iştirak nəticəsində həm Qarabağla bağlı məlumatlarım artacaq, həm də yeni dostlar qazanacağam. Tədbirin təşkilatçılarına öz dərin minnətdarlığımı bildirirəm".

Düşərgəyə Almaniyadan qatılan Günel Hüseynli deyib ki, bu tədbir gənclərin Vətənə bağlılığı baxımından çox önəmlidir: "Almaniyada Təmiz enerji prosesləri üzrə magistr təhsili alıram. Burada olmaq mənim üçün qürurverici və sevindiricidir. Çünki tədbir azərbaycanlı gənclər üçün həm dünyagörüşünün artırılması, həm də Vətənə bağlılıq baxımından çox önəmlidir. Ən önəmlisi bu tədbirin Xankəndidə təşkil edilməsidir. Biz uşaq yaşlarımızdan Qarabağ hekayəsi ilə böyümüşük və bu gün hamımız üçün sevindirici haldır ki, Qarabağda beynəlxalq tədbirlərə ev sahibliyi edirik". Fransada doğulub böyüyən, hazırda Parisdə yaşayan İbrahim Diavara ilk dəfədir ki, Qarabağa səfər etdiyini deyib. Babası seneqallı, anası isə türkdür. O, Azərbaycanın Qarabağ uğrunda mübarizəsini uzun müddət yaxından izlədiyini bildirib: "Qarabağa dünən gəlmişik. Xankəndi çox gözəl şəhərdir. Əminəm ki, bundan sonra daha da gözəlləşəcək".

Millət vəkili Naqif Həmzəyev Sherg.az-a açıqlamasında deyib ki, Azərbaycanın diaspora siyasətində yeni bir səhifə açılan bu günlərdə, Xankəndi şəhərində keçirilən Diaspor Gənclərinin VI Yay Düşərgəsi xüsusi əhəmiyyət kəsb edir. Deputatın sözlərinə görə, bu tədbir təkcə diaspora gənclərinin vətənlə əlaqələrinin gücləndirilməsi deyil, həm də Azərbaycanın qələbə tarixinin yaşayan simvolu kimi qarşımızda durur:

"Diaspor Gənclərinin VI Yay Düşərgəsinin Xankəndidə keçirilməsi təsadüfi deyil. Bu şəhər Azərbaycanın ərazi bütövlüyünün bərpası və Qarabağ Zəfərinin simvolu kimi tarixi əhəmiyyət daşıyır. Diaspora gənclərinin bu torpaqda toplanması, onların vətənin hər qarışının azad edilməsi uğrunda aparılan mübarizənin şahidi olması deməkdir. 44 günlük Vətən müharibəsindən sonra azad edilən ərazilərdə belə mənalı tədbirlərin keçirilməsi, Azərbaycanın güclü dövlət kimi öz tarixi torpaqlarında diaspora nümayəndələrini qarşılamasının bariz nümunəsidir. Bu, həm də dünyaya Azərbaycanın bu torpaqlarda daimi olduğunun, burada normal həyatın bərqərar olduğunun mesajıdır. Komitə sədri Fuad Muradovun da qeyd etdiyi kimi, Prezident İlham Əliyevin rəhbərliyi ilə həyata keçirilən çoxşaxəli diaspora siyasəti öz uğurlu nəticələrini göstərməkdədir. Bu siyasətin əsas istiqamətləri bunlardır - Diaspora ilə işin institutlaşdırılması və davamlı xarakter alması, diaspora gənclərinin xüsusi diqqət mərkəzində saxlanması, Azərbaycan mədəniyyətinin dünyada tanıdılması və diaspora nümayəndələrinin ölkənin iqtisadi həyatına cəlb edilməsi. Bu il düşərgəyə 61 ölkədən 128 azərbaycanlı gəncin qatılması diaspora siyasətinin uğuruna dəlalət edir. Bu rəqəmlər göstərir ki, Azərbaycan diasporası dünyada geniş coğrafi yayılma göstərir. Gənclər arasında vətənə maraq ildən-ilə artır, diaspora təşkilatlarının fəaliyyəti səmərəli nəticələr verir. Həmçinin, Vətənlə əlaqələrin gücləndirilməsi prosesi uğurla davam edir".

Parlament üzvü vurğulayıb ki, diaspor gəncləri üçün bu cür tədbirlər milli kimliklərini qorumaq və gücləndirmək baxımından əvəzolunmazdır:

"Bununla Vətəndən uzaqda yaşayan gənclərin ana dillərini inkişaf etdirmələri, milli ənənələri öyrənmələri, Azərbaycan tarixi və mədəniyyəti ilə dərindən tanış olmaları, həmvətənləri ilə əlaqələr qurmaları mümkün olur. Bu proses milli kimliyin gələcək nəsillərə ötürülməsində mühüm rol oynayır. 61 ölkədən gələn diaspora gəncləri gələcəkdə öz yaşadıqları ölkələrdə Azərbaycanın təbii səfirləri rolunu oynayacaqlar. Onlar Azərbaycan həqiqətlərini dünyaya çatdıracaq, ölkəmizin müsbət imajının formalaşmasına kömək edəcək, Azərbaycanın beynəlxalq aləmdəki mövqelərini gücləndirəcək, ikitərəfli əlaqələrin inkişafına töhfə verəcəklər. Diaspor gəncləri ilə qurulan əlaqələr uzunmüddətli iqtisadi faydalar gətirə bilər. Gənclərin bu düşərgəyə marağının ildən-ilə artması sevindirici haldır. Düşərgə platformasının ilk gündən özünü doğrultması onun düzgün konsepsiya üzərində qurulduğunu göstərir. Bu platform gənclərin real ehtiyaclarına cavab verir, müasir tələblərə uyğun təşkil olunur, praktik nəticələr əldə edilməsinə imkan yaradır, uzunmüddətli əlaqələrin qurulmasına şərait yaradır".

Parlamentari əlavə edib ki, müasir dünyada diaspora gəncləri ikili kimlik problemi ilə üzləşirlər. Bu düşərgələr bu problemin həllində mühüm rol oynayır:

"Belə tədbirlər milli kimliyin qloballaşma şəraitində qorunmasına, müxtəlif mədəniyyətlər arasında körpü rolunu oynamasına, çoxmədəniyyətli cəmiyyətlərdə Azərbaycan mədəniyyətinin təqdimatına, beynəlxalq dialoqun inkişafına töhfə verir. Ümumən, Azərbaycan diaspor siyasətində uğurlu addımlar atır və bu istiqamətdə sistemli işlər görülür. Prezident İlham Əliyevin rəhbərliyi ilə həyata keçirilən çoxşaxəli diaspora siyasəti öz bəhrələrini verir. Diaspor gənclərinin vətənlə əlaqələrinin gücləndirilməsi, onların milli kimliklərinin qorunması və gələcək nəsillərə ötürülməsi Azərbaycanın uzunmüddətli strateji maraqlarına xidmət edir. Bu prosesdə hər bir gənc diaspor səfiri kimi öz missiyasını dərk etməli və vətəninin dünyada layiqli təmsil olunmasına töhfə verməlidir. Gələcəkdə bu cür tədbirlərin daha da genişləndirilməsi, yeni formatların tətbiqi və beynəlxalq təcrübədən istifadə edilməsi diaspora siyasətimizin səmərəliliyini artıracaq və Azərbaycanın dünyada mövqelərini möhkəmləndirəcək.

İsmayıl Qocayev

Şərq 2025.- 6 avqust (№137).- S.6.