Zəfər Bayramı xalqın iradəsinin qələbəsidir

Azərbaycan var olduqca bu gün unudulmayacaq

Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi

Gənclərimiz canı və qanı ilə tarix yazdı. Bu nəsil Vətənin ən böyük zəmanətidir

Bu gün şanlı qələbəmizin 5-ci ildönümüdür. 8 Noyabr- Zəfər Günü milli qürurumuzun ən uca zirvəsidir.

Hər bir millətin tarixində elə anlar olur ki, o anlar zamanın səlnaməsində silinməz izlər buraxır, xalqın ruhuna əbədi qürur və inam bəxş edir. Azərbaycan xalqı üçün də Zəfər Günü məhz belə bir möhtəşəm tarixdir. Bu gün torpaqlarımızın azadlığı, şəhidlərimizin müqəddəs qanı, ordumuzun igidliyi və xalqımızın birliyi ilə yazılmış şanlı bir dastandır.

Zəfər Günü əsrlərlə həsrət qaldığımız ədalətin bərpası, milli mənliyimizin, dövlətimizin gücünün və xalqımızın sarsılmaz iradəsinin təntənəsidir. Bu gün biz yalnız torpaqlarımızın işğaldan azad edilməsini deyil, Azərbaycan ruhunun dirçəlişini, millətimizin tarixi qürurunun bərpasını qeyd edirik.

Bu Zəfər - gənc nəslin yaddaşına qəhrəmanlıq məktəbi kimi həkk olunmalıdır. Çünki bu günün qəhrəmanları, vətən yolunda canını fəda edən oğullarımız gənclərimiz üçün əsl Vətən sevgisinin, mərdliyin və fədakarlığın simvoluna çevriliblər. Onların mübarizəsi göstərdi ki, xalqın birliyi, liderinə inamı və torpağa bağlılığı qarşısında heç bir güc dayana bilməz.

Zəfər Günü gəncliyə ünvanlanmış bir çağırışdır: öz kimliyinə sahib çıx, tarixinə söykən, vətənini sev və qorumağı borc bil! Bu, sadəcə bir bayram deyil, bu, bir ruhun dirilişidir, bir millətin yenidən doğuluşudur.

Bu möhtəşəm gün münasibətilə ölkənin hər yerində, məktəblərdə, universitetlərdə, bağçalarda və mədəniyyət ocaqlarında Zəfərimizin əzəmətini əks etdirən tədbirlər keçirilir. Uşaqlara və gənclərə Vətən sevgisi, milli ruh, dövlətə sədaqət və qəhrəmanlıq duyğuları aşılanır. Onlara bu Zəfərin hansı fədakarlıqlar bahasına qazanıldığı, azadlığın necə böyük dəyər olduğu öyrədilir. Hər bir tədbir, hər bir çıxış bu gün Azərbaycanın gələcəyinin möhkəm təməllərinin qoyulduğunu sübut edir.

Günlərdir əsgər mundirli, əlində üçrəngli bayrağını qürurla dalğalandıran körpələr, məktəblilər və gənclər İkinci Şəhidlər xiyabanına axın edir. Onlar qəhrəman general Polad Həşimovun, həmçinin Vətən uğrunda canını, qanını fəda edən saysız-hesabsız qəhrəmanlarımızın məzarlarını ziyarət edir, onların əziz xatirəsi önündə baş əyirlər. Balaca uşaqlar şəhidlərə ithaf olunan şeirlər səsləndirir, gözlərində qürur, dillərində "Qarabağ Azərbaycandır!" nidaları ilə böyüklərin qəhrəmanlıq ruhunu gələcəyə daşıyırlar.

Bu gün ölkənin bütün ümumtəhsil və ali təhsil ocaqlarında ilk dərs Zəfər Gününə həsr edilib. Müəllimlər dərs saatlarında ordumuzun qazandığı möhtəşəm qələbədən, şəhidlərimizin misilsiz cəsarət və şücaətindən bəhs ediblər. Uşaqlara və gənclərə milli ruhun, vətənə məhəbbətin və dövlətə sədaqətin əhəmiyyəti aşılanıb. Onlara Zəfər Gününün tarixi əhəmiyyəti, bu qələbənin xalqımızın birliyi, igid oğullarımızın fədakarlığı sayəsində qazanıldığı izah olunub. Şagirdlər bu dərslərdə həm qəhrəmanlarımızın ruhuna hörmətlə yanaşıb, həm də növbəti dəfə Azərbaycanın azadlıq və qürur tarixinin şahidi olublar.

Qeyd edək ki, 2020-ci il sentyabrın 27-də Ermənistanın törətdiyi hərbi təxribatlara cavab olaraq başlayan 44 günlük Vətən müharibəsi, Müzəffər Ali Baş Komandan, Azərbaycan Respublikasının Prezidenti cənab İlham Əliyevin qətiyyətli və uzaqgörən rəhbərliyi ilə tarixi Qələbə ilə başa çatıb. 8 noyabrda Azərbaycan Ordusu 44 günlük Vətən müharibəsində parlaq qələbə qazanaraq Şuşa şəhərini azad etdi və bununla da, torpaqlarımızın işğalına son qoyulub. Prezident İlham Əliyevin 2020-ci il 3 dekabr tarixli Sərəncamı ilə 8 Noyabr "Zəfər Günü" elan edilib. Bu qərar xalqımızın qəhrəmanlığını, dövlətimizin qüdrətini və milli qürurumuzu əbədiləşdirərək gələcək nəsillərə şanlı tarix kimi ötürür. Zəfər Günü hər il 8 noyabrda dövlət səviyyəsində qeyd olunur və xalqımızın milli qürur, azadlıq və yenilməzlik rəmzinə çevrilib. Gənc nəslin milli mənlik şüurunun formalaşmasında və vətənpərvərlik tərbiyəsində Zəfər Gününün rolu son dərəcə böyükdür. Bu müqəddəs gün gənclərə təkcə bir qələbə tarixini deyil, millətin gücünü, xalqın birliyini, Vətən sevgisinin ucalığını anladır. Zəfər Günü sayəsində gənc nəsil anlayır ki, azadlıq, müstəqillik və torpaq sevgisi sadəcə söz deyil, can bahasına qorunan dəyərlərdir.

Bu günün hər il qeyd olunması gənclərin yaddaşına qəhrəmanlıq, mərdlik, milli kimliyə bağlılıq duyğularını hopdurur. Onlar şəhidlərin fədakarlığını, qazilərin şücaətini öyrənərək dövlətinə, ordusuna, bayrağına daha böyük sevgi və inamla bağlanır.

Zəfər Günü gəncliyə bir məktəbdir; bu məktəbdə vətənpərvərlik ruhu, milli özünüdərk və mübarizə əzmi öyrədilir. Hər bir gənc bu günün mənasını dərk etdikcə, Azərbaycanın gələcəyinə daha məsuliyyətlə, daha qürurla addımlayır.

Milli Məclisin Müdafiə, Təhlükəsizlik və Korrupsiya ilə Mübarizə Komitəsinin üzvü Aydın Mirzəzadə Sherg.az-a açıqlamasında deyib ki, Zəfər Bayramı Azərbaycanın qürur və birliyinin təcəssümüdür. Deputatın sözlərinə görə, Zəfər Günü yalnız hərbi qələbənin deyil, milli həmrəyliyin, dövlətçilik iradəsinin və xalqın öz liderinə inamının təntənəsidir:

“Bu gün hər bir azərbaycanlı üçün fəxarət, başucalığı və milli kimlik rəmzidir. Zəfər Bayramı Azərbaycanın müstəqilliyi, milli qüruru və torpaq bütövlüyü uğrunda apardığı uzunmüddətli mübarizənin məntiqi nəticəsidir. Azərbaycan xalqı öz liderinin rəhbərliyi ilə bu məqsədə uzun illər ciddi şəkildə hazırlaşdı. İgid oğullarımız Ali Baş Komandanın rəhbərliyi ilə 44 gün ərzində ərazi bütövlüyümüzü təmin etdi. Daha sonra isə birgünlük antiterror əməliyyatı ölkədə separatizmin kökünü tamamilə kəsdi.

Zəfər Günü Azərbaycan xalqı üçün qürur, başucalığı və fəxarət günüdür. Bu gün igidlərimizin qəhrəmanlıq salnaməsini təcəssüm etdirir. Azərbaycan var olduqca, bu Zəfər Günü də xalqımızın simvolu kimi yüksək səviyyədə qeyd ediləcək. Yeni nəsillər azərbaycançılıq ruhunda böyüyürlər. Hər bir vətəndaş müstəqilliyin qorunmasını özünün ali vəzifəsi hesab edir. Bu keyfiyyətlər xalqımızın keçmişindən gələn dəyərlərin, bugünkü fədakarlığın və gələcək nəsillərin tarixə ehtiramının nəticəsidir".

Deputat hesab edir ki, ölkənin milli maraqlarının müdafiə edilməsi üçün, ilk növbədə gənclərdə vətənpərvərlik hisslərinin güclü olması vacibdir. Onun fikrincə, yalnız vətənini sevən, vətəninə məhəbbət bəsləyən gənclik bütün ali dəyərlərin müdafiəçisi ola bilər:

“Xalqımıza məxsus olan maddi və mənəvi sərvətlərin keşiyində dayanar, qoruyucusuna çevrilər. Biz bunun, bu həqiqətin 44 günlük müharibə dönəmində əyani şəkildə şahidi olduq və bir daha inandıq ki, müasir gəncliyimiz milli mənlik şüuruna malik olan sağlam təfəkkürlü gənclikdir və həmin gəncliklə gələcəyə ümid etməyə dəyər. Çünki həmin gənclik xalqımıza, bizə məxsus olan dəyərlər uğrunda canından, qanından keçməyə hazır olduğunu bir daha təsdiq etdi. 44 günlük müharibədə Vətənin hər qarış torpağı uğrunda son damla qanına qədər vuruşan, şəhidlik zirvəsinə ucalan gənclərimiz vətənə məhəbbət hissinin necə olduğunu bütün dünyaya göstərdi”.

Şəymən Bayramova

Şərq 2025.- 8 noyabr (№ 205).- S.6.