"Bütün iradlar nəzərə alınıb"

"QHT haqqında" qanuna əlavə və dəyişikliklər "korrektə" olunub

Milli Məclisin yaz sessiyası bitəndən sonra çağırılmış növbədənkənar sessiya da dünən başa çatdı. Parlamentdə 2 növbədənkənar iclas keçirildi. Hər iki iclasda isə Azərbaycanın ictimai-siyasi və sosial-iqtisadi həyatı üçün mühüm qanunlar qəbul olundu. İlk iclasda 15 il üzərində işlənən "Təhsil haqqında" qanun, sonuncu iclasda isə "QHT-lər haqqında" və Dini etiqad azadlığı haqqında" qanunlara əlavə və dəyişikliklər edildi. Amma QHT-lərlə bağlı qanunda xeyli dəyişikliklər var. Cari məsələlər üçün ayrılmış vaxtda isə deputatlar maraqlı təkliflər səsləndirdilər. Missiyası başa çatmaq üzrə olan ABŞ səfiri Ann Dersi də Milli Məclisin sonuncu iclasını izləyib.

"Taxıl ortada qalıb"

Cari məsələlər üçün ayrılmış vaxtda millət vəkili Pənah Hüseyn taxıl problemindən danışdı. Onun fikrincə, bu gün fermerlərin istehsal etdikləri taxılın alıcısı yoxdur. Bunun nəticəsidir ki, buğdanın qiyməti 8-6 qəpiyə qədər düşüb: "Dövlət həmin taxılın becərilməsi, gübrə alınması üçün vəsait ayırıb. İndi taxıl ortada qalıb. Bu taxılı normal, hətta baha qiymətə dövlət almalıdır. Digər tərəfdən, rayonlarda kombaynları aqroservislər imkanlı insanların sahələrini biçməyə göndərirlər. Belə ayrı-seçkilik də yolverilməzdir".

Baba Tağıyev İrana qarşı...

Millət vəkili Baba Tağıyevin çıxışı İran-Ermənistan münasibətləriylə bağlı oldu. O nəzərə çatdırdı ki, İran Livandakı "Hizbullah" hərəkatına 786 milyon dollar yardım edib. Bu təşkilatla isə ermənilərin sıx əlaqələri var, birgə tədbirlər keçirirlər. Sonradan bu vəsait hesabına "Hizbullah"ın əliylə Ermənistana silah və sursat göndərilir: "İranda 40 milyon soydaşımız yaşayır, onların ödədikləri pullar hesabına dövlət büdcəsi formalaşır. Ancaq həmin 40 milyonun heç təhsil və mədəni haqları yoxdur, öz dillərində oxumağa imkan yaradılmır. Aydındır ki, bundan sonra deyəcəklər ki, başqa dövlətlərin daxili işlərinə qarışmaq olmaz. Ancaq insan haqları heç bir dövlətin daxili işi sayıla bilməz".

Spiker deputatları ümumi sözlər danışmamağa çağırdı.

YAP-ın icraçı katibi Əli Əhmədov Rusiya prezidenti Dmitri Medvedyevin son bəyanatının Dağlıq Qarabağ münaqişəsinin tezliklə həllinə ümid, nikbinlik yaratdığını vurğuladı.

"Məsələnin açıq saxlanması Azərbaycana təzyiqdir"

Müdafiə və təhlükəsizlik komitəsinin üzvü Zahid Oruc ABŞ Konqresinin Alt Komitəsində "907-ci düzəliş"in müzakirəyə çıxarılmasına toxundu. Onun sözlərinə görə, bununla bağlı hələ qərar verilməməsi, məsələnin açıq saxlanması Azərbaycana təzyiqdir: "1992-ci ildə bu düzəlişin qəbul edilməsinə bəraət qazandırmaq mümkün olmasa da, başa düşmək olardı. Yalnız Azərbaycan antiterror əməliyyatlarında iştirak etməyə başlayandan sonra, 2001-ci ildən həmin düzəlişin hər il qüvvəsi dayandırılmağa başlanılıb: "Deyirlər ki, bu qanunu ləğv etmək çətindir. Ancaq əslində elə deyil. Digər tərəfdən, ABŞ hər il Ermənistana, Dağlıq Qarabağdakı separatçı quruma yardım edir. Məqsəd nədir? Həmin yardımlar Ermənistanı demokratikləşdiribmi? Yox! Digər tərəfdən, bu yardımlar hesabına Dağlıq Qarabağdakı separatçı rejimin mövqeləri möhkəmlənib".

Daha sonra gündəlikdəki məsələlərin müzakirəsinə keçildi.

"QHT haqqında" qanuna əlavə və dəyişikliklər "korrektə" olunub

Hüquq siyasəti və dövlət quruculuğu komitəsinin sədri Əli Hüseynov "QHT haqqında" və "Dini etiqad azadlığı haqqında" qanunlara əlavə və dəyişikliklər barədə məlumat verdi. O, keçən müzakirələrdəki təklif və iradların nəzərə alındığını nəzərə çatdırdı. Əli Hüseynov qeyd etdi ki, tətbiqi prosedurunun çətinliyi nəzərə alınaraq QHT-lərin məcburi qeydiyyatı proseduru ilə bağlı müddəa layihədən çıxarılıb. Qeydiyyatsız fəaliyyətə görə məsuliyyət məsələsi də aradan qaldırılıb. Tanınmış şəxslərin adlarının, o cümlədən Azərbaycan adından QHT-lərin öz adlarında istifadə etmələrini qadağan edən müddəa isə saxlanılıb. Xarici QHT-lərin Azərbaycandakı filiallarının rəhbərlərinin Azərbaycan vətəndaşları olması tələbi də qalır. Azərbaycanda daimi yaşayan xaricilər və vətəndaşlığı olmayanlar da QHT yarada bilərlər. Müvəqqəti yaşayanların belə hüquqları yoxdur. Fond üçün məbləğin miqdarı 50 min manatdan 10 min manata endirilib: "Biz istəyirik ki, xarici QHT-lər saziş bağlayaraq Azərbaycanda fəaliyyət göstərsinlər".

Ə.Hüseynov dedi ki, QHT-lərin hesabat verərkən audit rəyini də ora əlavə etmələri barədə müddəa da çıxarılıb. Bu zaman audit rəyinin hazırlanması ilə bağlı maliyyə tutumu nəzərə alınıb

Teatr oyunu söhbəti

Sosial siyasət komitəsinin sədr müavini Musa Quliyev dövlətçilik məsələsinin demokratiyadan öncə gəlməsinin vacib olduğu qənaətindədir: "QHT-lərimizə 20 milyon lazımdırsa, Dəstək Fonduna büdcəmizdən o qədər ayrılsın. Beləliklə də QHT-lərimiz xarici donorların əlinə baxmasınlar. Çünki bu qrantlar elə-belə verilmir"

Millət vəkili Pənah Hüseynin çıxışı yenə "qıcıqlandırıcı" oldu: "Deputatı dövlət təyin edəndə mollalar da təyin olunacaqdı". P.Hüseyn təklif edir ki, xarici ölkələrdə təhsil alan insanların Azərbaycanda dini ayin və mərasimləri aparmalarına qoyulan qadağa da layihədən çıxarılmalıdır: "QHT haqqında" qanuna əlavə və dəyişikliklərə gəlincə, Əli Hüseynovun çıxışından məlum olur ki, əsas məhdudiyyətlər, maddələr çıxarılıb. Bu nə teatr oyunudur? Bu, kimə lazım idi?" Millət vəkili hesab edir ki, bu məhdudlaşdırıcı müddəalar indi çıxarılsa da, növbəti sessiyaların birində yenidən gündəmə gələcək: "Bunun arxasında internetlə bağlı məhdudlaşdırıcı xarakterli layihə gələcəkdi".

Spiker Oqtay Əsədovun cavabı gecikmədi: "Haradan bildin ki, səni dövlət təyin edib?"

"Pənah Hüseynə əməkdar artist adı verilsin"

Millət vəkili Zahid Oruc və Fəzail İbrahimli Pənah Hüseynin teatr oyunu və millət vəkillərinin təyin olunması ilə bağlı söylədiklərinə etirazlarını bildirdilər. YAP-ın icraçı katibi Əli Əhmədov əsas məqsədin Azərbaycanda sabitliyi qorumaq olduğunu vurğuladı: "Din insanların qəlbində olmalı, başqa məqsədlərə xidmət etməməlidir".

Vitse-spiker Valeh Ələsgərov Bakı-Tbilisi-Ceyhan neft kəməri çəkilərkən bir qrup QHT-nin Səngəçal terminalı yaxınlığında iki tısbağa tapılmasına görə belə kəmərin çəkilməsinə etiraz etdiklərini xatırlatdı: "Sonra məlum oldu ki, həmin QHT-lərin sayı tapılan tısbağalardan çoxdur".

Rəşad Baxşəliyev

Şərq.- 2009.- 1 iyul.- S. 4.