Qarabağ Forumu keçirilib

Partiyalar ATƏT-in Minsk Qrupunun fəaliyyətini tənqid ediblər

Dünən Demokratiya Uğrunda İttifaqın (DUİ) təşəbbüsü ilə Qarabağ Forumu keçirilib. Tədbirdə Azərbaycanın bir qrup müxalifət partiyası ATƏT-in Minsk Qrupunu Dağlıq Qarabağ probleminin həllində Ermənistanın mövqeyini dəstəkləməkdə qınayıb.

Vurğulanıb ki, problemin həllində vasitəçilik edən dövlətlər təcavüzkar Ermənistanı çəkindirmək üçün heç bir addım atmayıb, əksinə, problemin həlli adı altında Azərbaycanı işğal faktoru ilə barışmağa, Dağlıq Qarabağa müstəqillik verilməsi istiqamətində hüquqi prosedurlara razılıq verməyə yönəlmiş aşkar təzyiqlərə başlayıblar. Forum iştirakçıları sonda birgə bəyanatla çıxış ediblər. Bəyanada qeyd olunub ki, vasitəçi dövlətlər Qarabağ problemindən istifadə etməklə Azərbaycanın yerləşdiyi regionda nüfuz savaşı aparır və bu savaş Azərbaycanın haqq və hüquqlarının tapdanması ilə müşayiət olunur. Sənədə imza atanlar problemin yalnız Azərbaycanın ərazi bütövlüyü çərçivəsində, beynəlxalq prinsiplərə uyğun həllini mümkün hesab etdiklərini, Dağlıq Qarabağda antiterror əməliyyatlarının aparılmasının zəruriliyini diqqətə çatdırıblar.

Firdovsi

Şərq.- 2009.- 4 iyul.- S. 7.