"Diffomasiya haqqında qanun"un qəbulu gözlənilir

Əflatun Amaşov: "Bu məsələ ola bilsin ki, parlamentin payız sessiyasında gündəliyə salınsın"

Diffomasiya ilə bağlı müzakirələr son zamanlar daha intensiv xarakter alıb. Bu sahə ilə əlaqədar artıq bir neçə qanun layihəsi də hazırlanıb. Lakin nəzərə almaq lazımdır ki, sözügedən qanunun qəbulu ilə bağlı cəmiyyətdə fikir müxtəlifliyi mövcuddur.

Belə ki, yazısında yol verdiyi böhtan və təhqir elementlərinə görə jurnalistin cinayət məsuliyyətinə cəlb edilməməsinin reketçiliyin daha da genişlənməsinə gətirib çıxaracağı düşüncəsində olanlar da var. Bununla belə diffomasiya ilə bağlı məsələnin Milli Məclisin payız sessiyasında müzakirə ediləcəyi ehtimalı da səsləndirilir.

Azərbaycan Mətbuat Şurasının (MŞ) sədri Əflatun Amaşov da bunu mümkün sayır. Onun sözlərinə görə, inkişaf etmiş ölkələrdə diffomasiya ilə bağlı qanun var və yaxud da qanunvericilikdən jurnalistin məsuliyyətə cəlb olunması ilə bağlı maddələr çıxarılır. "Azərbaycan Avropaya inteqrasiyanı daha da sürətləndirən bir ölkə kimi gec-tez belə bir qanun qəbul etməli və ya qanunvericiliyə dəyişiklik olunmalıdır. ?urnalistlə vətəndaş arasında olan münasibətlər cinayət müstəvisində deyil, mülki müstəvidə öz həllini tapmalıdır. ?urnalist bilərəkdən səhv edibsə, o zaman həbs olunmalı deyil, cərimə və müəyyən inzibati qaydada cəzalanmalıdır. Müxtəlif jurnalist təşkilatları müxtəlif layihələrlə çıxış ediblər. Azərbaycan jurnalistlərinin son qurultayında da biz bu məsələni müzakirə etdik. Bu yaxınlarda Avropa Şurasında keçən diskussiyalarda bu məsələ müzakirə olundu. Belə bir qayda mütləq olmalıdır. Ancaq söhbət vaxtdan gedir ki, nə zaman ola bilər. Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun müsabiqə ilə bağlı elan etdiyi layihələr arasında da bu məsələ gündəmdədir ki, diffomasiya ilə bağlı vəziyyət necədir və bununla bağlı nələr etmək mümkündür. Mənə elə gəlir ki, heç nəyə məhəl qoymadan bu sahədə hakimiyyətlə KİV arasında diskussiyaları genişləndirmək lazımdır. Cəmiyyət bu istiqamətdə məlumatlandırılmalıdır". Ə.Amaşovun sözlərinə görə, bu məsələləri daha açıq şəkildə müzakirə etmək lazımdır ki, tərəflər özünün rolunu bilsin. Ə.Amaşov qeyd edib ki, indiki halda Mətbuat Şurasına daxil olan şikayətlər diffomasiya sahəsində çoxsaylı problemlərin olduğunu göstərir. "Ayrı-ayrı insanların şərəf və ləyaqətləri alçaldılır. Gözləmək ki, ümumiyyətlə mətbuatda vəziyyət tam durulsun, jurnalistlər etik normalara tam əməl etsinlər, bundan sonra qanun qəbul olunsun, elə bilirəm ki, bu düzgün olmazdı. Bir müddət bundan əvvəl MŞ adından Milli Məclisin rəhbərliyinə müraciət ünvanlamışdıq ki, bu məsələnin müzakirəsini gündəmə çıxarsınlar. Ola bilsin ki, parlamentin payız sessiyasında bu məsələ gündəliyə salınsın. Yəqin ki, bu məsələnin müzakirəsi bir müddət çəkə bilər. İnanmıram ki, "Təhsil haqqında" qanun kimi çox çəksin, amma gecikə bilər. Bundan başqa əmin deyiləm ki, diffomasiya ilə bağlı məsələlər ilk mərhələdə qanun şəklində həyata keçirilsin. Mənə elə gəlir ki, əvvəlcə qanunvericiliyə müəyyən əlavə və dəyişiklik oluna bilər və orada Cinayət Məcəlləsində bir sıra maddələr çıxarıla bilər".

Firdovsi

Şərq.- 2009.- 7 iyul.- S. 7.