Gəncədə müşavirə keçirilib

Azərbaycan diplomatik korpusu nümayəndələri oradan Naxçıvana gedib

Azərbaycan Xarici İşlər Nazirliyi dünən Azərbaycan diplomatiyasının 90 illiyi ilə bağlı silsilə tədbirlərə start verib. Yubiley tədbirləri ilə əlaqədar artıq Azərbaycanın xarici ölkələrdəki əksər səfirləri və konsullar Bakıya gəlib. Dünən nazir Elmar Məmmədyarovun rəhbərliyi ilə diplomatlar Gəncəyə səfər ediblər. Səfər proqramına Gəncədəki Heydər Əliyev parkında ümummilli liderin abidəsini ziyarətlə başlayan Azərbaycan diplomatları daha sonra Şah Abbas Məscidi, Cavad xanın məqbərəsi ilə tanış olublar.

Azərbaycan Demokratik Cümhuriyyətinin yerləşdiyi ilk binaya baş çəkən diplomatlar daha sonra dahi Azərbaycan şairi Nizami Gəncəvinin məqbərəsini ziyarət ediblər. XİN-in mətbuat xidmətinin rəhbəri Elxan Poluxov "Şərq"ə açıqlamasında bildirib ki, nazir Elmar Məmmədyarov və Azərbaycan diplomatlarının iştirakı ilə Gəncədə Azərbaycan diplomatiyasının 90 illiyinə həsr olunmuş konfrans da keçirilib. Konfransda çıxış edən Azərbaycanın xarici siyasət idarəsinin rəhbəri Elmar Məmmədyarov Azərbaycan diplomatiyasının 90 ildə keçdiyi şərəfli tarixdən, eləcə də diplomatlarımız qarşısında duran vəzifələrdən danışıb. Nazir çıxışı zamanı DQ münaqişəsi ətrafındakı vəziyyətə də toxunub. Gəncənin müasir görünüşünün onda xoş hisslər yaratdığını bildirən nazir Elmar Məmmədyarov Azərbaycan diplomatiyasının 90 illik yubileyinin qeyd edilməsinə Gəncədən başlanılmasının da təsadüfi olmadığını deyib. Azərbaycan diplomatiyasının bünövrəsinin Azərbaycan Xalq Cümhuriyyəti dönəmində məhz 9 iyul 1919-cu ildə qoyulduğunu xatırladan nazir Elmar Məmmədyarov prezident İlham Əliyevin 24 avqust 2007-ci il tarixli fərmanı ilə 9 iyulun Azərbaycan diplomatlarının peşə bayramı elan edildiyini vurğulayıb. Ulu öndər Heydər Əliyevin də Azərbaycan Xalq Cümhuriyyəti dönəminə xüsusi həssaslıqla yanaşdığını qeyd edən nazir məhz onun fərmanı əsasında həmin dövrə aid olan bütün sənədlərin nəşr edildiyini vurğulayıb. Nazir Azərbaycan Xalq Cümhuriyyətinin yaradılması üzərində xüsusi dayanıb. "Azərbaycan Xalq Cümhuriyyəti və onun diplomatiyası haqqında danışmazdan əvvəl bir vacib məqamı qeyd etmək istərdim: hələ Azərbaycanın dövlət müstəqilliyinin elan edilməsindən əvvəl, Cənubi Qafqazda siyasi vəziyyətin çox mürəkkəb olduğu və tez-tez dəyişdiyi zaman Milli Şuranı təşkil edən Azərbaycanın qabaqcıl siyasi xadimləri 1917-18-ci illərdə Tiflisdə Cənubi Qafqaz Komissarlığı və onun seyminin tərkibində aktiv diplomatik fəaliyyətə başlayaraq, eyni zamanda vacib diplomatik təcrübə əldə edərək milli istiqlaliyyət uğrunda mübarizə aparıblar"- deyən nazir Elmar Məmmədyarov Azərbaycan xarici siyasəti ilə bağlı mühüm qərarların qəbul edilməsində Gəncə şəhərinin xüsusi yer tutduğunu qeyd edib. Nazir Azərbaycan Xalq Cümhuriyyətinin yaradılmasında xüsusi rolu olan Azərbaycan siyasi xadimlərinin tarixdə çox parlaq və şərəfli səhifə yazdıqlarını deyib. Azərbaycan müstəqillik əldə etdikdən sonra Azərbaycan diplomatiyasının əlaqələrinin əhəmiyyətli dərəcədə genişləndiyini bildirən nazir indi Azərbaycanın dünya birliyində özünəməxsus yer tutan və hörmət edilən ölkəyə çevrildiyini söyləyib. Elmar Məmmədyarov Azərbaycan xarici siyasətinin daha da təkmilləşdirildiyini də qeyd edib. Ermənistanın işğalçılıq siyasətinə toxunarkən isə nazir bu istiqamətdə BMT, ATƏT, Avropa Şurası, NATO və İslam Konfransı Təşkilatı çərçivəsində ölkəmizin ərazi bütövlüyünü dəstəkləyən bir çox qətnamə və qərarların qəbul edildiyini bildirib. Nazir prezident İlham Əliyevin rəhbərliyi ilə Azərbaycan diplomatlarının bu istiqamətdəki səylərini daha da artırdıqlarını deyib.

Onu da qeyd edək ki, dünən Gəncə səfərini başa vuran Azərbaycan diplomatları Gəncədən Naxçıvan Muxtar Respublikasına yola düşüblər. XİN-in mətbuat katibi Elxan Poluxov Azərbaycan diplomatlarının bu gün Naxçıvanda bir sıra tədbirlərdə iştirak edəcəklərini bildirib. Qeyd edək ki, Azərbaycan diplomatiyasının 90 illiyi ilə bağlı iyulun 9-da Bakıda geniş konfrans keçiriləcək.

Vüsalə Rafiqqızı

Şərq.- 2009.- 7 iyul.- S. 3.