Parlamentin yaz sessiyası gərgin keçib

Bu müddətdə 99 qanun və qərar qəbul edilib

Milli Məclisin yaz sessiyasında Azərbaycan dövləti və xalqı üçün çox əhəmiyyətli qanunlar və qərarlar qəbul olunub. İctimaiyyətin diqqət mərkəzində olan və üzərində 15 il işlənən "Təhsil haqqında" qanun layihəsi bu sessiya çərçivəsində müzakirəyə çıxarılıb və qəbul edilib.

Dünən parlamentin yaz sessiyasının yekunlarına dair keçirilən mətbuat konfransında çıxış edən vitse-spiker Bahar Muradova bu müddət ərzində görülən işlər, qəbul olunmuş qanun və qərarlar, səfərlər və qəbulu gözlənilən layihələr barədə geniş açıqlama verib.

Bahar Muradova qeyd edib ki, MM-in yaz sessiyası dövründə 17 iclası keçirilib, 99 qanun və qərar qəbul edilib. Yaz sessiyasının 14 iclası dövründə 68 qanun və qərar, o cümlədən 1 Konstitusiya qanununa dəyişikliklərlə əlaqədar 12 qanun qəbul olunub. Bu dövrdə parlamentdə 14 beynəlxalq müqavilə ratifikasiya edilib. 107 qanuna dəyişikliklər edilib, bütövlükdə sessiyada 14 qərar çıxarılıb. "Növbədənkənar sessiya isə çox səmərəli keçib. Milli Məclisdə 31 qanun və qərar qəbul edilib. 4 qanun və 2 Konstitusiya qanununa dəyişikliklər edilib. 14 qanunverici qərar qəbul olunub, 1 beynəlxalq müqavilə ratifikasiya edilib, 12 qanuna dəyişiklik və əlavələr olub".

"Demokratiyanın inkişafı ilə bağlı bir sıra addımlar atılıb"

"Bu dövrün yaddaqalan məqamı isə hesabatlar dövrü olmasıdır. Sessiya müddətində 2008-ci ilin "Dövlət büdcəsinin icrası haqqında" qanun qəbul olunub. "Nazirlər Kabinetinin 2008-ci il fəaliyyəti haqqında" hesabatı dinlənilib, İnsan hüquqları üzrə müvəkkilin məruzəsi, bələdiyyələrin fəaliyyətinə inzibati nəzarəti həyata keçirən qurumun hesabatı dinlənilib" deyən vitse-spiker qeyd edib ki, Milli Məclisdə Cinayət Məcəlləsi, Mülki Məcəllə, Cinayət Prosessual Məcəlləsinə dəyişikliklər edilib. "Könüllülük fəaliyyəti haqqında" qanun qəbul olunub. Ölkədə demokratiyanın inkişafı ilə bağlı bir sıra addımlar atılıb. İnsan hüquqları üzrə müvəkkil, "KİV haqqında", "Televiziya və radio yayımı haqqında" qanunlara əlavə və dəyişikliklər edilib.

Sessiyada Mənzil Məcəlləsi təsdiq edilib

Növbədənkənar sessiya müddətində Azərbaycan Sərhəd Xidmətinin 90 illik yubileyi, diplomatik xidmətdə fərqlənməyə görə medal, diplomatik xidmət orqanının 90 illiyi ilə bağlı yubiley medalının təsis olunması ilə bağlı qanun qəbul olunub. Sessiya dövründə bir sıra yaşayış yerlərinin adlarının dəyişdirilməsi, ərazi bölgüsü və inzibati ərazi quruluşu haqqında qanunlara dəyişikliklər edilib.

İqtisadi sahəyə gəlincə isə sessiya müddətində, "Xüsusi iqtisadi zonalar haqqında", "Milli Bank haqqında" qanunlar, Vergi Məcəlləsinə, "Sahibkarlıq fəaliyyəti haqqında" qanuna dəyişikliklər olunub, Mənzil Məcəlləsi təsdiq edilib.

Elmlə bağlı yeni qanun qəbul ediləcək

Bahar Muradova bildirib ki, Milli Məclisdə sosial sahələri əhatə edən mühüm sənədlər də qəbul olunub. Əmək Məcəlləsinə dəyişikliklər edilib, əhalinin keyfiyyətli dərman vasitələri ilə təmin olunmasında yaranmış problemlərin aradan qaldırılması üçün "Dərman vasitələri haqqında" qanun müzakirəyə çıxarılıb və qəbul olunub. "Təhsil qanunu uzun müddətdən sonra qəbul olundu. Gələcəkdə isə təhsil sahəsini tənzimləyə biləcək yeni qanunların qəbulu gözlənilir. Qarşıda bizi "Elm və tədris haqqında" qanun layihəsinin qəbulu gözləyir.

MM-in komitələrinin ümumilikdə 84 iclası keçirilib

Bütün bunlarla yanaşı, Milli Məclis beynəlxalq əlaqələrin inkişafına da diqqətlə yanaşır. Milli Məclisin hazırda 73 ölkə ilə dostluq qrupu var. Sessiya müddətində komitələrin işi yaddaqalan olub. Komitələr artıq bir sıra qurumlarla əlaqəli şəkildə fəaliyyət göstərir. Bu günə qədər komitələrin ümumilikdə 84 iclası keçirilib, 159 məsələyə baxılıb. 129 qanun və 4 qərar layihəsi qəbul olunub.

Parlamentə 25 min 666 təklif, ərizə və şikayətlər daxil olub

Millət vəkilinin sözlərinə görə, vətəndaşlar daim Milli Məclisə müraciət edirlər. Son zamanlar müraciətlərin sayı azalmaqdadır. Bu il Milli Məclisin aparatına 25 min 666 təklif, ərizə və şikayətlər daxil olub. Bu da ötən illə müqayisədə 9 faiz azdır. Bu dövr ərzində MM-də 2781 vətəndaş qəbul olunub. Komitə sədrləri tərəfindən 550 nəfər qəbul olunub. Onlardan 75 nəfəri elektron poçt vasitəsilə qəbula yazılıblar.

Payız sessiyasında "Ali təhsil haqqında" qanun müzakirəyə çıxarılacaq

Parlamentin payız sessiyasında bir sıra mühüm qanunlar qəbul olunacaq. Onlardan biri də Tikinti Məcəlləsi, "Həbs yerlərində saxlanılan, təqsirləndirilən şəxslərin hüquqlarının müdafiə edilməsi haqqında", "Dövlət büdcəsindən maliyyələşən təşkilatlarda işçilərin əməyinin ödənilməsinin təmin edilməsi haqqında", "Ali təhsil haqqında" qanun layihələrinə baxılması nəzərdə tutulur.

Rəşad Baxşəliyev

Şərq.- 2009.- 8 iyul.- S. 3.