"Qarabağa səfər ehtimal olunan sülhə dəstəkdir"

"Münaqişənin sülh yolu ilə həll olunmasına şanslar var".

Asim Mollazadə: "Missiyamız ehtimal olunan müsbət nəticələrdən sonra əhəmiyyəti proseslərə hazırlamaqdır”

Dünən keçirdiyi mətbuat konfransında Azərbaycanın Rusiyadakı səfiri Polad Bülbüloğlunun rəhbərlik etdiyi nümayəndə heyətinin tərkibində Dağlıq Qarabağa səfər edən Azərbaycan İslahatlar Partiyasının (AİP) sədri Asim Mollazadə belə deyib.

O, Azərbaycan - Ermənistan arasında münaqişənin həlli və bu istiqamətdə cərəyan edən proseslərin inkişafına diqqət çəkərək, müsbət nəticələrin olacağı barədə ehtimalların yarandığını deyib. A.Mollazadə ATƏT-in Minsk qrupunun münaqişənin nizamlanması yönündə mütəmadi görüşlər keçirməsini və Moskva doktrinasından sonra Rusiyanın münaqişənin həllində maraqlı görünməsini bu baxımdan əhəmiyyətli sayıb. AİP sədri həmçinin Qarabağa səfərlə bağlı birmənalı olmayan fikirlərə də öz münasibətini bildirib. "Bu missiya mövcud olan danışıqlar prosesini əvəz edə bilməz. Bu, "xalq diplomatiyası" da deyil. Missiyamız ehtimal olunan müsbət nəticələrdən sonra cəmiyyəti proseslərə hazırlamaqdır". A.Mollazadə hesab edir ki, ilin sonuna qədər müvafiq çərçivə sazişi imzalana bilər. Məhz həmin sənədin imzalanmasından sonra sülh proseslərini inkişaf etdirmək olar. Onun fikrincə, Dağlıq Qarabağa edilən səfər də ehtimal olunan sülhə dəstək verməkdir. Millət vəkili deyib ki, Rusiyanın Cənubi Qafqazdakı münaqişə durumunun dəyişilməsində daha fəal iştirak etmək istəyi sülh prosesinin davam etdirilməsi üçün yaxşı imkanlar açır. "Biz Dağlıq Qarabağ münaqişəsini sülh yolu ilə həll edə bilsək, bu, bütün region üçün müsbət faktor olacaq. Biz əminik ki, Cənubi Qafqaz xalqları sülh şəraitində yaşaya bilərlər və biz regionda sülhün irəlilədilməsi imkanlarından yararlanmalıyıq. Əlimizdə olan sülh imkanlarından yararlanmaq üçün emosional deyil, rasional şəkildə hərəkət etməliyik". A.Mollazadənin sözlərinə görə, erməni lobbisi və Ermənistan ermənilərinin mövqeləri fərqlənir. "Ermənistanda mən, prezident Sarkisyanın bizimlə söhbətində dediyi kimi sülh imzalamaq istəyini gördüm".

İlkin Həsənov

Şərq.- 2009.- 11 iyul.- S. 3.