Qadın jurnalistlərin forumu keçirilib

Dünən Azərbaycan Jurnalist Qadınlar Assosiasiyasının təşkilatçılığı ilə jurnalist qadınların birinci Ümumrespublika forumu keçirilib. Forum öz işinə başlamazdan əvvəl isə Azərbaycan Jurnalist Qadınlar Assosiasiyasının üzvləri Fəxri Xiyabanda ümummilli lider Heydər Əliyevin və Azərbaycan mətbuatının banisi Həsən bəy Zərdabinin məzarını ziyarət ediblər. Qeyd edək ki, forum öz işinə dövlət himninin səsləndirilməsi ilə başlayıb.

Forumda qadın jurnalistlərlə yanaşı, dövlət qurumlarının, beynəlxalq təşkilatların və səfirliklərin nümayəndələri, millət vəkilləri də iştirak ediblər. Azərbaycan Jurnalist Qadınlar Assosiasiyasının prezidenti Sevil Yusifova Azərbaycan mətbuatının yaranması, keçdiyi tarixi inkişaf mərhələsi və qadın jurnalistlərin mətbuatın inkişafındakı xidmətləri barədə danışıb. Mətbuatın inkişafında dövlətin dəstəyinə toxunarkən isə təşkilat rəhbəri ulu öndər Heydər Əliyevin bu sahədə gördüyü işləri xatırladıb. O bildirib ki, məhz Heydər Əliyevin diqqət və qayğısı sayəsində ilk dəfə mətbuata dövlət tərəfindən dəstək göstərilib. Ulu öndərin mətbuata qayğı və diqqətinin jurnalistlər tərəfindən də yüksək qiymətləndirildiyini deyən Sevil Yusifova ona "Jurnalistlərin dostu" mükafatının verilməsini də bunun bariz nümunəsi kimi qiymətləndirib. S.Yusifova mətbuata dövlət dəstəyinin bu gün də prezident İlham Əliyev tərəfindən davam etdirildiyini və buna ən yaxşı nümunənin elə bu yaxınlarda KİV-ə Dövlət Dəstəyi Şurasının yaradılmasını göstərib. Rəhbərlik etdiyi təşkilatın yaranmasının bu il həm də on ili tamam olduğunu bildirən Azərbaycan Jurnalist Qadınlar Assosiasiyasının prezidenti bu müddət ərzində əsas fəaliyyətlərinin qadın jurnalistlərin problemləri ilə bağlı olduğunu bildirib. O, eyni zamanda qadın jurnalistlərin birinci forumunun keçirilməsinin məqsədlərini də açıqlayıb. Bildirib ki, qadın jurnalistlərin bir araya gəlməsi bir tərəfdən jurnalist qadınların problemlərini çözmək, digər tərəfdən isə onların təşkilatlanması baxımından vacibdir. Bu baxımdan da təşkilat sədri qadın jurnalistlərin birinci forumunda iştirak edən jurnalist qadınları aktivliyə çağırıb.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova isə qadın jurnalistlərin birinci forumunun keçirilməsini artıq qadınların ölkənin ictimai həyatında iştirakının real təsdiqi kimi qiymətləndirib. Çıxışı zamanı dövlətin KİV-ə dəstəyi barədə danışan komitə sədri əsası ulu öndər Heydər Əliyev tərəfindən qoyulan bu siyasətin bu gün də prezident İlham Əliyev tərəfindən davam etdirildiyini bildirib. Buna nümunə kimi KİV-ə Dəstək Şurasının yaradılmasını göstərən Hicran Hüseynova qadın jurnalistlərin öz peşəkarlıqlarını daha da artırmağa çağırıb. O, rəhbərlik etdiyi komitənin media sahəsi ilə sıx əməkdaşlıq etdiyini vurğulayaraq qadın jurnalistlərlə əlaqələrin bundan sonra daha da genişləndirilməsini təklif edib. Hicran Hüseynova rəhbərlik etdiyi komitənin də qadın jurnalistləri dəstəklədiyini və bu yöndə onlara hər cür kömək verməyə hazır olduğunu bildirib.

Prezident Aparatı ictimai-siyasi şöbənin sektor müdiri Vüqar Əliyevin də çıxışı əsasən dövlət - mətbuat münasibətləri üzərində qurulub. Dövlət tərəfindən mətbuatın inkişafı istiqamətində həyata keçirilən davamlı siyasət barədə danışan PA rəsmisi çıxışı zamanı qadın jurnalistlərin birinci forumunun keçirilməsinə də toxunub. O bildirib ki, bu forum Azərbaycan mediasında qadın jurnalistlərin rolunun artırılmasına öz töhfəsini verə bilər. Azərbaycan mətbuatında gedən yeniləşmə proseslərindən danışarkən Vüqar Əliyev bildirib ki, 2003-cü ildə Mətbuat Şurasının, eləcə də çoxsaylı jurnalist qurumlarının yaranması da bu yeniləşmənin nəticələrindən sayıla bilər. PA rəsmisi çıxışı zamanı qadın jurnalistlərin fəaliyyətinə də münasibətini açıqlayıb. Vüqar Əliyev deyib ki, Azərbaycan qadın jurnalistlərin fəaliyyəti məsuliyyət və peşəkarlıq baxımından örnək hesab edilə bilər.

BMT-nin Azərbaycandakı rezident əlaqələndiricisi Buruno Ponezatin isə çıxışında qadın jurnalistləri sosial sahələrdə olan problemləri qabartmağa çağırıb. Son illər Azərbaycan cəmiyyətində gender bərabərliyi ilə bağlı müzakirələrin getdiyini qeyd edən BMT-nin rezident əlaqələndiricisi hesab edir ki, qadın jurnalistlər sosial sahələrdəki problemlərə daha çox diqqət yetirməklə həm də həmin problemlərin ortadan qaldırılmasına öz töhfələrini vermiş olarlar. O, Azərbaycan qadın jurnalistlərinin birinci Ümumrespublika forumunun keçirilməsini də təqdirəlayiq hal kimi qiymətləndirib.

Azərbaycan Mətbuat Şurasının sədri Əflatun Amaşov isə çıxışında hazırda KİV-də çalışan qadınların sayının təxminən kişilərə bərabər olduğunu bildirib. Müxtəlif vaxtlarda bu göstəricilərin dəyişdiyini bildirən Şura sədri çıxışı zamanı zarafatyana üçüncü minilliyin qadınların hakimiyyəti altında olacağına dair mülahizələr irəli sürüldüyünü xatırladıb. Qadın jurnalistlərin cəmiyyətdə olan problemlərin qabardılmasında daha obyektiv və humanist olduqlarını bildirən Şura sədri Azərbaycan mətbuatının inkişafında qadın jurnalistlərin özünəməxsus yer tutduqlarını bildirib.

Millət vəkili Qənirə Paşayeva isə qadın jurnalistlərlə qürur duyduğunu bildirib. Çıxışı zamanı MŞ-nin sədrinin hazırda mətbuatda çalışan qadın və kişi jurnalistlərin sayının təxminən eyni səviyyədə olması fikrinə toxunan millət vəkili "yaxşı olar ki, bu gender bərabərliyi qadın jurnalistlərin çalışdıqları KİV-in idarə olunmasında da təmin olunaydı. Elə Mətbuat Şurasının özündə də"- deyib. Qeyd edək ki, forumun açılış mərasimindən sonra müzakirələr iki sessiya çərçivəsində davam etdirilib. Müzakirələrdən sonra isə Jurnalist Qadınların birinci Ümumrespublika forumunun yekunu olaraq dövlət başçısına müraciət qəbul edilib. Sənəddə dövlət tərəfindən qadın jurnalistlərin problemlərinin həlli, eləcə də media qurumları ilə təhsil müəssisələri arasında əlaqələrin yaradılması, region KİV-də multimedia işinin yaxşılaşdırılması istiqamətində dövlətin jurnalistlərə dəstəyini bir az da artırması xahiş edilib. Qeyd edək ki, forumun təşkilat komitəsi Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın "Qızıl nailiyyət" medalı ilə təltif edilməsi haqqında da qərar qəbul edib. Mükafatın təqdimatı ilə bağlı ayrı bir tədbirin keçirilməsi nəzərdə tutulur. Bu gün isə Jurnalist Qadınlar Assosiasiyası "Monte Kristo" restoranında Milli Mətbuat Günü və təşkilatın yaranmasının 10 illiyinə həsr olunmuş tədbir keçirəcək. Tədbirdə bir sıra qadın jurnalistlərin mükafatlandırılacağı gözlənilir.

Vüsalə Rafiqqızı

Şərq.- 2009.- 16 iyul. -S. 6.