Brüsseldə Azərbaycan-NATO müzakirələri keçirilib

Görüşdə ölkəmizi xarici işlər naziri Elmar Məmmədyarovun rəhbərlik etdiyi nümayəndə heyəti təmsil edib

Dünən Brüsseldə Azərbaycan-NATO müzakirələri keçirilib. 27+1 formatında keçirilən görüşdə ölkəmizi xarici işlər naziri Elmar Məmmədyarovun rəhbərlik etdiyi nümayəndə heyəti təmsil edib. Azərbaycanın NATO yanındakı nümayəndəliyindən "Şərq"ə verilən məlumata görə, səfər çərçivəsində nazir Elmar Məmmədyarov NATO rəhbərliyi ilə ikitərəfli görüş keçirib.

Aparılmış məsləhətləşmələr zamanı Azərbaycan-NATO münasibətləri, Azərbaycanın NATO ilə Fərdi Tərəfdaşlıq üzrə Əməliyyat Planının (FTƏP) yerinə yetirilməsi, həmçinin regionda təhlükəsizlik, enerji təhlükəsizliyi məsələləri müzakirə edilib. Bununla yanaşı, Azərbaycanın enerji resurslarının Avropa bazarlarına nəqlinə dəstək ifadə edilib. NATO tərəfi Azərbaycanın FTƏP-in vasitəsi ilə təhlükəsizlik sektorunun islahatı, qüvvələrin bu beynəlxalq qurum ilə qarşılıqlı operativ uzlaşması, Azərbaycanın Əfqanıstanda Beynəlxalq Təhlükəsizliyə Yardım Qüvvələri (İSAF) əməliyyatlarına töhfəsi sahəsində əldə etdiyi uğurları yüksək qiymətləndirib. Bundan əlavə NATO tərəfi elm, təhsil, ətraf mühit və ictimaiyyətin məlumatlandırılması sahəsində ölkəmizlə əməkdaşlıqdan məmnunluğunu bəyan edib. Qeyd edək ki, müzakirələrdə Müdafiə Nazirliyi, Dövlət Sərhəd Xidməti və digər qurumların nümayəndələri də iştirak ediblər. Onu da xatırladaq ki, hazırda NATO ilə Azərbaycan arasında Fərdi Təhlükəsizlik üzrə Əməliyyat Planının ikinci fazasının həyata keçirilməsi davam edir. Bu mərhələ 2008-2010-cu illəri əhatə edir.

Vüsalə

Şərq.- 2009.- 16 iyul.- S. 2.